متلازمة عائلتي (رواية ليبية)

الحلقة 6

حمزة : اهلا وسهلا بالصحبة .. و أخيرا وصلت

علي كمال : ؟؟؟؟

حمزة : شفناك تراقب فينا و اتبع فينا في الطريق لعند ما وصلنا هنا .. من انت ؟
علي كمال : انت اللي من ؟ وشن تبي من البنت ؟
حمزة : مش موضوعك انت .. و ما تجاوبش السؤال بسؤال .. انت هنا تحت رحمتي يا غزال

يتنرفز علي كمال من كلامه و في لحظة سريعة يضرب الراجل يلي كان حاط السلاح على راسه و يطيحه و يشد حمزة من رقبته .. لكن الراجل الثاني يطلع سلاحه و يضرب الرصاص الفوق .. ندى تحط راسها لوطا من الخوف .. ينزل حمزة ايدين علي كمال من رقبته

حمزة : شكلك بتوجعلي راسي و انا مش عارف لعند توا علاش ما حطيتش رصاصة في راسك

يمشي لندى و ينحي اللصقة من على فمها

حمزة : من هذا ؟

ندى تقعد ساكتة وتبكي
حمزة : قاعد نتكلم بهدوء .. من هذا ؟
ندى : استاذ علي .. يقري فيا في الجامعة
حمزة : آآآآها .. شفتنا قدام الكلية قصدك ! .. أنا مش قلتلكم تأكدوا ان ما يشوفنا حد يا اغبياء
ندى : من انت .. وشن تبي ؟
حمزة : انا حمزة يا حلوة و موضوعي مع بوك مش معاك(تتذكره ندى على طول من لما سمعت بوها و امها يتكلموا عليه ) .. لكن الله غالب في حاجات لازم تنحل الا هكي يا حلوتي
علي كمال : اسمع .. انتبه لألفاظك أحسنلك .خير ما يصير كلام ثاني !
حمزة : انت شن قصتك ؟ ما تخافش ولا كيف ؟ شن تقدر ادير اصلا مش قلتلك انت تحت رحمتي !
علي كمال : انا تحت رحمة ربي وبس .. و ما تسحابش اني خايف منك .. انا ما خايف الا ع البنت وبس كان هذا راهو عرفت شن درت معاك

يأشر حمزة على صبيانه ينزلوا السلاح

حمزة : شن بدير ترا ؟

علي كمال يصكر ايده ويضربه على وجهه بأقوى ما عنده و يطيح حمزة لوطه .. ينوض حمزة ويردله وحدة على خشمه و ينزل شوية دم منه ..

ندى : استااذ علي

علي طول علي كمال يردله واحد لحمزة

ندى(وهي تبكي) : خلاص خلاص .. بوي ما عنداشي فلوس افهمها يعلم الله وضعه شنوا توا .. وأمي في العمليات حاليا اشبح شن صاير فيها توا بالله عليك خلينا نمشوا بالله عليك

يشبح علي كمال لندى و يسخف عليها و على حالها

حمزة : قولي الكلام هذا لبوك قبل ما يجي يتسلف مني و يورط روحه معاي .. سايرته بما فيه الكفاية اكثر من ثلاثة شهور و المدة المفروض اللي يرجع فيها هي شهرين
علي كمال : انت ما تتحشمش على وجهك ؟ توصل بيك لدرجة تخطف بنت على خاطر الفلوس ؟
حمزة : الكلام كله هذا ما يأثر فيا .. عطيتك فلوس ردهم في الفترة اللي اتفقنا عليها وبس
علي كمال : قداش الفلوس اللي تبيهم ؟
حمزة : علاش ؟ شن تبي تدفعهم ؟
علي كمال : ايه .. كم ؟
حمزة : 30 ألف .. تقدرهم ؟
علي كمال : تم .. خليني نمشي نجيبهم ونجيك !
حمزة : هههههههه اشبح اشبح طلع الراجل يتكلم بجديات !
علي كمال : بجديات ايه .. خليني نمشي نجيبهم
حمزة : تحسابني مهبول نخليك تمشي ؟ و كان تمشي ومعش تجي ؟ ولا ادير اي لقطة ؟
علي كمال : انا راجل و عند كلمتي .. و كلمة التريس ما تنزلش
حمزة : شبعت منه هلبا الكلام هذا انا .. معش يمشي معاي الوهم هذا
علي كمال : خلاص امالا .. خليني نكلم خوي هو اللي يجيبهم
حمزة : و خوك هذا مضمون ؟
علي كمال : اياه علينا عاد .. مش تبي فلوسك انت ؟ باهي دير راي