متلازمة عائلتي (رواية ليبية)

الحلقة 16

يوقف و ويمشي و يخلي هيثم مقعمز وخلاص

هيثم : اخ منك يا وليد .. ان شاء الله غر ما تكونش مورط روحك في مشكلة

................

........

تطلع وصال من الحمام و هي تجفف في شعرها
تدخل غرفة النوم و تشوف نديم طايح لوطا و يكح بقوة ونفسه ضايق و مش قادر يتحرك و تنصدم

وصال : نديم ... نديم .. خيرك ؟

و تتذكر ان معاه الربو .. و يأشرلها نديم بإيدها على بخاخ الأكسجين

وصال : البخاخ ؟ البخاخ وين هو ؟ غر تعالى اطلع اوقف ع الروشن خود نفس

تساند وصال نديم لعند الروشن و يمد نديم راسه و يتنفس

وصال : البخاخ متعك وين ؟ نديم .. قولي وين ؟
نديم (هو و يكح) : في .... في .... غرفتي

تاخد وصال عبايتها و وشاحها وتنزل

.........

......

علي كمال يقعد مصدوم من كلام نسرين .. وحس انه رجع لنقطة البداية وموضوع خديجة وتفريقها بينه و بين اولادها

سلمى : الباص متعي وصل ..

تمشي سلمى للجامعة و تخليهم

خديجة : انتي ما تدخليش بيني و بين اولادي خليك بعيدة
نسرين : الموضوع يعنيني هلبا .. تبي تزوجي علاء في سِبّتْ ما جبتش صغار قاعدة .. حابة نقولك كيف صكرت سنتين مع ولدك .. ناس تقعد 15 سنة من دون صغار وبعدين يجيبوا عادي .. انا عارفة اصلا موضوعك مش في الصغار موضوعك شي تاني .. اشبح يا فيا انا يا في علي كمال
خديجة : معش تجبدي علي في الموضوع .. تبي تحرضيه عليا باش علاء ما يتزوجش عليك
نسرين : ههههههه ضحكتيني .. حتى في الحلم علاء ما يتزوجش عليا .. راجلي و عارفاته .. حلي موضوعك مع علي كمال اللي تبي تاخدي الجناح متعه و كالعادة مش معتبراته بكل .. تهنيتي على ولادك صح ولا خيرك ما تفكريش تزوجيه؟
خديجة : عليوه وليدي ما تسمعلهاش.......

يرفع علي كمال ايده بمعنى اسكتي

علي كمال : خلاص وصلت لهنا راهو .. الموضوع واضح و صريح .. عمرها معاملتك ليا حتتغير انا تقبلت الوضع هذا خلاص

ويتلفت بيطلع

و تجي وصال تجري نازلة من الدرج وتتلاقى مع علي كمال

وصال(بصوت خايف) : علي كمال ..
علي كمال : شن في .. خيرك ؟
وصال : بخاخ نديم وين ؟

علي كمال طول يدخل لغرفة علي كمال و ياخد البخاخ من الدرج
و يرجع يركب لنديم و تلحقه وصال وخديجة

....

خديجة : خيره .. شن في ؟
وصال : ولعت بخور و حطيته في الغرفه وهو راقد نسيت عنده الربو