أحببت تونسية ( روايات ليبية )

حلقة 3 الجزء التاني

رواية #أحببت_تونسية
( خيال ممزوج بلواقع )
للكاتبة #ندي_أحمد
الرواية بلهجة الليبية
حلقة 3 ❤️ الجزء التاني
🔥

ريماس بكل سرعتها في طريقها لصالة الجيم قلبها يدق بسرعه الشارع مظلم لاول مرة متخافش في نص الليل طالعه تسوق بسرعه خيالية
وصلت للجيم دخلت تجري تلقا احمد مرمي وسط القاعه
ريماس= احمد يا احمد شبيك شنوااا صار
احمد مش قادر ينوض ولا يتكلم هوا خارج وعيه تماما للاسف احمد لاول مرة في حياته يذوق الخمر و يسكر...
احمد=امشي روووحي ارجعي للحوش ماتقربينيش امشي
ريماس مش مصدقة لي تشوف فيه=معقولة احمد العاقل المؤدب لي ما عمره حط سبسي في فمه سكرااان...
طلعت تجري للسيارة جابت شيشة المية و رجعت صبتها على راسه وهوا مرمي عالقاعه
ريماس= اهووو فييييق نوووض شنوا عملت ياخي علاش هكااا علاااااش
احمد= امشي ارجوك امشي منحبش نسمع صوتك ولا نشوفك وجودك يخنقني فهمتي
ريماس قعدت على ركابيها جنبه وكانت ميتة تعب من يومين ماذاقتش النوم=احمد علاش تعمل في روحك هكا حرام عليك اتخيل جت معايا عمتي و شافاتك والله تموت
احمد جمع قوته و ناض قعد جنب ريماس و شبحلها و كان كلامه متقطع=ارجعي للحوش قتلك ريماس
ريماس= لا موش راجعه الا انا وياك ...مش بش نخليك هوني و مش بش نخليك نسوق وانتا في هالحالة واضح
احمد= يعني خايفة عليا
ريماس= لا اما عمتي
احمد= ههههههههه عمتك ولا أمير
ريماس= به يلا انروحو توا انتا موش في وعيك معاش تحكي اسكت
احمد= بس انا بنموت
ريماس= ربي يطول ف عمرك يا خويا لطف عليك
احمد صرخ في وجهها بكل قوته=انا موش خوووك فهكتي وما عمري حنكون خوووك انا نحبك يا ريماس نحبك وراس امي مقدرتش نتخلص منك وين ما نمشي صوتك في وذاني تعبت تعبت قلبي ما طاوعنيش ونعرف الشي هاذا غلط انتي حبيبة خوي امير و حتتزوجو بس اناااا مش قادر نشوفكم مع بعض انا فاليوم نموت الف مرة لما نشوفكم مع بعض
ريماس مصدومة من كلامه و دموعها نزلو=احمد اما انا نحب امير و بعمري ما حنغزرلك غير كأخ بس واضح...
احمد= ههههههه هاذا لي قاتلني انا نطعن في خوي في ظهره و نخون في ثقته
ريماس مسكت يد احمد ولد عمتها =احمد بربي خلي الموضوع على جنب و هيا انروحو خايفة يصير معاك شي والله
احمد= ياريت نموت ميتة زي العالم مش ميتة الحياة
ريماس=احمد انتا راجل باهي و مزيان و بخدمتك ومتربي الف وحدة تتمناك شوف حياتك شوف وحدة اخرى اكيد توا تنساني راه الحب لي من طرف واحد بعمره ما كان حب صدقني
احمد طلع من جيبه حديدة حادة = انا اليوم خلاص نبي نموت نموت وانا مالي عيوني منك وقتها نكون مرتاح...سامحيني
احمد كان يبي يقطع شرايينه قدام ريماس...بس ريماس بسرعه مسكت ايديه و
ريماس=هات هوني لالالا متديرهاش
احمد=حولي ايدك قتلك حولي معاش نبي نعيش قتلك حولي
ريماس وهيا متمسكة بالحديدة انجرحت و تمت يدها تنزف وهيا مش واعية بيها...
احمد اتفطن ليد ريماس لي تنزف فحول يده ومسك يديها
احمد= ريماس انتي تنزفي ريماس انا شنو عملت يا ربي
ريماس بعدت يدها من بين ايديه=عادي عادي لاباس لاباس
احمد جضن ريماس بكل قوته وهيا مصدومة من الموقف ما توقعاتاش يدير هكي...مخلالهاش الفرصة تبعد عليه=ريماس ريماس سامحيني ريماس نحبك علاش مخليتينيش نديرها ونرتاح منجمش نعيش بلاش بيك منجمش نعيش ونشوفك عروس لخوي منجمش نعيش وانتي و خوي في نفس الحوش لي انا فيه ريماااس والله الموت ارحملي
ريماس مش قادرة تنطق ولا كلمة دفاته بكل قوتها و عطاته كف=يزي كاهااااو خلااااااااااض يزي يزي تعبت قداش مني انا تعبت منك ومن روحي ومن كل شي...عيب لي تدير فيه عييييييييييب ارجع لوعيك يا احمد ارجع لوعيك
طلعت بسرعه و هيا فالباب ناداها احمد= ريماس سامحيني
ريماس حتى ما التفتتش وراها =تحبني نسامحك ارجع لدار خاطر عمتي متتحملش حتى شي فيك لو تحبني ننسا لي صار ارجع بخير و ارجع احمد تع زمان وانساني لاني مستحيل نشوف راجل غير امير
ريماس طلعت تجري من القاعه و طلعت في السيارة حطت راسها عالمقود وتمت تبكي تبكي بشهقة بعد لي صار...كانت متوقعه لي صار مع احمد قبل ماهو الا فترة ومرت مكانتش متوقعه ان احمد يحبها لهالدرجه...ريماس كانت تشوف في حب احمد ليها فترة و حتمر بس للاسف احمد ما نساهاش و تعلق بيها اكثر حتى بعد ما عرف ان موعد زواجها قرب من خوه ...حتى بعد ما اعترفت الف مرة انها مش ممكن تشوفه غير كخوها وولد عمتها
رجعت ريماس للحوش خشت الحمام غسلت وجهها و ضمدت الجرح لي في يدها...دخلت قتحت باب دار امير تطمن عليه
امير نايم وجهه مزال تعبان و شاحب
ريماس قربت منه و تمت تشبحله وهوا نايم=امير نوعدك مش حنفكر في غيرك لو نموت منجمش نخلي قلبي يدق لغيرك
طلعت ريماس و سكرت الباب و رجعت لبيتها هيا و امينة...امينة كانت نايمة الوقت كان ثلاثة الصبح ..ريماس دخلت فراشها و حطت راسها عالمخدة والنوم هارب عليها من افكار لي في راسهااا
الصبح
امينة ناضت بدري للجامعه= ريماس وين المفتاح اووي
ريماس= هاوينو غادي حلي عينيك
امينة= خزي انتين ايمة وانا نقرا الصبر يا ربي
ريماس= نقصي حسك وسكري الباب وراك خليني نتمرقد
امينة = كسلاااانة تتحشميش
امينة طلعت و قالت بصوت عالي حتى اتفيق ريماس من النوم= اميييير شنوووو فيك خييييييرك وطلعت تجري لسيارتها
ريماس سمعتها نطت من السرير و طلعت تجري لغرفة امير فتحت الباب من دون حتى اذن =امير امير شبيك
امير انخلع منها= بسم الله الرحمان الرحيم..خيرك
ريماس= شبيك...شنو صارلك...وين...تره,,,لاباس
امير= ريماس تي خيرك تقول ضاربك جن هالصبح خلعتيني راه ...حتى شعرك بسم الله نايض تقول مقنبلين عليك الناتو العفو
ريماس اجري للمراية=وووه عليا يح بيني نفجع...
شدت شعراتها فوق و مزالت تتثاوب والتفتت لامير= انتا لاباس مش صاير معاك شي
امير= لا والله حمد لله احين بهلبا من امس
ريماس= امينة الكلبة تفوووووو عليها
امير= هههه شن دارتلك
ريماس=تعيط قدام بيتي وانا راقدة وتقول امير خيييرك بش تفيقني الحمارة نضت ساقي اعلى من راسي والله الا ما تشوف ...نفجعت عليك
امير= توا فهمت سبب دخلتك...والله بالاول لما دفيتي الباب نحسابك قوات الردع هههههههه
ريماس= تتضومر انتي مخيب راسك هههههه
امير= خيرها ايدك
ريماس= أممممم تجرحت البارح وانا نعمل في كسكروت فالليل
امير=تره نشوف
ريماس=قتلك لاباس شبيك
امير= ليوم عندي مراجعه عند الدكتور الساعه 2 ولا نسيتي
ريماس= ايييه ايفكرك فالخير خليني نرجع نرقد والساعه 12 فيقني كلمني فالتلفون اوووكيتو
امير= يحليلي منك ياااااوكيتو
ريماس طلعت بسرعه من عند امير وهيا تجري لدارها كان احمد كيف راجع من برا...اتصدمت فيه منغير قصد
ريماس= احمد...سمحني مشفتكش
احمد يشوفلها بس مقالش حتى كلمة...وكمل طريقه لداره...فتح الباب و دخل رمى حاله عالسرير...سكر فونه....دخل للحمام بياخذ دوش ومش حابب يطلع ولا يشوف حد حتى امير خوه لا ما تطمنش عليه
ريماس دخلت لدارها=حمد لله اهو رجع احمد لاباس....الصبر ياربي قداش كان منهار البارح...سخفني.... يلا توا بعد ما نتزوجو انا و امير توا ييأس و ينسا .....يتبع