"အကို ဒီဘက်နားမှာ ကျောက်တုံးတွေ ရှိတယ်"
နွမ်းခါးပြောသံကြားမှ ဓာတ်မီးကို နွမ်းခါးအားပေး၍ အနားတွင်ရှိသော လက်တစ်ပွေ့စာမျှရှိသည့် ကျောက်တုံးတစ်ခုကို ကောက်ယူကာ အပေါ်သို့ မြှောက်၍ ခွဲလိုက်သည်။ ရေခဲပြင်သည် အပေါ်ယံကြည့်လျှင် ပါးလွှာသည်ဟုထင်ရသော်လည်း ခွဲကြည့်သောအခါ တော်တော်နှင့်မကွဲပေ။ အချက်နှစ်ဆယ်လောက် ဆက်တိုက် ပေါက်ခွဲလိုက်တော့ ရေခဲသားပြင်တစ်လျှောက် ပက်ကြားအက်လာသည်။ ခွဲခြားက နွမ်းခါးရှိရာဘက်သို့ ပြေးလိုက်ပြီး နောက်ဆုံးတစ်ချက်ကို အားနဲ့ ပစ်ပေါက်ခွဲလိုက်စဉ် ရေခဲသားပြင်က ကွဲအက်၍ ပြိုကျလေသည်။
"အား အေးလို့သေတော့မှာပဲ ဒီဂူကို ထောင်ချောက်ဆင်တဲ့သူကို တွေ့လို့ကတော့ ဂုတ်ချိုးပစ်မယ်"
လူကို မမြင်ရခင် အသံကို အရင်ကြားရတာကြောင့် ဓာတ်မီးနဲ့ထိုးကြည့်တော့ အတွင်းတွင် လူလေးယောက်ရှိနေသည်။ အ၀တ်အစားတွေက ဟောင်းနွမ်းနေသည်တော့မဟုတ်ပေမယ့် ပြဲသည့်နေရာကပြဲ၍ စုတ်ပြတ်နေသည်လည်း ရှိသည်။
ရွှေကိုင်းတပ်မျက်မှန်လေးနဲ့ လူချောလေးတစ်ယောက်က ရုတ်တရက်ကြည့်ရင် မိန်းကလေးနှင့် မှားရလောက်အောင် ချောမောသည်။ အသက်ကတော့ ခွဲခြားနှင့်ရွယ်တူလောက်ရှိမည်။ သူ့ဘေးတွင်ရပ်နေသည့် ပါးသိုင်းမွှေးရေးရေးလေးရှိသော ခန့်ညားသည့် သူတစ်ဦးက ဒဏ်ရာရနေဟန်ရှိသည်။ ဘေးနားမှာတော့ အထုတ်အပိုးတွေပိုက်ထားသော အနည်းငယ် ၀သည့် သူတစ်ဦးကို တွေ့ရပြီး ကျန်တစ်ဦးကတော့ စောစောက ငြီးငြူသည့်အသံပိုင်ရှင်ဖြစ်ဟန်တူသည်။ အရပ်ပုပု အသားဖြူဖြူနှင့် အတော်လေးလည်း သွက်လက်သည်။ အပေါ်ကို လွှားခနဲ ခုန်တက်ကာ ခွဲခြားတို့စီ လျှောက်လာသည်။ အန္တရာယ်ရှိနိုင်လား ပြောမရသည်ကြောင့် နွမ်းခါးကို အနောက်သို့ပို့လိုက်သည်။
"ကျေးဇူးတင်ပါတယ် ဒီက ကျွန်တော်မျိုးမှာ အကိုကြီးပေးတဲ့ အသက်ပဲ ရှိပါတော့တယ် ဗျာ"
ရုပ်တည်ကြီးနဲ့ လျှောက်လာပြီးမှ ခွဲခြားအနားကိုရောက်တော့ လက်ကိုဆွဲ၍ ငိုသံကြီးလုပ်ပြောလာသူကြောင့် အနောက်နားမှ နွမ်းခါး၏ ရယ်သံတိုးတိုးလေးထွက်လာသည်။
YOU ARE READING
1. Close to... You (မင်းနဲ့နီးဖို့) Completed
RomanceLove is painful but still do it
