بصعوبة ناضت دينيس ما باغياش تمشي و تخلي بلاصتها جنب البحر...المكان الوحيد اللي كتحس فيه أنها فعلا عايشة...ناضت و هي ساخطة مفقوصة و حاسة بنار الغيرة شاعلة فيها...كتحاول تخبيها لكن كل تصرفاتها كتأكد العكس...خصوصا ملي كتخايل فهد و اشراق معانقين و فنفس الوضعية اللي شافت فيها أسمر!!! باغا تكددب أحاسيسها و تقنع راسها ان فهد ماشي بحالهم و ما يمكنش يرضخ للنزوات دياال إشراق و أنه من نهار شافتو و هو واقف بجنبها...مستحيل يضعاف قدام إشراق و يتخلى عليها....كانت محتاجة للأمان ...محتاجة تعنق فهد و تحس بحمايتو ليها... ركبات وراه فلموطور و تخشات فيه بحال شي بنت صغيرة...خدها وصدرها على ظهرو...كتحس بنبضات قلبو و بحرارة جسمو و العطر اللي كيزيد ينعشها و..يسحرها!!! وصلوا فالوقت للفاك و هي ماسخياش بداك العناق...ما كرهاتش الرحلة تطول إلى ما لا نهاية و لكن لكل شيء بداية و نهاية!! نزلات و هي كتشوف واش إشراق واقفة كتسناهم...كان مجرد فضول....الساحة كانت خاوية تقريبا كلشي دخل بقاو غير هما بجوج...اتاجهوا مباشرة للقاعة. كيف العادة اختارت انها تجلس القدام و مامسوقاش للنظرات ديال الطلاب... أما فهد فضل يمشي يجلس اللور. ربع ساعة بعدما بدا الأستاذ الشرح ديالو جاها الفضول تشوف أشنو واقع اللور!! و ياريت ما دارت!!! لقات إشراق لاصقة في فهد و بلباسها الفاضح...صاية ميني وفخادها لاصقين فخادو....!!!زعما غتكون هاذي بداية و تمهيد لما هو أكبر و أن فهد ما وفاش بوعدو? دورات دينيس راسها بالعرض البطئ...ما بقاتش قادرة تركز..كلشي كيبان ليها ظلام..حالتها النفسية الله اللي عالم بيها.. تفقصات لواحد الدرجة ما كتصورش...حطات لاجوندا فوق الصاك و بدات تعض فظفارها...و كتقول مع راسها: لا ما يمكنش يعاملني هاكا!!!لا هذا غير تمثيل...قصدو يلعب معاها حتى ينفذ داكشي اللي قاال!!! بالرغم انها حاولات تصبر راسها بهاذ الإحتمالات بقات نار الغيرة شاعلة و ما بغاتش تطفى.....
دينيس: اتقي الله أ دينيس راه مابيناتكم والو باش تغيري!!! عنداك تكون طحتي فيه!!!! راه بحالو بحال اسمر!!!
دوزات دينيس الحصة كاملة و هي كتحاول تصبر و تهدن راسها بحال شي هبيلة بحركاتها و نظرات عينيها... بقات على هاذ الحال حتى سالات الحصة. جمعات حوايجها و خرجات بالزربة باش ماتشوفهمش بجوج و لكن شكون خلااك?
لالة إشراق حالفة حتى تفقص دينيس....
إشراق: حبيبة دينيس
دارت عندها دينيس دايرا ضحكة صفرة و تمات راجعة عندها...
دينيس: وي إشراق?
إشراق: بغيت غير نعرفك على حبيبي الجديد.. فهد!
شافت فيه بنوع من الإزدراء و مدات ليه يديها
دينيس: مشرفين فهد و نتمنى تكمل سيمانة!!!
فهد كيدوز قدامو السيناريو كامل و تصدم من جرأة دينيس و بالضبط فهاد اللحظة ما توقعهاش منها..
YOU ARE READING
أحببته في حلمي ❄️ مكتملة❄️
Fantasy❄️مقطع تشويقي❄️ .....برد مختارق أجسامهم لي ملتحمة صدفة....قلبهم كيضرب بشكل مفزع...كيخلي الخوف يسيطر و يلعب بيهم كيف بغى...... كيخلي الكلمات يتبخرو و الاحاسيس يتخباو...كيعطي نوع من الألم إلا أنه غير واضح....عينيه كيبرقو بريق غريب و ضحكتو تحكمات بطر...
