Days of Counting Camellia (Hiatus)

[9] Emperor wants a cage

ထိုသည်ကို ဘေးနားမှ ပရောဟိတ်အိုကြီးသည် တိတ်ဆိတ်စွာအကဲခတ်နေလေတော့သည် ။
အနှီအဖိုးကြီးသည် နဂိုတည်းက မှေးစင်းသောမျက်လုံးအိမ်တို့ရှိသူမို့ ၊ သူဘာပြောပြော ဖုံးကွယ်ထားတဲ့ဗဟေဠိများပါဝင်နေသည်လို့ တစ်ဖက်လူကို အထင်ရောက်စေသည် ။
လေပြေထဲက ပန်းချယ်ရီလေးများသကဲ့သို့ ယိမ်းနွဲ့နေတဲ့မိန်းမငယ်လေး၏စိတ်နှလုံးကို အဖိုးကြီးသည် မမြင်ယောင်ဆောင်ခဲ့ပြီး နှုတ်ဆက်ကာ လူနာဆောင်မှထွက်ခဲ့သည် ။

ဤနန်းဆောင်ကြီးသည် လူနာဆောင်ဟုအမည်တပ်နေရသော်လည်း အမှန်တကယ်မှာ အဆင့်နိမ့်ကိုယ်လုပ်တော်များကို ယာယီနေရာချလေ့ရှိသော နန်းဆောင်သာဖြစ်၏ ။
အဆင်အယင်မှာ မိန်းမပျိုလေးများ၏အကြိုက် ပြင်ဆင်ထားတာကြောင့် သေသပ်လှပပြီး ၊ နိမ့်ကျတဲ့ စစ်သုံ့ပန်းတစ်ယောက်အတွက် မသင့်လျော်လှပေ ။

ဒါကို ဘယ်သူကြည့်ကြည့် ရိပ်မိပြီဖြစ်သည် ။
Afa အပေါ်မှာထားရှိတဲ့ Xavia ဧကရာဇ်ရဲ့သဘောထားဟာ မရိုးရှင်းတော့ပေ. . . ။
နန်းတက်စတည်းက ပိတ်ထားတဲ့ မောင်းမ‌ဆောင်ဟာ နောက်ဆုံးတော့တံခါးဖွင့်မယ့်အချိန်ကာလကို ရောက်ခဲ့ပြီလော ?

နန်းတော်ထဲ စစ်နိုင်သူရှင်ဘုရင်နှင့် စစ်သုံ့ပန်းကျွန်မလေးတို့ကြားက စည်းခြားထားတဲ့အချစ်ပုံပြင်လေးတစ်ပုဒ် ပါးစပ်ရာဇဝင်တွင်နေကြောင်း Afa သည် အဘယ်သို့သိနိုင်မည်နည်း ။
သူမသည် တစ်လ‌နီးပါး မေ့မျောနေခဲ့ပြီး ရက်ပိုင်းကမှ သတိရတာဖြစ်သည် ။
မျက်လုံးဖွင့်တဲ့အခိုက် မိုးနဲ့မြေလိုကွာခြားသွားတဲ့ ပတ်ဝန်းကျင်ကို Afa အသားမကျနိုင်သေး ။
ဘေးနားကလူတွေရဲ့ Afa အပေါ် ဆက်ဆံကြပုံဟာလဲ မေးခွန်းထုတ်စရာဖြစ်နေပြီ ။
ဒါပေမယ့် ဘယ်လောက်ပဲ ပြောင်းလဲသွားပါစေ ၊ ထိုသူနဲ့ဝေးဝေးနေနေရတာမို့ Afa အဖို့ သက်တောင့်သက်သာဖြစ်စေတာကအမှန် ။

မီးတွေတောက်လောင်နေပေမယ့် ထိတွေ့မိတိုင်း အေးခဲသွားရတဲ့ မျက်ဝန်းတစ်စုံ ၊ စူးထက်တဲ့စကားလုံးတွေနဲ့ ထိခိုက်နာကျင်စေသော်လည်း မထင်မှတ်တဲ့အချိန်တွေမှာ တစိမ့်စိမ့်နွေးစေတဲ့ နှုတ်ခမ်းနီနီတွေ . . . ။
ထိုသူဟာ အဲသလောက်အန္တရာယ်ကြီးတာပဲဖြစ်သည် ။
တခါတလေ ပြတ်သားသယောင်ထင်ရပေမယ့် တခါတလေ တွေဝေနေတတ်တာက Afa ရဲ့အမြင်ပဲမှားနေသလား ။
ရေအေးစီးကြောင်းတွေနဲ့ ရေနွေးစီးကြောင်းတွေ ရောယှက်တည်ရှိနေတဲ့ ခန့်မှန်း၍မရသော မဟာသမုန္ဒရာကြီးလို လူပဲဖြစ်သည် ။