أحببت تونسية ( روايات ليبية )

حلقة 2 الجزء التاني

رواية #أحببت_تونسية
( خيال ممزوج بلواقع )
للكاتبة #ندي_أحمد
الرواية بلهجة الليبية
حلقة 2 ❤️ الجزء التاني
🔥

ريماس ناضت تلقا جاكيت أحمد على كتافها =ياخي متع شكون هاذي ياربي شبيني نعست يح بيني
حطتها على جنب و مشت بسرعه تشوف في امير من البلار تع غرفة العناية تطمن عليه أمير راقد مزال تعبان بعدت الستار بيدها و قربت وجهها من بلور لي بيناتهم حتى تشوفه واضح نزلت دمعتها لانها بعيدة عليه و حطت راسها بكل ما فيها من تعب وتمت تبكي= ياربي منجمش نعيش من غيرو ياربي ان شاء الله تحليله يطلع سلبي يارب ....
امير فتح عيونه و شافها متكية عالبلور و تبكي وهيا مش فاطنة عليه قاعد يشوف في كتافها كيف يتحركن و هيا تبكي= ماتبكيش ريماس انا وعدتك ما نبكيك طول عمري...سامحيني و جمع قواه و ناض من سريره و ماسك التغذية تاعه وقرب و دقدق عالبلور ...رفعت راسها شافاته مسحت دموعها بسرعه و شاورتله بيدهاا =ارجع للسرير امشي
كانو يحكو اشارات لان الصوت ما يوصلش بس كل شي كان مفهوم بلغة عيونهم
امير شاور بيده على خدها وقلها مااتبكيش امسحي عيونك...
الدكتور= سلام عليكم دكتور امير
ريماس ما تحركتش من مكانها
امير= خير يا دكتور طلعو التحاليل
الدكتور= لالا مزالن اسبوع تاني ان شاء الله
امير= اهااا...دكتور نبي انروح مليت من المصحه
الدكتور= بس الجرح مزال مفتوح
ريماس طقت عالباب=دكتور ممكن ندخل ميسالش
امير= دكتور ريماس ممكن تقول زميلة السنة بتتخرج دكتورة ان شاء الله هيا قارية سنواتها الاولى في تونس و بتكمل هنا عندها ضروف
الدكتور= اتفضلي دكتورة
ريماس= ايعيشك
امير= به امتا بنطلع
ريماس= علاش مستعجل انتي
الدكتور= تطلع بس بشرط...لازمك عناية خاصة تجيب ممرضة مثلا تغيرلك الضمادات و تعطيك الابرة كل يوم و التغذية ...ممرضة مقيمة يعني او ممرض طبعا
امير= اي ايه ممرضة
ريماس فنصت فيه= ممرضة شنوواا...انا لي نتلها بيه دكتور انا وقفت محاضراتي السنة هاذي توا انا لي ندير كل شي و نكون ممرضته الخاصة اصلا انا بنت عمتو و نسكنو في نفس الحوش يعني موش لازم منها الممرضة
امير فطن للغيرة تع ريماس و اتبسم
الدكتور=اوكي تمام مالا اليوم تقدر تروحو بيه
ريماس= حمد لله بنطلع نكلم العيلة وراجعه
أحمد فونه يرن=الو احمد وينك
أحمد=ألو ريماس خيرك صاير معاك شي انتي بخير
ريماس= لاباس اما ايجا بش نخرجو امير من المصحه ليوما
احمد= والله.. حمد لله يارب جايك توا

سكر من ريماس و اتصل بالحوش
امينة= اهلا حمودي خير
احمد= قولي لامي و ايهم بلاش يجو للمصحه الدكتور قال عادي يطلع اليوم
امينة= واللهي حمد لله يارب...ماما يا ماما تعالي
احمد= يلا انا ماشي نجيبه
ريم= خير يا امينة شنو في...معاش وقت بنطلعو للمصحه
امينة=لالا بلاها كلمني احمد و قلي بيطلع اليوم
ريم= من قال
امينة= والله توا كلمني احمد قال الدكتور سمحله يغادر
ريم=يارب لك الحمد يارب...يلا يلا نجهزوله غرفته و سريره
في المصحه
أحمد= حمد لله عالسلامة امير
امير = الله يسلمك يا خوي بارك الله فيك...مننساش لي درته على خاطري
احمد= ما درت شي راه هاذا واجبي
ريماس ماسكة امير من يده من جهة=امير لو تحس بدوار قلي نجيب الكرسي المتحرك باهي
احمد= ايه ايه احسن
امير= لالا اهو عادي مش حاس بشي
ريماس= يا روحي ربي ما يوريني فيك شر...منقدرش نعيش من غيرك والله
كلام ريماس كان نازل على احمد زي من يطعن فيه...كلكلمة يحس بمرارتها على قلبه و ساكت
طلعو امير فالسيارة واتمدد من تالي و رقد تعب من الخطوتين لي مشاهم و طلعت ريماس جنب احمد وماسكة في يدها جاكيت
ريماس= احمد شكرا ايعيش خويا
احمد= على شنو
ريماس= الجاكيت هاذي ليك انتي نعرفها
احمد تلخبط= لالا عادي بس كنت نشوف في امير شفتك راقدة قلت مرات تبردي
ريماس= ايعيشك
احمد مش قادر يشبح لريماس طول الطريق يسوق و ساكت وكأنه يصارع في نفسه= احمد ضروري تعتبرها اختك ضروري تحولها من قلبك و من راسك ابعد عليها قدر المستطاع
ريماس ساكتة واتفكر= احمد من بعد لي صار اتغير يا حسرة من كنا صحاب و نبصرو ووين ما نتضايق نحكيله...خصارة الحب في غير محله قداش يفسد علاقات ....
التفتت لأمير لتالي و تشبحله و تتبسم= ربي يديمك جنبي و ما يفرقنيش عليك اميرووو ربي يشفيك
احمد كان مركز معاها وهيا تشبح لامير ومانزلتش عيونها...مقدرش يتماسك غيرته و ضرب فرينوووو قوي
ريمااس=ووووه شبيك ياخي بشوية علاش هكا
احمد= اسف اسف معلش ...امير انتا كويس
امير)= تمام حمد لله
وصلو للحوش و دخلوه لغرفته ايهم و احمد رفعوه بيناتهم
امير= ربي يباركلي فيكم خوتي والله ما ننساش وقفتكم معاي
ايهم= امير اقل واجب انتا لو مهما نديرما نردولكش جميلك علينا
ريم= ربي يخليكم لبعضكم يارب
ريم= احمد وايهم يلا نطلعو خلي يرتاح
ريماس= ايه حتى انا طالعه معاكم
احمد=ايه لازم ترتاحي شوفي وجهك تعبان من السهر ريحي روحك
امير = لا لازم تغيريلي الضمادات بالاول لاني مش قادر نرقد بيهم...نبي اصغر منهم
ريم= باهي باهي يا ممرضة نخلوك انتي و مريضك بش ما نزعجوكش
ريماس= عمتي هههه تي عادي شبيك تحبو تقعدو اقعدو
ايهم= وين قاعدين و غمزلها...خوذو راحتكم
ريماس= يا ماصط توا نوريك هههههه
طلعو و احمد كان ميبيش يطلع و يخلي ريماس مع امير بروحهم...تضايق هلبا طلع بسرعه و طلع في سيارته و اتوجه لقاعة البوكس= احمد شن لي قاعد تدير فيه....معقول اغير عليها من خوي لي هوا حبيبها و حيتزوجها قريباااا...شن لي تدير فيه انتاااا شن..
دخل للقاعه لبس بدلة الرياضة وتم يتمرن ويضرب بكل قوته...يبي الشحنة لي فيه ترتاح...يبي باي طريقة يبعد عن ريماس باي طريقة لازم يلقا وين يهرب منها...=علاااااش حتى نغمض عيوني نشووووفك علاش يا ريمااااس علاش يارب أأأأأأأأأأه وتم يضرب في تع التمرين و ايعيط ايعيط لين طاح على ركايبه و غطاه العرق و نفسه انقطع.......يارب يارب لا تبليني في قلبي...يارب عاونني يارب
طاح الليل و أحمد مزال في القاعه لين رقد عالارض وهوا مش واعي بشي كل شي في جسمه يتألم كل شي
في الحوش
امينة=الو اهلين اسعد
اسعد=اهلين...كنت نبي نطمن على دكتور ايمن كويس
امينة=مشكور ايه حمد لله ليوم روحنا بيه
اسعد= انتي عليش مجيتيش للجامعه ليوم
امينة=مشغول بالي على امير ومنبيش نخلي ماما بروحها...فاتوني هلبا كورسات
اسعد=انا بنعطيهم لكي متشغليش بالك تمام توا ناخذهم من الادارة ولا نتصرف
امينة= ما تتعبش روحك شكرا
اسعد= سراج كلمك ولا
امينة= بس الشي هاذا يخصني انتا شن دخلك...انا لازم انسكر باي
اسعد= سكرت في وجهي خاطر هاذاك الحقير .... الايام بيناتنا والله الا ما يندم
اسعد= الو سراج انتا وين نبيك في موضوع
سراج=نتلاقو بكرا فالجامعه يا برو انا بنرقد توا تعبان شوي
اسعد= باهي نبي نسالك..شن لي بينك و بين امينة
سراج= اييي علينا مش قتلك فوت الدسكة هاذي...اصلا هاذي حياتي الشخصية مفروض نحكيلك كل شي
اسعد= حتى ولو في شي انا نحذرك ابعد عالبنت ها مش حركات رجال لي تدير فيهن واضح...انا من الاول حكيتلك انا على شن ناوي وانتا توا جاي تطيح في كل شي
سراج= اسمع اياك تقرب منها مفهوم اهو والله لا صاحبي ولا نعرفك...بعدين مشكلتك مع خوها شن دخلها هيا...من لي يدير في حركات مش متع تريس نا ولا انتا..
اسعد= بنبكي من طيبتك ياراااا تي شن دخلك فيا ابعد من شوري وخلاص
سراج= توا لما تبعد انتا من شورها توا نبعد من شورك..نصبح على خير
امير=ريماس...ريماس نوضي امشي لدارك
ريماس= لا موش ماشية بنقعد جنبك لين يخلص التغذية و نرقد
امير= بس هوا يخلص متاخر توا نتصرف اني والا نسيتي اني دكتور
ريماس= سي الدكتور ايعيشك خليني نخدم عروحي موش ماشية مفهووووم
امير= ام راس يابس
ريماس=صحيت عالمعلومة نعرف
امير= مهبولة
ريماس= بيك
امير= هههه تعاكسي فيا وانا بنموت متتحشميش ههههههه
ريماس الكلمة وجعتها بالرغم انه يبصر كلمة بنموت زي السكين في قلبها...نطت و جلست جنبه و مسكت يده= اسكت معاش تقولها مفهوم معاش نحب نسمعها ايعيشك لو عندي خاطر عندك...راه نحنا يا نعيشو مع بعضنا يا نموتو الزوز مفهوم...امير ربي ما يوريني فيك شر
امير= سامحيني...تعبتك معاي
ريماس= معاش تقول هكا...نسامحك على شنوااا.؟؟؟؟ اصلا انتا نسيت لي عملتو معايا كيف عملت الحادث هاكا قداش سهرت معاي و تحملت كل شي؟؟؟نسيت كي كنت كل مرة نغرق و انتا تنقذني اصلا انتا خليتني نحب الدنيا و عطيتني سبب نعيش بيه ..حتى حد ما حس بوجيعتي غيرك...انتا يا امير انتا هوا السبب لي انا عايشة على خاطرو انتااا تفهم فيااا ميهمنيش لي يصير خليه يصير المهم انتا معاي ومنك نستمد قوتي
اميردموعه نزلو وهيا موش شايفاته وهيا منزلة راسها و تحكي...امير حس بمسؤولية كبيرة حس انها متعلقة بروحه بشكل غير طبيعي...غمض عيونه و فكر= زعمه لو يطلع عندي خبيث فالتحليل كيف بيصير فيهااا؟؟؟ كيف؟؟؟؟ يارب ان شاء الله خير يارب
ريماس نزلت راسها وما رفعاتاش تاني....امير استغرب ...يده بين يديها ماسكتها بكل قوتها و نايمة و هيا جالسة...امير وجعاته بكل ومكانش يبي يفيقها بس هوا تضايق من افكاره لي جاته و يبيها تبعد عليه
امير= ريماس ... انا نبي نقعد بروحي بنرقد اطلعي برا لو سمحتي
ريماس استغربت من كلامه و لهجته=شبيك حبيبي
امير=ولا شي يا عيوني بس نبي نقعد بروحي
ريماس = اوكي تصبح على خير
ريماس طلعت وسكرت الباب و امير غمض عيونه يبي يهرب من افكاره
ريماس =مسكين امير نفسيته صفر...لازم ناقف معاه والله مش بش نخليك وحدك الا لو خذتني الموت
فجاة رن فونها= الووو عسلامة احمد
_انا حارس قاعة البوكس
_شبيه احمد
_لالا خير
_بس انتي بس لي لقينا رقمها...نحنا بنسكرو القاعه بس هوا مرمي عالارض وموش واعي بشي...ارجوك تعالي روحي بيه ممكن يكون شارب ولا حاجة
ريماس=شنواااا...جاية جاية
ريماس طلعت تجري لبيتها...
ريماس=امينة هاتي مفتاح كرهبتك بربي فيسع فيسع
امينة= توا متاخر ليل خير شن في امير تمام
ريماس= اي اي تمام راقد وكان سالت عليا عمتي او هوا قلهم راقدة او في التواليت باهي
امينة = بس
ريماس= ايعيشك بلا بس لا بطيخ هاتي
طلعت ريماس تجري فتحت السيارة داست بكل سرعتها = احمد معقول يشرب لالالا مستحيل..... ان شاء الله ميكونش صايرتلو حاجة والله عمتي موش ناقصة فجايع........يتبع