مذكرات عاشقه

الحلقه 28💋💋

الله يراك وأنت تخوض المصاعب ، وتتعرقل ،وتتعثر ، ويكسر قلبك ، وتناضل ، وتحاول وتعود ، الله شهيد علي كل تنهيدة وجع ، فلا تقلق ♤♤♤♤♤♤

استاقظت راسي يوجع فيا ، ملفوف بالفاشه ، فيه صوت دوشه وموسيقي عاليه، اني وييييين ، وشن جابني اهني ، مربوطه بسلسه حديد في السرير ، لكن نقدر نتحرك في الدار ،  محطوطه في مكان مافيشي شبابيك بكل ، الاصوات تقرب واني خايفه ، انفتح الباب وخش الشخص نفسه اللي متشبه بالنساء ، يلبس في لبس مشحط وجسمه مغري نوعا ما ، وطبعا المكياج معبي وجها ، والبارفن النسائي اللي حاطه يضرب من بعيد،   شبحلي بنظرة تخوف مع قيمه هذاكا الحاجب ، قالي طيب فيييك ياحنه اللي نضتي ،  وتي روحك ياباهيه ، شويه وادجيك البنت تجهزك ، قتله شن ادقول انت ، بتجهزني لشني ، عيط عليا بقوة ، صكري فمك يااا...... وياااا...... ومخلا كلمه كبيرة ماحطها هالحقير ، طلع وهوا يهز في هذيكا التندرا اللي مدايرها من تالي ، اقسم بالله زي الانتايا ، حرام فيه كلمه ذكر ، الحجرة اللي انحبست فاها كبيرة ، ومعبيه اسرة ومرايات وشناطي ، خشو مجموعه  بنات مخلطات ، فيه اللي ليببيات وفيه افريقيات من النيجر والتشاد وغيرها  جنسيات مخلطه ، بدو يلبسو ويتكمو في رواحهم  ، ويجي هذاكا الانتايا يمكيج فيهم ، اني مصدومه ، اني في حوش دعارة ، نسمع فيه يوصي فيهم ، لما تركبي الطيارة شن اديري ، ولما توصلي كذا ، ولما ولما ، تخيلو يطلع في الليبيات للدول التانيه ، ببيع في شرفنا ويلوح فيه برا ، يرفع فيهم للي الامارات ، وصلت بيهم يتاجرو بعرض الليبين ، تخيلو  كميه الليبيات اللي شفتهم موجودات مايتصدقش ، وفيه اللي متزوجه ادقوله ساعه ومنروح قبل مايجي راجلي،  اني دماغي بيطير مني ، اني وييين ، معقوله في ناس ماتخافش ربي بهالطريقه ، خلاص الزني بدي مببااااح لهالدرجة
وَلَا تَقْرَبُوا الزِّنَا إِنَّهُ كَانَ فَاحِشَةً وَسَاءَ سَبِيلًا ﴿٣٢ الإسراء﴾
الزَّانِيَةُ وَالزَّانِي فَاجْلِدُوا كُلَّ وَاحِدٍ مِنْهُمَا مِائَةَ جَلْدَةٍ ﴿٢ النور﴾

شدوني كروني للحمام بالسيف ، تنظيف وحلوي وفتلي ، ربطوني وكل مانعيط يضربني هوا كف ، يااااااااااااربي نجيني منهم ، قاللهم لبساها وجهزاها خلي نلبس حتي اني ، توقعته بيلبس خماره هالمصردن وبيطلع ، شويه ويجي يهد علينا بهذاكا القفطان والباروكه والمكياج ، باللهي ماعرفته نيين تكلم ، قاللهم نحس فيه لما يشوفني حيهبل عليا ، وهما يضاحكو معاه ، طلع عنده حتي شدود جنسي الاخ ولا الاخت معاش عرفت نصنفه ، غبارة حرفه مطينه عليك ياليبيا .
قال صلى الله عليه وسلم: “لاتزال أمتي بخير ما لم يفش فيهم ولد الزنا، فإذا فشا فيهم ولد الزنا؛ فأوشك أن يعمهم الله بعذاب” .

يقولو في كلام يغطي عليه الشاطان وجها ، يسألو فيه علي حاجات حساسه هلبا ، معاش فيه حشم ولا  ادب ولا اخلاق الا من ستر ربي ، قعد يقسم فيهم اللي بيسافرو واللي بيقعدو في الحوش ، قعمزني في الصالون وربطلي رجليا وايديا ، في بنت نيجيريه قعدت بحداي ، ترجيتها تفكني وتساعدني ، قالتلي انهم حيقتلاها لو فكتني ، قعدت تحكيلي في قصتها ، هيا من اسرة فقيرة واهلها كلهم ماتو ، خدمت في بيوت دعارة في النيجر ، باش تحصل حق الهجرة لي ليبيا ، ومن ليبيا تبي تسافر لاوروبا ، اول ماوصلت لي ليبيا ، جابها واحد للحوش اهوا ، علي اساس حيسفرها بعد 3 شهور مقابل تخدم تحته،  لها 4 سنين وهيا في هالقذارة وماباش يسفرها ، يعطي فاها في مبلغ رمزي ، ومش من حقها تعترض علي ولا كلمه ، قالتلي ماتوقعتش انه حنخدم مع مرضي نفسيين ،قالتلي مرة بعتوني مع ليبي ، قعد يضرب فيا للصبح ، قالتلي اني تعذبت ، جسمي اتشوه ، خلاص نبي نتوب ، ومش عاطيني فرصه ، قالتلي اني لما كنت في النيجر ماكانش حد يقدر يتحكم فيا ، وبيوت الدعارة اللي خدمت فاها كانو يعاملو فينا كبشر ، لكن من اول ماوصلت اهني واني نتعامل كالحيوانات .....
قالتلي اني مذنبه وزانيه ربي مستحيل حيسامحني ، حتي صلاتي عرفت مافيش منها فايدة سيبتها .
قلتلها كيف ادقولي هكي !!، من قال ربي مش حيسامحك ويغفرلك ، لازم اتوبي توبه نصوحه ، وتحاولي تطلعي من هالوسخ اللي عايشه فيه ، ومهما كانت ذنوبك ماتسيبيش ربي ، كلنا نغلطو وغلطه علي غلطه تفرق،  بس ربي رحيم وغفور
وقال الحسن رحمه الله : لو لم يذنب المؤمن لكان يطير في ملكوت السماوات والأرض ولكن الله تعالى قمعه بالذنوب