Days of Counting Camellia (Hiatus)

[4] Dominant Sadist

" အဲဒါ တလောက အရှင် ဖမ်းခေါ်လာတဲ့ သုံ့ပန်းမဟုတ်ဘူးလား ? ဘာကြောင့် တော်ဝင်ညီလာခံကို ကြားမြင်ခွင့်ပြုထားတာလဲ ? "

" ရှူး ! တိုးတိုးပြောပါဗျာ အရှင်ကခွင့်ပြုထားတာမို့ အသက်မပျောက်ချင်ရင် ဝင်မပါတာကောင်းတယ် "

" မသင့်လျော်လိုက်တာ "

ဤစကားချပ်များသည် ပါးနပ်သော မှူးမတ်အရာခံကြီးတချို့ဆီကလာသည် ။
ထိုသူတို့၏ ခါးသီးသောအကြည့်များကို လက်ခံရတဲ့ Afa သည် Xavia ညီလာခံအား မျက်‌မှောက်မြင်ခွင့်ရသော ပထမဦးဆုံး ကျွန်တစ်ယောက်ဖြစ်လိမ့်မည်။
မဟုတ်သေး ။
တစ်လောကလုံးမှာတောင် ပထမဆုံးဖြစ်နေနိုင်သည် ။
စစ်သုံ့ပန်းတစ်ယောက်က နိုင်ငံတစ်နိုင်ငံ၏ ညီလာခံအစည်းအ‌ဝေးကိုကြားနာခွင့်ရသည်ဆိုတာဟာ သမိုင်းဝင်မည့်အချက်ပင်ဖြစ်သည် ။
သေချာပေါက် ဂုဏ်ယူစရာကိစ္စတော့မဟုတ် ။
ပြီးတော့ ဒီအခြေအနေက Afa. ထံ မလိုအပ်သောအာရုံစိုက်မှုများကို ဆွဲဆောင်သည် ။
ဒါမှမဟုတ် ဤသို့ဖြစ်အောင်ပဲ တမင်ကြံထားသည်လားမပြောတတ် ။
ဒါလဲ မဖြစ်နိုင် ။

Afa သည် သာမန်သုံ့ပန်းတောင်မဟုတ် ။
ရန်သူ Raven ပြည်၏ ဧကရီတစ်ပါးဖြစ်သည် ။
ဤလုပ်ရပ်က Xavia ဘုရင်အတွက်လဲ အကျိုးရှိစေမည်မဟုတ် ။
ဘယ်လိုတွေးတွေး Xavia ဧကရာဇ်၏ရည်ရွယ်ချက်ကို Afa နားမလည်နိုင်ပေ ။

မည်သို့ပင်ဖြစ်စေကာမူ Afa ၏ အပြစ်ဒဏ်သည်ကား ရှင်ဘုရင်ကြားအောင် ဖယောင်းပန်းနီများကိုအသံထွက်ရေတွက်ရခြင်းပင်ဖြစ်သည် ။

" ၁၂၀၅ , ၁၂၀၆ , ၁၂၀၇ . . . . . "

ထိုသူစိတ်ကျေနပ်ရအောင် နာကျင်နေသောလည်ချောင်းတွေကို တွန်းအားပေးကာ အသံထွက်ရွတ်ရသည် ။
Xavia ၏ ကြမ်းတမ်းသောဆောင်းက သနားစရာကျွန်မလေးကို မျက်နှာသာမပေး ။
အချိန်ကြာလာသည်နှင့်အမျှ အေးစက်ကိုက်ခဲလို့လာတော့သည် ။
ဂါဝန်နဲ့မဖုံးနိုင်တဲ့ ခြေဖြား ၊ လက်ဖြားတွေသည် ပြာနှမ်းလို့နေပြီ ။
လည်ချောင်းကဓားဒဏ်ရာသည်လဲ အအေးဒဏ်ကိုအံတု ၊ အားပြုကာ ရက်စက်လှပါသောရှင်ဘုရင်ကြားလေအောင် အသံကို ညှစ်ထုတ်ရပါ၍ ပြန်လည်ကောင်းမွန်လာဖို့လမ်းမမြင်တော့ ။