عشق في بلاد حروبها لا تنتهي ( الفتنه و الثأر)

البارت 33

_
_
#عشق_في_بلاد_حروبها_لا_تنتهي
#تكملت_الجزاء_الأول الحلقة (33)
.
.
في الحلقة السابقة
نزلت غالية براسها وتكت جبهتها علي جبهته وهيا تسمع في صوت نفسه العالي ودموعها لقعدو ينزلو علي خدوده هوا وقالت بهمس وبصوت يرعش:اني نحبك يامحمد اني نحبك هلبا انت قلبي وربي انت حياتي تسيبنيش رد بالك تسيبني لانه ح نموت واللهي ح نموووت
وبعدت براسه شوي وقعدت تشبحله كيف ضم فمه وهوا يزمط في ريقه ويبتسملها وهوا خلاص يستسلم لمصيرة يستسلم بكل رحابة صدر ، عيطت غالية عيطه خلت الشارع كله يطلع من أثارها من بحت الالم لي فيها
حست روحها وكانها في حلم حاسه بروحها رزينه وهيا تحس في الجرات اللي يبعدو فيها علي محمد وهيا تصيح ب قلة حيلة وب صوت تعب وأرهقته الصدمه : لاااا محمد لااااا
وقبل ماتغمط عيونها شافت عبد السلام وهوا مطبس علي محمد ودموعه علي خدوده .....

قراءة ممتعة
#البارت_التالت_والتلاتون

لماذا لا ينتهي كل هدا ، لماذا لا نعش بسلام 💬🔐
(الياقوت)
.
طلع عبد السلام من الاسنسير وهوا يشبح في شباب المحور كلهم محاوطين المستشفي حايسين فيها من الداخل وحارسينها من برا .
ضيق عيونه وهوا يشبح في مراد وبو عائشة عبدالرزاق جايينه ، قرب منهم وقال:نا مانيش عارف عليش جايين اصلا لصايرله كله من تحت روسهم
مراد:كيف ياجدي كان يعدو ويخلوه من دون حراسه لقدر الله يمكن يهجمو عليه مرة اخري
عبدالرزاق:خلاص يابوي خليني نعدي اروح بيك ونطمن رقية عنه
عبدالسلام:قتلكم مانيش مروح منقعد هنا نين نحقو حالته ستقرة ولا لا
تنهد عبدالرزاق وشبح لمراد:شني حال هداية
نفخ مراد:توا كويسه بس لما بتعرف بمحمد ربك يستر مانيش عارف كيف نقلها وهيا من امبدري تسأل وينه
عبدالرزاق:هيا هنا
مراد:لا في #####
__
حذفت عائشة طاسة المية وعيطت بطول حسها:كله من تحت راسك يابنت ال...... ياشياطين دمرتو حياتنا طلعوها من هناااااا طلعوها
شدتها امها واختها "ليلي"لقالت:عيشة خلاص هدئ روحك
دفتها عائشة وزادت صيحت مع دموعها لينزلو زي لمطر:كيف بنهدئ كيف وهدي الشيطانه هيا وهلها دمروني خدن شرفي وقتلو راجلي وتوا لحقو الاخر قتلوه ، عدو بيها من هنا طلعوها من هنا طلعوها من حياتنا
.
كانت غالية في الدار تسمع فيها وتبكي وهيا متكمشه في روحها وحاطه راسها علي ركابها .
وميسم حاضنه بنت خالها حنين وتبكي ، وخوات عائشة الصغيرات مقعمزات جنبها.
رفعت ميسم راسها وشبحت لغالية بحقد وقالت:نحنا شني درنالكن عليش تقتلو في خوتي عليش
قعدت غالية تبكي ومارفعتش راسها ابدا ليها ، كانت تسمع فيها تدوي وتسمع في صياح عائشة لبرا وتسمع في دوت لبنات لحاطين اللوم عليها ، بس ماكانتش تفهم في دوتهم ماكنتش مركزه علي شن يدوو ، ولا علي الاهانات والسبان ليوجهو فيه ليها ، ماكانش تسمع في شي غير صوت واحد في ودنها ومفهوم ليها بس وهوا صوته ، ""من الاخير انتي عاجبتيني واجد يابنت""
حطت يداها علي وجها وتكت علي ركابها وهيا تحاول تفتح ودانها وتسمع اهاناتهم وضميرها يرتاح بس صوته مايبيش يسيبها وهيا تسمع في كلامه يتكرر في ودنها ، """ انتي في القلب ياغلاي""
وجي بين عيونها وهوا طايح بين يديها غارق بدمه لقعد ملطخ حوايجها وخدها ويداها وكيف شافت احمد خوها ، فتحت عيونها طول وهيا تشهق في عبرتها وصوت بكاها يزيد .
خشت اخت حنين الصغيرة ميسون عليهم ، واول ماجت عينها علي غالية اللي بتموت من لبكي قربت منها طول وقعمزت قدامها وحضنتها:خلاص اهدئ
نطقت غالية من بين بكاها:ك..لة مني ..اني ...اني لقتلته
بعدتتها ميسون شوي وهيا تبعد في شعرها من علي وجها وقالت:هضا ربي كاتبه هضا نصيبه من الدنيا ماتقوليش هكي انتي مادرتيله شي
هزت غالية راسها وماعاش قدرت تتكلم من هستيرية لبكي لين اخت عائشة "مها" قربت وهيا تمد في شيشة لمية لميسون:اعطيها تشرب
خدت ميسون شيشة لمية وحاولت تشربها بس غالية ماقدرتش تشرب من لبكي ، شدتها ميسون من يداها وقالت:صبي معايا صبي اغسلي يديك ووجك
شدت ميسون غالية وجت مها ساعدتها وطلعتها معاها للحمام وخلتها تخششها ميسون وهيا ردت لدار واول ماقعمزت اختها التوأم "مريم" قرصتا وقالت:شني لديري فيه هضا
مها شبحتلها:كنك ماتقعدي كيفهن عاد ، بحتي حالة البنت كيف صايرة
تنهدت مريم ووشوشتلها:حسابك مش هنا خليها في الحوش
نفخت مها ووقفت وطلعت من جنبهم .
__
طلع سفيان من الدوش وهوا يلبس في تيشرته بسرعة ويلحق علي تليفونه لمابطلش تشرين ، قامة ورد طول:ايواا
زياد:الطقة ياسفيان ضربوه برصاصة وحالته خظيرة
فتح سفيان عيونه علي وسعهم وقال:تي الصبح كلمني شن تقول انت
زياد:مش عارف ياراجل شكلها نقلبت فوق روسنا
سفيان:تي كدب ما تسمع من حد
زياد:السيد كريم هوا لقالي وهوا ماشي لبنغازي اتصل بيا وقالي يبيك غادي قبلة اني كنت بنمشي لكن مانقدرش نسيب هني ونمشي
مسح سفيان وجهه وحس رجليه ماعاش حاملينه وهوا ينزل يقعمز علي الارض وسكر الخط علي زياد وهوا ستين فكرة وفكرة في راسه ، لو محمد مات حلمي بالبرائة ينتهي ، هز راسه وقام يديه وشد راسه وهوا يدكر في حركات محمد معاه وقال:تي شن نفكر اني استغفرالله الراجل بين الحياة والموت واني نفكر في مصلحتي
وقف وهوا يحاول يصحصح ويرد يتصل ب زياد لاول مارد عليه قاله:احجزولي في طيارة ولا دبرولي كيف نمشي
زياد:امورك تمام والطيارة علي الساعة 8 المغرب
__
حدف الصقر مخزون لكلاشن لكان علي الطاولة علي علي لنقز بخوف وبعد قبل مايجي فيه والشباب من الخوف كلهم بعدو وهما يشبحو لي الصقر لعيط والنار تقدح من عيونه:يا...... واللهي لا ..... شن خرفت اني شن خرطت قلتلكم ماتقتلوشي ، الله كان الطقه مات لما نقطعة تحت رجليا الحيوان ال... جيبوهولي هني نبيه قدامي الكلب لكنت بنديره في الطقه كله بنفشه فيه الحيوان هدا
شرين تليفون علي اللي ماعاش عرف يهرب من قدام الصقر وينفد بجلده ولا يقعد واقف لين ربي يفرجها عليه ولا ياخده لعنده ولا يرد علي تليفونه لعنة الله عليه لماعاش يبي يسكت .
غمظ الصقر عيونه وهوا رافع قبضات يديه فوق يحاول يهدي روحة وبعد لحظات صمت صيح من غير مايتلفت لعلي:رد ياولد ال.... رد
انخلع علي لطلع التليفون من جيبه بسرعة وهوا يرعش ورد طول علي منتصر :الو شن تبي
منتصر:الطقة """مات"""
زمط علي ريقه وهوا يمسح علي جبته وينزل في التليفون لوطه وهوا يشبح لصقر لتلفتله وضيق عيونه ، نزل علي راسه لوطه وقال:مااات
ميل الصقر راسه يمين و يسار وقال بهدوء:باهي جيبولي احمد
ومشي خش لمكتبه وقربع الباب بالقوة .
تلفت علي وقال:وين باسم
جي باسم من وراه يجري:نعم يافندي
علي:خود اول طيارة وبرا لبنغازي شوف شن صاير غادي وجيب احمد
هز باسم راسه وتلفت مشي وهوا مضيق عيونه ويدكر اول لقاء مع محمد "" محمد رفع يده مسح علي لحيته وهوا يبعد تلاته خطوات التالي وفجأة وبخفة يد طلع سلاحة من حزامه وضرب تحت رجلين باسم اللي قريب صب مسرينه وقعد ينقز زي المهبول واحمد وخر طول والخوف ركبه من ساسه لراسه وهوا يسمع في صوت محمد لعيط:هي انت وياه كل واحد يركي لسيارته والمسجون نا نجيبه
وكيف باسم بيتكلم ، محمد قص عليه وقال بعصبيه:كلمه اخري لا نعرف علي لا عليوة رصاصه بين عيونك""
طلع برا وهوا يفتح في السيارة وركب وهوا يولع فيها ويتكه بظهرة علي الكرسي ورجع راسه التالي ويحط في يده علي خشمه ، ""باسم:اسف يافندي تو نطلعه
وأول ماباسم شد محمد من يده تلفتله محمد وضربه بيده علي خشمه لين طاح علي الباب وقال:صبرت عليك واااجد
علي طلع من ورا مكتبه:خلاص اطلع يا باسم"" ، "" باسم رفع راسه بستغراب وقبل مايتكلم اي حرف ، سبقه محمد وقال بتسهويك وهوا يحط في يديه في جيوبه:حسيتها
ضيق باسم عيونه وماردش
محمد بتسم:المره هدي نزلو قطيرات دم منه بس مره اخري انطيره لكي من مكانه
وطبطب علي كتفه:وكان ماتعرفش من هوا الطقة
ضحك بهزوه وكمل وهوا يتخطي فيه ويمشي:اسأل صقورة عليه ههه""
ضرب باسم الستيرسو بقبضة يده بعصبيه:موتك نقضك من بين يديا....
__
في #بنغازي
تاني يوم الصبح ...
كانو ميسون ومها ومريم مقعمزين يهدرزو وغالية حاطه راسها علي لمخده وتشبح للفراغ ودموعها ينزلو بروحهم وهيا حاضنه التليفون ، نخلعو لبنات من عيطت رقية لخلت غالية تنوض تقعمز وتتلفت للبنات لمخلوعات زيها
وقفت غالية علي رجليها بسيف وتنفسها بدي يزيد وهيا تقرب من الباب ولبنات وراها ويسمعو في صياح النسون برا ومن بينهم رقية لتبكي وتقول:لا ماتقولوها ليا  يانعليا ولدي يانعليا ضنوتي عيالي ماتو قبلي ماتو وسحونو كبيدتي اقتلوني ياربي خودني مانقدر نتحمل مانقدر نصبر
رفعت غالية راسها وهيا تتلفت وتتكه علي الباب بظهرها وقعدت تنزل بشوية وهيا ترعش مع بعضها لين قعمزت لوطه ، قربت ميسون منها طول وهيا تبي تحضنها بس غالية بعدتها وهيا تشبحلها ودموعها بس ينزلو ، غمظت عيونها بالقوة وحطت يداها علي وجها ، "" ..: ونا مش مسيبك نا حاطك عند هلي يعني في الحفظ والصون نا لو مش مطمن عليكي ره مانخليك غادي بروحك ،  ..:انتي بنتي ياغلاي ، ..:نا مستحيل نسيبك ""
عيطت غالية بالقوة بأسمه وبدت تبكي بالصوت وبهستيريا ، قربت مها وقعمزت جنب ميسون لمقعمزة قدام غالية وتحاول تهديها :خلاص ياغالية اهدي كلنا ليها ستغفري ربك
هزت غالية راسها وشبحتلهم :لالا ، لا هوا هوا قال..ي هوا قالي مستحيل نسيبك
ومسحت دموعها بعبث وشدت يدين ميسون:مستحيل يخيب ظني اني ان.ي نعرفه هوا بطلي هوا مستحي..ل يكدب عليا ، مستحيل مستحيل
قعدو مها ومريم يشبحو لبعض بستغراب وميسون قربت حضنت غالية لخشت في حالة هستيرية وتردد في كلماتها ، مستحيل يسيبني .
حاولت ميسون توقفها هيا ومها وساعدتهم مريم وقعمزوها علي سرير ميسم وهيا شبه سايخة.
اشرت مريم بيدها لمها بمعني الحقيني .
طلعت مريم وطلعت مها وراها وسكرت الباب ، شحتها مريم من مرفقها ومشو يجرو طلعو برا وهما يشبحو في العياط والدنيا المقلوبة وميسم كانت سايخة ويفيقو فيها لبنات والجارات وعائشة مقعمزة مصدومة.....
__
.
.
.
مربوحة ياغالي مكانك في القلب بيقعد خالي  .
مربوحة ياعيوني مكنك محفوظ بين ظلوعي .
مربوحة يانفاسي وعد مايدخل حد من بعدك لحياتي
مربوحة يادقاتي رحيلك ضعف من نبضاتي
مربوحة عدي ورتاح ، مربوحة ياراحتي ومناي
(الياقوت)
.
.
تاني يوم كانو الشباب ومعاهم سالم يركبو في الخيمة .
درسة سيارة مراد لتلفت لهداية لفتحت الباب وهيا تحاول تنزل بشوية وكانت صااابرة ودموعها ينزلو من غير صوت نزلت حماتها هناء ساعدتها وعزوزتها شاده العيل .
قرب سالم من مراد لقاعد في السيارة ومنزلش وهوا شاد التليفون بين يديه.
سالم:معدي
رفع مراد راسه:لا بنبرم ندور مكان ندرس فيه السيارة وجاي معاكم هي
هز سالم راسه ورجع تلفت وهوا يشبح لجده اللي مقعمز جنب الشيابين ومهبي وباين عليه العجز والضعف 💔
__
درس باسم السيارة قدام لستراحة ونزل وهوا يتصل ب منتصر لفتحله الباب:خش
خش باسم وقال:وين احمد
منتصر نفخ:في الدار متلوح
باسم:ولد ال.... يستاهل القتل هدا
منتصر:فكينا ياراجل الصقر نبه يبيه عايش ، خلينا ناخدو تداكر حني التلاته والشباب يروحو باالبر
باسم:روح انت وياه اني عندي حاجة بنديرها هني
منتصر:اسمع اني راسي مستك اليومين هدو لعشتهم مع لكراك المدمن حاسهم قرنين ماخاطريش اروح ويسألو عليك ويديرولي سين وجيم يانقعدو جميع ياروحو جميع
نفخ باسم:تي اقعد كب تقعد دير لريحك
وتلفت طلع وخلا منتصر يضرب في الباب برجله:ناقصني مشاكل اني
__
.
.
خشت هداية علي امها لمقعمزة علي كرسيها في الدار وتبكي وهيا تهز من غير اي صوت ، تبكي بقهر وألم ، تدكر في نفس اللحظه نفس الالم نفس الجرح لقعد يتعاود مرة تانيه اللي صار قبل 8 سنين قعد ينعاد توا ، الجرح اللي انفتح من 8 سنين توا زاد انفتح اكتر واكتر وولا موجع اكتر .
قربت هدايا وقعمزت علي ركابها قدام امها وحضنتها ودموعها علي خدودها ، زاد صوت بكي رقيه مع صوت تشرين تليفون هداية لبعدت من امها وهيا اطلع في التليفون من جيب ماليتها .
مسحت دموعها وفتحت الخط:ها مراد
مراد:عطيها التليفون
حطت هداية التليفون في ودن امها من غير اي كلام ، وقبل مارقية ادير اي ردت فعل او تبعده سمعت صوته التعباااااان و يادوب مسموع:ا.مي
شهقت رقية وشدت التليفون زين وقالت بلهفة:يانعليا وليدي كبيدتي تمروجت ياوليدك بعيد الشر عنك بعيد الشر
سمعاته وهوا يحاول ياخد في نفسه بشوية ورد عليها:س.امحيني ، ار...ضي علي يمه
رقية زادت تبكي اكتر:الله يسامحك ياوليدي نا مسامحاتك دنيا واخرة وراضية عنك لا يوم الدين غير ردلي بخير مانريد شي
مسحت هداية دموعها وقالت:يمه خلاص ماتعبيشي
ومحمد ماعاش قدر يتكلم وهوا يرجع في الاكسجين علي فمه وياخد في نفس منه وغمظ عيونه وهوا يسمع في امه قالت بحنيه وواضح من صوتها شارقة من لبكي:ارتاح ياوليدي رتاح توا ماتعبش روحك نا ندعيلك ومش ناسيتك
حول محمد الأكسجين وقال:يمه
رقية:نعم ياوليدي عيون اميمتك قول
تكلم محمد بصوت متقطع وهوا خلاص تعب هلبا:غ.الية يمه
رقية:في عويناتي غالية ياوليدي مغير انت رتاح وابرا وماتخمم في شي وراس وليدي
رد محمد الاكسجين وغمظ عيونه بتعب ، وسفيان حول التليفون من ودنه ورد علي رقية وقال:ايوا ياميمتي خلاص مانبوش نتعبوه هلبااا
رقية حست روحها هدت هلبااااا علي قبل وقالت بدموعها لمابطلوش نزول:هالله هالله فيه ياوليدي عينك عليه وراس وليدي
سفيان:من عيوني ياميمتي ماتوصي حريص
سكر سفيان وطلع لمراد مدله التليفون وقال:امشي انت مانبوش نديرو الشبهه وفوتو لعزي
خدي مراد التليفون وقعد يشبحله:ان شاءالله تعدي علي خير
طلع سفيان تليفونه لشرين ورد طول:ايوا سيد كريم
عبدالكريم:شن حاله توا
سفيان شبح لمراد لأشرله بيده:نا معدي
هز سفيان براسه ورد علي عبدالكريم:الحمدالله توا حالته مستقرا وكلم حتي امه ، لكن قعد عليه خطر الرصاصه في مكان خطير
عبدالكريم:ان شاءالله خير ، ومادبيكم اكتر من امه وخوته ماتقولوش عليه من واحد لا واحد تجي في ودن رجال الصقر
سفيان:ماحد يعرف اصلا وامه توا بس عرفت وخوته بس حتي خالة وعمه مايعرفوش
عبدالكريم:هكي الافضل ، صرفت الحرس وله
سفيان:اي صرفتهم من ساعة
عبدالكريم:ان شاءالله تفوت الفكرة علي خير كان يعرف الصقر بمحمد قعد عايش ابصر شن يصير
سفيان:بأذن الله الخطه تمشي تمام التمام لين محمد يصح زين
__
خشت ميسم لدارها وهيا تسمع في انين بكي غالية لراقده علي السرير ومتكمشه في بعضها ، سكرت الباب بالمفتاح وقربت تمددت جنبها وهمست:غالية
فتحت غالية عيونها وشبحتلها ودموعها مابطلوش نزول ، وقالت بصوت متقطع من لبكي:اني ، اسفه كله من ، من تحت راسي اني لقتلته ، محمد مات بسببي
ميسم نزلو دموعها وسكتت وخلت غالية تكمل في كلامها المتقطع:ي.ياريتني نموت ياريت نقدر نموت اني ورجعه هوا عايش
ميسم:غالية محمد عايش
شدت غاليه نفسها حتي من صوت بكاها ختفي وناضت قعمزت:شني محمد ع.....
قعمزت ميسم طول وحطت يدها علي فم غالية:اسكتي مايبوش حد يعرف ، عشان لو عرفو كلهن مرات يرجعو يغتالوه
حولت غالية يد ميسم:كله مني اني اني السبب
ميسم قربت حضنتها:انتي ماذنبك شي ماتاخديش علي كلامي امس كنت موجوعة علي خوية بس خلاص الحمدالله حالته كويسه ومستقره
سكتت غالية وهيا تبكي وفي خاطرها ، لو يعرفو انه خوها هوا لضربه مايخلوهاش ولا يوم هني ، غمظت عيونها وبادلت الحضن لميسم وهيا حاسه براحة حاسه بالفرح انه محمد قعد عايش وماسيبهاش .
__
.
.
مر اسبوع هادي او مش هادي اكتر ماهوا حزين ، حتي بعد ماعرفو انه محمد عايش بس قعد الحزن في قلوبهم ، حزن علي ظروف تخليهم يديرو لولدهم عزي وهوا قعد يتنفس ، يشوفو دموع الجيران والاقارب وصغار عمه وخالة يبكو علي خاطرة وهوا قعده فيه الروح زيه زيهم ، صعبة علي ام وصعبة علي اخت وخو وعلي مرته ، يسايرو الناس علي حاجة خايفين ومرعوبين منها تصير ، وصاعبة اضعاف علي انسانه تحس روحها هيا السبب في اللي صايرله هدا كله .
.
مرو اسبوعين علي محمد وتحسن فيهم شوي ولا يقدر يوقف يمشي شوي شوي ويتحرك لكن بصعوبة .
ربي يحبه لنقضه من رصاصة كانت لا محال تقتل اي شخص في مكان خطير زي لجاته فيه .
قعمز محمد علي السرير وشبح لسفيان ومراد لخشو عليه:هااا يارفيق كيف حالك
بتسم محمد وحط يده علي جرحة:الضربة لي ما تقتلك تقويك
مراد نفخ:اوووف ياراجل قعد تفكر في القوة انت تي خلاص سيبهن وفكر في حياتك توا بعد لصارلك المفروض توعي علي روحك
محمد:المفروض مرفوض
اتكه مراد علي الحيط ورفع يده بستسلام لين سفيان ضحك:ههههه توا غير ينوض بسلامة وبعدها يحلها الحلال
محمد:جيبولي تليفوني
مراد:تي لوحة هضا خود شفرة وتليفون جديدة اصلا كيف جابو مكانك انت الا من الشفرة
محمد:لا عندي فيه وحده اخرى مايعرفها حد غيركم
سفيان:وين حاطه انت
محمد:في سيارتي
واشر محمد لمراد وقال:عدي جيبه انت
مراد:لزه نعتبرها
محمد:تي عدي يارا وانت مدايرلي فيها رقية اليومين هدين
ضحك مراد:بنحرشها فيك
محمد ضحك:هههه عدي خير مانفتح جرحي عليك
رفع مراد يديه وطلع وخلاهم وهوا يتصل ب هداية ومشي للأسنسير:الو
رص مراد البطمة ولقاها راقية لعنده تنهد:ها حبيبتي كيف حالك
هداية:الحمدالله كيف حال محمد قلبي عنده
انفتح الاسنسير وكان فيه اربعه رجالة طلعو منه وقال واحد منهم:السلام عليكم
ضيق مراد عيونه ونزل التليفون وقال وهوا يركب ويتلفتلهم:وعليكم السلام
قعد مراد يشبحلهم لين تسكر عليه الاسنسير وقعد مستغرب من اشكالهم ، رفع التليفون وهوا يسمع في هداية:مرااااد تي وينك
مراد فتح عيونه وقال:يانعن فيتهم
وسكر علي هداية وهوا يخبط في الاسنسير لبعد لحظات وصل بيه لدور الاول ، واول مانفتح شاف شباب موزعين علي المداخل وجت عينه علي واحد كيف بيتحرك بجيه رجع رص علي الطابق لي فيه محمد .
اتصل مراد طول بسفيان مرة تنين تلاته لكن مافيش اي رد  من سفيان ،نفخ مراد بالقوة وهوا يطلع من الاسنسير لنفتح ومشي يجري لغرفة محمد بس وقف مصدوم وهوا يشبح في سفيان طايح علي الارض وراسه دم ومحمد مهناش ، مسح مراد علي وجهه بصدمة وخش بسرعة كبه من الروشن وهوا يشبح في السيارات لمصفحة لتحركت من تحت المستشفي ............
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25