كذبتي الصادقة❤

البداية

لعبت لحد المغرب وفتت للبيت وهم ترزلت من امي لان متدمر بالتراب والوصخ امي صارمه جدا وعصبية حتى ابوي مرات يتجنبها لان مشاكلها ما تخلص ابد هاي حقيقة وهي امي واحبها بس هذا طبعها...

دخلتنا للحمام كبل اني ووقاص وجلف طلعت النا جلد جديد هي سباعية حيل وكل شي ما يعصاها حتى سيارة تعرف تسوق بس والدي ما يخليها...غسلت النا وطلعتنا ..

راحت للمطبخ تسوي العشا واني تذكرت النونه اللي اجتي ركضت لغرفة عمي فتحت الباب وجفتت كبل ..وجان الكف عمي نازل بوس بعمه وسناء وهي تضحك هههه سويت عليهم القاء قبض متلبسين  طفرتهم ..

عمه وسناء حلوة حيل تشبه الهام شاهين اول ما طلعت صغيرة عمرها يلا ٢٠متزوجه بنت ١٤ ...عمي غركان كان بيها ..جفلتهم وهو ابتعد بسرعه سوه روحه يباوع عالطفلة بحظن امها علينا عمي هالسوالف مو ذاك طبع الحمرة بعد ...كان توه جاي من الشغل ملابسه كلها تراب يشتغل عمالة..لما شافني بالباب صاح الي اتقرب 

اجيت يمهم
-ولك شوف بنت عمك شلون حلوة ههه ولك دير بالك تتنازل عن حقك بيها

وسناء:مهدي هاي شدتخلي براس الولد

اندار يضحك ويه زوجته ويكول الها طالعه لامها ..كان فرحان حيل بيها رغم هاي ثالث بنت الهم ..وحده قبلها ماتت عدا نهى

كعدت وحطوها بحظني اضحك فرحان بيها ...حسيت برابط بيني وبين هالطفلة غريب اكبر من رابط القربى ..غرت مدري انزعجت يمكن لان نهى صارت عدها اخت جديدة واني ما عندي اخوات
بقت اباوع الها وعمي كل شويه يكول ولك اكبر وانطيها الك 

وسناء:مهدي هاي شبيك ...عوف الولد لا هيج تحجي تعرف اضوج
-وليش تضوجين ابن عمها هو ننطيها اله هههههه

-ما اريد اخلي بناتي بهالخانه ..بنتي تكبر وتتخرج يلا تتتتزوج مو مثلي
جاوبها بحدة

-وشبيج انت بالله ...كالها بنرفزة..ما عاااجبج هسه لو اشعل اصابعي شموع ما يعجبج اشو كاسر ضهري واحفر الكاع حتى اسعدج وانت مو راضية
-لا لا مهدي والله مو هيج 

-لا هي هيج انت من تزوجنا لهسه بهالسيرة عوود لو دارسه شجان صرتي الدكتورة وسناء.... بالله وسناء تنعاد هالسالفة ما يصير خير وحق الله كافي ميت موت تعبان بهالعمالة ارجع الكي هالسوالف كبالي
-شبيك فدوة مهدي ليش هيج عصبي والله مو قصدي هذا

-قصدج لو مو قصدج كلت الج بعد مو اني اللي اتعير بفقر
-هو منو فتح حلكه ومنو كال فقر وين الفقر الحمد لله

-تشوفين اهلج عدهم خير عبالج يفيدوج ..جان ما انطوج الي وهمه يعرفون ما عندي شي..احمدي ربج على نعمته بيت وبناااات ورود ورجال يفني نفسه لخاطرج شتردين اسويلج بعد

كنت كاعد وحظرت المشكلة كلها عمي طلع من الغرفة وركع الباب وراه وزوجته اخذت بنتها مني وحطتها بفراشها وتغطت واسمعها تبجي ..يا بويه شكد انقهرت عليها بوقتها النهار كله تطلك وماتت لما ولدت وتالي هيج ينتهي يومها..انقهرت عليها وضجت من تصرف عمي