part10الاخير
فارس مقعمز في داره ويدخن
خشت فدوى:انت كيف دير هكا
فارس:اطلعي وسكري الباب
فدوى:مش طالعه انت بجديات ضحكت على روز وخديت منها كل فلوسها وشركاتها
فارس:ايه ارتحتي اطلعي هي
فدوى:ليش
فارس:مش حانسمح لوحدا زي هدي تاخد تعب بوي وعمي
فدوى:تعب منو خيرك انت من يوم جينا عالدنيا نعرفو انه كل شي مهتم بيه عمك عامر وحناي تحكيلنا قداش كان مسؤول عاكل شي هدا حق روز وخوها تعرف انا مصدقه انه بابا وعمي ليهم ايد في موت بوها بنت بالسن هدا انحرمت من بوها سندها كل حياتها مش مكفيك زدتها انت هدا سبب اللي خلاك تتزوجها
فارس:اطلعي معاش نبي نسمع منك شي
فدوى مسحت دموعها:ياريت قعدت بعيد زي ماتعودنا تعرف انك هكا تعاود في نفس الماضي رح نكبرو واحنا حاقدين على بعض جارح رح يكرهك زي ما بوه كره عمامك وربي رح يردلك كل شي وطلعت
فارس:اووف علينا خدي هاتفه وطلع
في مكان بعيد
هيثم:مافهمتش كيف دار هكا قصدي من البدايه كان هوا اكثر واحد قريب منها ويوقف معاها
نهال:صدمتني بجد كنت نحترم فيه هلبا
هيثم:تكسر القلب لما طلعت
نهال:زعما وين مشت
هيثم:مش عارف حاولي تتواصلي معاها نعرفو وينها ناخدوها معانا عالاقل
نهال تتصل بيها:ماتردش
هيثم:زعما سافرت حتا خوها وامها مش موجودين في لحوش
نهال:خوي الحقير
هيثم:كلاب فلوس كلهم هي نوضي نروح بيك عطلتي
نهال:اوك هي
هيثم جبدها من يدها:بنخطبك الاسبوع الجاي رهو مافيش تأجيل
نهال:بهي حاضر 😅هي روح بيا
محسن يبكي:ماتوقعتش منهم الشي هدا والله هيا طيبه وحرام يصيرلها هكا
رفيده:خلاص بهي اهدا انت كلمها واحكي معاها اكيد مش رح تزعل منك
محسن:اكيد كرهتنا كلنا عيله مادارتلها شي في حياتها
رفيدة:خوها ماعنداش ايميل او رقم تتواصل معاه
محسن:مقفل من الصبح نتصل بيه
رفيده:يمكن سافرت وين ماكانت
محسن:مش بالسرعه هدي ماتلقاش طيارة توا
رفيدة:اوووه مسكينه
محسن 💔💔
اما حال فيروز رجع زي ماصارلها قبل سنين لما خسرت ولدها وسافر مسكره عليها دار وتبكي:اللهم اني لا اسألك رد القضاء بل اسألك اللطف فيه
عبدالله في مطعم:بنجر عليك موضوع
عصام:ان شالله خير
عبدالله:نبي نرد مرت المرحوم
عصام ضحك:عجباتك ياملعون
عبدالله:هلبا قطعه اجنبيه مليحه
عصام:دير رايك
عبدالله:هي مالا نتوكلو
رجعو للحوش مالقو حد غير نساوينهم
منيه:مرتاحين توا عاد خربتوها
عصام:حقنا
منيه:غير على من تضحك بس
عبدالله:وين مرت المرحوم
سعاد:شن تبي فيها
عبدالله:شي مايخصكش
عصام يضحك:غير احكيلها
سعاد:شن فيه بالزبط
عبدالله:بنرد مرت خوي
سعاد:نعم شن تفضلت
عبدالله:زي ماسمعتي
سعاد قربت منه:فكر في الموضوع بس وصدقني نخربها عليك انت وخوك وتعرفني كويس
عصام:معاش تقدري كل الاملاك بدت باسمنا
سعاد:ماشي ياسلفي وطلعت
عصام:رد بالك مرتك معاش نطمنلها انا
فدوى:نكرهك
مروان:انا درت كل شي عاخاطرك
فدوى:حتا لو الموضوع هدا يخلينا ننفصلو ماتتصرفش بنذاله مش هدي صديقت عمرك
مروان:وانتي حبيبتي
فدوى:معاش نقدر نكمل معاك
مروان:شن قصدك
فدوى:قصدي اني معاش نوثق فيك ببساطه
مروان:انتي اكتر وحدا تعرفيني انا شن
فدوى:ولاني انصدمت بحقيقه مانعرفهاش مش حانكمل معاك
مروان:تمام اللي يريحك سكر الخط
عصام:جيبلي الملفات
فارس:انا في العيادة توا بعدين خليهم معاي
عصام:ليش
فارس:انت عارف انه مرتك في صفها وكل الشركة مغيرتها يعني في لحظه ممكن اي حد ياخدهم منك ويضيع تعبي
عصام:مزبوط
فارس:خلاص مالا خليهم عندي
روز اختفت معاش قدر حد يوصلها لا هيثم ولا فدوى ولا حتا محسن
فات شهر وفي يوم انقلب فيه كل شي
مجتمعين الكل بناءا علي طلب من فيروز
خش فارس:خير ياعيله
محسن وقف بيطلع
فارس:قعمز مكانك
محسن:حول من قدامي
فيروز:قعمز سلم ولدي نبو نسمعو شن صاير
فارس قعمز جنبها:عارف انه اللي بتسمعيه بيوجعك بس لازم نحكو فيه
فيروز:ان شالله خير
فارس:قبل شهور عمي عامر بعد زارك في المستشفى طلع لفندق بعد ساعات جاه اتصال انه بنته لحقاته لي ليبيا وموقفينها في المطار طلع بسرعه وفي الطريق اكتشف انه فيه خلل في سيارته خلاه يفقد السيطرة ويدير حادث شنيع فقده حياته
فيروز تبكي:ربي يرحمه ولدي بس شن سبب العطل
فارس:العطل انه سيارته بدون فرين وهوا كان يجري فادار الحادث بس القصه منو اتصل بيه وقاله بنتك في المطار وهيا لاجت ولا فكرت اصلا تلحق بوها
هيثم:شن قصدك
فارس وقف ركب فلاش عالشاشه وفتحه كان فيديو مصور من مكتب عصام والحديث كان
عبدالله:اكيد بنته حاتجي كيف بنديرو الرزق كله ليها هيا وخوها
عصام:احنا من الاول قتلناه باش نلهفو كل شي ولده عنده القلب اي ضغط عليه يموت اما فرخته بننكرو انها بنته ونتهموما انها غير شرعيه ونصابه
عبدالله:وهيا زعما عندها علم باللي صار من زمان
عصام:مش عارف خلي نتلاقو وبعدين نزبطو كل شي اكيد وصلهم خبر موته توا
عبدالله:زعما
عصام:اللي بعته يقوله بنتك في المطار هوا نفسه بيوصللهم الخبر
عبدالله:اممم فكره
غصام:الكلام بينا مانبيش مرتك اللفعه تعرف سادها مشاركتنا وتبي حصتها
عبدالله:تمام
هيثم:انتم قتلتو عمي?
عصام:كذب طبعا هدا فيديو مركب تركيب
فارس:وانتي شن رايك ياامي
سعاد:كذب ايه
فارس:ضحكتو عالكل وخدعتونا بينما انتم الثلاثه متفاهمين قتلتو خوكم ومتفقين تقسمو فلوسه
عصام:بعد شن خلاص اللي فات مات وانت درته بيديك دمرت بنته وخديت رزقها
فارس ضحك:من جدك انت
روز:لا اقنعتهم بجديات
فارس لف يده على خصرها:بنتخلى على مرتي وحبيبتي بسبب من ام وبو بايعين صغارهم عاخاطر الفلوس ولا شن ياسعاد
"اكيد تلخبطت عليكم الامور تعالو نحكيلكم بالشويه "
flash back
فارس كيف عرف انهم السبب في موت عمه
من يوم البحر لما راسه مصدع واتجه لدار امه وبوه يبي ياخد حبوب راس سمع حديثهم
عبدالله:الفلوس كلها راحت علينا
سعاد:ماتريحش احنا درنا جريمه وقتلنا تبينا توا نقعمزو نتفرجو عليها تاخد فلوسنا وتمشي تي كان نقتلها ونلحقها لبوها
عبدالله:ولو اكتشفو الصغار
سعاد:معاش صغار وانا مش خايفه عليهم شن بيصيرلهم يعني بعدين ولدك دكتور يوقف مع خوته انا وياك نلهفو الفلوس ونسافرو نعيشو حياتنا
فارس حس الوطا دور بيه طلع بسرعه قعمز عالشط ويفكر كيف ام تتصرف هكا وتكون انانيه وبعدها حسم قراره
end back
عبدالله:انا مش معاهم
سعاد:مالا طالما سمعتنا معاش فيه مهرب ايه بوك وعمك متفقين يقتلوه ومن الاول عندهم علم انه تزوج وعنده بنت وولد استغلو النقطه هدي وفسدوله سيارته باش يموت
روز قعمزت عالصالون:بس ماحسبتوش انه ديما حايكون حد سابقكم بخطوة
flash back
قبل يسافر عامر بيومين اجتمع في الشركة مع روز ومروان
عامر:خوتي مش حايسكتو رح يديرو شي فا خلينا نجهزو
لازم تتعرفي على كل العيلة وتعرفي كيف حايتصرفو وحوللها كل اسهمه في شركات ليبيا لاسمها ومروان مجهز كل شي وديما كان قدامها ويراقب في الكل
end back
فارس:ونسيتو يا اذكياء اني خشيت لعمي بس اللي ماتعرفوشي اني طلبت تشريحه وتقرير السيارة ومكالمات من هاتفه لكن اخر شي توقعته انكم السبب وقررت اني نحط ايدي في ايدها ونحميها منكم
flash back
بعد روحنا من البحر
رن هاتفها:ايوا
فارس:نبي نشوفك
روز:ليش شن فيه
فارس:ارجوك
روز:بهي وين انت
فارس:تعالي في .....$&& تلقيني
روز طلعت مشت للمكان الي قالها عليه لقتها شقه خشت:فارس
لقاته مقعمز في الظلام
روز قربت منه:خيرك شن صاير
فارس:معاك حق
روز:كييف
فارس:هما قتلو بوك
روز سكتت:بهي اهدا مانبيش نشوفك هكا ضعيف
فارس:امي متفقه معاهم يبو ياخدو فلوسك ويسافرو
روز:عرفت اني مش ظالمتهم
فارس:عرفت وقاعد عند وعدي بس نبي نطلب منك طلب
روز:شن هوا
فارس:خلينا نتزوجو انا معاش عندي ثقه فيهم شاك في اي لحظه يدبرولك حاجه تأذيك نبي نحميك وتكوني ديما قدام عيوني
روز:وبعدين
فارس:انتي وراحتك لو تبي الطلاق رح نطلقك بس اعرفي اني نحبك ونبيك
روز:تمام موافقه بس بنمشو على خطتي
فارس:عندي راي ثاني بس خلينا نتزوجو اول شي في لندن وبعدها نرتبو كل شي
روز:اتفقنا end back
فيروز تبكي:حسبي الله فيكم ياولادي يا كبدي خابت فيكم ربايتي لدرجه تقتلو خوكم لحمكم ودمكم غاضبه عليكم ليوم الدين وحارمه عليكم جنازتي
عبدالله:لا يمي بالله عليك ماتغضبي عليا اسف انا هما غررو بيا وشيطان وسوسلي
فارس:بالزبط 😏
سمر وفدوى يبكو اما هيثم مصدوم
منيه:ولما نسأل فيك تقولي مالياش علاقه
خش مروان:الشرطة برا قدمت شكوى بثلاثه قضايا
جريمة قتل مع سبق الاصرار والترصد،النصب واحتيال،محاوله القتل المتعمد
عصام:وين دليلكم
فارس فتحله فيديو الشركة لما قاله نودروها زي ماودرنا بوها
flash back
تذكرو لما فارس وقف عالمكتب بعدين ضحك وطلع هوا في وقفته خدي الكاميرا اللي كانت مزروعه وطلع لما ضمن اعتراف صريح منهم
اما اللي صار في المكتب كله تمثيل ومروان طبعا متفق معاهم
لما درست روز سيارتها بقوة
فارس:خيرك بتقلبيها على راسك
روز نزلت طايرتلها:هدا غير تمثيل اللطف قريب كسرتلي عظامي من الاول قتلك ماثقلش في الكف
فارس ضحك:معليشي انسجمت في الدور
روز:الملفات
فارس:في الحفظ والصون
وصل مروان معاه جارح ودانييلا
فارس:ردي بالك من روحك
روز:حاضر
فارس قربها منه:بنستاحشك
روز:خلاص بهي ماما تشوفلنا
فارس:مادخلي بحد مرتي بنجيك بعدين
روز:مرات حد يراقبك
فارس:بنجيك قلت
روز:بهي براحتك نستنا فيك
ركبت سيارتها ومشت مع امها وخوها لاستراحه فارس
في اليل
فتح باب الدار وخش
روز:تخيل ماما راقده هنا
فارس:انا جاي ومتاكد انك انتي قلبي مايغلطش
روز:دخليك انت وقلبك 🤭
فارس:مستاحشك
روز:مش اكتر مني تبي تتعشا
فارس:اي والله جعان بكل في جرتك اليوم كلهم نفخو عليا. حتا فدوى هزئتني
روز: 😂معليشي لكن اكيد سمر تلصقت
فارس:هههه لالا بري جيبيلي ناكل هيا
روز:حاضر
end back
روز:تفضلو برا حوشي يا مجرمين
عبدالله تلفت:انتي طالق
سعاد:اريح من وجهك
خذتهم الشرطة واعترفو بكل شي لانه معاش عندهم كيف ينكرو بعد الادله خسرو كل شي في لحظه الفلوس والاملاك وصغارهم
فارس مقعمز في شقته يدخن
روز حطت يدها عاكتفه:اسفه لانك وقفت في وجه امك وبوك
فارس:هدا واقع والحق بدون وقفتي كان حايجي يوم وتنكشف الحقيقه قدامنا وياخدو جزائهم هدا في الدنيا ومزال الاخره وين بيمشو من ربي انا واجعني كيف صدقتهم وكنت واثق فيهم وقاهرتني امي كيف تخلت علينا ببساطه
روز:انا جنبك وحانعوضك عاكل شي وعد
فارس:ربي يخليك ليا يانور عيوني
جمعتهم الجده
فيروز:اللي صار اليوم تنسوه من دماغكم وتمسحوه من حياتكم انتم احفاد الجارح وهدا بروحه فخر يلي طلعو من الحوش اليوم عدوهم ماتو هدي عيلتنا وانا امكم وبوكم رح نزوجكم كلكم ونكملو حياتنا ونعيشو الفرح مانبوس نحزنو
منيه:ربي يخلينا لينا خالتي
فيروز: ويحفظكم كلكم
سمر تبكي:اسفه عارفه اني زودتها معاكم هلبا بس
روز:خلاص حناي قالت انسو ياريت اللي فات كله ننسوه احنا ولا اليوم ونبو نفرحو رهو حتا انا نبي عرس مش غير انتم
ضحكو كلهم
هيثم:امتا بنمشو نخطبو
فيروز:بكرا باذن الله نمشو نتقدمو ونلبسو انت ومروان وبعدكم بنستقبلو خطاب سمر ومحسن الاخير
جارح نزل يجري:هناك زفاف
روز:تعالى
جارح قعمز جنب فارس:اريد هنا
روز:بياع 😏
وبالفعل نسو اللي صار وكل واحد انشغل بالتجهيز البنات يطلعو ياخدو في لبس والشباب يجهزو في اثاث الحوش
ثاني يوم الساعه 8 مساءا 🌺
فيروز:احنا جايين الليله نطلبو ايد بنتنا الحلوة لولدنا هيثم بعد موافقتنا طبعا على ولدكم مروان
وفي المربوعه كان فارس اللي يطلب فيها من بوها
حوريه:نتشرفو طبعا
جارح:يس يس 😻
روز:قعمز يا ولد
فيروز:هي نادو العرسان خلي يلبسو
خش هيثم الاول لبس الخاتم:مبروك علينا غزالتي
نهال:الله يبارك فيك حبيبي
وخش مروان لبس فدوى.
جارح:اذن لن تتزوج ميا 🤭
فدوى شافتله:مني ميا
مروان:مش حد اميرتي مادوريشي الفرخ هدا
جارح:مش فرخ وميا حبيبته هي
مروان:شدي خوك عليا خير مانرتكب جريمه
جارح خش ورا روز ويضحك:تستحق ذلك
فدوى:بعدين نتفاهمو
مروان:ان شالله خير
واليوم اللي بعده استقبلو الناس اللي جايين يخطبو في سمر
حسنيه:والله البنيه شايفها ولدي في الاذاعه وعجباته جينا من الباب طول
فيروز:نتشرفو ومعروفين الراي لخوها وللبنيه وان شالله مانختلفوش
في المربوعه
زاهرمقعمز ويهز في رجله بتوتر
خشت سمر قدمت القهوة وقعمزت
هيثم:نستاذن انا وطلع
زاهر:كيف الحال
سمر:تمام وانت كيفك
زاهر:توا بديت كويس تعرفي قداش ليا ندور فيك
سمر:ليش
زاهر:لاني حالف ماناخدش غيرك وكنت خايف نلقاك متزوجه
سمر واطت راسها
زاهر شد يديها:نحبك يابنت طول فتره شغلك في الاذاعه نراقب فيك كنت نخدم في الاداره بس قلبي معاك وين ماتمشي وافقي ونوعدك نديرلك اللي تبيه ونعيشك ملكه نفتحو اذاعه انا وياك ياعسل 😍
سمر ضحكت:نفكر بهي
زاهر:تمام معاك لبكرا وتردي عليا خودي رقمي من اختي
سمر:تمام وطلعت
تسريع في الاحداث
فاتو شهرين ووصل العرس طبعا داروه جماعي في حوش العيله كان فخم وكله من ارقى الاشياء والكل كان مبسوط هلبا
طلعو العرسان في سياراتهم ورا بعض كل واحد معاه مرته
هيثم:اخيرا حلالي ربي يباركلي فيك
نهال:امين 💛
محسن:وربي بنهبل مش مصدق خديتك 😻
رفيده:مجنون🖤
مروان:من قال بعد هالسنين كلها نرجع ونتزوجك
فدوى:نصيبنا حبيبي ان شالله ديما معاي 💜
زاهر:الحمد لله ربي كتبك من نصيبي
سمر:ربي يخليك ليا 💙
اما الحلوين
روز:حبيبي
فارس:عيونه
روز:عندي خبر
فارس:بيجينا الوريث 😍😍
روز:كيف عرفت 😨
فارس:راجلك دكتور ره 😅
روز:اوف فسدتلي المفاجئة
فارس:احلا مفاجئه حبيبتي ربي ينوضك بالسلامه
جارح:سأصبح خال 😻
فارس:عندي شي بنقوله
روز:شن
فارس:سامح كلمني قبل يومين وقال لقا متبرع ولد صغير يعتبر ميت سريريا واهله موافقين يتبرعو بقلب ولدهم
روز:قصدك
فارس شد يدها بقوة:خوك قلبه تعبان وانتي بروحك كنتي دوريله في متبرع خلينا نديروله العمليه ويكمل حياته زي اي انسان طبيعي
روز:انا خايفه
فارس:تخافيش انا رح نحضر العمليه ومايصير الا اللي كاتبه ربي
روز:شن رايك انت
جارح:الذي ترينه مناسب جميلتي 😘
روز:نتوكلو على الله
سافرو بعد اسبوع داروله العملية
روز دور في ممر المستشفى
دانييلا تبكي:لماذا تأخرو
روز:اهدي ياماما هدي زراعه قلب مش سهله
دانييلا:انا خائفه جدا
روز:ان شالله خير
فارس طلع:الحمد لله نجحت العمليه
دانييلا:حمدا لله
بدي يتحسن وبعد 3شهور طلعوه من المستشفى وروحو للبلاد
فيروز دايرة غدي كبير ومحتفلين برجعه الجارح 😻
محسن:بطلنا الصغير
جارح:هل اشتقتو لي
محسن:هلبا يامعلم
جارح:حناي اريد ان اتزوج انا ايضا
كلهم ضحكو
روز:خيرك هبلت
جارح:لادخل لكي 😋
روز شدت في فدوى بقوة
فارس:خيرك حبيبي
روز:تعبانه بس
فيروز:دخلوها سادها ماتعبت
كيف تغدو ويهدرزو
جاهم خبر موت عصام وللاسف مالقاش حد يدير عزاه ولا حتا يترحم عليه دفنوه فارس وهيثم بس
بعدفتره
فارس خش للدار شاد بيبي:الف مبروك ياروحي
روز:الله يبارك فيك
فدوى:شن بتسموه العسل هدا
فارس:عامر فارس الجارح
روز ضحكت واذكرت
flash back
بعد خدت روز كل الشركات مشت لاستراحه تاخد في لبسها
فارس حضنها:حبيبي
روز:تم كل شي
فارس:شن قصدك
روز:مش قتلي ليك الخيار لو تبي تطلقي
فارس:وتوا شن تبي
روز:نطلق
فارس:لالا مستحيل خيرك هبلتي
روز:مش قتلي نردلك حقك وخلاص خديت حقي توا
فارس بدي يعيط:حقك بهي وانا #لقلبي_حق 🖤 مش غير انتي ومش رح نضيعه لو عالموت
روز:شن قصدك
فارس حضنها:قصدي اني مستحيل نتخلى عليك لو مهما صار
روز:يعني انا حق قلبك
فارس:بالزبط 😘😍
The end
الظلم اياكم والظلم لانه الدنيا دور يوم ليك ويوم عليك وكلمه حسبي الله ونعم الوكيل مش ساهله ولكل ظالم نهاية وظلم الناس يخلص في الدنيا قبل الاخرة
كلنا نغلطو ربي خلق الانسان خطاء بس اهم شي نتوبو ونتراجعو ونصلحو اغلاطنا
وتحيه خاصه لزوز من متابعيني اللي قدرو يحزرو الخطه اللي بين فارس وروز 😘😘 #ام_الجود و #محمد_احمد
واتستنوني في "الجزء الثاني من رواية وجدتكي ملجئي ❤️🤭
lole saad
