.............
....................
نديم : نعم شن ؟
علي كمال : خيرك على مرت خوك ؟
نديم : ما تشبحش فيها شن تقول ؟
علي كمال : خلي تخرف .. هادي مرت خوك مفروض يكون في حدود مش ضروري تفوتها معاها حتى لو هي لسانها طويل مش ضروري ترد عليها .. ما تخليش مشاكل بينك وبين خوك علاء
نديم : باهي حاضر يا علي كمال غر انت بس
علي كمال : بتسمع كلامي امالا شن اكبر منك انا هههههههه
نديم : اكبر شن والناس كلها يسحابونا توأم هههههه
.........................
...............................
خديجة تكلم في جميلة بالنقال
خديجة : كلمت بوك على وصال وقال باهي وقالنا يوم الاربعاء بروا اعطوا فيها الكلمة باش تجي تمشي معاي
جميلة : باهي خلاص تو نقول لاحمد و يجيبني
خديجة : هيا صكري خلي بنكلم عمتك فاطمة بنقوللها بنجو
.............
................................
في حوش عمهم خالد (حوش عمهم يسكنوا جنبهم)
سالمة : يا وليد تعالى نبيك
وليد : نعم يما شن في ؟
سالمة : غير قعمز هنا
وليد : اهو قعمزت ..
سالمة : اسمع انا قررت بنخطبلك بنت عمتك وصال .. شن رايك ؟
وليد : ايه عادي يما اصلا عاجبتني البنت .. لكن مش توة بعد فترة ساهل
سالمة : باهي المهم خديت منك الموافقة توة
...........................
.......................................
في الليل بعد ما يتعشوا مقعمزين كلهم في الصالون ونسرين في الكوجينة ادير في شاهي و حلويات
علي كمال : شن يا سلمى شن جو القراية ؟
سلمى : ماشي حالها تفدد وخلاص
نديم : ما ينخافش عليها هادي معروفة
سلمى : ع الاقل تسأل مرة مرة عليا اللطف خيره علي كمال يسأل ديما
نديم : ماهو ناخد منه في التقرير بعدين انتي ما تعرفيش ههه
سلمى : ايه حتى انا صدقت
فتحي : اسألوا على اختكم مرة مرة بالك ناقصها حاجة
نديم : حاضر يا بوي
فتحي : الكلام حتى عليك يا علاء
سلمى : علاء من لما تزوج نساني اصلا هههه
علاء : مش قايلك تبي حاجة قولي
سلمى : نبصر نبصر كلهم مش مقصرين ربي يحفظهم
علاء : كان نشدك يا قردة هههههه
ويضحكوا كلهم
نسرين في الكوجينة
نسرين : ايه اضحكوا وانا طول النهار في الكوجينة معش نطلع منها
شن العيلة اللي طحت فيها
وتوتي سفرة الشاهي والحلويات و ترفعهم تحطهم قدامهم و تقعمز بحدا راجلها علاء
فتحي : صحيتي يا بنتي
نسرين : سلمك صحتين
خديجة : خيره الشاهي مر هكي اللطف
نسرين : عمي هكي يحبه .. كان تبي سكر قولي لسلمى تجيبلك
خديجة : بلاش تو نحلي بالحلويات
فتحي : شن جو الكلية يا علي كمال ؟
علي كمال : ماشي حالها يا بوي
نسرين : بالله بنسألك يا علي كمال ؟
علي كمال : تفضلي !
نسرين : كيف اسمك علي كمال مركب هكي ؟ هو يا علي يا كمال اما علي كمال هادي اول مرة نسمعها انا الصراحة !
YOU ARE READING
متلازمة عائلتي (رواية ليبية)
Fanfictionمفيش انسان معصوم من الأخطاء مفيش انسان كامل .. بعيدا عن روايات المراهقين رواية ليبية واقعية ممزوجة بالخيال مشوقة رواية تحكي عن العائلة و مشاكل العائلة و اسرارها والحب في حياة كل شخص فيها شخصيات مميزة و احداث قوية ..
الحلقة 2
Start from the beginning
