تسالمو وسدو الخط باوعلي الشيخ وكال ..
- مادري ليش كلبني حاسني النه غير اتصال
-ان شاء الله الاخير
ثاني يوم الظهر بعد الغدا جنت بالمطبخ
وصاحني الشيخ .. كالي عوفي الي بيدج
واصعدي ..
صعدت وراه وهو بيده التلفون كالي ..
- هذا ابو سالم يتصل
اكعدي نسمع شعندو
قفلت الباب وكعدت وهو فتح خط ..
- ها يابه السلام عليكم
- عليكم السلام والرحمه
- شلونك ابو جراح شلون الصحه
- الحمدلله بخير
- يابه عندي سالفه طويله وياك عندك مجال نحجي لو غير وكت اتصل
- لا يابه اسمعك تفضل
- اسمعني ابو جراح هالحجي اتمنى يضل بينه ليوم الممات لان اني ما فاتح كلبي لاحد وكل اهلي همه مسيرين عندي كلشي بحساب محسبلهم ومايعرفوه واريده يضل ماينعرف
- ان شاء الله يا يابه ما تبدر منا الزله بحكك
- كلك اصل ياابو جراح .. اني احجيلك سالفتي وبعدين اكولك ليش حجيتلك هالحجي
وطولت وياك
-زين اسمعك
- يابه اني جنت ضابط مخابرات بزمن صدام من عمري ١٨ سنه عشت متطبع باطباع شغلي حتى بين اهلي ما اظنك ماتعرف شلون اطباع المخابرات بذاك الزمن تعرفهم بعد
الخيال الي يمر منهم يشكون بي ويصنفوه منين مامنين
- اييه يابه معلوم
- اي قبل هالحجي اني جنت بعدني بالانبار
بحديثه احنه من الحقلانيه شمر احنه ماكولك بيت فلان وفلان لان ماضل الي يسوا حتى نذكره ، المهم من جنت بالانبار جنه عايشين بخير واملاك وصيت و ولد عشيره معروفه
خيرنا مغطي الركاب ، اني عندي بوكتها
خمس اخوه ٣ اكبر مني وواحد اصغر مني
بليله سوده تعارك اخويه الجبير ويه واحد
من ولد الجغايفه صبحنا الصبح كبل مانحط لكمه الريوك بحلكنا اخويه انكتل واجتنه الناس تتعايط الحكو فلان كتل اخوكم خلاص
اخوي الثاني اخذ سلاحو وطلع وابوي وعمامي كلها تسلحت وطلعت وصار المشادد بالحجي بين العشيرتين وانقسمنه بين الي يلاحك الكاتل وبين الي يدفن ويحضر الفاتحه
فضت الفاتحه والكاتل اهلو ماينطوه
اهلنا دمهم حار على اخونا وراح اخوي الثاني حرك كاع تابعه الهم قريبه من بيت الكاتل بساعتها اخوي وولد عمي بس طلعت سيارتهم ماعبرت الفرع الا وطبكت عليهم سياره ثانيه وخرطتهم وتكتلو بمكانهم اثنين من ولد عمي واخوي
صار شكد راحولي اربع زلم يهزون الكاع بمشيتهم اربع زلم باسبوع واحد تذبحو غدر
-لا اله الا الله ربي يرحمهم ويجعل مثواهم الجنه
- ويرحم موتاك ياخيي .. هنا صار بينا فصل حتى نوكف هدر الدم اني كلتلهم حك ٣ زلم
اخذوه فصل بس حك اخويه الجبير دم بدم
ما رضو اهلي نص الي موافقني ونص الي يريد يسد السالفه خاف تجر الدمايه بعد
وعبرت الاربعين لاخوتي واشوف كتال اخويه الجبير كدام عيني يتمشى بكل دم بارد
وهو اني هالمده كلها ادور عليه ويكولون اهله شردوه وسفروه بره وشفته بعد ما ضل عقل براسي فزعت ولد عمي واخذت سلاحي وطلعت هداد على بيتهم عرضولي الحريم
وكتها وتراجعت مادخلت البيت وكفت بالباب
ودكيت بيتهم خرطته بالسلاح وضليت لليل انتظرت يطلع لحد ماتجمعو ولد عمه وصار بينا حجي وكلتلهم ما يصبح الصبح اذا مو هالكاتل مطمور بكبره ولو اعرف اذبح عشر زلم حتى اصله هم اذبح ما يرفلي جفن
همه زامطو وواحد منهم سحب سلاحه علينه
ضرب رجل ابن عمي واني رديتهه اله بصدره من ساعتها اشتغلت حرب بينا
تصاوب الي تصاوب منا ومنهم
بس واحد منهم حط علينه يمن الله نوكف الدم وهو يجيب النه الخاتل جوه وضام راسه
وراح جابه سحل واجه بالعجل كتلته بكاعه
بدون ولا كلام .. خصلنا هنا كلمن رجع لبيته
YOU ARE READING
حديثتي الشقراء
Romanceليست مجرد سطور .. انها رواية خلود .. حكمه ومبادىء .. روايه يحتاجها من هم في أوج الشباب تجسيد لمعنى كلمه ' قدر ' حديثتي الشقراء .. خالده عصرنا الالفيني الغلاف من صديقتي الغاليه Marwa-Albidhani ✨..
