عالمي الإفتراضي🌐💔

الحلقه الخامس عشر ❤

(عالمي الافتراضي 🌐)
.
.
للكاتبه Lames monje
الحلقه خامس عشر 1️⃣5️⃣🌸
.
.
.

عقلي تعب من كثر مايقولا فيق ي القلب
والقلب واخد وضع نحبه هوا مهما دار.!
يلعن شكلك باهي.!
.
...

راما ❤
نضت بعد مية واسطه كا العادة بس هالمرة غير كنت قريب بنطير من الفرحه لان كانت سهريتي مع نٌعمان ما توقعت نسامحه بسرعه هادي ❤🥰بس والله نحبه ايه مطلق وكان متزوج بس والله القلب ليه والعقل ليه ونموت وما ناخد غيره واتفقنا ان الاسبوع الجاي ان حايجيب امه وتم فيا ❤.
نضت لقيت امي حاطا حتي الغداء ع نار وكانو تهدرز هي وبوي بس امتى صبحت سكتو وطلع بوي 🤷🏻‍♀️
• انا : مامتي حبيبتي ندير معاك حاجه ولا نقولك اطعلي انا نكمل الغداء وندير كيكه ولا نقولك لالا ندير تشيز كيك عبدو يحبها ❤ وندير مبطن للعشاء وبوريك ومرفوسه ❤🔥لينا هلبا عليها..
• امي حطت ايدها ع جبهتي : والله مافيك حرارة كيف نايضة هكي خيرك بنتي مريضه ولا تبي فلوس والله مفلسه من عرس اسيل غربالتيني من كل قرش ...
• انا : فلوس شني ومرض شن للطف عليا مانبي شي نضت ناشطه ومبسوطه عيب يعني 🤷🏻‍♀️ وحبيت نبسطكم معاي شن فيها..
• امي : دوم يارب لالا عادي ان شاءالله حتي الموضوع الي انهدرزلك عليه يعجبك ..
• انا قلبي نخصني : موضوع شني ..
• أمي : صاحب بوك عمك فرج كلم بوك امس وطلبك لي ولده محمد 😊
• أنا : محمد الخناب الحشاش 😳
• أمي : هذا زمان توا شاد محلات بوه كلهم وبدا مصلي ويخاف ربي وولد تغير ..
• أنا : تغير بعد شني يايما بعد ما خدا سمعه زفت وهوا ينقز من لحوش وينخب في فلوس من صاحبه بالله خليني ساكته..
• أمي : يعني نفهم من كلامك شني ..
• انا : مش موافقه ..
• أمي : بس بوك عطى فيك كلمه وقاله تفضلو واليوم بيجونا ..بيجي هو واخته يديرو مقابله شرعية ..
• أنا : م م مقابله انتي شن تقولي يايم وراسك فكيني من البصارة ع صبح ..انتي شن تخرفي
• امي : نخرف 😳😠تمام وانا امتى كنت نبصر ..وعلى عنادك وقله ادبك توا نوريك مش حاتكسري كلمت بوك قدام صاحبه انتي شوفيه وبعدين ارفضي ولا ملحي المهم كلمة بوك مش حا تنزل ..
• أنا : مش حانطلعله اهو قولتلك اطلعله انتي مدامك خايفه ع كلمت راجلك ...وشوي بووووف كف ثلاثي الابعاد ..😰
• أمي : المقابله حا تصير والمرة هادي ضربتك المرة تانية نقتلك ياقليله الادب 😠اقلبي وجهك من عليا وطلعي شن تلبسي وبتطلعي ورجلك فوق رقبتك
مشيت جري لداري وانا ايدي ع خدي الي كيف نار ...من بنكلم خشيت النت ندور في اسيل وانا قريب بنهبل من البكاء 😭 عرفته حظي ديما تقول فيها سيلو المنحوس منحسو ولو علقو ع راسه فانوس 😔 ..
وبديت نبكي من وجع قلبي مش من الكف لان ولا عمري ضربتني امي 💔معقولة المرة هادي تختار بوي عليا معقول ع خاطر راجل غريب تضربني تي ياريت راجل مسقم لالا حشاش وبتاع نساوين توا تاب لما بيتزوج لان عارف مش حايقبلو بيه وهوا في هديك الحاله 💔😭ياربي اعطيني القوة وربي نمسح بيه اللوطا ونطلع ..توا نوريه ..
ومر اليوم وانا نبكي ونسمع في امي تنادي تعالي تغدي بس ما دورتهاش 💔 اصلا مارديتش جتني رسالة من نٌعمان ..
📨 《حبيبي صباح الخير .. فاضية شوي ستحشتك ونبي نهدرز عليك شوي ❤كان باهي ديرلي رنه 》
نفسيتي زفت وانا مش عارفه شن نقزل ولا شن نعبر اوووف سعدودهم الرجاله الحكم ديما في ايدهم الحمدالله بس قررت نرد عليه ونخلي روحي عادي بس💔..
رنيت مرة ..📞ع طول عاودلي ..
• أنا : الوو ..
• نٌعمان : هلا وغلا بعمري كيفك..
• أنا : الحمدالله كيف انت 💔
• نٌعمان : أنا بخير مدامك بخير بس نحس انك مش تمام ..فيه شيء
• أنا : لالا وخنقتني العبرة 💔😭
• نٌعمان بقلق وبنبرا جدية : راما خيرك وردي بالك تكدبي عليا ..
• أنا : والله ...
• نٌعمان : ما تحلفيش ولا نجيك وربي ما نرجع التالي اهو قولتلك 😠 قول الي فيها نسمع فيك ..
• أنا بصوت مغموم وشبه مش طالع : اليوم مقابلتي 💔
• نٌعمان بصدمه : م م مقابلة شني ماتقوليليش ..
• أنا : ايه ومغصوبة وربي ما نبيه ولا ليا بيه علاقه ..
• نٌعمان : كيف ملا علاش بيجيك ومن وين جاك ..
• قعدت نشهق من البكي وما رديتش ..
• نٌعمان بصوت عالي : راما من وين يعرفك ..
• أنا : ولد صاحب بوي 💔
• نٌعمان : اهدي وقولي اسمه ووين يشتغل ورقم بوك ولا خوك ولا اي حد من العيله ..
• أنا : محمد فرج ال ...يخدم في محلات متع قومستي وحاجات متع سيارات في ال......
• نٌعمان: تمام ابعثيلي رقم واحد من العيله نستنا..
• انا : نع..
• نعمان : سلام ...وسكر والواضح انه فاصل 😠
يارب استر لان شكلها حاتصير عركه ومش خايف من الموت ارحم من ها شكل محمد حشا اسمه 😔 وقعدت في داري وقلبي واجعني ونفكر في نعمان شن بيدير وشن حايصير شوي هكي فتحت عليا امي الباب ...
• أمي : الناس كلموني ومع ساعه سبعه بيجي الولد يشوفك قبلها وتوا ساعه 6نلقاك ترادعي ف روحك ومطلعه شن نلبس ..
• أنا : ش ش شن قاعدة تقولي مش موافقه هي بلغصب ..
• أمي : ايه غصب وانا قولت كلامي وتمت المناقشه .
• أنا : مش حانلبس ومش حانطلع ولو بنموت .. قربت مني وشرار في عيونها وشدتني من ودني ..
• أمي : حا تلبسي وحا تردعي روحك وان شاءالله نجيك نلقاك مش واتيه وربي ياراما ع ردان الكلام توا نوريك ..
• أنا وبديت نبكي : بتغصبوني ع حد ما نبيه يايما والله نكرهها والله مش كويس ..وبديت نمسح في دموعي تمام انتي وبوي بترتاحو لما تزوجوني والواضح قالقين مني الحمدالله يارب ماعطاكم كان انا راهو بعتونا في مزاد ..وما كملت كلامي الا وشدتني من شعري وبدت فيا ضرب وقرصات وكفوف وانا نعيط يارب نموت حرام عليا ياما هذا كله ع خاطر راجلك الله ياخدني وترتاحي انتي وياه ..وهي تضرب وتقول بوك يا مسخه اسمه بوك ياقليلت التربية هذا الدلع شن يدير ...للحظه نقولكم كرهت امي وحسيتها مرت بوي معقول يايما ديرلي هكي ..
ومر الوقت فيسع وجت امي لقتني لابسه وحطاء شوي مكياج وفاردة شعري ولابسه شوي كسسورات ومكان الكف قاعد واضح ..جتني
• امي : ايوه هكي تعدلي وخليك بنت بوك وهي ما تاخد منك اكثر من نص ساعه وبعدين تبي ترفضي براحتك ..وجت تشد وجهي درقته بايديا 🙅🏻‍♀️نحسابها بتضربني.. ضمتني سامحيني والله ماقصدي نضربك بس..
• انا : امي بعدي عليا ...شبحت لوجهي
• أمي :حي الكف قاعد مكانه 💔زيديله شوي كريمه ولا بودرة باش يختفي
• أنا : بعدي من عليا خلي نكمل لابس .. طلعت امي وانا في داخلي معقولة يا أمي يا طيبه ياغالية تنقلبي مرة وحدة عليا 💔..وجو الناس جتني امي ..
• أمي : ناس جو وضيافه جاهزة شوي وجيبيها وسلمي ع ناس ..
• أنا : ج جو ..باه تمام ..شديت تلفوني شفت لعلى نلقى حاجه تريحني شفت صورة نٌعمان بستها وابتسمت 😊لين جتني رساله كسرتني 💔😭📨
من نعمان 📨
《ربي يهنيك غاليتي بس حاولت والله وربي يسعدك ويواتيلك الوقت الطيب بس النصيب انكتب سامحيني أنا مسافر لمصراته》
😭👆🏼الي نشوف فيه صح ولا نحلم هني حسيت روحي خسرة كل شيء بس استجمعت قوتي في نهاية عندنا ضيوف نضت مسحت دموعي وساويت مكياجي ووقفت قدام المراية ..
أنتي قدها يا راما ما حد يهزك ..ونضت وقمت السفرة
خشيت طلقت السلام....😳
• راما : خالتي جميله نرجس🤷🏻‍♀️😳
• خالتي جميله &نرجس :وعليك السلام
• راما في داخلي وربي توا نوريك يا نٌعمان وشادة دموعي بسيف شبحت ل أمي غمزتلي 😉
• أمي : قربي قربي بشوية عليك ..
• راما قدمت الضيافه وقعمزت جنب امي : اهلا بيكم شرفتونا..
• خالتي جميله : الشرف لينا طبعا انا متحشمه لان ماقولناش جاين ابكر من هكي وان شاءالله ما احرجناكم بس ولدنا مستعجل ومايبيش يضيع الفرصه ههه..
• أمي : حشاك من الحشمه حوش حوشكم ولينا العتبة وليكم الصدر دلالي في اي وقت ❤
وقعدنا نهدرزو وانه كيف مطلق وماعنداش صغار ويشتغل ومتريح وانتم تعرفونا ومن هذا القبيل ...وكملت ع صوت بابا يناديلي ..راااما رااما
• انا : نستادنكم بوي يضبح ..وطلعتله ..نعم
• بوي : الولد يبي يشوفك حسب شرع ربي ..
• انا نزلت راسي ع اساس متحشمه : تمام ..وخشيت وراه وماقمت راسي طلقت سلام وقعمزت ..
• بوي : شوي ونرجع عندي مكالمه ..🤣🤣وطلع
قمت راسي ونزلو دموعي طول 😢🥺
• أنا : هكي أنا نستاهل يا نٌعمان 😢💔
• نعمان قرب مني : والله لا بس نحبك ونبي نديرلك مفاجاة ❤ وحبيت نعوضك وراسك ماتبكي وبدا يمسح في خدودي بايده 😊ابتسمي ...
• أنا قمت بكتافاتي بحركه معنها لا
• قرب وباسني ع خدي وضمني لصدره ...
• انا ابسمت وبديت نضرب فيه ع صدره : علاش حبي دير فيا هكي حاول بعد عليا
• نعمان : اششششش لان نحبك بس والله نحبك يامهبولتي نعشقك..وباس راسي ..
• انا : ههههه باهي حول وانت لقيت فيها ولا يجينا بوي يقولك بعد الي شفته ما تطلع لازم تقرأ الفاتحه ولا نقتلكم ههههه
• نعمان : يارب يخش علينا كان هكي اصلا مش حانصبر علبك هلبا بس نغير اثاث الحوش وحا نجيبك ❤اعطيني بس ثلاث شهور وتكوني ع دمتي وحلالي ..
• أنا ضحكت : والله اليوم كله خوف بس شن درت في م ..
• نعمان شبحلي : معندكش علاقه المهم أنا توا هني ...🤨خيره وجهك من ضربك ..
• أنا ابتسمت : لالا مافيا شيء عادي ..
• نعمان : احكيلي حبيبي بوك ضربك ..
• أنا : لالالالالا 😔 حبيبي تبيني نبكي تاني بالله عليك خليني مبسوطه ...
• نعمان : طلع هدية كانت باكو فيه حديدة ع ابيض 😳❤...هدية اعتدار وخطوبة ان شاءالله وان شاءالله غدو تلفونك اجديد يوصلك نبي كل شيء بيني وبينك يبدا جديد ❤..
• أنا : بس أنا خايفه ..
• نٌعمان : معاتش تقولها الكلمه هادي نقتلك راه هههه انا نحميك بإذن الله من اي حد حتي من نفسي نخاف عليك نظلمك وبإذن الله مش حانظلمك ..وقربت من المرة هادي وقولتله نحبك وبوسته بوسه طوييييييله وهربت وانا كان وجهي احمر زاي النار ههههههه ❤..ومر احلا واسوى يوم في حياتي وكانت نهاية تهبل❤
نهاية كل اثنين يارب ❤
.
.
.
..
..
.
..
..
..
..
..
نضت مع 8صبح بعد ما جت الشمس ع وجهي 🌤
وكٌنت نحس في جسمي متكسر وكان واكلة طريحه معتبرا نضت وانا نحك في عيوني وشعري بس حسيت الدنيا مصقعة شبحت ل روحي 😳🤷🏻‍♀️مش كنت لابسه توتا وشن ها الادوية ومن غيرلي لبسي نضت نشبح روحي فل المراية 😓 كان اوضح شكلي كنت مريضه عيوني منفخات شعري حايس شوي ونفتح الباب 🚪بشوية وخش نادر بكرسي المتحرك كان لابس بدلة رسمية وريحته من قبل ما يفتح الباب وصلتني ❤🤦🏻‍♀️ وقعد يشبحلي ..
• نادر 😊😍 : صباح الخير ..كنت نشبحلها كانت طرف واقف جسم متنسق مشاءالله وكانت التيشرت لنص فخادها وبطم التشيرت مفتوح بتلخبيط كانت بطنها وشوي من صدرها يبان 😍
• أنا : ءءء صباح النور ..وفطنت ل روحي جريت ع طول لسرير وغطيت روحي بايرغان 🤨..أنا شن صارلي ومن غيرلي دبشي ..
• نادر : كنتِ امس مريضه هلبا وطول ليل كنت معاك..
• أنا : مممم معاي صار حاجه 😔
• نادر : ماتخفيش ماصار شي وانتي اساس ماكنتِ في حاله تسمحلك انديرلك اي شي ..
• أنا : علاش خيرني أنا امس..
• نادر : انتي شن تحسي ..
• أنا : نحس ان جسمي مكسر وراسي حايتفجر..
• نادر : افطري وخودي بنادول💊 حطيتهولك في درج الي جنبك هداك من الحرارة كنتِ حا تنحرقي لولا ستر ولطف ربي ..انتي ماتدكريش في شيء
• أنا : لالا ندكر بس
• نادر : شني ..
• أنا : شفتك شايلني وتمشيء ..
• نادر : ياريت بس كنتي صح في حضني لكن ع الكرسي
• أنا : اسفه سامحني تعبتك معاي ..
• نادر : لالا عادي تبي اي حاجه كلميني 🤦🏻‍♂️اووو نسيت ماعطيتكش تلفونك ..
• انا : حتي حوايجي نبي نغير وين الشٌونط متاعي ولا حنقعد نلبس في حوايجك ..
• نادر : اسف اسف حاظر اليوم تجيبهملك نيتا وتساعدك في ترتيبهم ولا توا نفهمها ولما نجي نوريك طريقة استخدام غرفة الملابس ..
• أنا : اوكي 😔...وجاي بيطلع...نادر
• نادر تلفتت : نعم ..
• أنا : أسفه وشكرا ...
• نادر : ع شني لا داعي لشكر والاسف مش بينتنا ❤وشوي وتجيبلك نيتا الفطور كولي باهي ع خاطر تقوى مناعتك يادكتورة ..
• أنا ابتسمت : حاظر ..وطلع..
حسيت ان زودتها معاه ولا كيف 🤦🏻‍♀️ممكن غلط ان كدب عليا بس معقولة لو قالي انه معاق في هديك الفترة كنت سيبته ..مستحيل مش حانسيبه اصلا انا عقليتي مش هكي لان لو انا ف مكانه ممكن حاندير هكي معقولة لدرجة هادي حبني 🥰وليش لا انا ننحب بس يا ترا أني نحبه ..حطيت ايدي ع قلبي ..ايه والله نحبه ليش الكدب صح كدب عليا بس مش حايتغير شيء زعمه نعطيه فرصه 🤔 ونعطيه امل مش عارفه والله ياريت كان تلفوني معاي راني كلمت راما وريحت روحي لعلى تلقالي حل ديما لما نكون مشوشه هي تريح فيا ..
ونفتح الباب وجابتلي نيتا الفطور 🌼
والله جيتي في وقتك والله جيعانه ..
.
...
..
..
...
...
...
اول مافتحت عيوني نضت دخلت الحمام صليت ولبست وكلمت ماكس لان عندي جتماع مع ساعه 10ولازم نكون حاظر نضمت اموري وساويت روحي بس دكرت أسيل وقلت نخش نشوفها مرات سخنت تاني ولا مانضتش نترقب عليها ولما خشيتلها كانت ❤🥰شي حورية جاية من الجنه قطعه من القمر ونعكاس اضاءة الشمس عليها كانت تهبل ❤هدرزنا شوي وصراحه اول مرة بعد ما جت هني ❤وسالتني هل صار حاجه بينا والحمدالله الي ماتهورت ونغريت وراء شهوة لكنت حقيقي خسرتها وخسرت نفسي 🤦🏻‍♂️❤ رتحت لما بدت تشكرني وتتجاوب معاي ببتسمات وحسيت ان فيه امل في علاقتنا ولما شفت الفرحه في عيونها لما نجيبلها حوايجها وتلفونه خالت عندي طاقه ايجابية نقاوم بيها اي شي اليوم ❤🥰
.
.
..
..
...
...
...
يتبع ❤🥰 قربنا ع المشارف النهايات ❤😍
الحلقه مفيهاش احداث فا شبه تعتبر قصيرة وان شاءالله غدو كان طلعت الحلقه الاخيرة توا نزل بارت ❤