_________________
عائشة كانت مقعمزة وتبكي كلعادة زي كل يوم ومصكرة الدار
بلقاسم طقطق علي الباب :عاائشة يابنتي افتحي الباب
عائشة:خليني يا خالي نبي نقعد بروحي
بلقاسم:نوضي يا بنتي اطلعي وشمي هوا ربي وكولي زي الناس انتي مرا مريضة
عائشة:معش نبي شي اني نبي انموت ونرتاح بس خليني كله منكم انتو تعاديتو اني خسرت ولدي ياا خالي فهد اللي كان يقود فيا هنت عليه وليه اسبوع ماقالش حتى وينك فهد اللي مايرقدش كان اني مش واكلة
بلقاسم: لا حول الله حرام عليك اللي اديري فيه في روحك نوضي علي خاطر ولدك اهو طلع من المستشفى اليوم وحاله كويس
عائشة ناضت بسرعة فتحت الباب: طلع وين مشي عند مني بيقعد
بلقاسم حط راسه لوطة:مشي مع بوه اشبح يقعد غادي ولا يروح
عائشة :ارفني ليهم ياا خالي توا بالله عليك نبي نشبحهه
بلقاسم:ماعندي ماندير غادي قعمزي
عائشة والله كان مرفعتني لما نمشي برووحي ياسر ان ولدي بسبك انت بعيد علياا
بلقاسم قعد يشبحلها وساكت
___________
وصلو اللي عازمهم مصطفى لي حوشه فتح الباب الكبير وخششهم
وطبعا بشرى وشدى ف الروشن
شدى: غزااال نهار مغبر
ابرار:ياسر انتي وياها درتو العار
بشرى :غير جي خوك بس كان هدا نلقاك قبلي
عهد مقعمزة في وسط الحوش تسمع فيهم وتبي تنوض تشوفه لاكن شادة روحها
خشو الرجالة داخل قعمزو وفهد جابوله كرسي قعمز عليه شوية وخش ركان وبعده بشوية باسط
في اللي كان فاهم وعارف القصة وفي اللي كان مقعمز ومش فاهم شي ومغصوص مش قادر يسأل
___________
طقطق باب الجنان ناض باسط وقف وطلع فتح
.عائشة:السلام عليكم
باسط حط راسه لوطة :تفضلوو
عائشة:كيف حالك يا باسط اني عائشة
باسط قام راسه:عائشة 😳 اهلين كيف حالك شن اخبارك
عائشة :الحمد الله كيف حالك انت
باسط: الحمد الله خشي خشي تفضلي
عائشة خشت وطقطقت علي باب الحوش
وباسط:خش وقعد ساكت يبي يقول لي نصطفى ومش عارف كيف
فهد كان مقعمز يهدرز ومخلي روحه عادي لاكن كان مضايق هلبا وقلبه واجعه علي اللي ايدير فيه في امه
_______
فتحت ايات الباب
ايات انصدمت :اهلين تفضلي 😐
عائشة: زاد فضلك ناديلي عهد بنيتي
ايات :ح حاضر وخرت وخلت الباب نفتوح
ايات:عهد عهد
عهد مقعمزة تهدرز هي واحلام :ايواا
ايات :ااه ا ام فهد برا تبيك
عهد:خالتي عيشة وينهاا وناضت تجري لقتها فم الباب
عهد:خشي تفضلي
عائشة خشت وجت طول حضنت عهد وبدو يبكو هما الزوز
وكلهم واقفين يشبحولهم
شوية وخشو قعمزو في وسط الحوش مع العيلة
عائشة:سامحوني خشيت عليكم فجأءة
امال :عيب يا عائشة من العيلة انتي
سميرة شبحت لي امال وسكتت
ابرار شادة لسانها بسيف
عائشة: ملقيتش حل تاني باش انشوف فهد قلبي يغلي عليه نبي نطمن عليه وهوا رافض يشوفني
عهد: اني هادي اللي حارقتني كيف يقدر يدير هكي تي فهد كان مايشوف في حد الا انتي تغير هلباا
عائشة: طول عمري كان الموضوع هدا كابوس حياتي وانراجي فيه امتى يتم وماكنتش نسحاب نهاايته هكي
عهد:مستحيل اتكون نهايته هكي فهد مايقدرش يقعد بعيد عليك هكي صدقيني حيولي ويعرف انه غالط في حقك
عائشة: باهي نبي انشوفه قوليلي كيف
عهد :نوضي معاي نطلعو من الباب التاني ونبعت اسلام تنادي عليه
عائشة :زعمة يجي
عهد:يجي يجي نوضي معاي
أنت تقرأ
قرارات خاطئة 🌷
General Fiction《الرواية بلهجة الليبية 🇱🇾》 اتزوجته باش نهرب من روتين حياتي الممل مافكرتش في شي غير الطمع ان بنسافر وبنعيش حياة جديدة ماكنتش نعرف ان هكي بيصير فيا ...💔 _______
