ثلاث دمعات

بارت 1

انة أمنية عمري ١٢سنة
خواتي دارين وطفوف تؤام بس ما يشابهن!!
احنا عالم فقرة ع گد حالنا ونشتغل عند بيت الشيخ
أبوي فلاح بگاعهم واني وخواتي ننظف دواوينهم
وبيوتهم

طبعاً حتى بيتنا من الشيخ
هو منطي البابا صغير وع گدنا
يگولون عندي أم بس.. ما شايفتها
أبوي من تزوج أمي جان ينتظر منها الولد
حبلت أمي وجابتني.. يگولن عماتي
بوكت الاجيت للدنيا جن القيامة قامت
امي تتباجة وأبوي، يسب ويشتم
وهاد الدنيا.. وبانيها ع راس امي
شلون تجيبلة بنية؟
الاثنين ما رايديني جانو يردون وليد

تبطرو وما رضو برزق الله
وليتنا ما جينا الهالدنيا ولا عشناها
وعشنا ضيمها المرمرنا

شهرين و حبلت امي مرة ثانية
ومن جابت.. جابتلي احلة أختين
أمي متخبلة وصايرة تدگ وتلطم ع راسها
وأبوي يصيح غضب ونزلن ع راسي
وماراضي ع جيتنا للدنيا...
الاثنين جانو ما رايدينا
وجانو يتمنون الوليد

بعدها حبلانة أمي وبحملها هذا
رايحة للدكتورة... وگايلتلها بيچ وليد
وأمي وأبوي فرحتهم ما تنوصف
بس يا فرحة ما دامت!!
مارة الايام وصار طلوگ أمي قوي
كلش قوي.. عاد مامتحمل رحمها ومنفجر
والوليد ميت!!!!

أبوي من داري بالصاير.. الزم ع امي طلگها
واخذها واشمرها ع أهلها، وطبعاً أحنا وياها
أسبوع وذبتنا أمي ع أبوي.. وأتزوجت
رجال مطلق وعنده... جهال وعاشت حياتها

آما احنة فمنا وبدت رحلت معاناتنة
أبوي ما يأس وبعده يريد ولد يشيل أسمة
مثل ماهو يگول..
بسبب حالته الفقيرة باقي ٣ سنوات يلا گادر
يتزوج بعد طلاقة من أمي
وتزوج مديحة بوقتها كان عمري ٤ سنوات
وخواتي ٣ سنوات

ما أتذكر شلون كبرنا وشلون عشنا حسب الاعرفة
جان بيبي هي ربتنا من أطفال ومن توفت تزوج بابا
مرت الايام وكبرت صار عمري ست سنوات وجبيرة وأفتهم

أتذكر اشياء طفيفة دائما جنا ننحبس
ونبچي وننضرب... يعني طفولة
مشتتة معاناة وما اتذكر بضبط بس
الإعرفة اني وخواتي جانو هاملينا فدنوب
وننضري ونتعاقب بلا اسباب

بالرغم عمري الصغير.. وفارق السنين
القليل بيني وبين خواتي.. الا إني جنت
اعتبر نفسي مسؤولة عنهن .. ام ألهن مو إخت
احرم روحي وأوفرلهن
احرگ روحي وأضويلهن..

بوقتها جنت أشوف البنات يسجلن للمدرسة
وفرحانات وگعت دخيل دم لابوي تواسيل وبجي
ويلا وافق.. يسجلني
شكبرها فرحتي بوكتها ما تنوصف..

عشت طفولتي محرومة من كلشي.. أشوف البنات
شيملكن من ألعاب وملابس وانه ما أملك غير دمية صغيرة وصدرية مشگگة متصدقين بيها عليه العالم
جان اكو حانوت صغير بالمدرسة يبيعون نساتل..
ولفات.. أشوف البنات ياكلن أصفن اباوع ع حلگهن
واتمنى أكل مثلهن..