كنت ماشيه زى التايهه حاسه انى شايفه ومش شايفه .. الشوارع قدامى والطريق بس مش عارفه اروح فين .. مافيش فى بالى وجهه معينه .. ملاايين الأماكن ممكن اروحهها .. بس .. بس ..
حاله من الملل والخمول مسيطره عليا مش عاوزه اعمل حاجه عاوزه افضل ماشيه وخلاص .. ببص فى وشوش الناس واشوف حكايات .. حكايات فى عنيهم فى تجاعيدهم فى خط الزمن على جبينهم .. بعشق الحكايات .. بس مش عارفه انا ليه مش ليا حكايه .. ليه معنديش مراة أب شريره تعذبنى عشان ادور ع الأمير .. ليه ما اقابلش وحش واتأسر فى قلعته لحد ما احبه ويحبنى .. طب مش هيجيلى علاء الدين بقاا عشان يفرجنى ع العالم .. طب اعمل ايه يعنى انام واحلف مش هصحى غير لما ييجى امير يبوسنى .. احترت !!؟؟
انا هاروح اكل ساندويتش بطاطس سورى احسن .. روحت للمطعم طلبت ساندويتش ومشيت أكله وانا لسه بفكر .. انا عارفه أنه مينفعش معايا اى حكايه من الحكايات دى .. انا لو كان عندى مراة أب شريره كنت ضربتها علقة موت وكتفتها هى وبناتها وروحت الحفله بردوا عادى وما كنتش حلمت بأمير ولا غيره .. أنا اصلا لو طلعلى وحش هيقتلنى قبل انا ما احبه .. اعمل ايه مش بإيدى نفورى من الوحشيه والاشكال اللى بشعه فى الشكل أو الطبع ... ايوه بيصعبوا عليا بس دا أخرى مقدرش حتى اتعامل معاهم .. مش فاهمه انا هاعمل ايه بعلاء الدين وبساطه واناا ممكن اروح اى حته انا عاوزاها بس انا اصلاا بمل من الأماكن الجديده ومش بحب اسافر خااالص .. وبوسة ايه اللى تصحينى .. دا انا لو البيت وقع وانا نايمه هقوم ازعقلهم عشان الدوشه وانام تانى !!!! ..
صح .. انا أصلا مش بتاعت حكايات ولا بتاعت حب .. اتنهدت كتير وبصيت للسما كان فى غيوم بتحجب الشمس .. والشمس مع ذلك مصممه انها تنور ومع الصراع دا كنت عارفه أن مش هيكون فى مطر ... ما انا أصلا مش بحب المطر !!
خلص الساندويتش وانا بقعد على الرصيف وحاطه ايدى على خدى .. اوووف .. ايه الملل داا !
سرحت شويه .. لقيت حد بيحطلى حاجه فى ايدى ومشى .. اتنفضت من مكانى وانا ببص ع الفلوس اللى فى ايدى
_ استنى عندك ... انت فاكرنى ايه
لفلى بهدؤ .. وأظن أن عقله بعيد خالص عن الهدؤ داا .. فى موج من الافكار فى عنيه .. أصل انا طبعى كدا لما اشوف حد افضل ابص فى عنيه لحد ما اجيب آخره واشوف اللى جواه .. طبعا بيشوفنى بجحه .. وقحه .. قليلة الادب .. أوك .. عادى .. عارفه انى المفروض اتكسف .. بس اتكسف ازاى وانا مش مكسوفه اصلا .. هتكسف اكيد فى حاله واحده لو عنيك فيها حاجه تكسف .. ولحد دلوقتى مشوفتش الحاجه اللى تكسف !! ...
شكلى سرحت تانى عشان كدا سابنى ومشى بس على مين والله ما انا سايباك انهارده لازم اطلع مللى عليك
جريت وراه ماهو أصله كان مشى كتير .. ناديت بأعلى صوتى لدرجة أن الشارع كله بص علينا
_ استنى عندددددددك
لفلى تانى وهو مصدوم وبيشاور على نفسه
_ اناا
_ ايوه انت
مديت ايدى وفردت كفه حطيتله الفلوس فيها تانى
_ اتفضل فلوسك انا كنت قاعده بستجم مش بشحت
كان واضح أنه مزهول عنيه مفتوحه وفيها عدم فهم رهيب مقدرتش امسك نفسي ضحكت
_ ايه ي عم انت شايف كائن فضائى قدامك
_ لا شايفك انتى
_ وهو انا ايه
_ سلعوه
اندهشت من رده دا بجد ولا هزار .. ولا اشتغاله بس ممنعش روح الشردوحه اللى جوايا انها تتطلع
_ نعم ي اخويا .. سيإه .. السلعوه دى تبقى امك ي خفيف
بان الغضب فى عنيه حمم بدأت تتطلع تطلع وواضح انها هتنفجر فى وشى .. مش عارفه انا ايه اللى خلانى اقول كدا عمرى ما اتماديت فى ألفاظى وكلامى مع الغير بس المره دى مش فاهمه ايه اللى حصل .. المهم قبل الحمم دى ما تنفجر فى وشى كنت بهديها وانا برفع ايدى بإستسلام
_ أسفه .. مكنش قصدى انت نرفزتنى
اتنهد بتعب وقال وهو هيمشى
_ خلاص ولا يهمك بس خلى بالك من كلامك بعد كدا
كان فى فضول جامد من ناحيتى ليه خلانى امسك فى دراعه بلفه ليا
_ مالك
رفع حاجبه بطريقه خلتنى هموت واضحك بس مسكت نفسى .. عاوزاه يطلع اللى جواه
_ تسمحلى اعزمك على مانجا
حواجبه الاتنين اترفعوا لفوق .. فظهرت ضحكتى على وشى وهو بيسألنى بإستغراب
_ هو مش المفروض الناس بتعزم بعضها على قهوه
نفس الفكر العقيم اللى عند كل الناس .. ليه القهوه يعنى بالذات .. ايه المميز فيهاا عشان تنو.ل الشرف دا فى التعامل بين الناس .. ليه يعنى لما واحد يحب يعزم واحده ويتعرف عليهاا يعزمها على قهوه .. مع أن لو حد عزمنى على مانجا انا مش بس هتعرف عليه دا اناا مش بعيد ابات فى حضنه والله
بصتله كان لسه بيبصلى ومستغرب .. وواضح ان حالة الذهول والكأبه دى مش هتروح بسهوله
_ يالا بينا هعزمك على مانجا
مشى جنبى وكان لسه واضح عليه الحيره وكأنه بيسأل نفسه هى مين دى وانا رايح معاها ليه .. عنده حق ما انا كمان مش عارفه انا عزمته ليه يمكن عشان فضولى ولا عشان حالة الملل اللى انا فيها
قعدنا فى كافيه هادى زى ما اناا مش بحب ..اه والله مش بحب الهدؤ بس اعمل ايه الحاله اللى هو فيها دى ميمشيش معاها غير هدؤ ويارب يقدر اللى انا بعمله عشانه
طلبت مانجا لينا احنا الاتنين وهو لسه ساكت .. شكله هيتعبنى معاه
_ ها ي سيدى .. مالك احكى .. متبصليش كداا يمكن تلاقى عندى الحل للى شغلك .. قول
وكأنه كان مستنى إشارتى .. اتكلم بسرعه كأنه خايف تروح شجاعته أو انا أجرى واسيبه
_ شغلى بيخسر وقريب هفلس وحبيبتى مش بتحبنى وصحابى وعيلتى سابونى لوحدى
رجع اتنهد تانى وهو بيسند على الكرسى بتعب وبيأس سألنى
_ عندك حل
وبكل عفويه وحماس جاوبت
_ طبعاا عندى الحل
اتعدل فى الكرسى وبصلى بإهتمام
_ ايه
وبغمزه جاوبت
_ اشرب مانجاا !!
**************************
كملت جرى على السلالم وانا بعدهم وبحسب الوقت هما اصلا دورين وكنت عاوزه أخدهم فى دقيقتين بالظبط بس للأسف الدقيقتين لقيتهم عشره .. يالا مش مهم هعوضهم يوما ما .. ما انا فاضيه بقاا
كملت استمتاع بالايس كريم اللى كنت باكله لحد ما لقيت قدامى الباب اللى المفروض كان لشركه بس واضح حاليا أنه باب لخرابه !
دخلت بهدؤ مش عشان دى طبيعتى .. أبدا دا بس عشان مستمتعه بالايس كريم .. كان قاعد فى اللى المفروض كان مكتب بس أنا مش شايفه غير كومة أوراق وبس
هو شكلا حلو وواضح أنه عنده حس فكاهى هيطلع على دماغى بس لما يفوقلى أنا عارفه .. عنيه بُنى .. شعره جميل وناعم أسود ذى الدقن الخفيفة اللى عنده دى جسمه فى العموم حلو .. بس استايله .. لاا مش حلو .. معجبنيش .. خلصت الايس كريم وبصتله كان لسه دافن وشه فى الورق اللى قدامه مش فاهمه يعنى هو لما يعمل كدا هيلاقى الحل طالعله من الورق يسلم عليه .. ضحكت وانا بتخيل المنظر .. وطبعا ضحكت الرقاصات اللى عندى مش هتفارقنى لازم تيجى وتسلم على أى حد اتعرف عليه .. بصلى بذهول واضح أنه هيلازمه طول ما احنا نعرف بعض .. صحيح أنا اللى عرضت عليه أساعده فى حل مشاكله وهو وافق من مبدأ ما هى كدا كدا خربانه .. بس أنا لازم اثبت نفسى واساعده .. واهو تحدى بينى وبين نفسى أما نشوف مين اللى هيكسب أنا ولا نفسى .. صحيح أنا ونفسى واحد بس فى الحاجات دى اتنين معلش ....
قعدت قدامه
_ يالاا عشان نبدأ
رفع نفس الحاجب وهو بيبصلى بإستفهام
_ إنتى مين
مش باين عليه أنه عنده فقدان فى الذاكره .. يعنى اكيد اشتغاله
_ امك
بينرفزنى وبعدين يزعل
_ أهدى ي كبير أسفه .. مقصدش .. انت اللى بتسأل أسأله غير منطقية .. ايه انا مين دى .. لحقت تنسى المانجا ي مانجا
حاول يهدى نفسه وهو بيسألنى تانى
_ قصدى اسمك ايه .. وانتى مين وعاوزه تساعدينى ليه وكداا .. معلش أنا لازم اطمن .. مش يمكن تطلعى من المنافسين
المره دى انا اللى رفعت حاجبى وكان نفسى أشوف شكلى ما انا مش دايما بعرف ارفع حاجب واحد
_ أنت اصلا ليك منافسين
_ احم .. لاا
الحمدلله طلع اهبل .. مديت ايدى اسلم عليه وانا بعرفه بيا
_ أنا فرح .. فرح المنصورى .. خلصت دراسه من سنه تقريبا ومافيش داعى تسألنى كنت بدرس ايه .. ويساعدك عشان انا حابه اساعدك .. وببساطه اكتر تقدر تقول عشان مش لاقيه حاجه أعملها
رفع حاجبه تانى .. واضح أننا مش هنشتغل احنا هنقعد هنا ونشوف احسن واحد يرفع حاجبه
_ يالاا نبدأ ونشوف هنعمل ايه
فجأه لقيت قدامى ورق كتير وبيطلب منى ادرسه واشوف هعمل ايه وايه الحلول من وجهة نظرى .. اممم .. شكلى لازم اعمل كل حاجه بنفسى ..
_ قوم ي أستاذ .. خلينا ننضف المكان الأول
_ مافيش داعى ... مفيش غيرنا هنا ومحدش هييجى
_ اذا كان حضرتك معندكش مشكله مع القرف أنا عندى مشكله .. ننضف وبعدين نشتغل
بدأنا تنضيف .. ما هو أنا يستحيل اقعد فى مكان مش نضيف هو اه مش هوس بالنضافه .. بس كمان مش بحب القذاره اطلاقاا ..
مافيش موظفين .. كلهم مشيوا عشان معندوش فلوس يديهم مرتباتهم .. كان مشروع شركه بس من الواضح أنه فشل .. المكان مافيهوش حياه .. فبالتالى مفيهوش اى ابداع أو ابتكار .. أصل الحياه إبتكار .. لو مافيش حياه مافيش حاجه خاالص !
تعبنا اوى فى التنضيف ... تقريبا اخدنا نص اليوم وبعد ما خلصت كنت بظبط هدومى عشان امشى بس مش عارفه هو استغرب ليه
_ انتى رايحه فين
_ ماشيه
_ لا والله .. هو انتى كنتى جايه تساعدينى فى التنضيف بس
شكلى لازم اشرحله كل حاجه
_ أنا مش بشتغل وانا تعبانه أو مرهقه .. ومش بشتغل تحت اى نوع من الضغوط .. ونصيحه منى خد شاور ونام شويه .. واصحى اتفرج على اللى احنا عملناه فى المكان .. عشان زى ما رتبناه إن شاء الله هنرتب حياتك
_ ازاى
لفيت ومشيت خطوتين .. ما انا بصراحه معرفش ازاى .. مافيش فى دماغى خطوات ثابته نمشى عليهاا عشان ننجح .. بس كمان عندى يقين من جواياا اننا مش هنفشل .. وعشان كدا جاوبت عليه بكل هدؤ .. الحل العبقرى عندى لأى أزمه
_ اشرب مانجاا
سيبته ومشيت .. أنا مرهقه .. مش بحب اعمل اى مجهود .. مش حكاية انى دلوعه .. بس كمان شايفه أن مافيش حاجه تستاهل اجهد نفسى عشانها .. اتمشيت لأخر الشارع .. بشوف الوجوه والأشخاص نفس أعرف حكايتهم .. هو فضول والله مش أكتر يمكن اقدر اساعدهم .. بس عارفه أن أغلب الردود هتتلخص فى كلمتين .. " وانتى مالك "
هو صحيح أنا مالى .. بس اعمل ايه مش بحب أشوف حد مهموم .. وبعشق الحكايات
هو انا مش هيكون لياا حكايه بقاا ... سرعت فى خطوتى شويه وانا بشاور لعمو السواق يوقفلى .. سواق الاتوبيس .. الرايق اللى مشغل الست ام كلثوم وبيجبر الكل أنه يسمعها .. أنا بحب أغانى الست بس مش بسمعها زى حاجات كتير بحبها بس مش بحب اعملهاا .. كسل يمكن .. ملل أكتر .. مش عارفه بس أنا بحب كلمات أغانيها لما اسمعها صدفه فى مواصله .. أو وانا بلف بين القنوات فى التلفزيون أو المقاطع اللى ممكن تيجى قدامى على السوشيال ميديا .. بس انى ابحث عن أغانيهاا وافضل طول اللى اسمعهاا واشغل مساحة التليفون بيهاا .. لا مش ممكن ... بحبها زى حاجات كتير بحبهاا حبهم مجرد خاطره فى خيالى .. ركزت اكتر مع كلمات الست وهى بشجن بتقول
وأنت معاياا يصعب عليا .. رمشت عينيا ولا حتى ثانيه
وأنت معايا يصعب عليا رمشت عينيا ولا حتى ثانيه
يصعب علياا .. ليغيب جمالك ..
ليغيب جمالك .. جمالك .. ويغيب دلالاك
اه لو شويه
قد كداا مشتاق اليك ... قد كداا ملهوف عليك
وكعادة كل السواقين لازم توصل عند اجمل حته فى الأغنيه .. وانا وصلت
مشيت ادندن بالكلمات بينى وبين نفسي .. مش هنكر انهاا جميله وعندى فضول اسمع بقيتها .. يمكن احفظها واغنيها لبطل حكايتى لما ييجى .. هو مش هييجى بقاا
تليفونى رن .. نغمة الفون المستفذه .. مش بحب احط أغنيه أو نغمه مفضله لياا .. ليه بقاا لان لو عجبتنى الرنه هفضل اسمع فيها ومش هرد .. فرفقا بحال المتصل بسبب نغمة الفون المستفزه عشان ارد
فتحت الخط وانا بسحب نفس طويل عشان اقول بأنعم صوت عندى
_ الو
وقبل حتى ما الحق أعجب بصوتى اللى طلع دا لقيت الموكوسه "نجلاء" صحبتى بتصرخ وتقول
_ الحقينى ي فررررح ... انا فى مصيبه
***********************
كلام كتير قالته مكونتش انا منه جمله مفيده .. فمكنش قدامى غير انى اسكتها وانا بقول
_ خلاص اقفلى انا جيالك اهو
قفلت معاها وغيرت اتجاهى ناحية بيتهاا .. هى مش بعيده .. مواصله كمان بس .. وعشان انا مؤدبه كان لازم اتصل بيهم فى البيت اقولهم انا رايحه فين
_ الو ايوا ي ماما .. اه انا خلصت شغل ... مكنش فى شغل كتير .. اول يوم بقا وكدا .... بقولك ي مامتى انا رايحه عند نجلاء صاحبتى شويه ... اصلها تعبانه ونسيت ادويتها معايا فهروح اديهالهاا عشان تعبانه اوى .. حاضر مش هتأخر .. سلام
كدبه صغيره مش مشكله .. حتى لو كلفتنى انى هدخل فى تحقيق لما ارجع البيت .. نجلاء تعبانه عندها ايه .. وازاى نست ادويتها معايا وانا مشوفتهاش من شهر .. وغيره وغيره بس أن شاء الله هبقا اطلع من كل الاسئله دى بكدبه تانيه صغيره
كنت وصلت بيت نجلاء .. رنيت عليها طلبت منى ادخل .. جوزها مش جوه .. ماهى عرفانى بتكسف ومش هقدر ادخل طول ماهو جوه .. وش كسوف انا اوى
_ خير ي نوجا فى ايه
اترمت فى حضنى وهى بتكمل عياط بشحتفه
_ بيخونى ي فرح .. على بيخونى
لويت شفايفى .. وايه اللى يعيط فى كدا .. ما فى داهيه
_ أهدى بس ي حبيبتى .. وقوليلى ايه اللى حصل .. دا اكيد شيطان ودخل ما بينكم
_ لا مش شيطان انا شوفت بعنيا
فتحت موبايلها على صوره واضح انها كانت يشوفها قبل ما اجى .. كانت صورة على جوزها وبنت حلوه جنبه .. هى مش حلوه بس .. هى حلوه اوى اوى كمان .. بس كانت ماشيه جنبه واضح انها كانت ماشيه معاه أو ماشيه جنبه صدفه وهما بيعدوا طريق بس اللي صور صور صح .. جايب حلاوة البت وهى الصراحه حلوه ولا حلاوة المولد
_ شوفتى ي فرح .. شوفتى
_ اه ي اختى شوفت .. شوفتى انتى البت حلوه ازاى دى صاروخ .
_ اه شوفت .. وشوفت البيه وهو ماشى جنبها وهو مبسوط بحلاوتها اوى
_ لا ولازق فيها .. مافيش حتى هوا بيعدى ما بينهم ... لا وشوفتى شعرها الاصفر دا .. تفتكرى طبيعى ولا صبغه
_ انا فى ايه ولا ايه ي فرح .. بقولك البيه بيخونى تقوليلى صبغه
لويت شفايفى بزهق .. البت دى ي غبيه ي غبيه
_ خلاص قومى لمى هدومك وسيبيله البيت وانا هرفعلك قضية خلع ويطلقك .. اه
_ بس أنا مش عاوزه اطلق
يعنى اضربها دى ولا اعضها .. معلش هستحملها صحبتى بردوا
_ ومش عاوزه تطلقى ليه .. مش هو خاين .. سبيله البيت خليه يتذللك لحد ما توافقى ترجعيله عشان يعرف قيمتك
كانت بتهز دماغها بتنفى كلامى .. انا عارفه انها هترفض هى اجبن من أنها تعمل كدا
_ ايه .. مش عاجبك كلامى طبعا .. ما انتى عارفه انك لو سبتيله البيت هيقول الحمدلله ويرقص عشره بلدى من الفرحه .. عشان خلص من النكد بتاعك .. ي حبيبتى انا عارفه انك بتحبيه .. بس الحب لوحده مش كفايه مينفعش تكونى بتحبيه وليل نهار بتنكدى عليه .. مينفعش تكونى بتحبيه واول ما حد يبعتلك صوره مالهاش اى لازمه وممكن متكونش ليها اى علاقه بجوزك تشكى فيه وتتهميه بالخيانه .. مينفعش اصلا تكونى بتحبيه وتوصلى نفسكم لمرحلة أن حد يراقب جوزك ليل نهار عشان يسك عليه غلطه يفرقكوا بيها وهو عارف أنه هينجح .. مينفعش ..
_ طب اعمل ايه
_ قومى استهدى بالله كدا البسى حاجه فشتشى وحطيلك شوية احمر واخضر وامسحى الصوره دى .. واول ما جوزك ييجى اشربى انتى وياه مانجا وادعيلى
مشيت من عندها وانا شبه متأكده انها هتسمع كلامى اصل نجلاء من النوع اللى بيتأثر اوى بكلام الغير عشان كدا رنت عليا هى كانت عارفه انى هقولها انك غلطانه والشويتين دول فاستنت .. انما لو كان عندها شك انى هصمم أن جوزها خاين وأنها لازم تسيب البيت مكنتش هتكلمنى ابدا .. عشان كدا مكلمتش حد غيرى .. كنت بعدت عن بيتها كفايه .. فطلعت فونى رنيت على رقم .. ولو ركزتوا شويه فى الرقم هتعرفوه ايوا هو رقم على
_ ايه ي عم .. شوف مين اللى بيفتش وراك وصورك انهارده وانت مع رودينا وبعت الصور لمراتك .. انا هديت الموضوع ولميته بس خلى بالك عشان المره الجايه انا مش هعرف اتصرف وممكن اوى مراتك تقفشك .. يالا سلام ..
***********************
وصلت البيت اخيرا بعد يوم طويل لذيذ .. ايام حياتى كلها حلوه ودا عن اقتناع عشان كدا مش بقدر اقول دا اجمل يوم فى عمرى ولا الكلام دا .. ايام عمرى كلها جميله
_ اخيرا جيتى ي اخرة صبرى
نبع الحنان امى ... بتعشقنى الست دى اوى
أنت تقرأ
طبيبة القلوب
General Fictionسارت فى الارض بفرح ومرح تداوى القلوب .. كل القلوب .. وما كانت تدرى بذاك الالم الذى كاد يفتك بقلبهاا .. وعندما علمت به هل ستعرف كيف تداويه أم أن ذلك أكبر من قدرتها
