عشق في بلاد حروبها لا تنتهي ( الفتنه و الثأر)

البارت 31

_
_
#عشق_في_بلاد_حروبها_لا_تنتهي
#تكملت_الجزاء_الأول  الحلقة (31)
.
.
في الحلقة السابقه
وفجأة شد يدي وجبدني ليه لين انضربت في صدره بالقوة ، وحط يدي علي رقبته وهوا قعد شادها بيده ويدي التانيه رجعها ورا ظهري وهووا يدخل في صوابعة بين صوابعي ، وقرب باسني علي خدي بخفه ، وحضني ليه بكل قوته وكأنه يبيتي نخش بين ضلوعه ، واني بين يديه مش عارفه شن ندير ، ومش قادره نبعد ، اصلا مانبيش نبعد نبيه اني نبي هدا الغلط وحابه الغلط هدا .

قراءة ممتعة
#البارت_الواحد_والتلاتون

سينتهي كل هدا سينتهي و سيبقي ك جرح في القلب و سيلتحم وسيختفي من داكرة العقل بين دكريات جديدة سعيدة للغاية 🌻🌅🌙
(الياقوت)
.
.
.
بتسمت غالية وهيا تشبح لمحمد لفتح باب الجنان لكبير وعيونه في ساعة اليد متعة واول مارفع راسه وتلفت شبحها تشبحله وتبتسم .
ضحك علي الجنب وغمزلها ورفع يده مسح علي شعرة وفي نفس اللحظه ومن بين بسمته ومن غير مايسمع صوت ولا يشبح شي حس بشي سخون خترق صدره.
صوت الرصاصة لطلعة من السيارة لمصفحة لواقفة بمسافة مش بعيده علي الحوش وستغلت لحظة فتح محمد للباب"الكنشيلو" ، نزل محمد راسه وشبح مكان الطلقة ونزل يده لترعش وهوا يمس في الدم السخون لتدفق منه ورجع رفع راسه لأول مارفعة جت عينه علي احمد اللي في السيارة و شاد المسدس لستقرت رصاصتة بين صدرة .
خدي محمد نفس كبيرر وطاح علي ركابة ومايسمع الا في عياط غالية لجاته تجري وشداته من ضهره وطاح في حضنها وهوا يشبح فيها تبكي ويسمع في صوتها ينادي في اسمه.
غالية:محمد محمد نوض باللهي عليك نوض محمد
دموعها كانو سابقيين صوتها ، وحسها اللي اطلع فيه بسيف ، يداها صوتها يرعشو وقلبها بيوقف ، قعمزة علي الأرض وساوت راسه علي صدرها وهيا تشد في خده ودموعها ينزلو علي وجهه:م..محمد تمشيش باللهي عليك تموتش محمد لا باللهي عليك
مدت يدها وشدت يده اللي شاد بيها مكان الرصاصة ورفعت راسها وهيا تشبح في السيارة اللي تحركت بس قبل ماتتحرك شفاته ، عرفاته من ، عرفت من هوا عرفاته كويس .
طبست راسها لمحمد لفاتح عيونه وفاتح فمه يحاول ياخد نفس ودموعه خانوه ونزلو وعيونه حمرر ويقاوم في روحه يخليهم مفتوحات .
عيطت غالية عيطة من وسط قلبها عيطه علي الشخص لردلها حياتها لرجعلها حياتها وعلي خوها اللي خسرها كل للقاته ، طلعت صوتها لكسرها حتي هوا وهرب وبعد محاولة قالت:محمد لا باللهي عليك لا مش مستحيل تسيبني مش تقولي انتي قلبي
حولت يدها من جرحة ومسحت بيها علي جبهتها وخدها لي ولو دم ونزلتها شدت خده وكملت:حتي انت قلبي خليني نموت اني لكن انت لا ماتخسرنيش بوي مرة تانية بموتك
كان محمد يشبحلها ويقاوم في رغبته في النوم ، في نوم طويل نوم مافيش منه رجعة الرجعة لتخليه يشوف الوجه هدا الوجه الوحيد لريح فيه من بعد امه.
نزلت غالية براسها وتكت جبهتها علي جبهته وهيا تسمع في صوت نفسه العالي ودموعها لقعدو ينزلو علي خدوده هوا وقالت بهمس وبصوت يرعش:اني نحبك يامحمد اني نحبك هلبا انت قلبي وربي انت حياتي تسيبنيش رد بالك تسيبني لانه ح نموت وللهي ح نموووت
وبعدت براسه شوي وقعدت تشبحله كيف ضم فمه وهوا يزمط في ريقه ويبتسملها وهوا خلاص يستسلم لمصيرة يستسلم بكل رحابة صدر
" ومن يرفض الرحيل عن الدنيا بين احضان الحبيب وعلي همسات منتظرة من من يحب "
(الياقوت)
.
__
نرجعو نكملو من وين ماوصلنا ...... 🌅
.
دونك ليا ، يابلادي راك تعزي عليا ، دونك ليا ، فراقك واعر وصعيب عليا ، دونك راحتي ، وفراقك عازتي 💛
(الياقوت)
.
تاني يوم الصبح وكان يوافق يوم الأثنين.
اتكت نادين علي كرسي الطيارة وهيا تاخد في نفس كبير وتشبح في ساحة المطار من الروشن .
حست بيد شدت في يدها بالقوة ، تلفتت وهيا تشبح لفارس لرفع يدها وباسها وهوا يدخل في صوابعه بين صوابعها وقال ببتسمه:خايفه
هزة نادين راسها:شوي تعودت علي ماما وبابا وخوتي والجو هني
وتنهدت وكملت:توا بنولي بروحي في غربتي
قرب فارس وباسها بحنية علي خدها وماهمه حد من الركاب وبعد وهمس قدام وجها:ماعمري حسيت بالوحده وبالغربة معاك ومع زيد ، سامحيني ياحبي لانه حسستك بالشعور هدا
هزت نادين راسها بمعني لا وكيف بتتكلم بس فارس سبقها وقال:لكن وعد من اول وجديد زي ماانتي كنتيلي العيلة الحلوة اللي ضاعت مني ح نكون ليك السند
بتسمت نادين:مولي حلو هلبا ههههه
ضحك فارس وقرب باسها من جبهتها ورجع اتكه علي كرسيه وهوا يتلفت يشبح لزيد لمقعمز بهدواء في مقعده 🌼
__
.
في #بنغازي
بعد محمد شوي ورخي يدها اللي كان لافها ورا ظهرها وهوا يسند في جبهته علي جبهتها وفتح عيونه قعد يشبحلها .
وغالية مش قادرة تفتح عيونها ولا تتحرك مش قادرة غير تستنشق الاكسجين لخداه منها بقربه ، تستنشق وصوت تنفسها عالي وزفيرها يضرب علي وجهه .
ميل محمد راسه وقرب من ودنها وهمس:قتلك عدي نا عليش تعاندي فيا ياقلبي عليش تخلي فيا نغلط
رفعت غالية راسها وهيا تحاول تستوعب وقالت:محمد
مسح محمد لحيته في خدها وبعد عليها بخطوتين وهوا ينزل في راسه ويمسح في وجهه بيده وقعد يمسح بسبابته علي شفايفه:خشي جوا
وخرت غالية علي طول وتلفتت خشت جري وسكرت الباب وتكت عليه وهيا تحط في يدها علي قلبها وتغمط في عيونها وتدكر في اللي صار.
__
في #طرابلس
وقف الصقر قدام الحيط وهوا يشبح للاسم المكتوب.
سكر قبضت يده باالقوة وضربها علي الحيط وعيط بطول حسه:اخلقوهولي من تحت الارض يومين ، يومين بس ومانلقاش الطقه قدام عيوني لما نفجركم ياولاد ال........
وتلفت وضرب شطاية السلاح برجله ومشي وخلاهم كلهم مش فاهمين كيف قدر محمد يخش بينهم ويدير هدا كله .
خش الصقر لمكتبه وقربع الباب علي قوته وهوا يضرب في اللي قدامه وشد راسه بين بديه .
خش علي وراه وسكر الباب بشوية وقال بهدوء:ح نبعت شباب لشرق يتعقبو مكانه
تلفتله الصقر وخبط يده علي الطاولة وقال بشر طالع من عيونه الحمر:يومين بنهارهم وليلهم ياعلي ومافيهمش تالت مانلقاش الكلب قدامي اقرو علي روحكم الفاتحة
هز علي راسه وقبل مايطلع قال الصقر بعياط:وابعت معاهم الكلب احمد وهوا من غير فايده
علي:تي مش قادر يتحرك من لياخد فيه
الصقر:اسحب امه منه ماتعطيشي شي الا لما يدير لنبوه حط في راسه مايلقاش الطقه مافيش مخدر
علي:تمام سيدي
__
في #بنغازي
خشت ميسم علي غالية اللي مقعمزة علي السرير و تنشف في شعرها المبلول.
ميسم:اووووف قطعو الضيء وتلفوني مافيشي شحن
حطت غالية الفوطه فوق شعرها وقعدت تخبل في شعرها تحت الفوطه لمغطيه حتي وجها وهيا تحاول تركز مع ميسم وتنسي لصار الصبح
شبحتلها ميسم بستغراب وضيقت عيونها وقبل ماتتكلم سمعت دوشت امها برا .
تلفتت وفتحت الباب وهيا تسمع في صوت محمد ضحكت وقالت:حي حمادي روح
وطلعت تجري وخلت غالية اللي جبدت الفوطه من علي وجها وبتنقنيق:حق طلع حق هوا هني بالحقااا اوووو ياربي
كتمت تنقنيقها اول ماسمعت صوت ميسم تنادي فيها:غاااااالية تعااالي نديرو فطور
تحمحمت غالية ووقفت لمت شعرها ولبست وشاحها وطلعت وهيا رجل القدام ورجل التالي واول ماوصلت لنهاية الممر سمعت صوته يهدرز مع رقية ، زمطت ريقها وخدت نفس وهيا تحاول تطلع وتقرر في نفسها انها بتمشي بسرعة وتحاول ماتلفتش انتباههم .
سمت بالله وحطت راسها لوطه وسرعت من مشيتها بس اول ماطلعت لي وسط الحوش وقفتها رقيه:صباح الخير بنيتي
غمظت غالية عيونها بالقوة وتنهدت لمحاولتها الفاشله للهروب وتلفت وهيا تحاول ادير روحها طبيعية واول ماتلفتت شبحاته متكي جنب امه ولابس اللبسه العربيه وحاط عيونه في تليفونه
تحمحمت وقالت بصوت هااااادي:صباح النور ماما رقية
رفع محمد عيونه فيها طول ورفع حاجبه.
رقيه:تعالي تعالي كيف كنا في سيرتك
ضيقت غالية عيونها وقالت بصوت قريب من التنقنيق:تو نجي غر ميسم تبيني ندير معاها فطور
بتسم محمد ورقية ردت عليها:تو ديره بروحها وهي ماتصدق تو تحطه كله في راسك وهي تقمعز تتفرج عليكي تعالي
هزت غالية راسها وقربت قعمزت جنب رقيه ومحمد ساوا تقعميزته وكان مايبيش يشبحلها بكل ، وكأنه يحاول يتناسه لصار او يحاول يبعد نظرة منها باش مايعيدش الغلط لداره
رقية:محمد جاب ملفك وبسجلك في مدرسة لكانت تقرا فيها ميسم
بتسمت غالية:بالحقا
هزت رقية راسها:اي لكن بسجلك منزلي تعدي للمتحانات بس
ضيقت غالية عيونها:علاش اني مانبيش هكي نبي نضامي
رقية:هكي احسن يابنيتي واريح لكي
هزة غالية راسها:لالا اني نبي نتعب نبي نمشي نضامي
سكتت رقية وشبحت لمحمد لقال:نضامي لا
غالية: ومنزلي اني مانبيش
محمد :قمعزي امانا
قلبت غالية شفايفها وشبحت لرقية ودموعها قريب ينزلو
رقية:خلاص يامحمد وكانك علي الشيلان نديرلها نا باص
هز محمد راسه بمعني لا:نا قلت كلمه نضامي لا يمه خلاص خليها علي راحتها وتسكير راسها تو يفيدها
فتحت غالية فمها وقعمزت زين علي ركابها:انت لتسكر في راسك خيرك هكي ديما بايعها معاي اني لبنقرا ياخي ولا انت ، اني نبي نتعب واني لبنوض اصبح وكان ماتبوش ترفعوني نمشي حتي علي رجليا
طلعت ميسم من المظبخ تجري علي صوت صياح غالية اللي ماحولتش عيونها من محمد اللي قعمز زين وهوا يدخل في صوابعة بين خصلات شعره ويحاول مايعصبش عليها وعلي طريقة كلامها معاه قدام امه وقال بهدوء وهوا يشبحلها:عدي جوا ياغالية والمدرسة شيلها من دماغك
ضمت غالية شفايفها ودموعها نزلو وهيا تشبحله وتحاول تشد عبرتها بس ماقدرتش وهيا تفجر فيها وتصيح عليه:اني نكرهك نكرهك هلبااا ردني لحوشنا ، عاش نبي نقعد هني
ووقفت وخشت تجري لدار وهيا تبكي .
حكت ميسم راسها وهيا مستغربة ومش فاهمه شن سبب العركة هدي ومش قادرة تستوعب انه غالية تتكلم بالطريقة هدي مع محمد ، بس رجعت للمظبخ وسكرت علي الشاهي ولحقتها جري .
رقية:وراس وليدي ماتكسر ب خاطرها عويلة وقعده ماتعرفناش زين ، سايرها يتيمه ياناري مشتاقة لحويجة تلها بيها
محمد مسح علي وجهه:وراسك غالية ومانقدر ارد لكي طلب لكن في هدي اسموحة يميمة كلمتي وقلتها
رقية تنهدت وسكتت ومحمد وقف وقرب باس راسها وطلع برا ، وعلي طلعته خش سالم طايرتله
ضيق محمد عيونه وتلفت لجيها التانيه وهوا يطلع في تليفونه .
ضيق سالم عيونه وطبس راسه وفهم حركت محمد وتجاهله علاش ، قرب وقال:السلام عليكم
محمد:وعليكم السلام
سالم:امتي روحت
حط محمد التليفون في ودنه ومشي وسيب سالم من غير مايرد علي سؤاله وكأنه ماسمعش شي .
تنهد سالم وخش الداخل.
ومحمد مشي ورا الحوش وهوا يتصل ب سفيان.
سفيان:الو يافندي شن وصلت
محمد:اي من بدري واصل
سفيان بتسم:تي وينك يافندي الدنيا مقلوبه ههههه
محمد ضحك:مقلوبه علي راس الصقر
سفيان:هههه اما افكارك جهنمية ، توا نقدرو نهجمو عليهم ونضمنو الانتصار
محمد:لالا مازال مانضمنو شي
سفيان:شني مازال
محمد:..........
__
في #طرابلس
طلعو صفاء وايلاف من المحاضرة .
صفاء طلعت تليفونها من الشنطه وقالت:تعالي نمشو للكفيتيريا مابين جونا
ايلاف:هي حتي اني بنتصل ب رؤوف
ضيقت صفاء عيونها وشبحتلها:وعلاش رؤوف طول عمرك يجك بوك علاش توا رؤوف
ضحكت ايلاف:جت فيه الحليوه اس
قلبت صفاء عيونها وتصلت ب بوها:الو بابا اني كملت
مفتاح:روحي اليوم مع ايلاف اني عالق في الخدمه
صفاء توثرة وشبحت لايلاف لدكرتها انها اتصلت ب رؤوف وقالت:عادي اراجيك يابابا لين اتم
مفتاح:علاش ايلاف ماجتش
تنهدت صفاء وقالت:لالا جت خلاص تو اروح معاها
واول ماسمعتها ايلاف تلفتتلها بضحكه:واااه الحمدالله ياربي الحمدالله اتصلت ب رؤوف هههه
صفاء مسحت علي جبهتها:الله يحشمك يالوفي الله يحشمك ويحطك نفس موقفي
ايلاف رفعت يداها فوق:ياااارب والله ماني مقايله لا
ضحكت صفاء:مجنونه
قعدو مقعمزين في الكفيتيريا ربع ساعة لين اتصل رؤوف ب ايلاف.
صفاء:حشمه ازح
ايلاف:اس
فتحت ايلاف باب السيارة وهيا اطبس لرؤوف لبربش في التليفون:رؤوف
واول مارفع رؤوف راسه شبح صفاء لواقفه قدام السيارة وحاطه راسها لوطه وباين عليها التوثر ، سرح وماعاش يندري علي روحة ومافيقاش غير صوت ايلاف لولت تكلمت بس هدي المرة بعياط:تي ياولدي ارزن راني نكلم فيك
تلفتلها رؤوف:تي خيرك
ضحكت ايلاف:اليوم صفاء بتروح معاي شن نقولها تجي ولا نطلبلها تاكسي
ضيق رؤوف عيونه:مرزن دمك تي قولي للبنت تركب وهيا
تلفتت ايلاف ورفعت يدها لصفاء بمعني تعالي .
ركبت ايلاف وجت صفاء ركبت:السلام عليكم
رؤوف:وعليكم السلام شني حالك
صفاء:الحمدالله وانت
رؤوف ولع السيارة وتحرك ورد عليها:الحمدالله ياربي
قلبت ايلاف عيونها بملل من حديتهم وولعت المسجل.
وطول الطريق وهيا تحاول تخلق حديت بينهم بس شي شي هديك صفاء ترد بكلمتين وقص وتسكت قريب فقعت مرارة ايلاف لتفجرت:فقعتولي مرارتي شن هالرسمية ازح راكم مخطوبين ياجمعة الخير
ضربت صفاء جبهتها بيدها بشوية ورؤوف قعد يضحك وشبح لإيلاف:ماتتحشميش انتي
رفعت ايلاف كتافها:درهتولي كبدي الصراحة
__
في #بنغازي
فات الوقت وأذن المغرب ، وكانو كلهم مقعمزين برا يهدرزو والضي هارب ، الا غالية مقعمزة في دار ميسم ومضايقة هلبا.
حطت ميسم صفرة القهوة قدام محمد وجدها لسأل:وين لبنية
ميسم:قعده في داري
عبدالسلام:كنها ماطلعتش جنبك
سكتت ميسم وشبحت لمحمد لوقف.
عبدالسلام:وين معدي مش تبي القهوي
محمد:تو نجي
قعمزة ميسم جنب رقية ووشوشتلها:جاب ربي عيشة عدة لحوش هلها وماحقت لصار امبدري
رقية:اسكتي قدام جدك
سكتت ميسم وهيا اطرم في شفايفها
لاد محمد ورا الحوش وتصل بيها وحط التليفون علي ودنه بس من تاني تشرينه سكرة الخط في وجهه ، صفه النية وعاود مرة تانيه بس عاودت وسكرت الخط في وجهه.
حط تليفونه في جيبه وكمل طريقه ومشي لروشن دار ميسم وطقطق عليه بالقوة لين غالية لكانت مقعمزة علي السرير جت واقفه .
ضيقت عيونها وقربت من الروشن وقالت:ميسم
محمد:افتحي
ضيقت غالية عيونها:برا درق وجهك ماعاد نبي نشبحك ولا نسمع صوتك
قعدت غالية حاطه ودنها علي الروشن وتراجي في رده بس ختفي صوته وحسه بكل لين ستغربت ، وندمت انه مافتحتش ، نفخت وفتحت الروشن وهيا تشبح تتاكد انه مشي.
غالية:يمشي يمل...
وفي نص كلمتها انفتح الباب عليها بالقوة ، تلفتت بستغراب واول ماشفاته هوا شهقت وزادت شهقتها لما سكر الباب بطقة بالمفتاح.
غالية:هي انت شن ادير
قرب محمد وشدها من يدها وقربها منه:كنك انتي ماتحبيش الواحد يتعامل معاك بأسلوب
ضرباته غالية علي كتفه وقالت بتعصيب:حول انت ماخصكش فيا
فنص محمد:ومزال تتعنتري
قلبت غالية شفايفها وشدت يده اللي ضاغط بيها علي دراعها:حول باهي تو يجو
محمد خف من قبضة يده من دراعها لحس بروحه انه وجعها وطلقها وهوا يوخر وقال بعصبية:ازف عليش قعده في الظلام افتحي ازفت لفلاش
ضيقت غالية عيونها وخافت من صيغة كلامه وقربت من السرير وقعدت ادور علي تليفونها علي بصيص ضي القمر لجاي من الروشن بس مالقاتاش نفخت وتلفتتله:ماتكشخش عليا بس مالقيتاش
طلع محمد تليفونه وولع لفلاش وحطه علي الشكماجه واول ماتلفتلها قالت:اهو عندك علاش مدرتاش من الاول
رفع محمد حواجبه من غير مايتكلم ، زمطت غالية ريقها وحطت يداها علي فمها وقالت:خلاص سكتت
كان محمد بيبتسم بس شد روحة وقال:حركات عويلة الصغار مانحبهنش ياغالية اكبري جو تسكري في وجهي الخط وتعاندي فيا وتعلي صوتك علي قدام هلي لا
غالية:اني مش عيل وبعدين انت لتخلي فيا ندير هكي
محمد:غلاي نا ندوي عربي ره
نفخت غالية:شن تشبح فيا مه حتي اني نفهم فيك
محمد فنص فيها:تي اسكتي
قلبت غالية شفايفها وقعدت تنقنق:باهي اني نبي نقرا خليني نقرا ونبي نضامي نبي ندير صحاب مانبيش نقعد بروحي
ضحك محمد علي اصرارها انه تقعد تدوي ، قرب وشدها من كتافها وخلاها تقعمز علي السرير وهوا قعمز قدامها وشد يدها باسها ورفع راسه شبحلها:افهمي ياغلاي نا مانبيش نخوفك ، لكن حياتك في خطر كان لا قدر الله خليتك تعدي وفطنو لكي ولا حقوك في مكان اريح فيها نا وياك انتي وليتي نا يمسكوك يمسكوني
غالية فكت يدها منه:انت خايف علي روحك
حط محمد يده علي جبهته وتنهد:لا حولي ولا قوة الا بالله
ورجع شبحلها:غلاي ياقمري انتي ياقلبي ماترقيهاليش
غالية:اني مارقيلكش فيها بسطها تو تهون
محمد:هيا مش بسيطه بيش نبسطها
ورفع يده قعد يمشي فيها علي خدها:انتي لأفهميني نا لا خايف علي روحي ولا هم يحزنون نا خايف عليكي عشان لو وصلو فيكي يوصلو فيا عشان اكيد مش مسيبك بين يديهم اكيد بنلحقك فهمتي
هزت غالية راسها بمعني اي وهيا مطبسه راسها ، نزل محمد يده لدقنها ورفعلها راسها وكمل:وان شاءالله العام الجاي نقعد حداك هنا ونسجلك نضامي ونا لنشيلك تمام
بتسمت غالية ورجعت هزت راسها بمعني باهي .
بتسم محمد وقعد مركز علي ملامحها وهوا يدكر في الصبح ، بس نزل نظرة طول وهوا يحاول يحكم امور نفسه وغريزته ووقف قبل مايضعف اكتر ومشي خدي تليفونه وقرب من الباب وتلفتلها وهيا قعده مقعمزة وقال بجدية :ومرا اخرا رد بالك تعالي صوتك وتناقشيني قدام امي
ضيقت غالية عيونها بكل وقالت:بو وجهين
ضحك محمد وقال وهوا يتلفت ويفتح في طقت الباب:نجيك ره
وطت غالية صوتها وهمست:قليل ادب وصايع
رجع محمد طقت الباب بطقتين وتلفتلها:شني شني....
.
.
.
#يتبع_للبارت_لبعده
____________________________________
بداء كتاب الرواية في 2019 / أبـــ4ٰـــريل / 7
تم وضع قَفلة لـ الرواية في 2019 / سبتــ9ٰـــمبر / 25