When Fools Rush In (COMPLETED)

13

Wala nang usapang namagitan pa hanggang sa makarating sila sa bahay ni Greg sa Quezon City. Tahimik nitong ipinasok ang sasakyan sa malaki at maluwang na bakuran. Ipinarada nito ang kotse sa tabi ng isang dalawang delivery truck.

Bumaba si Greg at umikot sa tabi niya at binuksan ang pinto niya. "Welcome, to your new home, Bianca."

Tahimik niyang pinagmasdan ang malawak na bakuran. May dalawang matandang punong-mangga sa magkabilang sulok ng solar. May lumang bakal na swing at seesaw. Nilinga niya ang dalawang palapag na bahay. Ayon kay Greg ay may apat na silid iyon na kinalakhan nito at ng mga kapatid.

Sinalubong sila ng isang maliit na babae na sa tingin ni Bianca ay nasa late twenties. "Good afternoon po, sir," anito at tumingin sa kanya, nanunuri ang mga mata.

"Betty, pakiakyat mo na ito sa itaas," utos ni Greg sa katulong habang iniaabot ang mga bagahe ni Bianca. "Doon sa dating kuwarto ni Sam. Siyanga pala, Betty, si Ma'am Bianca mo, ang asawa ko."

Narinig ni Bianca ang pagsinghap nito. Muli siyang tinitigan. Nakita niya ang pakikiraan ng disgusto sa mga mata nito.

"Welcome po, ma'am," sapilitang sabi ng katulong.

"Thanks, Betty..." aniya.

Hinawakan siya ni Greg sa kamay at inakay patungo sa isang building na hiwalay sa bahay at umookupa ng malaking bahagi ng harap ng bahay.

"I'll show you my shop." Binuksan nito ang pinto sa likod at pinapasok siya. "My source of income," nakangising wika nito. "Sa palagay mo ba'y kaya kong bumuhay ng pamilya sa trabaho kong ito?"

Sinuri ni Bianca ng tingin ang shop ni Greg. Dahil Linggo ay wala ang ayon dito ay limang trabahador. Nakakalat ang mga hindi pa yaring mga cabinet, office table, at bunk beds. Nakahilera naman sa gilid ang mga tapos na at nalagyan na ng varnish. Mahusay ang pagkakayari ng mga iyon at pulido na nagpapatunay lang ng isang mahusay at de-kalidad na manggagawa.

Sa isang sulok ay ang mga modernong mekanismo na ginagamit sa paghulma sa mga kasangkapan.

"Talaga bang karpintero ka?" she asked.

"Dati akong elementary teacher sa isang pribadong paaralan dito sa Quezon City, Bianca." He grinned boyishly. "Nagtapos ako ng education dahil iyon ang gusto ng Mama. Isa siyang retired teacher. But I inherited the carpentry talent from my father. May nakatayong isang lumang shop dito noong bata pa ako na nang mamatay si Papa ay tuluyan nang nasara.

"Dalawang taon na akong nagtuturo nang maisip kong hindi ako nasisiyahan sa trabaho ko. Sinubukan kong buksang muli ang shop ng Papa at paisa-isang tumanggap ng order mula sa mga dating customer."

Inilahad nito ang kamay sa loob ng shop. "I'm inundated with orders I can hardly breathe. So, kumuha ako ng mga tao. The next thing I knew, nag-aabot na ako ng resignation letter sa escuelahang pinagtuturuan ko."

"Mag-isa ka lang bang nakatira sa bahay sa likod?" Nakakailang isiping ngayon pa lang niya unti-unting kikilalanin ang napangasawa.

"Yeah. Si Sam, 'yong sumunod sa akin, ay sa bahay nila sa Novaliches. Ang bunso naman, si Luchie ay pitong taon na sa Italya. Umuuwi iyon dito once in every two years para magbakasyon. Nito lang nakalipas na taon hindi nakauwi dahil nanganak."

"Bakit hindi mo naisip mag-abroad? Lahat yata ay iyon ang gusto, ang makarating sa ibang bansa." Wala sa loob na hinaplos niya ang isang malaking crib na yari sa palochina, kumislap sa isip ang isang sanggol na naglalaro sa loob niyon.

"Ayokong manirahan sa ibang bansa. May trabaho naman ako rito at ako ang boss. Isa pa, kung nagtungo ako roon, di malamang na hindi kita nakilala," Greg said, looking deeply into her eyes.

Umirap siya. "Hmp. Bolero."

Natawa ito. "Tara sa bahay. Ituturo ko sa iyo ang magiging silid mo. Iyon ang dating silid ni Sam. At kung gusto mo, magpahinga ka muna sa itaas. Ipatatawag na lang kita kay Betty, kapag handa na ang hapunan."

"I think I'll pass dinner, Greg," aniya. "Mabigat sa tiyan ang ginatang bilu-bilo na inihanda ng Mommy kanina. Mag-aayos na lang ako ng gamit at pagkatapos ay magpapahinga na."

"Kung iyan ang gusto mo. Ako rin nama'y maraming nakain kaninang ginatan sa inyo."