مالي وطن في نجد ألا وطنها

8

البــارت الثــامن >
.
.
.

.................••............
بعد صلاة الجمعه في الرياض في بيت ابو نجد
عند نجد للي كل ما تذكرت هايف على طول شالته من بالها بأي فكره وخصوصاً انها مقهوره منه دق تلفون البيت وراحت ترد
نجد : الو
نجد : الو
هايف اللي حاس ودور رقمهم لين انحاس مخه واول ما سمع الصوت اوجعه قلببه وارتبك : الو
نجد فز قلبها بس قالت ( خبله انتي واضح انتس انهبلتي كل صوت تسمعينه تحسبين انه هو ): من معي
هايف: نجد شلونتس
نجد : من ؟
هايف اللي تردد كثير انه يدق بس ما معه حل الا انه يضمن نجد بصفه على الاقل : مدري اذا تعرفين الليل !
نجد اختبصت ولا شعوريا قالت : وش تبي ولا ما لقيت فالدمام شي يلهيك
انصدم هايف من هالكلام ماعرف يصنفه عتب ولا وشو واصلا وش عرفها انه بالدمام : هاه ؟؟
نجد انتبهت لنفسها وسكتت بس صفقت السماعه اول ما دخل ابوها
ابو نجد : وش عندتس
نجد : انظف التيلفون
ابو نجد : روحي سوي لي قهوه
نجد : طيب
هايف اللي كان تحت شعور الصدمه مب معقول ان نجد تدور على اخباره وليه قالت هالكلام وهل هي فعلا تحبه صحى على صوت متعب اللي جلس جنبه : ويين وصلت يالهيمان
لف هايف بقوه عليه : وش هيمانه ؟
ضحك متعب : ابد سلامتك
كانوا جالسين يتغدون عند البحر الجو حلو ومقبل ووليد يتهاوشون على الغداء كيف بيحطونه
ومشاري وسعود جالسين يلعبون العيال وبعد شوي اجتمعوا على السفره
مقبل : هايف يا رجال اكل وش بلاك ضايق والله تشوفك امك لتقول عايش بمجاعه
وليد: الله يرزقني نحف هايف في ذا الاسبوع بالله عطنا الطريقه جيتنا منتعم ماشاء الله والحين ثوبك يدخل معك 10
ضحك هايف: والله ابد وضعي طبيعي
سعود : وين يا رجال وانت ساعه معنا و23 ساعه سرحان
متعب : اللي يحب دايم حاله كذا لا يكون تحب بس
هايف : لا بس حنيت لديره وجمعة الديره وجمعة اهلي جوكم يا اهل المدينه غريب مهما كان متطور وحلو
مثلاً فالديره حنا نصحى بدري من الفجر كل الناس صاحين تصحى على ريحة فطور امي وراديو ابوي على اذاعة القران وريحة العود اللي فالبيت وبعد شوي يجتمعون الديره كلها في مجلس الشيخ يتقهوون ويشوفون اوضاع القبيله المحتاج يساعدونه والمديون يقطون معه ومن الساعه 11 الكل يصير بالمسجد بين قاري قران وبين اذكار وبعد الخطبة والصلاه عاد يبدا العطاء وكل واحد من بيته يطلع شي لجاره من غداه ولا تشوف الا بزارين يلفون بالصحون
وهذا اللي تعودت عليه ما تعودت اجلس بين جدران كذا
ابتسم مشاري الحزين : بعيد عن حنين الديره طلبتك يا هايف لا تضيع حب واهتمام اخوانك اشوفك من يوم تصحى لين تنام وجوالك ما يوقف رغم ان جوالك بسيط بس الحب اللي يوصله كبير هاذي نعمه غيرك فاقدها ، شوف هاذي جوالتي 3 من احدث مايكون واخواني 12 بنات وعيال الاتصال مفتوح والنت مفتوح وكل طريقه توصل الاخبار موجوده فيه بس مافيهم اي واحد يرسل الا كل شهرين ويرسل يبي شي ما يرسل يتطمن في المناسبات يتذكرون ويرسلون ام واب منفصلين مايدرون وين الدنيا
ابو لاهي مع زوجته وام لاهيه مع رجلها مافيه اي شي يجمعنا عشان كذا بطلبك قد ما تقدر لاتضيع هاللي بينكم
هايف ضاااق من كلام مشاري وحزن وقال وليد : خلهم يا مشاري على الاقل عايشين وعلى الاقل تذكر ان لك اهل اذا جاء يوم من الايام واحتجت اكيد بيوقفون معك لكن اللي فقد ام واب وش يسوي !؟
مقبل:افا بس وش ذا الحكي حنا اخوانكم واهلكم كلكم مايفرقنا شي
متعب : اييه لا تضيق ولا تزعل
مشاري : كيف بزعل وانتم معي
هايف ابتسم وهو يشوف صحبتهم وابتسم انه بينهم
مقبل :اقول هايف !؟
هايف: قول
مقبل : يعني ادري انها لقافه بس امس حصلت ورقه طايحه جنب ثوبك وتوقعت منها انك شاعر ولا !؟
ضحك هايف: كشفتوني يعني
متعب: والله اني داري هالسجات مب لله
مشاري : ايه ايه ابي يصير صديقي شاعر يفضفض عني وعنه
وليد : اذا ما عندك مشكله قلنا قصايدك ترا مشاعرنا جياشه
سعود : والله من عيونك واضح انك شاعر جبار
هايف: لا يا رجال وين!
مقبلل: والله انك جبار خل عنك ولا هاللي تكتب فيها ملهمه جباره
ناظره هايف بحده وضحكوا متعب: اقولك تحب ماتطيع اسألني واعلمك
مقبل: امززح معك بس اسمح لي بعلمهم بالقصيده
هايف ابتسم بإحراج: علم علم
مقبل وقف وهو يتنحنح : والله مدري كيف الالقاء بس ان شاء الله نفس المشاعر
مشاري: بتخربها والله
مقبل: يا ليتك تسكت
الكل:ههههههههههههههههههههههههههههههههههههههههههههه ههههههههههه
مقبل :اسمعوووا
(‏كثر ما احن لك و احن ل الماضي
‏سلام الله عليك .. إن كان ما سلمت ‏
تمر ايامي الحلوه على الفاضي ‏
وتمر ايام .. لاترسل ولا كلمت،
‏تحسب إني على كثر الزعل راضي
‏وأنا زعلان لي مده .. ولا علمت)
مشاري : اااااايه الحلاوه دي ااايه الحلاوه دي
وليد : هذا اللي بكفخه يقول ماني جبار
متعب : والله رهيب
سعود : تكفى تكفى دام انفتح باب القصيد عطنا وحده ثانيه
مشاري : ايه غزليه يعني
مقبل : لا على كيفه
هايف انحرج وهو ماوده بس مايدري وش يقولهم بس قال
(اذا اشتقنا وش نقول؟ ومن نعلم
‏يارب الناس ليه الناس في ظلمه؟
‏تعيش احلامنا ونموت نتحلم
‏وكل واحد يموت ويدفنه حلمه
‏ونظلم بعضنا ونحب نتظلم
‏مع ان اللي ظلمنا نعيش في ظلمه
‏حركات اليدين احيان تتكلم ‏
وحنا .. ماتكلمنا .. ولا كلمه)
متعب : علللمني انا علللمني
سعود: عز الله صح لسانك نموت وحنا نتحلم
مقبل : والله انك مبدع والله
وليد: صدقني يا هايف لو تشتهر تطييير تطيير تعرف وش يعني تطير
متعب : صادق والله ليه ما تفتح تويتر وتشتهر
وليد اللي اصلا كان مشهور: ما عليك انا اعلن لك
هايف: لا يا رجال مالي بذا الشغلات وبعدين انا قصيدي ما ابيه ينتشر بين اللي اعرفهم بس
مشاري : والله لو تشتهر تشهر على سنع مب ذا الفاضي
وليد: ياخي اتركي ماعليك مني
مشاري: تارك من زمان
هايف اللي كان في حضنه دحوم ويفكر في نجد ورفع راسه: احد بيروح لرياض هاليومين
متعب : لا
مشاري: انا بروح اجيب لي شغلات
هايف : اجل بخاويك
متعب: بتنزل الديره!؟
هايف: لا بخلص لي شي فالمدينه
وليد اللي فجاه صاح: يا شييينك يا مقبل
مقبل : ترا لايك لايك ما بتموت
وليد: من قال اني بحط لايك
سعود؛ وجع انت وياه وش بلاكم
مقبل : ما يتنازل الاستاذ ولا يحط لايك لمساكين للي يصممون له
سعود: الله من الفضاوه
مشاري: اي وللله
وليد : يالله منكم بس
رجع وليد بيشيل اللايك اللي يشوف انه يهز برستيجه اذا حط لايك لاحد المصممين له
.................••............
في الرياض
في بيت ابو فايز جاء فايز لابوه وجلس هو يشوف الجو هادي : ايه يبه ما بننزل ذا الاسبوع لعمي
ابو فايز :لا والله تعبت هالاسبوع خلوها الاسبوع الجاي اذا جاء هايف
لطيفه: غريبه مطلق ما توظف مع هايف
ابو فايز: مطلق غير عن هايف فيهم تشابهه بس مطلق انسان حار ما يتحمل احد يقول اشتغل وسوو وافعل ويحب يكون حر
وهايف حبيب ويتقبل كل شي ماعنده مشكله ويصبر
ام فايز: يا حليله هايف حبيب الله يوفقه مع انه ذا الايام مب عاجبني
ابو فايز : عيال اخوي على قوة ابوهم ما صاروا مثله قلوبهم رهيفه وهي اللي متعبتهم
فايز: عجزت والله في مطلق اقوله يتزوج يعيش ومعيي
ابو فايز : ما عليه مطلق ما يلدغ من جحر مرتين يبي يرتب اموره بعد طيحته لا تجيه طيحتن اقوى
ام فايز: الله يوفقه
اديم كانت تسمه بهدوء عن حب مطلق اللي الكل يشوفه وهو رافضه
ام فايز: ليتك يا فايز بدال ما تنصح الناس تنصح نفسك
فايز: اييه يمه انا تعبت وانتي تعبتي من التكرار بس ما دام هذا رايك اجل سوي اللي تبين
ام فايز انصدمت: هااه وش يعني اسوي
فايز: تبين تزوجيني زوجيني موافق
الكل فزوا اخيييرا فايز قرر يتزوج والكل استانس
ابو فايز: انت بس اشر على اللي تبيها وتم
فايز: اللي تبيها امي انا موافق
ام فايز: خلاص يعني نخطب لك ريوف
فايز: خلاص
صرخت ادديم وهي تضم فايز لان ريوف بتجي عندهم والكل يضحك بفرح
ابو فايز : اجل تم خلاص الاسبوع اللي يجي نروح لعمك ونخطب ووالله يوفقك
فايز ابتسم: امين يا رب
ما شالت الفرحه ام فايز وابو فايز اللي من حماسهم بيتفجرون وطبعا اديم اللي جيت ريوف صاحبتها عندها بالدنيا
واذا على لطيفه هي بعد راضيه لانها تحب بنات عمها اللي يازينهم .................••............
في طريق السفر
عند هايف ومشاري طلعوا رايحين الرياض وهايف اللي متكي وهو يفكر كيف يوصل لبيت ابو نجد
ماعاد يقدر وده يشوف نجد لو من بعيد
مشاري : وش شغلك يا هايف
هايف : ادور لي بيت صديق لي
مشاري ابتسم : من الديره صديقك
هايف: ايه وساكن بالرياض
مشاري : وصديقك ماتعرف بيته
هايف: ماني بجي للمدينه عشان كذا ما اعرفه
مشاري اللي فاهم وضحك: الله يا كبر حظه هالصديق اللي تعنى له من الدمام
هايف ابتسم وهو يطول على صوت المسجل اللي بطبيعة الحال يردد اغنيه في نجد
مشاري: وش لك في نجد عشان تحبها هالكثر
هايف : كل شي في نجد احبه
مشاري : حبك لديرتك غريب
ابتسم هايف على مشاري اللي ما يعرف سر نجد وبعد حوسه قدر هايف ياخذ عنوان ابو نجد من ابو تركي بدون ما يحس وراحوا
هايف : بس خلاص خلك هنا وانا بنزل
مشاري : متاكد اخاف تضيع
هايف لا شعوريا: قلبي دليلي
مشاري : يارجال قلبك حطه في جيبك لو ضعت بالرياض بجلس ادور 10 سنين ما لقيتك
ضحك هايف: هنا مانيب رايح رح انت خلص وارجع بتلقاني
مشاري : طيب بدق عليك
وهايف اللي وقف يشد جكيته على كتفه اللي باقي يوجعه وهو يناظر بيت ابو نجد اللي ماكان ابد بيت عادي يفرق عن بيوت الديره شي كبير بسرعه وخر لما طلع ابو نجد وهو ينزل راسه لسياره: مشاري لا تلفت الانتباه
مشاري : وش بلاك من ذا!؟
هايف : ياخي لا تناظر بتنكبنا انت والله ليمحطنا بالعصا اللي في يده لو شافنا
مشاري صد وهو مايدري وش السالفه ومر ابو نجد بسيارته وماركز فيهم
رفع راسه هايف : يا ذا الشايب الجاير
مشاري: وش سالفته ذا!؟
هايف ضحك : من شياب الديره
مشاري : ابو صديقك
هايف اللي استسلم لمشاري اللي ذبحه بالتلميح : ابو نجد
مشاري تنح: هاه
هايف: اعلمك السالفه بعدين روح شوف شغلك وارجع لي
مشاري وهو منلخم : طيب طيب
راح وهايف لف وهو يتلثم بشماغه ماكان يدري وش يبي بس وده يشوف نجد مايدري كيف بيشوفها وندم انه صدفها بيوم عرس شريفه وتعلق بها زود صح يحبها بس عمره ماشاف جمالها الا بذاك اليوم وهو يلف اتسعت عيونه وهو يشوف باب الحوش وردود ومن وراه صوت ام نجد تقول : غسلي الحوش زيين واسقي الشجر معتس لا يعصب ابوتس
نجد : يالتني كثر ما اسقي اسقيت زهره شبابي الميته
ام نجد بإستهزاء: فكري واستخيري
نجد : والله مالي الا استخير اشوف لي دبره بحياتي
ابتسم هايف وهو يشوفها تنظف بعصبيه
طلع ورقه وقلم من جيبه وكتب
(وانا بعد ..!
استخرت الله وبرجع أستخير
‏كان فيك الخير ما تبعد أبد ..
‏وكان فيك الشر يمحيه ويصير
‏فيك خير وما تفارقني بعد .) لفها ووقرب ورماها وسكر الباب بقوه وفزت نجد
ام نجد: من ذا !؟
نجد اللي كانت قريبب الباب وشافت الورقه واخذتها بسرعه وهي ماتدري من من: انا انا
خبت الورقه وراحت اخر الحوش وفتحتها وانلجمت من الصدمه وشهقت وركضت بتششوف من اكيد انه هايف وتتزحلق وتطيح
ام نجد: بسم للله يا خبله ،علامتس
نجد وقفت وهي تعرج بألم: المويه تعبي
ام نجد : ليت الله يعطيتس عقل بس
راحت نجد وهي يالله تمشي من رجلها فتحت الشباك وهي تلفت وشافت واحد متلثم ولابس جاكيت وجالس قريب قلبها فز لشخص وبس لا مب هايف انحف منه لكن لاشعوريا خبطت الشباك او مارفع عيونه لها وبانت من صغر عيونه انه يضحك
نجد: يييمه من ذا ، يا رب انه هايف ياويلي لو انه احد ثاني اكيد انه هايف عيونه مثل عيون هايف بس هايف بالدمام وش جابه!!؟؟ هو اليوم اتصل اكيد بيعلمني بشي وجاء عشان سكرت؟! يا ويلي ويلااه لا يجي ابوي بيذبحني ويذبحه
هايف اللي بعد ما حس انه امتلئ امل بشوفتها وقف بيروح لكن كالعاده مايمديه لف الا وسيارة ابو نجد وقفت وهو يناظره بأستغراب وعض هايف ثوبه وهج وابو نجد يناديه ويطرده مايدري كيف طلع ودخل لين ضيعه بس اكتشف انه ضاع وهو باقي يركض لف اول ماشاف السياره جات له طايره شهق بيوخر بس صكته وطاح ونزل صاحبها يركض : هااااايف
.................••............
في بيت ابو نجد
عند نجد اللي سمعت ركض وابوها ينادي وانخرشت وركضت هي بعد وطاحت وهالمره ما قدرت تقوم ورجلها توجعها : يمممه
ام نجد جت تركض: يا مجنونه وش فيتس كسرتي نفستس وش بلاتس
نجد: كنت بمر وطحت زياده
ام نجد: لا حول مدي رجلتس
نجد : يا يمه مقدر مقدر اااااه
ام نجد: يا ويلي خليني ادق على ابوتس اصبري
راحت ونجد اللي تبكي من السالفه كلها رجلها وهايف وابوها اللي كشفه
................••............
اما في احد الشوارع
هايف اللي كان طايح ويناظر : مشاااري
مشاري : وراك تركض وش جابك هنا !؟ رجلك فيها شي
هايف وقف وهو يضرب مشاري بقهر: حسبي لله عليك على كبر الرياض ما لقيت احد تصدمه الا انا اصلا ما لقيت الا ذا الحزه تصدمني بها
مشاري: وش دراني انك مثل الجني في كل مكان ، رجلك توجعك!؟
هايف وهو يعرج : لا لا
مشاري : اقول امش امش لايكون منكسره
هايف حاول يرفض واصر مشاري واخذه وهايف يحكي له كل القصه وهنا مشاري مات ضحك وحب
دخلوا الطواري ومشاري مستغرب من قصة الحب العجيبه !؟
مشاري : الله واكبر الحين انت مسميها وتحب بزر !؟
هايف: وش بزره ياخي البنت الحين كبيره
مشاري : بس اصغر منك ! مب مشكله بس وش بتسوي بأبوك وابوها
هايف: مدري
مشاري: والله وضع ابوها صعب دامه مهججك من كل هالحواري
هايف : الله عليك وش بتسوي اذا لقيت واحد جالس قدام بيتك وعند دريشة بنتك
مشاري : ياخي انت بعد مشقي عمرك يالخايس اخذ رقمها وقل يا بنت الناس هذا الوضع وانتهينا
هايف: يا ويلي ويلاه رفعت ضغطي رفعته انت خبل اقولك قفلت بوجهي
مشاري : وانت بعد وجهك قوي قفلت بوجهك وجيت لين بيتها وش تسوي بك
هايف: والله اني مابي لها الشينه بس وش اسوي لازم اني اعرف وضعها ولا مقدر احارب
مشاري: ما اقولك الا الله يعيينك انزل نشوف رجلك
نزلوا ومشاري ساند هايف
لكن لف وهو يشهق : ابك ابو نجد
مشاري: بسم لله عليك لهدرجه مروعك تشوفه بكل مكان
هايف من القهر عض كتف مشاري اللي صرخ: شفته يا تيس خلاص
هايف: وش عنده!؟ من معه ؟؟ لا يكون مسوي بنجد شي
مشاري :مدري معه بنت وحرمه !؟ هايف وخر وهالمره ما اهتم وهو يشوفه ساند نجد وطاح قلبه لا يكون طقها ولا سوا فيها شي وشك فيها
مشى وراهم ومشاري يحاول يوقفه وسحبه يوقفه : وين رايح يا خبل بيعرفك
هايف: ماعاد تفرق
مشاري: هايف انثبر انا بروح اشوفه من بعيد افهم السالفه واجي
هايف:لا انا بشوفها
مشاري : يارجال اقعد شكلك تبيه يكسر راسك انثبر مانيب اكلها بشوف الوضع واجي بعدين انت يالله يمشي ماني فاضي يشوفك وتهج بالمستشفى بعد
هايف: يا رجال اخلص راحوا
جلس هايف ومشاري راح وهو يلفلف يمين ويسار لين دخلوا لدكتور
................••............
في بيت ابو زيد
عند مطلق اللي كان معصب ولا تغداء معهم ابد وجالس بالملقط بضيق دخل حسين: مطلق انا والله اسف ما دريت ان ابوي بيكسره
مطلق : حسين وخر عني من عقلك بزعل عشان جوال تكسر
حسين : اجل عشان وشو زعلان
مطلق : ياخي انت ما تشوف محسن وتصرفاته وهباله
حسين: اشوف بس وش نسوي
مطلق : اااه بس اااه
حسين : هو لو ماشافه مع سلمى ما بيكسره
مطلق : حسين لا تجنني انت بعد واذا كان مع سلمى واذا كان لها وش بيصير
حسين : ما عليك انت تعرفه مريض
ابو زيد اللي دخل : مطلق
مطلق اعتدل : سم
ابو زيد: لايكون جالس هنا عشان هالخرده
مطلق : يا يبه الله يهديك انا ماني زعلان عشان الجوال انا زعلان منك محسن يعصف على ما يشتهي وانت معه
ابو زيد: اقصر لسانك
مطلق : محشوم بس وين المشكله اذا كان فيه جوال مثل هذا بالبيت بالعكس اريح لنا وبعدين المفروض تسمع مني ومن سلمى وانت تعرف محسن وتكبير الامور
ابو زيد: خل عنك هالكلام الفاضي ولا تفكر تجيب ذا الخرابيط مره ثانيه ان كانك تبي رضاي
مطلق : ابشر
ابو زيد : قم يلا بنروح العزبه
قام مطلق بضيق وهو ياخذ شماغه من سلمى اللي جت وهي ضايقه من ضيق مطلق وطلع لسياره ينتظر ابوه اللي جاء وركب وتحركوا للعزبه والسكوت سيد الموقف
.................••............
في المستشفى
عند هايف اللي ينتظر مشاري وهو عند الممرض اللي يلف رجله بعد ماشاف ان فيها رضه ونزل راسه يناظر رجله بس تجمد اول ماسمع صوت ابو نجد : هايف
هايف تجمد وبالقوه رفع راسه : عم مشعل !؟
ابو نجد : سلامات وش فيك !؟ لايكون كتفك فيها شي
هايف تورط : لا لا بخير بس طايح على رجلي وجيت اشوفها
ابو نجد: سلامات
هايف : الله يسلمك سلامات عسى ماشر انتم بعد فالمستشفى!؟
ابو نجد : لا ابد عرضيه وماشين يلا فمان الله
راح ابو نجد اللي ماكان يكلم عيال ابو زيد بس هايف عنده غير ومن طرف حاس بالذنب بعد ما صوبه
اما هايف اللي عادي عنده الا تشقق من الفرحه انه كلمه واستبشر خير
جاء مشاري : هاه وش قالوا في رجلك !؟
هايف: رضه بسيطه ! عرفني ابو نجد وجاء يسلم
مشاري : تستهبل على مخي انت ماتقول ما يسلم عليكم
هايف: الا بس اتوقع بعد ما صوبني بالرصاص حس بالندم
مشاري طارت عيونه: وش مصوبك !؟؟حسبي لله عليك ولا تبت
ضحك هايف: بالغلط بقولك السالفه بس قلي الحين ليش جايين ؟
مشاري: جايب بنته! مكسوره رجلها يقولون طايحه
هايف: ياخي وين تطيح ! مشاري لايكون ذا الشايب مسوي شي فيها
مشاري : يا رجال امها قالت للممرضه زلقت بمويه وطاحت
ماصدق هايف وهو يشوفهم طالعين : اسمع اسمع شوف امها راحت تجيب العلاج وانت حاول تسحب ابوها برا شوي
مشاري : يا خبل انت تكلم من جدك ! تبيه يذبحك انت
هايف: مشاري بتفزع ولا لا
مشاري : بفزع حسبي للله بس انتبه
هايف وقف وهو يعرج: طيب
راح مشاري لابو هايف وهو مسوي نفسه مضيع ويسأله وياخذه شوي بعيد بحيث انه مايشوف نجد
اما نجد اللي كانت تبكي من رجلها بس انقطع بكاها بالصوت اللي يناديها بهمس لف بصدمه وشهقت : هايف
ابتسم هايف : ايه
نجد: انت انهبلت وش تبي هنا !؟
هايف : قولي لي بس ابوتس اللي كسر رجلتس
نجد : مهبول انت ليه يكسرها ! انا طحت
هايف: شلون طحتي !؟ نجد اللي كانت الورقه بجيبها طلعتها بغضب :طحت من ذي !
ابتسم هايف : اجل سلامتس
نجد كان ودها تكفخه بس سكتت وهي تناظر رجله: ابوي كسر رجلك!
هايف ضحك: لا انا طحت
نجد : شلون
هايف : طحت منتس
صد بسرعه اول ما رجع ابو نجد وراح ونجد اللي وقفت وهي تحاول ما يشوف ابوها هايف
ابو نجد : توجعتس رجلتس
نجد: لا
ابو نجد: يلا يلا
طلعوا وعيون هايف عليهم ومشاري متورط فيه وبعدها طلعوا
مشاري : اول شي عمري ماتوقعتك كذا يوم شفتك شكلك هادي اثاريك حالتك حاله
هايف اللي كان مبسوط رغم مرارة الاحداث : الحياه مره ياخي
مشاري : والله يا حياتك اكشن
ضحك هايف وهو يسرد عليه بعض الاحداث اللي صار مع ابو نجد اللي ياما تصوب هايف بسببه
.................••............
في العزبه في الديره
عند مطلق اللي كان جالس بعد ما خلص شغله وهو يقلب التراب جاء ابو زيد وجلس : صب قهوه
صب مطلق وهو للحين ساكت بعد كسر صمته ابوه : لين متى بتجلس كذا
مطلق : كيف يعني !؟ وش فيني
ابو زيد: اسمعني يا مطلق سكت وخليتك على راحتك قلت سنه سنتين وبينسى بس اشوفك طالت طيحتك
مطلق : يبه وش له ذا الكلام
ابو زيد: ادري ان مشكلتك بالزواج لا تجيب وحده تضايقني وتزعل امك وخايف انك تزوج وتجي وحده اردى من هيفاء بس هالمره انا لقيت لك بنت الحلال اللي تعزني وتعز امك ومستحيل تزعلنا
مطلق انصدم: لا يا يبه انا مانيب متزوج ابد الله يرضى عليك لا تضغط علي
ابو زيد: مطلق خلك رجال لين متى بتجلس كذا العمر يمشي واذا تبيني ارضى عليك تزوج وعش حياتك
مطلق : يا يبه تكفى لا تلوي ذراعي برضاكم
ابو زيد: انت عمى ما تشوف امك اللي كل يوم ياكلها الندم انها زوجتك وحدتن شلعت قلبك وطلقتها انت عشان امك وبوك بتجيب لها الضغط انت
مطلق : امي مالها شغل
ابو زيد: عاد اسمع العلم اللي يجمد على الشارب رضيت ولا زعلت ان كانك تبيني ارضى عليك وامك ترتاح بتزوج اديم بنت عمك وهي ماهي ضارتنا ولطيفه موظفه بالمدينه ماتصلح لنا عندك اديم بتزوجها
مطلق هنا انجلط وقف ورا ابوه بيقنعه بس دق ابوه بعصاه بغضب: وصلك العلم يارضاي يارضاك
ركب وراح وترك مطلق واقف وراه مصدوم و موجوع ومقهور ضرب اللي قدامه بغضب وهو يحس قلبه بينفجر مو قادر على هيفاء عشان ينشب مع عمه واديم .................••............
في الخبر
عند متعب وسعود اللي كل واحد ماسك بزر وينومه
ماصدق متعب نام عزيز ونزل بهدوء بينزله لكن انفتح الباب بقوه ومشاري وهايف اللي يضحكون
متعب : الله ياخذكم صحيتوه حسبي لله عليكم
مشاري ترك هايف : هاته ياخي انومه انا ولا تدعي ياعجوز وخر وخر
اخذه مشاري اللي يغني له لين نام ونزله بسريره وجاء
سعود : هايف وش بلاها رجلك
هايف: طحت
متعب : وين طحت ياخي انتبه لنفسك
مشاري: بسيطه يا شباب رضه بكره ولا بعده تخلص
مقبل اللي جاء من برا ومعاه اكل :رجعتوا
مشاري : يووه انت يا تطبخ يا تجيب اكل
سعود ضحك: لا يشوفك وليد بيموت
هايف: وينه هو !
متعب ناظر ساعته: يجي الحين
على نهاية كلامه جاء وليد اللي جايب للعيال كلهم عدة رياضيه ونزلها وهو يقول : يلا يلا
مقبل وهو ياكل : وشو وين نروح
وليد سحب الصحن منه : مقبل خلاص ياخي صرت كأنك شايب شف كرشك كيف
مقبل : اقول وخر مالي كرش يا موسوس
وليد سحبه : قم غسل وامش يلا ، يلا سعود متعب هايف مشاري يلا
متعب اللي استسلم يدري لو يموت مب مخليه وليد
سعود : والله بنوم دحوم
وليد سحب دحوم لللي صاحي : ياخي وش تنوم هذا بسم لله عليه عيونه واضح ماحوله نوم خله ينطط شوي يدوخ امش بس
مشاري: انا وخر عني جاي من طريق ما اشوف بنام
وليد : تعرف انك بتقوم فلا تكثر حكي
هايف : انا عاد رجلي تعبانه
وليد: وش فيها
هايف : رضه مقدر
وليد: اجل انت امسك دحوم وانتم يلا
سحبهم وليد اللي مهتم جدا بالرياضه وقاعد لهم على الاكل والشرب وكل شي ولو مايطارد وراهم كان ضربوا ال 100 كيلو بسبب مقبل
هايف كان يضحك على اشكالهم ووليد يعطيهم التمارين ويتهاوش مع مقبل اللي كل شوي يوقف وياكل
ولا انتهت الساعه الا كلهم ارض من تعبهم الا وليد اللي كمل عادي ................••............
في الديره
عند البنات سلمى اللي كانت بالمطبخ بعد هوشة كلاميه مع اصايل العله وهالمره ما كانت سبب اي مشكله لكن تفاجأت بمحسن اللي سحبها وهو يعطيها كف اتسعت عيونها بصدمه
ريوف شهقت وهي ترمي اللي بيدها :. محسسسن وش تسوي
محسن اللي عبت اصايل راسه وجاء مليان غضب على سلمى : انقلعي انتي انقلعي
ام زيد جت تركض على الصوت : محسسسن
محسن اللي كان ناوي يكمل بس وقفته ام زيد: محسن خير وشوله تطق اختك
محسن: بنتس ذي مب متربيه لين اكسر راسها .
ام زيد: معصي والله ما تطقها وش مسويه
سلمى : اكيييد عبت راسه ام شحوم الله ياخذك وياخذها يا متخلف
محسن سحب عقاله وهالمره ضربها وصرخت
وهنا دخل حسين على صراخ سلمى وهو يدف محسن : الله يكسر يدك
محسن اللي طاح : حسييينوه هذا الكلام لي
حسين: اييه لك وقبل تمد يدك فكر مليون مره
ام زيد : انهبلت انت تطق اختك بالعقال مجنون
ابو زيد اللي تنحنح ودخل وهو مايدري وش صاير واللي يشوفه محسن طايح وبيده عقال وسلمى تبكي ورا حسين وام زيد معصبه ورييوف خايفه
ابو زيد: وش بلاكم
حسين : يبه شوف ولدك يطق سلمى ولا بعد يطق بالعقال
ابو زيد: وكسرٍ يكسر يدك ياللي ماستحي
محسن : يبه قلت لكم فكوني شرها ما تطيعون هاذي لسانها طويل تبي لها تربيه
ابو زيد: اقطع لسانك قطع اللله صوتك انا اللي ماعرفت اربيك انا
سلمى اللي انهارت : يا يبه والله ماسويت شي كله من الحيه اللي وراه توزه ويجي يصيح هنا
محسن: اقول انطمي
سكته كف من ابو زيد على وجهه: اقوول اسمع عندك وحده من الثنتين يا تقلع هالحيه من بيتي ولا تنقلع انت وياها برا
محسن : تطردني يبه
ابو زيد: علمتك وانت بكيفك
طلع محسن بغضب وهو يصارخ ويهاوش وياخذ اصايل ويطلع من البيت كله
ابو زيد لف على سلمى بغضب: ومانيب ساكت لتس انتي بعد اقصري صوتس ولا والله لكسر هالعصا على ظهرتس تسمعيين واذلفي من وجهي اسبوع لا اشوفتس
راحت سلمى وهي تبكي وانحاس جو البيت بكبره وام زيد تبكي على محسن اللي انطرد وسلمى اللي انطقت من دون ذنب
.................••............
في الخبر
هايف اللي بعد اللي صار معه صار كل يومه مبتسم وهو منوم عزيز على صدره ويراقب الشباك بهدوء
مشاري جاء وهو يناظر فيه وضحك: يا حظ شباكنا على كثر ما تأمل فيه
ضحك هايف : يازين شباككم ويا شينك
سكتوا لما مر وليد وهو يصور ويسولف بالسناب
هايف: ياخي ذا خبل والله محد مروعني الا هو والله لو يشوفه ابوي ليقول مسحور ولا مجنون
متعب اللي جاء : هايف معك الاوراق اللي عطيتك فالبنك تكفى قول معي
هايف : لا ما جبتها معي
متعب : يووه
سعود : وش فييك
متعب: ودي اخلصها وارسلها بكره شغلي لين راسي
هايف: خلها انا اخلصها
متعب : تسوي خير
سعود : اسمعوا دام الوقت ما تأخر ودكم نروح نودي دحوم الملاهي جنني من صبح الله يصيح حسبي على مقبل اللي علقه
مقبل جاء وهو دحوم على رقبته: احترم نفسك انا اعطيه حق من حقوق الطفل
مشاري :اصلا فكره حنا ماعندنا شي وبكره ويكند نطلع ونتونس
متعب : انا عندي شغل روحوا انتم
سعود : شغلك فالبيت
ضحك متعب: ايه تقدر تترك عزيز هنا
ضحك سعود: يا فاهمني
مقبل : نادوا وليد وين راح
هايف: راح للمجلس يخثردز على جواله
مقبل :ههههههههههههههههههههههههههه تدري يا هايف خلك دايم تسولف كلامك يعجبني
مشاري : رتويت لك بس روح تكفى طفشه وخله يجي على ما نجهز ونطلع
سعود : عاد وليد ما يحتاج انه يكشخ دايم كاشخ
متعب : بارك الله بالسناب اللي يلمعه يومياً
قاموا كلهم يبدلون ومقبل المعروف في التنكيد على وليد راح ينكد عليه
وطلعوا كلهم وتركوا عزيز ومتعب فالبيت
.................••............
العشاء في بيت ابو زيد
كانوا على السفره بس كل واحد منهم ضايق وساكت وام زيد كل شوي تقوم تطل وتشوف مطلق ليه ماجاء للحين!
ابو زيد: انتي علامتس رايحه جايه اجلسي
ام زيد:مطلق وينه من يوم طلع ماجاء مب عواديه ولا عنده احد يروح له
ابو زيد: الله واكبر يا عقول الحريم مطلق رجال يوقف على زنده التيس تبين تجلسين تراقبينه وين راح ووين جاء خليه يروح ويجي عقله في راسه ويعرف خلاصه
ام زيد جلست وهي باقي ضايقه وفزت اول مادخل مطلق اللي طلعت روحه وهو يدور حل بس ما لقى حل رجع وهو يحس انه مثقل ضيقه كتوفه مب قادر يرفعها
ام زيد: مطلق وينك من اليوم تاخرت !
مطلق وهو يبوس راسها بضيق: جيت يمه جيت
ابو زيد: تعال تعشاء
مطلق: بالعافيه ما ابيه
دخل للمقلط وسكر الباب وهو مايدري وش صاير بالبيت اصلا
ام زيد: ياويلي هو علامه
ابو زيد: خلصنا عاد ماعاد الواحد يتهنى بلقمه
قام ابو زيد وراح ينام ووقفت ريوف تشيل الاغراض وسلمى اللي بالغرفه ما طلعت
وام زيد اللي راحت لمطلق دخلت وهي تشوفه منسدح : مطلق امي علامك !؟
مطلق : مابي شيي يالغاليه
ام زيد: بس عيونك تقول فيك شي علمني وش فيك
مطلق جلس وهو يناظرها بضيق يمكن تنقذه : يمه وش اسوي عشان اطلع من اللي طحت فيه
بهالسؤال هد مطلق حيل امه اللي شايفه ضيقه ولا تدري وش تسوي : يمه يا مطلق توكل على ربك هو اللي يطلعك
مطلق : تهقين لو اتزوج بطلع يمه
ام زيد: لا تجبر نفسك واذا تقدر ترا بنات الحلال واجد
مطلق : ابوي بيزوجني اديم وش تقولين يمه
ام زيد : يا مطلق يا امك وش اقول انت استخر وشوف ربي وش يكتب لك واديم والله بنت حلال ومافيها الا كل خير وبنت عمك واذا همك انا وابوك واخوانك تعرف بنت عمك زين
مطلق : اااه يا يمه شسوي
ام زيد : استخير استخييير والدنيا ماهي بس هيفاء
طلعت وتركته وهوا زادت حيرة مطلق اللي حس بصداع يعصفه عصف
................••............
في الخبر
عند هايف اللي كان مستند على مشاري ويتمشون في الملاهي ووليد يصور وسعود يسوي التذاكر ومقبل كل ما صور وليد خرب الفيديو
مشاري : يالليل يا وليد روح هناك شوف الناس كلها تناظرنا وتصورنا
وليد: وش اسوي انا
قطع عليه الاطفال اللي جو له بيصورون معه
مشاري : امشوا بنروح هناك خلوه يشبع تصوير
سعود : يلا بندخل حنا بعد
هايف : لا مانيب داخل انا
مقبل: هايف تكفى والله انك بتفلها
مشاري : ايه ايه ادخل ودنا نضحك
اصروا عليه وركبوا وهايف اللي عمره ماركب وطبعا طلعوا وهم في حالة هستيريه من الضحك على هايف اللي داخ عليهم وصراخ وحوسه
وطلع وهو يكفخهم كلهم وهم يضحكون وبعد تعب رجعوا للبيت وهم مازالوا يطقطقون ومقبل يشرح لمتعب وضع هايف ويضحك
متعب : اووه يا هايف طلعت خيخه وييين قوة البدو والبداوه
هايف :تعال معي الديره اعلمك البداوه اما ذا اللي قلبت مخي قلب
مقبل :ههههههههههههههههههههههههههههههههههههههههههههههههه ههههههه ليتك شايفه وهو ماسك يد مشاري ويتعزوى " اخو مطلق "
وليد: فااااتني يا ليتكم صورتوه
مشاري : ما لحقت اصور والله اني توفيت من الضحك
هايف: اصبروا علي اصبروا
قطع الكلام مطلق اللي دق ووقف هايف وطلع يكلمه وهو يرحب فيه والعيال باقي يضحكون
هاييف كان يسولف بس صوت مطلق ماش : مطلق وش فيك يا خوي صوتك ماش
مطلق : مدري يا هايف ضايقتن فيني الوسيعه يا هايف
هايف: افااا علامك وش مضيقك
مطلق : ابوي ... قال لهايف كل شي صار من الصبح وسالفة محسن على سالفة ابوه بس ما درا ان محسن طق سلمى وطرده ابوه
هايف بغضب: اول شي محسن ذا يبي له تكسير راس انا مدري وشوله ابوي مخليه هو وام شحوم معنا بالبيت يذلف برا ويخيس معها وبعدين اتركك منه ابوي وشوله يبي يزوجك !؟ اديم بعد وينه من البدايه
مطلق : مدري يا هايف لكن هو خيرني وانت تدري ادفع عمري ولا يزعل علي لكن اخاف اني اظلم بنت عمي معي وحزتها لا اقدر اطلق ولا اقدرا اكمل
هايف: ابوي كيف يخاطر كذا لو يصير شي بينتهي اللي بين عمي وابوي وحنا خلقه بلشانين بمشاكل ابوي
مطلق: ان قلت ان ربي بيعطيني فرصه ويمكن اتجاوز فيها اموري لكن اخاف اني مقدر اكمل ومقدر اعيش مقيد
هايف: مطلق ابوي من يوم حط براسه يزوجك معناته بيزوجك ان ما كانت اديم بتكون غيرها لكن اللي فالموضوع يحير ان تزوجت اديم وانت متاكد انها ما تضيق امي وابوي ابد وهذا بيخليك تعيش معها براحه بس اذا انت ما تقبلتها بتحوس الامور بين ابوي وعمي واذا تزوجت غيرها ما تضمن انها بتكون مع امي وابوي كويسه انت بين نارين يا مطلق
مطلق : انا دقيت ابيك تطلعني منها قلي شي اسويه وبسويه
هايف بعد تفكير قال: انت تركت هيفاء عشان امي وابوي والحين انت حياتك على امي وابوي ورضاهم فا تزوج اديم وحاول يامطلق ما تظلمها بحب فاشل لهيفاء
مطلق اخذ نفس : زين خلني اسكر واستخير واشوف
هايف: الله يهدي قلبك يا مطلق
مطلق : فمان الله
ضاق هايف على مطلق مرره وتنكد وهو ماوده مطلق ينغصب بعد
انسدح وهو ماعاد يبي لا يسولف ولا يضحك
دخل مشاري : هايف العيال ينادون بيتابعون فلم ودك تروح
هايف: لا مالي خلق
مشاري : فيك شي !
هايف : لا
مشاري اللي كان مايحب يتابع الافلام اللي غموض وطلع لهم يقول ما بيتابعون ورجع جلس : فيك شي بس قلي وشو عسى خير احد صاير له شي من اهلك
هايف تنهد: مدري وش اقولك يا مشاري
مشاري: دامك تنهدت اللموضوع فيه حب
ضحك هايف بضيق : ياخي احيان اقول ليش ما طلعنا على ابوي قلبه قوي ولا يخضع للحب والخرابيط
مشاري : الشايب عليهم قلوب ليتها قلوبنا
هايف : ولا واحد من اخواني طلع مثل قلبه اخواني كلهم يحبون زيد ابد حب وفاز بحبه وهذا هو يجني ثماره ومحسن بعد فاز لكن حب على غير سنع ومطلق فشل فشل عظيم وموجع وانا مدري وش ارسي فيه وكلنا ندعي ان ربي يوخر حسين عن دروبه
مشاري : ياخي حمدلله اني ما حبيت ! انت وعرفنا قصتك بس مطلق وش قصته وراك ضقت عليه الحين لا يكون اللي يحبها تزوجت
هايف : لا هو اللي طلقها
مشاري: وشو !؟
هايف اللي وثق في مشاري اللي اليوم عطاه كل الثقه حتى ماقال للعيال اللي صار ابدد هذا وهم اخوياه من قبل : ابد بسيطه مطلق كان متزوج عادي مثل الاودام زواج تقليدي ولا نشوفه مع زوجته واضح حبه كان عادي المهم انها دايم على خلاف مع خواتي ويحذرها يا بنت الناس افهمي واعقلي ابد ما تطيع ويعصب عليها وامي تهاوده واذا غلطت زوجته على امي ما تعلمه وتحذر البنات يدرون لانها تدري شكثر يحبها وذاك اليوم دخل الا ويسمعها تصيح على امي وابوي وغلطت عليهم وترمي الاغراض قدامهم و حزتها ماتعرفه يا طقها طق طق حتى ابوي ما قدر يوخره ولا جلست دقيقه قشها وطلقها ولا عاد رجعت
ومن عقبها جت له وترجته وتعذرت من امي وابوي وسامحوها بس مطلق ماسامح ابد وتعب تعب لو تشوفه تحس انه يتقطع قدامك صح مطلق كتوم ولاهو كثير كلام بس يبان عليه نحف وانهد حيله يالله يقوم يقعد ويالله بالسنه قدر يتعود ويكمل والحين بيرجع يعاني من جديد
مشاري : مطلق رجال والله مهما حبها مستحيل تحل على امه وابوه وبيعوضه ربي
هايف: اللله يعوضه الله يعوضه ويكتب له الخير
مشاري : وان شاء الله انت بعد تنحل امورك وتهدا
هايف: يارب يا مشارري يارب
مشاري : ولا تدري عن نجد ورجلها وش صار فيها
هايف: بغيت اتصل بس خفت يرد ابوها وابتلش
مشاري:ماعندها جوال
هايف: مدري
مشاري : الله يعينك بس
.
.
.