لا تترك يدي (كاملة)

الموسم الثاني - الفصل الحادي والخمسون

أعذروني يا جماعة الفصل أتنشر غصب عني من شوية وكنت لسة بظبطه علشان كدة مسحته على طول وما قدرتش أرد عليكم علشان ألحق أخلصه وأنزله لكم

****************************************************************************************************

"ماما. أنا نازل أصلي العصر. محتاجة حاجة من تحت؟"

تركت مريم الكوب الذي بيديها وشطفت يدها من الصابون وجففتها بفوطة وقالت.

"أستنى يا محمد. عاوزة أديك حاجة تديها للشيخ حسن."

خرجت مريم من المطبخ ودخلت غرفتها. خرجت من الغرفة سلمت محمد مبلغ مالي. نظر محمد للمبلغ في يديه وسأل أمه.

"مش كتير ده يا ماما؟ إحنا رمضان قرب والمصاريف كتيرة."

عبست مريم وقالت.

"أوعي في يوم تستكتر الفلوس اللي تطلعها لله يا محمد. الرسول صلى الله عليه وسلم قال: <<مَا نَقَصَتْ صَدَقَةٌ مِنْ مَالٍ، وَمَا زَادَ اللَّهُ عَبْدًا بِعَفْوٍ إِلَّا عِزًّا، وَمَا تَوَاضَعَ أَحَدٌ للَّهِ إِلَّا رَفَعَهُ اللَّهُ.>> وبعدين زي ما بتقول إحنا داخلين على رمضان والناس المحتاجة كتير."

"أيوة يا ماما. وأنا ما قولتش ما نطلعش صدقة. أنا بس بقول أن المصاريف كتيرة علينا وزي ما بيقولوا اللي يحتاجه البيت يحرم على الجامع."

أبتسمت مريم لإبنها وقالت.

"بقى يا محمد أقول لك الرسول قال تقول الناس بتقول. مين اللي نسمع كلامه؟ الرسول صلى الله عليه وسلم اللي هيشفع لنا يوم القيامة ولا الناس اللي لا هتنفعنا ولا هتضرنا لا دنيا ولا آخرة."

أومأ محمد رأسه بتفهم وقال.

"الرسول صلى الله عليه وسلم."

أخذ محمد النقود ودخل غرفته. نادته أمه وسألته.

"رايح فين. العصر أذن. هتضيع عليك كدة الجماعة."

خرج محمد من غرفته وأسرع للباب وقال.

"كنت بجيب حاجة من جوا."

فطنت مريم أن محمد أحضر من ماله الخاص ليتصدق به وأبتسمت برضا له وربتت على كتفه وقالت.

"<<فَاللَّهُ خَيْرٌ حَافِظًا ۖ وَهُوَ أَرْحَمُ الرَّاحِمِينَ>> ربنا يبارك فيك ويحفظك يا رب."

أخذ محمد يد أمه من على كتفه وقبلها وقال.

"ربنا يبارك لنا فيك أنت وبابا يا رب."

* * *

سلم خالد وأنتهى من صلاة العشاء. دعا ربه وختم صلاته. لاحظ عبوس زوجته وصمتها. نظر لها متسائلاً. بلعت مريم ريقها وأجابت سؤال عينيه.

"في حاجة عاوزة أستأذنك فيها."

رفع خالد حاجبه.

"الفلوس بصراحة بتشطب. ولسة بدري على مرتب محمد وإيجار الشقة. حتى مستر دانيال أتأخر المرة ده في تحويل عمولتي مش عارفة ليه. أنا مش عارفة أعمل أيه."