مذكرات عاشقه

الحلقه 12 و13 ❤

الحلقه ١٢
ولست تدري شيئا عن معاناتي 🌺🌺
من بعد اسبوعين واحني بين المستشفي والحوش
حاااسة روحي موجوعه وصدمتي ماخفتش بكلل
امي رووووح قلبي بين الموت والحياة
الانسانه الوحيدة في الدنيا اللي تحبني وتخاف عليا ويهمها زعلي ، لو نقعد شهر مانتكلمش في الحوش محد يدورني ولايسأل علي حالي غيرها ، من عندي غيرك ياأمي باللهي اعليك ماتسيبيني بروحي ، نخاف يااأمي ، بلاك اني مانسوي شيء ، ياريتني قاعدة جنين داخل رحمك شادة فيك بالحبل السري ، ماتمشيش باللهي اعليك ياأمي مافيش حد محتاجك اكثر مني ، من ليا بعدك ياعيوووووني انتي💔💔
واقفه قدام باب العنايه ونبكي بلا صوت باش مانحصلش طريحة من المتوحش خوي ، حيلي مهدود هد ، اخ ياميمتي ريته فيا اني المرض ولا فيك ، قلت للصادق نبي نبات مع امي في المستشفي الليلة بس بالله اعليك مانبيش نخلاها بروحها وضعها مش مستقر نترجاااااك ، شافلي شبحة مووت وكركرني من ايدي بقوته كلها وروح بيا للحوش واني دموعي مابطلوش نلقي الالعاب الناريه تخبط احتفالا بفاتحتك ياسامي ، انت طالع من الايدة مع صحابك ونسايبك واني خاشه للحوش يجر فيا خوي زي الدابه ، وفي هاللحظه تمنيت لو ربي خلقني راجل ،كنت حنعلم هلبا ذكورة كيف تكون الرجوله ، مش كل من دار شعرات في وجهه بدي ناضج وكبير ويقدر يتحمل المسؤوليه ، فيه ذكورة بشنباتهم واجسامهم الضخمه لكن عقلهم مش ناضج عقلهم صغيييير صغيييييييير هلببببببا مايقدروش يقيمو بيه انفسهم فمابالك غيرهم ، ربي لما خلق الراجل بهيئته و برجولته وشجاعته وهيبته وقوته اللي تفوق المرأة بأضعاف مش باش يستقوي علاها ويضربها ، ولا يكسرها ويتعدي علاها ، ربي خلقك ياآدم باش تكون الصدر الحنون ، الحضن الدافي ، اللمسه الحنونه ، الظهروالسند اللي تتكي عليه اختك وامك ومرتك وبنتك ، حواء مش ضعيفه لأنه بوجودك هيا قويه ، حواء مش عار لانها شرفك وعرضك ، حواء مش جاهله لانك انت طريقها وحافزها للعلم ..حواء مش اقل منك ياآدم ... حواء هيا اللي بناتك .. حواء هيا اللي قواتك .. حواء هيا اللي كبراتك ... مادجيش توا تستكبر علاها ....🌺
كملت ليلتي واني نبكي ونصلي وندعي لامي مافكرتش في ولا حاجة هذيكا اللحظه الا امي وماشغلش بالي غيرها ....
في اوقات ربي يبعتلك اشارات يقولك انت علي شن كنت تبكي علي هالحاجة الصغيرة هادي تي راهو غيرك يبكي علي حاجات اكبر علي نعم انت عندك ومش حاس بيها وجي الوقت تفقدها ، ويااارب مانفقدك ياامي ....
تعلمت الدرس..... 🌺
مافيش حاجة تستاهل دموعي غيرك ، اي حاجة تانيه منقارنها بيك بتطلع تافهه ....
بعد اسبوع من شد الاعصاب .....
درت شربه خضراء ولبست عبايتي ونستني في الصادق باش يوصلني للمستشفي ، طق الباب فتحت نحسابه الصادق ، اول ماشفتك انصدمت ووخرت ودفيت الباب ، انت تلقيت الباب باش مايتسكرش وعيونك كانو معبيين نذم خشيت وقتلي بكل هدوء كلمني الصادق وقالي شدوني الردع ولانه خوك التاني مسافر لتركيا قالي دير بالك علي الحوش وانت متربي معانا وصاحبي وحاط فيك الثقه والكلام هذا ..
اني ماهتميتش نسالك علي الصادق ولا علاش شدوه لاني عارفه وساخته وقدارته ومع ذلك دعيت ربي يهديه ويفك كربه .
قتلك بهدوء وعيوني في الارض وصلني للمستشفي منقعد مع امي مادامه الصادق محبوس .
"تعصبت انت " وماكان ناقصني الا تعصيبك هذاكا التو .
ركبت في سيارتك واني لحقتك وصكرت الباب ، كنت شادة علي صدري بقوة بجد تعبانه ورعشه في ايديا وكل شيء ،غر راك اتفكر ولو ثانيه انك انت السبب ، لالا اني اصلا مانحبكش ولا حبيتك وانت ولا حاجة بالنسبه ليا صدقني كنت نتسلي بيك ولا مرة حبيتك لكن باللهي عليك دير روحك مصدقني حتي شويه واني نكذب ، خليني نحط حدود مع نفسي ونوقف حب خليني نزيلك مني بدون خسائر ارجوك ساااعدني لكن تصدق كنت نحب ضحكتك وعذاابي كانو عيونك وعضلاتك وكل شيءبس حاليا نشوفلهم بتقزز بملل بقرف وصلت لمرحله كره لكل حاجة حبيتها فيك ، ماتت رغبتي فيك زي ماماتت هلبا حاجات فيا .... 🌺
وصلت للمستشفي وطلعت نتيجة التحليل ، قالو انسجتي مش متطابقه معاك يااأمي ، صدقيني طبهم دوة فاضيه ، توا معقوله ياميمتي جسمك مايتقبلش حاجة من جسمي ،
كييييييف مايتطابقوش بس واني قطعه منك وانتي دنيتي ، كيف يكذبو روحي المتعلقه بيك واحساسي بكل حاجة فيك ، ياميمتي لما تتوجعي لا اراديا جسمي يتقطع من الالم ، ياميمتي دمعتك ماتنزلش علي خدك لالا طوول تنزل تحرق في قلبي حرق ، ويقولولك مش متطابقات تي هادي حاجة ماتنقاسش بالطب ، تنقاس بالمشاعر بالحب بالامومه بعشقي لرحم ارتحت فيه اكثر من دنيتي ونتمني نرجعله .....🌺🌺

ياقاضي الحاجات جئتك راجيا
كم حاجه اطوي عليها اضلعي
انت العليم بما طويت ...وكلما
ناءت به شفتاي...نابت ادمعي
جد بالرضا فرضاك أعظم حاجة
هو منتهي املي وغايه مطمعي "

حطيت راسي علي رجلين اميمتي وبديت انوح ونبكي ، نبكي علي دنيتي ، نبكي علي وحدتي نبكي علي ضعفي ، خوي ومرته مسافرين يدهورو في تركيا وماكلفش روحه حتي يسال علي امه دفع جزء من مصاريف المستشفي وسافر بيغير جوه والتاني انحبس من كثر التهريب والحشيش والنساوين واني وهالمسكينه مالنا غيرك ياربي ارحمنا برحمتك اللي وسعت كل شيء، مشيت للدكتور وسألته علي حال امي كان كبير في العمر هلبا وشااايب نعطيه في الستينات بياكلني بعيونه ، عاد اني بديت فريسه سهله لمطامع الرجال ، قالي امك حتموت لو ماحصلتولهاش متبرع والتكاليف عاليه هلبا متع العمليه مش حتقدرو علاها ، اني انهرت بالدموع شد ايدي يبي يخفف عليا ، جبدت ايدي منه بقوة وتوترت ، وقتله مافيش حل يعني ، قالي هوا من جيهه فيه حال ، ايه في حل لكن انتي ودماغك .
قتله شن قصدك
ابلع ريقه وقالي تذزوجيني
اني نخلعت ووخرت
قالي اهدي وبالشويه عليك نتزوجك مقابل اني نحصل متبرع لامك ونديرلك العمليه علي حسابي شن رايك فكري كويس
صدمتي كانت كبيرة معقوله اخرها نتزوج حد اكبر مني باربعين سنه ، ندفن شبابي مع حد في عمر جدي ، نقعد ممرضه في اول عمري لشاباني رجله في القبر ، واافقت واني قليله الحيله واني مهانه واني ضعيفه وافقت نبيع نفسي علشانك يااأمي وقداش تسوي عندي وقداش غاليه ، ولو بروحي اني مستعدة نفديك ، مالي حل غير هالحل ، وماشاورت لانه اصلا ماكانش واقف معاي حد ، كان معاي ربي فقط ،روحت وصليت استخارة وكنت مضايقه لكن الله غالب ماعنديش نصيب من الفرح حتي في زواجتي ، كنت مرة مرة ادجي اطل عليا ياسامي بدافع الجيرة فقط لا غير ، لانه نشوف في عيونك كيف يتهربو مني كأنهم خجلانين ، مستحيين من كميه العذاب اللي سببتهولي بدووون ذنب مني .......
حددت عرسك واني كنت منهارة لانه عرسي تحدد بعدك بيومين في يوم عمليه امي وهذا كان شرطي ، وماكنتش نبي لا عرس ولا شيء لكن اشرف اللي هوا خطيبي اصر يبيني نلبس الابيض ، قداش كنت متقززة منه وقارفه واللهي ياسامي قارفه ومش متحمله يقرب مني ، كل مانخمم في الموضوع نبكي ، نبكي بالم ، نبكي بحسرة ، وكأني حنسلم روحي لذيب باش يغتصبني ويقتل عذريتي ......🌺

جي يوم عرسك واتصلو بيا من العيادة وقالو انه اميمتي تاعبه وتبي تشوفني ، لبست فيسع ووقفت في الشارع ندور في تاكسي ، واخيرا حصلت واني كيف منركب يتلفتلي مولي التاكسي وكانو عيونه حمر وشكله يقدف ويضحك في ضحكه تخوف نزلت ووخرت بخوف شديتني ياسامي وتليتني لحضنك وعيطت علي مولي التاكسي باش يمشي ، ضميتك بكل قوتي ، وانت ضميتني بقوة اكبر ، حسيته حضن الوداع ، قعدت نبكي ونشم في ريحتك نبكي ونحضنك اقوي واقوي واقوي وكان نلقي ندخلك في وسط قلبي ، كنت فاقدة حضنك فاقدة وجودك ، كنت وحيدة مش معاي حد ، حضنك اماني حضنك راحتي حضنك كل احلامي ، نتمني الدنيا كلها توقف وتخليني في حضنك خلي نشبع منه شويه ، خلي نشم ريحتك ، خليها تعلق في حوايجي ، انت روحي ، صدقني انت قطعه مني ، واني من غيرك تاعبه ....💙
وجت اللحظه اللي خلاص لازم نطلع من حضنك ونخليه لغيري نخليه لحلالك نخليه لنصيبك نخليه لاختيارك وهل ياتري حتصونك زي ماصنتك وهل ياتري هل حتحبك زي ماحبك قلبي المريض ، ندعيلك تعيش ايامك سعادة ، كل ايامك فرح ياولدي ، لو كنت جبتك من رحمي مش حتكون اغلي عليا من توا ، وياريتك كنت جنيني مش حبيبي ، علي الاقل كنت تقبلت زواجك ومشاركتها فيك ....🌺🌺
انتهت الحلقه 💔