قرارات خاطئة 🌷

20

#قرارات_خاطئة🌼
الحلقة العشرين 20

👑H e m o t k 👑

_________________

عبد العزيز:السلام عليكم
فهد :وعليكم السلام
الولاد اللي مع عبد العزيز الزوز سحبو المسدسات
مقدام:هي هي هي شني هدا مداهمة هيااا 😠
عبد العزيز:من غير عياط ومشاكل جاي نبي ناخد بناتي وبنمشي
فهد ضحك:شن تسحابها وكالة من غير بواب ولا شني هي لم اللي معاك وروح مانبيش نغلط فيك راك راجل كبير
علي تلفت طول دار اتصالاته
الولد اللي مع عبد العزيز:هي هي نزل تليفونك لوطة انت انكلللم فيك 😠
علي يشبحله ومكمل يدوي وينعت فيهم
الولد قدم وموجه المسدس على علي :نزل التليفون قلت
فهد دفه:وخررر التاالي متخليهاااش تكبر 😠

البنات فاتحين الكوفينو متع سيارت وعد وينزلو ف البضاعة

ايات:كأنه صوت نقاش برا ولا
عهد حطت الشكاير فم الباب وطلعت تاني :معش في شكاير
وعد:صوت دوشة برا ولاا
عهد شبحت للباب وقرب منه حطت ودنها تسمع
بشرى:حي حي في عركة براا
ايات :زعمة مني ياا غبارة😥
ابرار:حولو تراا افتحي الباب يا عهد
عهد:لا مستحيل تبي فهد يقتلني
وفجأة وهما يتكلمو سمعو رصاصة عيطوو
وعد شدت في عهد:وخريي من ع الباب 😨
عهد خلاص بتموت وتبي تفتح الباب لاكن خايفة من فهد

طلعت امال وسميرة:شن الصوت هدا مني في برا
ابرار:في فهد ومعاها مقدام وواحد تاني
وطلعو خوات سميرة وبناتهم

طبعا الولد اللي شد المسدس علي علي ضرب رصاصة فوق علي اساس بيخوفهم

عبد العزيز:اني مش جااي لدم جاي نبي بناتي وبنروح
فهد:مافيش حاجة اسمها بناتتك لم الكنااسة اللي معاك واطلع روح 😠
جي باسط درس سياارته ونزل :شن في شن هدا يا عبد العزيز وصلت هكي هيا
عبد العزيز:من حقي ناخد بناتي زي اي بو يبي صغاره ومعش بنخليهم هني جيبولي حد عليه القيمة نتفاهم معااه مش الصيااع هادو
فهد قدم منه : صياااع؟
الولد التاني اللي مع عبد العزيز جي وقف قدام فهد:وخر التالي
فهد شبح لوطة وضاغط علي سنونه بلقوة ويقيم راسه نطح الولد طيحه لوطة
وعلي ضرب اللي قدامه بوكس وخشت بعضها بينااتهم

باسط يحز هني وهني وجو الجيران خشو فيها يحزو فيهم علي بعض

امال :حولي انتي ويااها من هني وفتحت الباب وطلعت
امال:عبد العزيز هواا انت 😠 شن جااي تبي ااه
فهد تلفت:خشيي دااخل
امال :لا مانييش خاشة شن جااي يبي استغل الفرصة خلا مصطفى مشي وجااي والله ماك راجل ولا محسوب عليهم
عبد العزيز :نبي بناتي من حقي ناخدهم وانشوفهم
امال:انت كل ماتجي تاخد في نفس الجواب قتلك ماا عندكش بنات هادو بناتي اني اني اللي ربيت وكبرت وتعبت
فهد جبد امال دخالها :خشي ياا عمتي ماااديريش العار الجيران يتفرجوو تربحي 😠
امال :بناتي اني هادو والله ماهو واخدهم
فهد:تي من بيخليه ياخدهم مني خشيي دااخل بس
عهد واقفة جنب الباب ولمحت بوها واقف مشي بيها خيالها لي زمان وهي صغيرة كانت توقف تراجي في بوها قدام الباب لما تعرف انه جاي واول مايخش يقيمها فوق وهوا يحضن فيها ويبوس ويجيبلها ف الهداية ويرقد فيها تحته 💔
عهد حطت ايدها علي فمها وهي تبكي
امال شبحتلها:معش تبكي مايقدر حد ياخدكم مني لين ياخد روحي قبل ماريبتكمش وكبرت باش يجي هوا ياخدكم بلبارد
وعد: باهي ماما معش تحرقي دمك تو نصيرلك حاجة خلااص ماحدش بياخدنا منك
فهد مايبيش يشبح لي عهد :خشو مانبي حد جنب الباب متطلعونيش علي طوري 😠و طلع وقربع الباب عليهم ولقاهم زي ماخلاهم
علي : جاي تتقااوا عليناا يااريتك حتى تكلمت كلاام تسحااابها ساايبة😠
مقدام:خلاااص يا علي اسسكتت وخررررر غادي 😠
عبد العزيز :مش مرووح الا وبناتي معااي وبعدين مني انتو باش تدخلو ف الموضوع هدا موضوع عائلي ماحدش دخله
فهد:باهي كويس بكل معناهاا كلامك معاي اني وعمي باسط
عبد العزيز :علاش مني حضرتك انشاء الله
باسط:هدا ولد مصطفى
فهد:اشبحلي اني الحوش هدا ماعندك فيه شي وبناتك تبي اتشوفهم اتجي زي الناس المحترمة مش جاي هكي اديرلنا ف العار قدام الناس
علي:لااا غاالط المووضوع كاان عائلي لاكن بلي درته بدي يخصنا تبي ولا ماتبيش
عبد العزيز: حول غاادي وشبح لي فهد اسمعني كوويسس اني طول عمري محروم منهم واليوم مش حنسكت عليهم
علي شرين تليفونه صكره واشر بي ايده فوق