مذكرات عاشقه

الحلقه 18💋

الحلقه 18
لانك يارب فوق كل الظنون، وفوق كل الخيالات ، ولأنك ربّ المستحيلات التي هي عليك هيّنة ، لأنك القادر الذي لا يعجزك أمر في السماوات والأرض ؛ نحن نحلم ولاحدود لأحلامنا ، وندعو ولاسقف لدعواتنا نأمل ولاقيود لآمالنا ، لانك الكريم إذا أعطيت أدهشت ، ولأنك كما وصفت نفسك علي كل شيء قدير 💕

اخديتها ومشيت باها للعيادة درتلها تقرير طبي وعالجتها عند دكتورتي ، نصحتني نبلغ الشرطه علي قصه الاعتداء هذا واني قررت نأجلها نيين نلقي باها ونخبره واكيد هوا حياخد بحق بنته اليتيمه ، شريتلها حوايج تبدل فيهم وخديت اجازة من العيادة يومين، وادهمت للمشفي عند أمي ونزلتها معاي ، حقا طلع اسمها نور ، وفعلا كانت النور اللي خش لحياتي ، اول ماشافت امي وكيف شعرها طايح قالتلي حتي ماما شعرها طاح ، واااااه ياسرطان قداش خديت منه احباب وقداش كسرت فينا مشاعر ، روحت باها للحوش ودوشتلها ولبستها بجامه ، كانت موجوعه، وريته الوجع كله فيا اني يانور وانتي ماينوبك منه ذرة ، نشوف فيك نفسي ، وأمنيتي مانشوفش فيك بنتي مستقبلا ، كلنا ممكن نتعرضو للتحرش او الاغتصاب وممكن يكون من اقرب الناس لينا ومن المحارم ، للاسف هذا انتشر بشكل كبير في بلادنا العربيه
في أٌمتك ياحبيب الله كثر الفجور
وأُبِيحت المعاصي  ....👆🌹
رن الجرس خفت يكون سعيد لكن فاجأتني لما لقيتك واقف وطالب انك تخش ، دخلتك ونسيت نور اللي مقعمزة تتفرج علي طيور الجنه في الصاله ، انت استغربت وقتلي هادي مني  ،قتلك توا نحكيلك ، التصرف الغير متوقع من نور اول ماشافاتك هربت وراي وقعدت تبكي وتعيط ماتقربنيش ماتوجعنيش، اني نخاف منك ،ماتقربنيش وبدت تعيط بشكل هستيري .
وتتساؤلو كيف يجي المرض النفسي ، تي العقد اللي ركبتاها فينا لاتعد ولا تحصي ، قولولي كيف منوثقو فيكم ونحبوكم وكل القصص اللي من حولنا عن خيانتكم ، كيف منصدقو مشاعركم وانتم الكذب يجري في دمكم ...
كيف منقدر نفهمها انه مش كل الرجال خاها اللي اغتصبها 💔 ، كيف منخلاها تستوعب انه مش كلهم يبو جسمها ، كيف نقدر نقوللها انه فيه اللي كويسين ومش حيضروها ،واني بروحي مش قادرة لانستوعب ولا نفهم ولانتخيل منكم غير الخراب  ، نبي نحاول نقنع نفسي بأنه مازال فيه رجال علي وطني مش ذكورة ..........👌🌺
دخلتها للدار واني نسكت فاها ونحلفلها  انك مش حاضّرها وانك طيب وفي داخلي نردد" اني ضحيته يانور مش انتي ماتخافيش" .
طلعت وانت في عيونك الف سؤال قتلي خيرها البنت مش طبيعيه بكل ، وفي خاطري نقول هوا انتو خليتو حد طبيعي ، حكيتلك قصتها ، انت تقززت وقتلي وانتي مالك ومالها بري سلماها للشرطه يدورو اهلهاولا يدبرولها مش ناقصه هم انتي ، وكيف تخلي بنت هكي تخش حوشكم  ..
اني اهني استب عقلي استاكه معاش قدرت نتحكم في اعصابي وفي كل موقف كنت نتأكد انه خروجك من حياتي كل أصح من الصحيح وإني كنت غبيه يوم حبيتك وحسيتك بني آدم .
والبنت شن ذنبها كان خاها فاسد ،هادي طفله من كل عقلك تبيني نسلمها للشرطه ، تباها تتعقد فوق ماهيا متعقدة ومنهارة، باللهي كيف تفكر ، وبعدين شن قصدك لما قلت بنت زي هكي تخش لحوشك ، انت ناسي انه اللي واقفه قدامك متعرضه للاغتصاب ، وكان هيا من خاها اني من زوجي ،ولادرت روحك ماشفتنيش هذاكا اليوم ، وباللهي  وين رجولتك ونخوتك لما ادقولي لوحاها في ميتم ، اني وياها يتامه وماليناش حد وشن تبي جايني كان عندك حاجة قولها فيسع تربح راني معاش طايقه شيء .
كنت تشبحلي وبس ، سألتني سؤال واحد .
انتي هكي كويسه ولا ثمتلي الطيبه ؟
وااااااااه منك تي اطلع تربح ايه اني شاطان رجييييييم ومدايره روحي ملايكه ودفيتك وطلعتك ، ربي مايحصل فيا غر في المرضي النفسيين افففف  وخلاص .
صورت البنت ونزلتها علي الفيس وكتبت اللي يعرفها يتصل ونزلت رقمي ،لازم نلقي باها باش ناخد حقها قبل ماتبرد القصه ، قعدت الليل كله وهيا تتوجع واني ساهرة معاها وقلبي بيتفتفت علاها ، انتي قضيه مجتمع كامل يانور مش مجرد قصه عابرة انتي موضوع يمس كل مرأة كل ام كل عائله مرات تكون نور بنتك او اختك او جارتك او حتي انتي ، ديرو بالكم علي اطفالكم علموهم الصح من الغلط ، من اكبر الاخطاء تخلو بناتكم جاهلين للمواضيع اهيا، ديما وقضو وعَّودو بناتكم يحكولكم كل شيء باش تعرفو تتصرفو في الوقت المناسب ، الشيء هذا مرات يصير في الشارع في المدرسه في الحياش راهو ماتستبعدي شيء ، والنت والفساد اللي صاير فيه بدي ينتشر في بيئتنا اللي كانت محافظه ...👆🌺
اتصل بيا رقم نحسابه حد تعرف علي صورة نور ، لكن لما قالي اني شفت منشورك ومستعد نتبرع بكليتي مقابل الحوش  ، بديت انقز من الفرح واخيرا واخيرا ، فرحت والفرحه كانت بأمل انه تكون انسجته متطابقه ،اتفاهمت معاه نتلاقو غدوة في العيادة ويدير تحليل وهالمرة نبي نتأكد من سلامه الكليه .
خديت نور في حضني وكأني نحاول نعوضها وولو واحد في الميه من فقدان امها ، كنت انطبطب علاها وكأنها روحي ♥️ وياخالق الارواح الرحمه ....🌺
كنت علي اعصابي نيين طلعت النتيجة ولله الحمد الانسجة متطابقه ودموعي معاش قدرت نشدهم قعمزت في الممر ونبكي ونور تسكت فيا ، ااااه ياطفلتي ياسندي انتي مش عارفه من مفروض يسند التاني ، لكن اني حسيتك جزء مني يانور عمري ، ووجهك خير عليا ...🌺🌺
كلمني المتبرع يبي يجي يشوف الحوش وافقت وعطيته موعد  لغدوة "بعدالعمل" ، درنا عشاء اني ونور وكلينا ورقدنا ، الصبح نوضتني وهيا تضحك ، وضحكتها كانت في حد ذاتها راحة ، قلتلها شن مدايرة ياشويطينه علي الصبح ،قعدت اتل فيا للكوجينه ، لقيتها مدايرتلي فطور، ههه زبادي وسندوتش جبنه وطاسه حليب ، شديتلها يداها الصغنونات وبستهم ، حليلي منها ياناس ادمنتها عشقتها ياهوووو ، فطرنا ولبسنا ومشت معاي للعمل ، كانت هاديه ومش زي الاطفال اللي في عمرها فوضويين ، تحساها بالغه في جسم طفله ، كملت خدمتي ودرت دورة علي أمي ومشيت للحوش ، خشيت للكوجينه درت رشدة مبكبكه لانه نور تحبها وساعدتني فاها هههه والعجينه اللي كليناها اكثر من اللي انحطت في الطنجرة ، ماتغدينا ودرت شويه في الحوش ، نين جي الموعد متع الراجل وفعلا خش باش يشوف الحوش واني نودع في كل زاويه في كل جزء فيه ، هذا بيت اهلي ، اهني لعبت اهني طحت اهني كان بابا الله يرحمه مقعمز اهني كان ياكل ، اهني ضربني الصادق ، اهني بكيت ، اهني تعذبت ، اهني تألمت ، اهني كنت نكلم في سامي  ،  اهني ضحكت اني وسامي ، اهني بكاني سامي وبكتني الدنيا كلها  ، وأشك اني عمري بس 20سنه .