#بينا_سهاري_وذكريات
الحلقه :التانيه
بقلم :فاطمه سالم الورفلي
.....................................
............
عند نجمه :
عتيقه زفرت:قصدي واضح يا بنت سرتيه.. المهم عندي شروط اني
نجمه برفعه حاجب:واللي هم!
عتيقه :اللي هم يا بنت سرتيه... تبعدي عن غاده..ولو سحرتيها ح نقلب عليك الطاوله سامعه ولا!
نجمه زفرت:تمام به
عتيقة... قعدت تقرا على القلب سمكه... ولوحاته في الكانون... دار ريحه قوييه وريحه مش حلوه بكل... لدرجه نجمه قعدت تكح... وعتيقه غطت خشمها بيدها... والدخاخين كثرن... وعبن الدنيا.. بينما في لحظات هدي بالضبط.... كان صدام يشوف لي.. بطريقه كره.. وفي اقل من لحظه وثانيه... انتفض... وقعد يرجع.. ويدفل.. حط ايده على فمه... ومسح فمه... ورفع راسه... جي صوت بوي في ودنه..
بوي:وين كنتي؟... وين؟
اني نبي نتكلم مش قادره... يبست... يبست في مكاني.. و الصدمه مش هنا الصدمه... لما قال صدام...
صدام يشوفلي وعيونه قلوب قلوب:ياعمي..ياعمي اني وصلتها...كانت في العزي غاده والدنيا ليل فا وقفتلها.. "وحاس وكأن شي كان غام عليه وتحول... في شي قوي حاس بيه وكأنه ربي خدي بني ادم وحط بني ادم تاني... لدرجه ايده ترعش.. ويلهث ويلقط في انفاسه بصعوبة.. "
بوي تخزرط:ها! ...اا ماشي ماشي غاده "وشبحلي بتفنيص وشاد على سنونه"...خشششي ...
اني نرعش مع بعضي... ولما قال اسمي زدت رعشت.... تنهدت وفرحت لما قال خشي نحسابه بيعاركني......شبحت لي صدام... وحاسه بقلبي يقرع بالطبول مش يدق وبس... من الخوف والشوق... حاسه ان من سرعه الدق... صوته مسموع .. خطيت اول خطوات... وخشيت للحوش.. وبابا لحقني طول وماكلمنيش... خش للمربوعه بسرعه.. بدون ما يشوفلي... بس لحظه لحظه!... ليش صدام مدام تزوج غيري... ستر عليا!.... ليش دار هكي!.. شن يبي هادا بالزبط!... زعما عارف ان توا بيقرو فاتحتي!...اخخ ياربي قوي عزمي.. وشوي ولقيت امي قدامي..
امي بتفنيص :وين كنتي يا شيطانه وين!... بوك قلب الدنيا عليك
اني بلهت ريقي وارتبكت... شوي تفكرت كلام صدام ابتسمت وقلت :مشيت لي للعزي
امي مدت ايدها عليا وضربتني :وقته هو توا وقته يا مريوحه!... خشي داخل ديري فتله فيسع... مش وقتك توا حسابك بعدين
بقلم فاطمه سالم الورفلي
... قعدت نمشي... ونتحسس في مكان الضربه بيدي... على كتفي... فتحت باب الدار... اماني شهقت وقعدت تبكي... خشيت وصكرت الدار...
اماني :حي عليك حي بابا لو ما لقاكش كان ح يقتلني... كان ح يقتلني في جرتك...
اني زفرت :اماااني مش ناقصاتك... بجديات مش ناقصاتك.. لميلي دبشي.. اني مش قادره
