《8》
مصعب : انتي مطلوبه .. زوجك مقدم فيك بلاغ انك سارقه منه فلوس و هاربه و الشرطه تدور عنك ..
ليلى بصدمه : شنوو..
مصعب : اللي سمعتيه ..
ليلى بدون وعي منها : الحقير ..اللئيم ..الكلب .. خلاص مش حنقدر نروح .. خلاص حنكمل حياتي و اني نهرب و ندور في الشوارع .. خلاص معادش بنشوف ماما .. معاد بنروح ...
حطت يدها على وجهها و قعدت تبكي .. مصعب قعد يسمعلها و يسوق بسرعه ... لين بعد عن السفاره بمسافه طووويله .. درس سيارته في موقف سيارات و قعد يشبحلها و هي تبكي ...
خلاها لين تكمل ... بعدين تكلم ..
مصعب : احكيلي قصتك ..
ليلى سكتت ..
مصعب : ضروري تحكيلي قصتك .. اني محامي و اكيد حنساعدك ... لو حكيتيلي قصتك حنقدر نطلعك من اللي انتي فيه ..هروبك هذا يأكد التهمه عليك .. احكيلي يا ليلى .. نبي التفاصيل كلها مش رؤس أقلام ..
ليلى تلفتت للروشن و بدت تتكلم ..
ليلى : كنت عايشه اني و ماما و خوي و مرت خوي .. كانو خوي و مرته يعذبو فينا اني و ماما كنت ديما نوقف في وجههم و ندافع عن ماما ..
لين جت سلوى مرت خوي و تقدملي خوها وسام .. و قالولي انه كويس و خلوق .. خوي وافق بلا حتى مايشاورني .. قلت بما انه كويس حنوافق باش نطلع من جحيم حوشنا و نطلع ماما معاياا .. وافقت و تم الفرح كان في البدايه معاي كويس بس لما سافرنا لندن ..تغير 180 درجه ....
سكتت ليلى قعدو دموعها ينزلو ..
ليلى : طلعو يكذبو عليا ما بيجيبولي ماما...واكتشفت انه سكار مايعرفش ربي .. كان يضرب فيا كان سادي ..
كل شي بالضرب بالاهانات اخر مره كان يبي يقتلني بس ربي كتبلي عمر .. و اكتشفت انه مدمن مخدرات .. كان يجيب في البنات للحوش .. كنت نسمع في كل شي .. تعذبت يامصعب .. كرامتي انهانت ..نفسيتي اتدمرت .. مالقيتش حل الا اني نهرب .. ساعدتني كيتي صديقته و هربتني .. هادي لو يطول بيا الزمان ولا يقصر مستحيل ننسى فضلها ...
شبحت لمصعب لقت عيونه شاعلات نار .. استمرو يشبحو لبعضهم .. لين تلفت مصعب لقدام يفكر كيف بيطلعها من الموضوع ...
مصعب : انتي اول شي ضروري تطلقي منه ..
ليلى : ياريت .. لاني معاد نبيه مستحيل نرجع نعيش معاه .. نموت ولا نرجعله
مصعب شبحلها : ولا اني بنرضى ترجعيلا ..
ليلى شبحتلا باستغراب ..
مصعب : بس تهمة السرقه ضروري تسقط عنك .. حنقعد ورا الموضوع لين نظهر برائتك .. بس نبيك تسمعي كلامي و توثقي فياا ..
ليلى سكتت تفكر .. حاسه بالخوف معاد عندها ثقه بحد ..
مصعب فهمها من نظرتها وقال: ماتخافيش .. انتي معايا في أمان ..
ليلى : وسام لئيم مانبيش نجيبلك مشاكل ..
مصعب ضحك ..
ليلى شافتلا حست بالاستفزاز : علاش تضحك ..
مصعب : وسام بالنسبه ليا حشره مايسواش .. اني وقفت في قضايا عصابات كبيره وسام هذا مايجيش ربع نقطه في بحرهم .. ماقدرش واحد فيهم يأذيني .. خليك واثقه فياا .. و خليك معاياا..
YOU ARE READING
الهاربه
General Fictionعندما تفرض عليك الحياة واقعاً لا تريده ، إما أن تستسلم ، أو تفعل مثل ما فعلت ليلى ...!
