قصص وحكايات

علمنا لله واياكم

صلو علي من لا نبيه بعده

-مالك يالولي سرحانة لية كدة ؟!

=صحبتي قالتلي إن سيدنا عيسى ابن ربنا ، هو ابن ربنا فعلًا يا ماما ؟!
-لا ياحبيبتي طبعًا هو عبد الله ورسوله بس ،والمفروض إن دة كان يكون ردك علي كلامها.
=مانا قولتلها كدة ، بس قالتلي :"إزاي في شخص هيتولد بماما بس من غير مايكون له بابا؟! وقالتلي "انا وانتِ يا لولي لينا بابا وماما فعشان كدة ربنا هو باباه والعدرا مريم هي مامته" !
-......
=ماما سكتِ لية ؟!

مجموعة من أهل نجران "النصارى"سافروا من مكة و راحوا لمسجد رسول الله في المدينة وكانوا غضبانين جدًا.

المجموعة دي كانت مكونة من ٦٠راجل ، ١٤راجل منهم من الأشراف والزعماء ، ومن ال١٤ دول ٣ رجال لهم مكانه كبيرة جدًا عند أهل نجران
وهم : رئيسهم ونائبه وإمامهم(مُعلمهم دينهم وصاحب المدارس اللي بيتعلموا فيها) 

تمام ؟
تمام

لما دخلوا على النبي صلى الله عليه وسلم المسجد قالوله :" ما شأنك تَذكُر صاحبنا "؟!
(سمعنا إنك بتتكلم عن صاحبنا)!

فالنبي سألهم وقالهم :" من هو"؟
فقالوا: عيسَى، تزعم أنه عبدُ الله!

فرد النبي صلى الله عليه وسلم وقال : "أجل، إنه عبد الله"!

-أومال هما كانوا بيقولوا عليه إية ياماما؟!
=نصارى نجران من النصارى اللي انحرفوا عن الحق وبالغوا وأفرطوا في حب سيدنا عيسى عليه السلام لدرجة إنهم عبدوه مع الله !

لإنهم قالوا إنه ابن الله والله أرسله ليخلص البشر من خطيئة نبي الله آدم واللي هي أكله من الشجرة المحرمة ، عشان ربنا يرحم البشرية من غلطة سيدنا آدم ومايعاقبهمش عليها لان كل البشرية من نسله والخطيئة في أجسامنا بالتوارث!

-ثواني ياماما مش انتِ قولتيلي قبل كدة إن سيدنا آدم هو اللي أكل من الشجرة برغم إن ربنا حذره منها فوسوس له الشيطان فأكل منها "

=ايوة صح

-طب لما هو سيدنا آدم هو اللي أخطئ، لية حد بداله يتحاسب على خطأه ؟! مش لما مودي أخويا بيغلط بتعاقبيه هو عشان هو اللي غلط مش أنا؟!

=بالظبط ، برافو يا لولي و عشان كدة القرآن (كلام الله)  بيقول إن سيدنا أدم لما غلط ربنا علمه كلمات يتوب بيها عليه وفعلًا لما اتعلمها وتاب بيها الله قبل توبته!
قال تعالى في آية ٣٧من سورة البقرة :"فَتَلَقَّىٰ آدَمُ مِن رَّبِّهِ كَلِمَاتٍ فَتَابَ عَلَيْهِ ۚ إِنَّهُ هُوَ التَّوَّابُ الرَّحِيمُ"
وحاجة كمان يالولي
قال تعالى :"وَلَا تَزِرُ وَازِرَةٌ وِزْرَ أُخْرَىٰ ۚ"
وهي دي رحمة ربنا بعباده يالولي إنه يعلمهم ازاي يتوبوا فيتوب عليهم ، حاشاه سبحانه تكون رحمة في إنه يعذب حد بذنب حد تاني زي ما بيقولوا!

-طب واية دليلهم على اللي قالوه دة ؟!
دليلهم و حجتهم زي حجة صحبتك يالولي بالظبط ، حجة أطفال في إبتدائي ،مستغربين إزاي في شخص يتولد من أم بس بدون أب ، والشخص دة يقدر يعمل حاجات من خصائص الرب!

-حاجات إية ؟!
=يقدر يخلق من الطين طير مش بس كدة لا وكمان ينفخ فيه الروح فيتحرك ويطير ، ويشفي المريض لو عنده مرض البرص الجلدي ، أو يرجع البصر لشخص أتولد كفيف ، وكمان يحيى الموتى ويرجعهم للحياة"!

-طب ما دي حاجات غريبة يا ماما مش تصرفات بشر ؟!
=لا يالولي الحاجات الغريبة دي إسمها مُعجزة ، وربنا بيديها للأنبياء بأختلاف شكلها عشان قومهم يأمنوا بيهم ، سيدنا موسى معجزته كانت في عصايته وإيده ، وسيدنا سليمان كان بيكلم الطير والنمل وكان له مُلك كبير
ونفس الكلام مع سيدنا عيسى كان عنده معجزات وكلها من عند الله
ولو كل نبي عنده معجزة قومه عبدوه كان كل الأنبياء أتعبدوا من دون الله!

قال تعالى في آية ٤٩من سورة آل عمران :"وَرَسُولًا إِلَىٰ بَنِي إِسْرَائِيلَ أَنِّي قَدْ جِئْتُكُم بِآيَةٍ مِّن رَّبِّكُمْ ۖ أَنِّي أَخْلُقُ لَكُم مِّنَ الطِّينِ كَهَيْئَةِ الطَّيْرِ فَأَنفُخُ فِيهِ فَيَكُونُ طَيْرًا بِإِذْنِ اللَّهِ ۖ وَأُبْرِئُ الْأَكْمَهَ وَالْأَبْرَصَ وَأُحْيِي الْمَوْتَىٰ بِإِذْنِ اللَّهِ ۖ وَأُنَبِّئُكُم بِمَا تَأْكُلُونَ وَمَا تَدَّخِرُونَ فِي بُيُوتِكُمْ ۚ إِنَّ فِي ذَٰلِكَ لَآيَةً لَّكُمْ إِن كُنتُم مُّؤْمِنِينَ"

=بإذن مين يالولي ؟!
-بإذن الله
=لو ربنا ما أذنش ؟!
-ماكنتش هتحصل.
=يبقى كدة سيدنا عيسى مين ؟!
-عبدالله
=برافو ياقلبي، ودة نفس الكلام اللي قاله سيدنا النبي لأهل نجران

فلما سمعوا رد النبي ، قالوله :"فهل رأيت مثلَ عيسى، أو أنبئت به"؟!
(سمعت عن شخص اتولد بدون أب زيه أو أنبئت به في القرآن)؟!
نفس الإستغراب ونفس السؤال ازاي شخص هيتولد من غير أب!

فأنزل الله آية٥٩ من سورة آل عمران على سيدنا النبي للرد عليهم

فقال تعالى :"إِنَّ مَثَلَ عِيسَىٰ عِندَ اللَّهِ كَمَثَلِ آدَمَ ۖ خَلَقَهُ مِن تُرَابٍ ثُمَّ قَالَ لَهُ كُن فَيَكُونُ"

الله خلق سيدنا آدم من غير أب أو أم ودي حاجة أعلى من خلق سيدنا عيسى من غير أب بس ، وسبحانه كما قَدر على خلق آدم من غير أب أو أم  قادر سبحانه على خلق عيسى من رحم أم فقط بدون أب!
فهمتيني يا لولي❤

#أسباب_نزول_آيات_القرآن🌻🌱
الشير مفتوح وهو الأفضل يا حبايب ✋❤

علمنا الله واياكم😍
#هبة_شلبي