طفولة مغتصبة (كاملة)

لست بمجنونة ..

♣️طفولة مغتصبة♣️
‎ما ذنبي ؟!... 💔
‎الجزء : 22
              °•°•°•°•°•°•°•°•°•°•°•°•°
‎دازو لأيام و حتى حاجة ما تبدلات من غير صفاء لي  ولات حالتها مأزمة بزااف من بعد لي وقع ليها و حتى موت باباها كمل عليها ولات كتنوض فليل و تبدا تبكي و تغوت على إثر الكوابيس لي كيراودوها... و خديجة حتى هي مبقاتش كتهدر غير ݣالسة و مهمومة و كتبكي و كتلوم نفسها مية مرة فنهار و هادشي بعدما عرفات حقيقة حفيظ لكاملة هاد الأخير لي كان باقي هربان ...أما يوسف بين نارين ما بين ختو لي حالتها كتزيد تأزم نهار على نهار و مو لي تبدلات عليه ولات قليل فين كتهدر و ولات غير مهمومة.... أما نسرين فهي لي كانت دائما مسانداه و واقفة فجنبو و كتواسيه ......
.......
‎كانو ݣالسين مجموعين كيتغداو من غير صفاء
‎يوسف : فيناهي صفاء
‎نسرين : مشيت لعندها قتلها يلاه تغداي و مابغاتش ...قاتليا بغات تنعس و خليتها على خاطرها (مع كملات كلامها و هي تنوض خديجة)
‎يوسف : فين غادا مكليتي والو ...؟
‎خديجة : غنمشي غير نطل على صفاء
‎نسرين : غتكون نعسات أخالتي
‎خديجة : لا غير خليني نمشي نشوفها
‎يوسف : (تنهد) واخا ....(مشات خديجة لبيت صفاء لقاتها فايقة و ساهية)
‎خديجة : صفاء ...(مشات ݣلسات حداها و بدات كدوز يديها على شعر صفاء بحنية) صفااء ..بنتي لحبيبة .... واش مبقيتش باغا تهدري مع ماماك ...(سكتات شحال عاد نطقات و هي كتبكي) هئ هئ عارفة أ بنتي حنا سباب هئ هئ ...كون تيقناك من لول كان كلشي غيكون مقاد و مكانش غايوقع هادشي كامل هئ هئ سمحيليا أ بنتي ..راني مبقيتش قادرة نشوفك هاكا ..هئ هئ هضري معايا جاوبيني ..واش حتال هاد درجة مقلقة مني هئ هئ (بقات كتهدر معاها و هي غير كتشوف فسقف ..حتال واحد اللحظة دورات وجهها لعندها و هضرات ببرود )
‎صفاء : ماماا ...
‎خديجة : (بفرحة) نعام أ حبيبت ماماها
‎صفاء : كون تزاديت ولد ݣاعما كان غادي يوقع هاكا ... مكانش خاصني نتولد بنت
‎خديجة : أش هادشي كتقولي أ بنتي ...نتي راك صفاء بنتي ..و الله خلقك بنت و نتي خاصك ترضاي بهادشي
‎صفاء : أنا منحوسة أ ماما كون ݣاعما تزاديت ݣاعما كان غادي يموت بابا كان غادي يكون باقي عايش .. أنا سباب أ ماما نتوما ما درتو ليا والو ...
‎خديجة : لا أ بنتي شكون قالك نتي منحوسة ...نتي هي نوارة ديال هاد الدار نتي و خوك يوسف هوما عويناتي لي كنشوف بيهم ...و باباك أ صفاء الله بغاه و حنا معلينا غير ندعيو معاه بالرحمة ...
‎صفاء : (مجاوباتهاش و دارت لجيهت الحيط و غمضات عينيها) بغيت نعس ...
‎خديجة :(تنهدات و دموعها بداو كيطيحو) واخا (غطاتها مزيان و خرجات و مشات لصالة لقاتهم باقين ݣالسين كيتسناوها)
‎يوسف : أنضرا ..؟!
‎خديجة :الله على بنتي مسكينة محملة راسها مسؤولية كلشي .. قاتلك هي السباب فموت باباها ...
‎يوسف : حتى أنا داك النهار هضرت معاها زعما و كيصحابلي حيدات هاد الفكرة من راسها ...
‎خديجة : حالتها كتأزم نهار على نهار معرفتش أ ولدي أش خاصني ندير ...ندير أي حاجة غير باش ترجع ليا بنتي كيما كانت
‎نسرين : أخالتي راه داكشي لي تعرضات ليه ماشي ساهل التحرش ...الإختطاف ...الضرب و الإغتصاب ...و هي باقا صغيرة راه باز ليها حتى تحملات هادشي كامل ...
‎يوسف : من الأحسن نتبعو ليها مع شي طبيب نفسي ولا تقدر تزيد تمرض كثر
‎خديجة : إيوا أ وليدي دير لي يسلك لمهم ختك متبقاش فهاد لحال راه خالعاني عليها (كملو حديثهم و هوما غافلين على صفاء لي سمعات حديثهم كامل و مشات لبيتها كتجري و سدات عليها الباب و بدات كتبكي و كلمة وحدة كتردد على فمها)
‎    صفاء : هئ هئ أنا ماشي حمقة هئ هئ ماشي حمقة ...
   •°•°•°•°•°•°•
‎يتبع...✔️