قمت صليت ركعتين وهديت مشيت لراغب في مكتبو عاملوا في البيت قال لي اقعدي هنا قلت ليهو كنت عاوزني لشنو قال لي اول حاجة تصرفك مع فادي قبيل كان بايخ جداً واحرجتيهو جدا جدا وثانياً السبب المدخلك في الحالة دي شنو ؟ قلت ليهو انت عارف انا لمن أكون زهجانة بتصرف تصرفات غبية وسبب الحالة الأنا فيها دي أنا حاسة أنو ما عندي لازمة في الحياة دي وبس قال لي الحياة دي مافي زول دائم فيها فعيشيها بكل الفيها واي حاجة صعبة حتعدي بس أعملي حاجة بتحبيها وخليك واثقة من نفسك قلت ليهو إن شاءالله قال لي ومشروعك قلت ليهو ما وقتوا عندي حاجات تانية بفكر فيها حاليا ما عايزة أعمل خطوات جادة بدون تفكير قال لي خير يا زولة ومتى ما احتجتيني حتلقيني ❤️ قلت ليهو تصبح على خير ،،، دخلت غرفتي وبين أني عايزة أحددها مع أي زول يغلط معاي وبين أني أفضل كده وبين أتغير للأحسن وأكسر عين اي زول أتكلم فيني ❤️ ،، بس ما عرفت حأبدأ كيف والهدف الحأختو قدامي شنو عشان اواصل ،، قطع حبل افكاري صوت التلفون كان اتصال من بت خالتي "وريف" انا وهي صحبات شديد وفي نفس عمري ،، اول ما فتحت الخط رفقة يا كلبة مالك ما بتسألي ولا اللقى احبابو قلت ليها احباب شنو يااخ قالت لي ما تكوني عملتيها تاني قلت ليها والله عملتها 😂 ما بيدي والله ودي آخر مرة تاني ما حيكون في فسخ خطوبة لانو دي ما حوافق قالت لي عقلتي متين !! قلت ليها قبل شوية وانا جاية من غرفة راغب قالت لي ااا راغب هو كيف ؟ قلت ليها احم 😏 من قبيل نازلة فيني شكل وما سألتيني كيفك تسألي من راغب قالت لي الكلام معاك ما حيفيد قلت ليها طيب ضربتي لشنو قالت لي كنت عايزاك تمشي معاي عرس صحبتي مافي زول رضى يمشي معاي قلت اشوفك قلت ليها تمام يا زولة اصلا عايزة أغير جو قالت لي أنتي جادة قلت والله جد انا مليت من الحبسة الأنا ما عارفة سببها شنو قالت لي خلاص خير بكره بجي اسوقك تقعدي معاي في البيت لحدي العرس ينتهي قلت ليها حسستيني انو عرسك انتي قالت لي ان شاءالله قريب 😂 قلت ليها أقطعي وشك يا تافهة ، قفلت فيها الخط لكن عدلت لي مزاجي يااخ 🖤
قمت من صلاة الصبح صليت ودعيت وصبحت على راغب وابوي ،، بقو يعاينو لبعض نظام غريبة!! قلت ليهم أتعودوا يااخ وأمي كانت قاعدة قلت ليهم وبعدين ماما أميرة ما شغالة عندي عشان تقوم بالشغل كلو براها 🙂 ابوي قال لي متين بتناديها "ماما اميرة" قلت ليهو دي اول خطوة في التغيير ،، بقت بتعاين لي بس وما ردت قلت ليهم بعدين تمني حتجيني وحأمشي أقعد معاها كم يوم عندها عرس صحبتها ابوي قال لي كويس ومنها تغيري جو قلت ليهو ده المطلوب ♥ ،،، بعد ابوي وراغب طلعوا ماما جاتني قالت لي غلطت معاك في حاجة قلت ليها أنت شايفة نفسك غلطتي قالت لالا والله قلت ليها تمام قالت لي انا طول عمري معتبراك زي بتـ.... قلت ليها قبل تكمل مافي داعي للحوار ده والله انا طالعة فوق أجهز شنطتي وماشه مع وريف قالت لي خير يا بت عبدالله قلت ليها قلتي حاجة قالت لي يا بتي ☺️ طلعت فوق ولا تعبت رأسي بالتفكير ضربت لي وريف قلت ليها تجيني قالت لي نص ساعة بس واكون معاك ،،اخترت كم فستان وكم بنطلون كده وختيتهم في شنطة الضهر ،،بعد ساعة حتى وريف وصلت قالت لي والله أسفة بس العربية قطعت بنزين قلت ليها وقت وصلتي بخير ما مشكلة ،، وريف إنسانة جميلة جوه وبرا طولها متوسط وحلبية ،، قالت لي طيب نطلع قلت ليها أرح أثناء ما طالعين هي وراغب أضاربوا في الباب وهي بدون ما تحس قالت ليهو آخ طويل كده وما بتشوف قدامك يااخ قال ليها عيدي كلامك قالت ليهو ودمك بارد كمان قال ليها لو خلصتي أبعدي من الباب لأني مستعجل قالت ليهو ما بزح الا تعتذر ،،جراها عليهو قال ليها متأكدة ما بتزحي قلت ليهم أحم نحن هنا ،، وريف وشها جاب الوان وفتحت ليهو الطريق وراغب دخل قلت ليها مشينا ؟! قالت لي أي أرح
