قرارات خاطئة 🌷

22

#قرارات_خاطئة 🌼
🔥الحلقة التانية والعشرين 22 🔥

______________

عائشة واقفة وتحس في روحها فيها لية
ايات لاحظتها تلفتتلها :خيرك عيوش
عائشة غمضت عيونها :مغص
ايات :خيرك مغص شني وانتي ف الثاني غبارة
عائشة قعمزت علي السرير تلفتولها البنات :خيرهاا
ايات: غير قوليلي شن تحسي بزبط
عائشة:غير شوية بس تو تمشي 😣
ابرار:قتلك متجيش اني من لما تم العرس وهي ظهرها
ايات:انادي علي ماما
عائشة :لا لا الناس كيف خاشين عيب برو انتو سلمو واني نرتاح هني شوية وبعدين تو ننزل
ايات:متأكدة؟
عائشة:اي اي بروو

فتحت عهد الباب وخشت :يا بنات شن اديرو هني انزلو الناس جنبهم ماما ومرت خالي بس انزلوو
ابرار:هي اهو جااين
عهد: خيرها عيوش
عائشة:فيا مغص ممكن من الطريق والسيارة تخضخض
عهد:قهوي هلبا ولا عادي
عائشة:لا مش قوي
عهد: باهي كلمي حسين يرفعك للمستشفى اطمني ماتقعديش هكي
عائشة :لا لا مش لازم نخلعهم مافيا شي انزلو انتو خلاص اني نرتاح شوية وانجي
عهد:باهي خلاص هي انزلو انتو
وصكرو عليها الضي وطلعو

عهد كانت لابسة قفطان اسود ماشي مع جسمها وكمامه دانتيل منقط ومنفوخات وهي شعرها كاري قاسماته بنص الفوقي شاداته واللوطي مفتوح

قعدت واقفة ف الكوجينة توتي ف الصفر سلمو وعد وايات وجو معاها يوتو ف الصفر شوية وجت عائدة مرت باسط بروحها

جي فهد من روشن الكوجينة يطقطق
ايات فتحاته:نعم
فهد :هاتي امية للرجالة بسرعة
ايات:باهي تعالى من الباب
وتلفتت :اسلاام افتحي الباب هدا

فتحت اسلام الباب
فهد واقف قدام الباب ومولع سبسي
جت ايات عطاته المالقي فهد عكرش السبسي :هاك لوحيه ف الكناسة مافيش وين انديره هني
ايات خدت السبسي وعطاته الصفرة وخشت
عهد:مشي
ايات:اي
عهد:كان جي تاني قوليله يتبت كم عدد الرجالة باش نعرف شن انحط
ايات فتحت الكناسة لوحت السبسي :بااه
وعد:كنتي تسفي فيه برا معقولة هكي مأثر فيك غياب مقدام
ايات:يا حيوانة عطاهولي فهد مايبيش يلوحه لوطة
عهد تلفتت:فهد كان يدخن ؟
ايات:اي علاش ماكانش من قبل ولا شني
عهد :تي مرييض يا حليلي خيره هكي الزفت بيمرضني اني فجرته
وعد:خيره شن فيه ؟
عهد :عنده رضة ع الرية من الحادث وممنوع الدخان مع الدوا اللي ياخد فيه
وعد:وخيره هوا معقولة مايقدرش يصبر
خشت امال :تي وين العصير خيركم بطيئات الحشمة

عهد :هيااا هييي
طلعت امال قعمزت جنب الناس وعهد طلعت الصفرة متع العصير ووراها ايات بشكلاطة

مرت عم صدام خدت العصير :مشاء الله هدي بنتك اللي اطلقت يا امال
امال :احم اي هي عهد
عهد ماعجبتهاش الكلمة وقعدت تكلم ف التفريق
مرت عم صدام: قتلك عندي جارتي ولدها يدوروله مرته متوفية وعنده ولد عمره خمسة سنين بالك ياخدوها
امال:لا وعلاش تاخد في واحد متزوج بنتي قااعدة بنت بنووت وماناقصها شي
مرت عمه:معقولة مطلقة وقاعدة بنت بنوت من بيصدقها الناس ماترحمش يا امال علي الاقل زوجيها وسكتي الناس
عهد خنقتها العبرة حطت الصفرة وطلعت
ام صدام:خلاص صكري الموضوع يا نويرة الناس ماتبيش تعطي
ابرار تعفلقت وناضت طلعت
سميرة:والله حني بنتنا واثقين فيها وقالت كلمة معناها صح بعدين اللي كان متزوجها امسافر ليه سنين واماليه مايندروش عليه داايح وين وصلت فيه مسكينة طلع مش مسلم مرة وحدة ويتزوج ف الولاد
ام صدام:هيييي غبارة اعوذ بالله وكيف امه اتجي تخطبله ومش عارفة ولدها شني
سميرة:هدا اللي صار والله مسكينة شافت الويل غادي ماصلت فينا هني لين ربي خدي فيها وعطي
امال ترحي وتبي اتنوض تريش المرا تريش لاكن صابرة ومقعمزة
مرت عمه :اني قلت اندير خير وانقوللكم لان حتى وكانها بنت الناس بتمسع بيها مطلقة مش حتصدق
امال:خلاص لو سمحتي غيرو الموضوع اني نضايق منه