متلازمة عائلتي (رواية ليبية)

الحلقة 16

يدخلوا عليه في غرفة النوم .. يلقوه واقف ع الروشن داهش لكن حالته احسن .. يعطيه علي كمال البخاخ و يبخ منه

علي كمال : أحسن ؟
نديم : أحسن أحسن
وصال : نسيت عندك الربو والله .. اسفة
خديجة : يعطيك السلامة وخلاص يا وصال .. ردي بالك مرة تانية

تاخد خديجة البخارة و تطلعها البرا

علي كمال : تبي حاجة كلمني .. بنمشي الشركة
نديم : تمام

يتحشم علي كمال انه في غرفة النوم ويطلع بسرعة

خديجة : وانت يا نديم .. كيف تنسى بخاخك في غرفتك ؟
نديم : اللي صار صار توا يا أمي
خديجة : باهي باهي .. ردوا بالكم مرة تانية

و تطلع خديجة و تنزل

وصال (بتوتر) : نديم .. اسفة .. والله اسفة نسيت راح من بالي عندك ربو
نديم : خلاص ما صار شي .. معش تتأسفي

يشوف نديم للخوف على وجه وصال والتوتر و حب يطمنها بطريقته

نديم : توا بري جهزي الفطور .. ما بين ما دخلت الحمام و نظمت أموري
وصال : الفطور جاهز .. نظم امورك .. تلقاه في الصالون
نديم : تمام

.......

.........

ينزل علي كمال يلقى نسرين واقفة على باب المطبخ يتجاهلها و ياخد مفتاح سيارته ويمشي الشركة و تدخل نسرين المطبخ

شوية وتدخل عليها خديجة

خديجة : لوين تبي توصل انتي ؟
نسرين : انتي لوين تبي توصلي ؟ تبي تخربيلي بيتي .. علاش ؟
خديجة : انا ندور في مصلحة أولادي ..
نسرين : أولادك مش صغار يعرفوا مصلحتهم بروحهم .. وقفي انك تاخدي قرارات عليهم و تدخلي فيهم .. مش ياسر اللي درتيه في نديم وعلي كمال ؟ لما خطبتي وصال لنديم .. في وقت وصال كانت تبي علي كمال ...
خديجة : أص .. أص .. أسكتي شن تقولي انتي ؟ اسكتي تو يسمع نديم
نسرين : ايييوه .. ما تبيش نديم يسمع توا عاد .. يا ويلك لو نديم يسمع يا عمتي .. شن رح تكون ردة فعله وشن حيدير فيك
خديجة : أوعك يا نسرين .. أوعك ..
نسرين : انتي ماكش عارفة حتى شن درتي في البنت ؟ والله وصال مسكينة حتى هي .. زوجتوها خو اللي تحبه
خديجة : صكري فمك قلتلك ومعش تعاودي الدوه هادي .. مهناش منها الدوه اللي تقولي فيها وصال لا تبي علي كمال ولا غيره .. سألتها أكثر من مرة
نسرين : صح مرات ما تكونش حاباته لكن كانت معجبة بيه والشي هذا ما تقدريش تنكريه .. ماكش ملاحظة انك لعبتي في حياة نديم و وصال ؟

تتعصب خديجة من نسرين و تطلع وتسيبها

نسرين : ايه يا خديجة .. مع تلعبي انتي ؟ كلمة مني لنديم بس .. اشبح شن يدير فيك

.....

.........

ندى : ماما .. نجيبلك دواك ؟
نجاة : لا لا خديتهم من بكري .. ادخلي افطري
ندى : باهي بوي و معاد وين ؟
نجاة : بوك في العمل .. و معاد البرا مع صغار الجيران يلعب
ندى : اها باهي
نجاة : غدوة اخر امتحان ؟
ندى : ايه ان شاء الله .. ادعيلي اهو بنتخرج
نجاة : ندعيلك في كل صلاة يا بنتي ..
ندى : صحيتي يا أحلى أم ..