فجأة كده الناس دي بقت تضرب نار في الهوا و النساوين جوة زغردن ياخ ده أسرع و أغرب عقد شفتو في حياتي و الناس ديل التقول عارفين و مجهزين ، و أنا طبعا لسه ما استوعبت الصدمة إلا بعد ما الناس قبلو علي دايرين يباركو و أنا بس قلعت منهم بطاقتي الأصلا شالوها مني بالقوة ، و طلعت طوالي ركبت العربية كنت ناوي أدور و أرجع الخرطوم لكن عندي ولد عمي كده جا لاحقني ومسك لي في باب العربية :
- يازول ماشي وين ؟
- فك الباب ده يا محجوب
- مافاكيهو وبعدين حركتك دي شينة الناس بتبارك وانت تمرق منهم مكرفس وشك كده
- وحركتهم هم ماشينة ؟؟ أنا راجل طول بعرض يورطوني كده ؟؟
- أسمعني يا ود العم ، البقت بقت.. و صباح مافيها كلمة ، لو إنت راجل بالجد مابتدي فرصة للكلام حسي الحلة كلها تقول البت ود خالها مابيها مالو إلا كان فيها عيب.. ودي عرضك بت عمتك قبل ماتبقى مرتك.... سامع الكلمة دي.. مـ ر تـ ك
ختيت راسي في الدركسون و اتنهدت ، كنت حاسي إني مقهور من جووووة و رايي ماليهو أي اعتبار حتى في حياتي الشخصية ، لكن أنا السبب... أنا الكنت بعيد من بيتنا و ناس بيتنا و علاقتي بيهم محصورة في شوية مصاريف و شوية احتياجات بجيبها و بختها ليهم ، حتى هديل البعتبرها صديقتي طلعت مرتبطة بصحبي تلاتة سنين و أنا ماجايب خبر وما ملاحظ في حين إنو مصطفى في فترة بسيطة قدر يكتشف الحكاية ، وكمان أخوي الوحيد الاتطرد من الشغل وأنا لغاية حسي ماعارف السبب و ماقادر أعمل ليهو شي... أبوي عامل شنو في دكانو ماشي كيف بكسب بخسر ده كلو أنا ماعارف عنو شي ، لو كنت مهتم بيهم أكتر كانت كلمتي بقت مسموعة في البيت... اااااخ..... من الزمن ، سرقني و أنا كل اهتماماتي محصورة في البنات والطلعات والشلة والشغل....... لكن كل شي بتصلح ، و أول شي لازم أوقف علاقاتي بالبنات سواء استمريت أو ما استمريت مع صباح دي ، لازم حياتي تمشي طبيعية... حب واحد حقيقي أكمل معاهو حياتي والباقيات يقيفو حالا......
رفعت راسي لقيت محجوب مافي شكلو شعر بي محتاج أكون براي... نزلت وقفلت العربية و ما كنت داير أرجع بيت عمتي قمت دخلت بيت جدي اللي هو لصق بيت عمتي بس بي ورا ، و على قدر الناس اللاقوني في الشارع اختصرتهم....
لزيت الباب ودخلت بيت جدي وفتحت الصالون شغلت المروحة و رقدت في السرير ، لكن المروحة كانت ماشغالة كويس و صوتها عاااالي والصالون مسقوف زنك يكركب سااااي ، قمت شلت المرتبة وفرشتها في عنقريب قاعد في الحوش ورقدت ، الجو كان ظريييف و مغيم بالعصر ده ، غمضت كده قلت أنسى كل شي و آخد لي نومة... بس قامن البنات في بيت عمتي دورن بالدلوكة وطبعا بيني و بينهم بس الحيطة دي ، بقيت غصبا عني مركز في الأغاني وهي زاتها كلماتها غريبة وتضحك ، وبقول في نفسي يعني معقولة مافي زول بعرف يكتب كلمات أحسن من دي :
- في خدو فصدة مالو ماجا شبيه الوردة مالو ماجا
شبيه الوردة مالو ماجا مقيم في جدة مالو ماجا
أيووووي يووووووووي يوووي
لقيت نفسي مندمج بضحك و مبسوط وهن لسه يغنن :
- بديك الرقم إنت مسكل لي، الناس سااكت تشمت بي
هههههه ياخ دي غنية شنو معقولة بس ، بعد داك جابن ليهن غنية كده :
- احي ما عمن عيني ياربي سهلا لي بي فيزا قايمة دبي
جايااااك جايااااك يا اب شرا جاياك جاية أفتو معاك
وتاني مسكن القبايل بالدور :
- برية برية اللوم بشيلو أنا الأخضر أب طاقية اللوم بشيلو أنا
برية برية اللوم بشيلو أنا ناسي ديل جعلية اللوم بشيلو أنا
برية برية اللوم بشيلو أنا ونحن ناس شايقية اللوم بشيلو أنا
برية برية اللوم بشيلو أنا حبايبي ديل شكرية اللوم بشيلو أنا
اخر شي بقو يقولو : هدى سوت قدرتها يامحمد مبروك عليك والعزاها عز قبيلتها. يحننوك و يسيروك يامحمد مبروك عليك و العقبة لمصطفى أخوك
حتى يادوووب بعد سمعت اسمي و اسم أخواني قمت استوعبت إنو الغنا ده بمناسبة عقدي يااا ساااتر...
المهم أصواتهم وقفت وشكلهم دخلو جوة ، و أنا النوم جافاني و قمت سمعت صوت رسالة المسنجر و ما كنت قايل النت مفتوح أصلا :
- هاااي
- أيوة
طبعا ردي ده كان بناء على إني خلاص داير أوقف البنات البعرفهم كلهم... لكن البت ماعجبها الرد
- مالوو حمادة اليوم
- والله يا نونة شوية مشاكل لكن الحمدلله
- مشاكل عاطفية؟
- ما اقدر أقول كده
- يعني إنت ما بتحب ؟ أو مرتبط
ياااه على الأسئلة البتنرفز قلت أرد و أطلع منها :
- لا
- ماحصل حبيت ؟
لقيت نفسي بجاوب تلقائيا :
- هي كانت وحدة ، ما حب لكن إعجاب... وتقريبا الوحيدة الفكرت أرتبط بيها لكن الأمور ما مشت كويس
- و دي زميلة ولا شنو
- لا مهندسة
- 😍😍😍😍😍 تمااام
ماعرفتها مالا اتكيفت كده لكن قلت أحسن أتخارج قبل ما أدي تصريحات أكتر.. قمت استأذنتها و طلعت من المسنجر.. و قبل ما أقفل النت ظهرت لي فوق رسالة و ماصدقت عيوني لمن شفت الاسم : ياسمين
- محمد ، كيفك
- ياسمين 😳
- مالك مخلوع كده
- لا بس متفاجئ
- مفاجأة حلوة ولاشينة
قبل ما أرد بقيت بفكر الخلاها تتذكرني في الوقت ده شنو ومالا بتتكلم كده زي الكأنها ما كانت زعلانة مني في اخر مرة اتفارقنا فيها
- مفاجأة حلوة طبعا
- يعني لسه متذكرني؟
- ياسمين الذكرك بي شنو
- ماعارفة لكن بس فجأة حسيت إنك بتفكر فيني
في اللحظة دي جاني شعور كده إنو في رابط بين نونة المجنونة وياسمين أو يمكن هي نفسها ياسمين لأنها عرفت معلومة إني شغال في شركة أدوية ولأنو بعد كلامي ليها طوالي ياسمين رجعت ، ورجعت في وقت غلط لأني حاليا بفكر أخفف من علاقاتي مش أعقدها زيادة ،عشان كده اختصرتها مع إنو جواي شوق عمييييق ليها :
- ياسمين عن إذنك...
قلت أقوم على بيت عمتي أشوف الحاصل هناك شنو ومستغرب لشنو مافي زول فقدني وطبعا ده محجوب ولد عمي قال ليهم إني تعبان ومحتاج أريح شوية لكن أنا ماكنت عارفو قال كده.... بس قبل ما أقوم أسمع ليك صوت بتين في بيت عمتي بتكلمو ورا الحيطة :
- الماغصني إنو ولا كلف نفسو يجي يبارك ليك
- يابت بطلي شلاقتك دي ، تلقي حسي ملخوم مع الرجال بهناك و يقول عيب يخليهم و يجيني
- إنتي هبلة ؟ ولا قايلة ناس الخرطوم ديل بعرفو العيب ؟؟ أنا قلبي ماكلني حاسة بيهو زي المجبور عليك
ده شنووو شكلهم كده بتكلمو عني أنا ، ولو بتكلمو عني معناتا دي صباح زاااااتا ، لكن شكلها طيبانة ياخ.. في وحدة بتحرش فيها وهي بتدافع عني ، كدي أتصنت أسمعهم حيقولو شنو تاني :
- مجبور علي ؟؟ هو لاقي بالله ؟ يابت أنا صباح مدوخة شباب البلد ديل كلهم...
- ههههههه غايتو إنتي افتراك ده بضيعك
طبعا اتصدمت ده شنو الأنا سامعو ده ، بقيت مافاهم شي.. لغاية ما صباح قالت :
- أنا مامفترية لكن عارفة قيمة روحي ، وماتفتكري أبوي و خالي جبروني على محمد ده ، لا أصلا أنا الجبتو لغاية عندي
- جبتي كيف يابت
- اتكلمت مع أمي وأقنعتها ، وخليتها تزن في راس خالي ...
- يعني بتحبيهو ولا شنو
- أحب منو ؟ أنا بس دايرة شي يمرقني من البلد الفقر دي... أنا مكاني ماهنا مكاني العاصمة عشان أقدر أحقق طموحاتي
أنا شكلي كده بحلم لا لا لا ده ما ممكن يكون حقيقي البحصل ده ، معقولة الصدفة ترميني في الحتة دي عشان أسمع الكلام ده ، ومعقولة صباح كبرت و بقت تفكر كده ؟ صباااح الكانت زمان مسمنها غنوم شدة ما مسكينة و كاتلة حيلها زي الغنماية.. صباح الكانت صوتها مابتسمع ياخ أنا زاتي حسي صوتها ماعرفتو لأنها كانت ما بتتكلم زاتو... دي شكلها أكبر دقسة دقستها ف حياتي....
أصواتهم اختفت قمت تاوقت بالحيطة أصلا هي حيطة قصيرونة ، لقيتهم الاتنين ماشات على جوة.... قعدت في العنقريب و ختيت يدي في راسي بفكر في الأنا فيهو ده...... حأعمل شنو مع الستة الأنا متورط بيهم ديل... قبيل كنت بفكر أخليهم كلهم ، لكن..... قسمة لو ما ظبطت ليها أمورها مابقدر أخليها ، ونجوى لو خليتها في الوقت ده حتنتكس لأنها لسه مااا بقت مية المية ده لو ماقتلتني أصلا... ياسمين موضوعها غريب لكن تقريبا منتهي بالنسبة لي ، روان المفترية داير أكسر عينها لكن مالاقي فرصة ، ميس ما منها قلق لأنو كل البيني و بينها صداقة عادية أما غيرتها وحركاتها دي مقدور عليهم.... لكن ديلاك كلللهم كوم و ممكن ما أشغل بالي بيهم في الوقت الحالي ده ، أما البت صباح دي كوم تاني ، دي بقت مرتي ومجبور عليها و طلعت مفتحة و عندها طموحات وحاجات دايرة تحققها بي ، لا وكمان طلعت هي الجايباني ليها.......
ياربي حأقدر أواصل معاها و أنا عارفها بتستغلني 😡 ولا أخليها و أتسبب في مشاكل ممكن تحصل في الأسرة والكلام الممكن يتقال فيها 😥 و باقي البنات.... أعمل معاهم شنو ؟ حيعرفو إني عقدت ؟؟ ولا ممكن أدس منهم 🤔 يلا لمن نتلاقى و نشوف
.
.
مع حبي 💖🌸 رحمات صالح
