الـحلقـة الـعـاشرة
تميم:: ولع سيارته ومشا خفتي تنفضحي
مريم:: علي اساس مصاحبتك لعند ننفضح
تميم:: باهي نسأل سؤال
مريم:: شنو
تميم:: لو جيت لمراد خوكي وقتلا نبي انسابكم ونخطب اختك مريم توافقي
مريم:: قلبها قعد يدق ولسانها ارتبط وخافت ومعش عرفت شن ترد
تميم:: ردي علياااا تواافقي ولالا
مريم:: خذت نفس وبلعت ريقها اكيد لا
تميم:: اووك تماام بكل الي نبيه عرفته تصبحي علي خير ومعش حتشوفي وجي
مريم:: استني شويه
تميم :: خلاص مافيش داعي قلنا سلام
وسكر الخط ف وجها ومريم نزلت دمعتها علي قد ماتريحت لتميم بس مقدرتش تقوله موافقه لان معرفتها بيه كلها كلها شهر ومتقدرش تاخذ قرار بالصعوبة هدي كانت محتاجة تعرفه اكثر بس كان ف سي داخلها يخليها محتاجه تميم. وتبيه قريب منها كانن عندها مشاعر مش مفهومة تجاهه وحست روحها خسارته ودمعتها نزلت وقعدت تمسح ف دموعها ماتبيش تبكي بس كانن صوت شهقاتها الي تحاول ادسهن كفيلات بأني نحس باللي حاسته وكيف هياا قاعده اتعذب ونضت من سريري وكانت مقمعزة علي سريرها وعاطيتني بظهرها وتبحت م الروشن وقمعزت جنبها وحطيت يدي علي كتفها وهي برمت علياا دغري وحصتني وقعدت تبكي وكأنها كانت تستني ف حد يجي يواسيها عشان تبكي ف حضنه
نا:: قعدت نمسح علي شعرها كنك شن في شنو الي بكاكي
مريم:: وخرت وقعدت تبكي وتحكي خسرته خلاص بغبائي معش حيبحت ف وجي بس والله مابيدي مقدرتش ناخذ قراز مكنش قصدي نجرحه بس مقدرتش
نا:: فهميني علي من تحكي
مريم:: تمييم
نا:: كنه شن دارلك
مريم:: امبدري رن علياا و..........
حكتلي كل حاجة
نا:: باهي خلاص بلا بكاء
مريم:: لو انتي مكاني شن كنتي حديري
نا:: كنت حندير نفسك لان فترة معرفتك بيه قصيرة ومتقدرش تقرري تكملي حياتك معاه والي صارلك انك تعودتي عليه بس انك حبيتيه ف شهر مستحيل
مريم:: تمسح ف دموعها وهناا ينزلن وتمسح وينزلن بس انا متريحتله ونفرح بعد نحكي معاه شعور اول مره نحسه وبعد نسمع صوته قلبي يقعد بيطلع من مكانه
نا:: ان شاء الله تحبيه ويكون نصيبك
مريم:: شن اندير باهي
نا:: ماديري شي خليه لعند يهدا وكان مازال متمسك بيك حيرد يكلمك
مريم:: وكان مكلمش
نا:: معناها انسيه
مريم:: اوف.
وخشت تحت الورغان وقعدت تبكي لعند نعست ونا خشيت لسريري ورقدت اما تميم ف عصب من جواب مرييم وقعد يبرم بالسيارة ف الشوارع ومخاطرش يروح للحوش وبرم برم ومع الساعة 3 ف الليل روح للحوش وخش وخطم من قدام دار اشرب وكان مازال واعي ويقرا وخش لداره وعزق روحه ع السرير ودغري جاه اشرف وخش عليه
اشرف:: وينك يابهيم من امبدري خراك مقفل
تميم:: يمرس ف راسه وساكت
اشرف:: نحكي معاك ازف
تميم:: خطاااني يااشرف راهو مش ناقصني حتي انت
اشرف:: سكر باب الدار وقمعز ع الكرسي كنك شن صاير
تميم:: مافي شي باتي قاعد بروحه قصدك
اشرف:: لا قاعد معاه سند وبكرا الصبح بيديروله خروج
تميم:: باهي تمام
اشرف:: يلا احكي كنك راقيلك تعاركت معاها
تميم:: خلاص معش في مريم
اشرف:: بسم الله شن صارلك امبدري متمسك بيها توا خلاص
تميم:: تي امبدري كنت واضح معاها لابعد حد قلتلها نخطبك توافقي قالت اكيد لا شن تبيني اندير اه نحب علي يدها علي توافق علياا وتحبني
اشرف:: اكيده بتقول لا هبل انت تي البنت دوبها عرفاتك ومازالت برضوا متعرفكش مش كان انت من سنين تعرفه وتلحق فيهاا وعارف تفاصيل حياتها م الالف للياء معناها مفروض توافق عليك معرفتها بيك كلها شهر من الطبيعي بترفض والله الا هبل بااهي وانا الي كنت نقول عاقل
تميم:: تي نحبها يابهيم افهههم
اشرف:: تحبها اوك ماقلنا شي لكن عطيها فرصة اتقبلك تحبك بروحها مش تضغط عليها وكأنك تبيها بالغصب
تميم:: مشعارف هضاا الي طلع معاياا
اشرف:: تبي الحب بالقوة انت كل حاجة بالقوه الا الحب يجي من ربي
تميم:: اصلاً خلاص قلتلها انسيني وانسي انك تعرفيني
اشرف:: حي ع الحمار حي رن عليها ياغبي وقوللها كنت معصب بس كنك هبل بعد قريب توصللها تمشي تضيعها
تميم:: لا مانيش ران خليها لو هياا جد حنفقدني وانا نعنيله ف حدورني بروحها
اشرف:: وكان مدورتكش
تميم:: معناها م الاساس ماتقبلتنيش ولا نعنيلها
اشرف:: ربي يهديك وخلاص
تميم:: خلاص اطلع وسكر الباب بنرقد
اشرف:: ارقد ارقد
أنت تقرأ
#نقطة_أمل رواية شرقاوية بقلم الكاتبة #Bent_benghaziكاتبة رواية#لعبة_القدر
Romanceرواية ليبية شرقاوية مميزة بقلم الكاتبة Bent_benghazi
