انا وبنت قيسمنا

الجزء الثاني من قصتي مع بنت قيسمنا

الجزء الثاني :

المهم نعت ليا جيهت الباب زعما خرج وانا نجبد كتاب تمارين مكتوب فيه كلشي وهو يبدأ يقلب فالصفاحي وهو يقوليا ماشي نتا لي كاتب هادشي هاد الخط مقود و نتا ميمكنش يكون خطك هذا !!

خرج ومتبقاش تعطي لدريات يكتبو ليك المهم حنا شعب حكار وهو بحال بغا يوري للتلاميذ العين الحمرا على ظهري صافي شديت الكتوبا خشيتهم فشكارة وحدرت راسي تميت قاصد الباب وأنا نهز الطباشير وكتبت ليه " الاستبدادية و الدكتاتورية فالتعليم يعطينا تلاميد بأقلام جبانة ونحن نحتاج إلى من يحمل هذا السلاح ، فكفاكم قتلا لإبداعاتنا بحجة أفكار سلبية كونتموها عبر تراكمات ضغط أساتذة الجهل بعد الإستعمار ف كفاكم استحمار !!

قلت ليه : كيجاك خطي !! تصدم وبقال حال فمو فخط موحال واش عندو بحالو ولا عمرو شافو ( خوكم من ناس لي عزيز عليهم الرسم والكتبة فالحيوط) ... قلت ليه نمشي نجلس ولا مصر تخرجني صحة ظلما !! مجاوبنيش من بعد ما قرا ديك الكلمات سرات معاه أنه مع شخص غير عادي ومكيخافش ومعدو ميخسر ناض مسح داكشي لي كتبت بلاما يدوي ...

واتجهت لبلاصتي اللور وكلشي بقا غا كيدور فعينيه ، بدأ الدرس وخونا متهضماتش ليه اللقطة لي درت كيشرح وكيشوف فيا .. كيملي وكيشوفيا وكيتسنا مني أبسط خطأ خوكم حاضي راسو وحتا انا كنبادلو نظرات حادة ومفعومة بالثقة فالنفس ، جا وقت تمرين عطانا الوقت باش نخرجوه وبدا كيدور يشوف كل واحد فين وصل وكيجاوب لي غلط وانا مدارش بجيهتي وكل مرة كيهز عينو كيلقاني مكنخرجش غا كندور فراسي!!

(خرجتو فدماغي و وهمتو أنني بحال مفهمتش و هادي غا ضربة خرا لي غتكون مجهدة شوية باش يجمع كرو معايا ) ... قالينا جا وقت تصحيح ... شكون ينوض للسبورة وحنا المغاربة كتشدنا الرهبة من الوقوف أمامها واخ يكون عدنا كلشي صحيح مكناخدوش المبادرة ... كلشي سكت تاواحد مابغا ينوض وهو يتيري فيا وقاليا نوض خرج ( هنا السمكة كلات الطعم ) ... درت راسي بحال متردد ونضت بشوية كأنني حصلت صافي طلعت فديك الدرجة المشهورة لي كتكون قريبة من سبورة و هو رجع للحيط اللور وكيتفرج زعما فالفشل ديالي ههههه مخرجتش بالطريقة العادية وعمرت السبورة بزربة لالا صدمتو بأنني خرجت بطريقة الأساتذة وكنشرح كل خطوة علاش وكيفاش ومنين جات وملي ساليت قلت للتلاميذ شكون مفهمش؟ كاين شي سؤال هههههه تاحد مجاوب وانا ندور ليه هو وقلت ليه استاذ نرجع لبلاصتي ولا عندك شي تدخل!!

بنادم دار ديك هااااااه ودارو كيشوفو فيه على أساس أنني علنت الحرب عليه مباشرة و هو يقوليا : لا غير رجع لبلاصتك قلت ليه شكرا ( كنضربو باحترام باش ديما نخليه مريض بالبرودة ديالي ) صافي سالات الحصة خرجت أنا الأول كيديما، كنغبر ومكنعمر معا حد واخ كنعرف شي وحدين منهم ، جات الحصة لي وراها دخلو كاملين ودخلت وراهم وجلست بحال مكين والو وبديت كنحس بأن كلشي ولا مهتم يدوي معايا وكلشي كيشوفيا

خوكم بطبيعت الحال ممسوقش وداير راسي ماضايرش عليا الفيلم ، وانا راه داكشي لي وصلت من نجاح فبداية الخطة عاجبني بزاف حيت داك الأستاذ سهل عليا المأمورية وخلاني نبان مقود و خديت إعجاب الكل حيت ملي درت ليه هكاك راني دافعت على كل واحد فيهم بطريقة غير مباشرة حيت كل واحد فينا فيه دري صغير لداخل كيخاف يواجه الأساتذة ويدوي على حقو... وغنكون أول واحد فحيات دوك تلاميذ لي جاب ليهم نصر معنوي وخلاهم يحبوني حيت حركت فيهم داك دري صغير وفرحتو بعد ماعاش فيهم لسنوات وهو خايف
دازت ديك الحصة وسالا نهار وخوكم اول واحد خرج ومشا لدارهم بلاما يحس شي واحد وجا الغد ليه ، وحصة جديدة عند مول الرياضة ... جيت لابس موجد... كيف العادة الدراري طلبوه باش يعطيعم الكورة واخ مقبلش غير بزز باش عطاها ليهم والدريات عطاهم الباسكيط وشي وحدينات جلسو كيتفرجو فدراري المهم تعازلو وجيت فالفرقة لي غتشد الداخلة

بداو دراري مكاين غاللعب والخبيط وكلشي ولا مارادونا مع دريات كيتفرجو وهادي أول حصة خليني من هنيني كل واحد باغي يبان المهم تماركة البيت ودخلت فرقتنا تلعبات كورة كيف شدوها لي لاعبين معايا عطاوها ليا وبدون سابق انذار غنزيدها ونباكيها نيشان فالعارضة كلشي مفهم والو هادا منين جاب هاد جهد ههههه (خوكم ديجا كيلعب كورة فواحد الفرقة فديك الوقت وركابي عامرين)

المهم ديك القذيفة خلات كلشي نتابه للماتش واجي تشوف وليت كنشدها كلشي كيقول تييييير تييييير وانا غير كنباصي حتى لواحد اللقطة من وسط تيران يعني تاواحد مغيفكر يماركي من تما، قاديتها على خاطري وصيفطتها نيشان تماركات.... دراري لي معايا جاو كيقولو ليا معلم كاين الآخرين خرجو وانا نخرج معاهم قلت لواحد كمل فبلاصتي طلبوني دراري وقلت لهم مبقيتش قادر نلعب توعت فخدي ( انا مبغيتش نكمل باش نخلي الصورة مزيانة لا يولي مبيضني شي واحد ولا نولي طايح شي طيحة ماهياش ونولي بحال مادرت والو المهم خليتها بعزها) وجلست كنتفرج بعيد على بنادم وانا نسمع رجلين كيقربو حدايا متلافتش بحال مكين والو وانا نسمع ، سلام واش ممكن نجلس نتفرج حداك قلت لها مرحبا ومتلافتش فيها !!

جلسات بقات ساكتة وهي تقوليا علاش مكملتيش الماتش راك كتلعب زوين قلت لها شكرا ولكن ضراتني رجلي ، عاد شفت فيها لقيتها واحد ختنا كتقرا معايا ومن داك نوع لي زاعم باينة مسيفطينها دريات دير ليا جس النبض !! قالت ليا فين توعتي قلت لها ف فخضي قالت ليا عدها ماساج تقدر تعطيه ليا قلت لها شكرا راه عندي وهي تقوليا علاش نتا داير هاكا!

قلت لها مفهمتش مالي كيداير؟؟! قالت ليا فشكل مكتفهمش!! قلت لها آش باغة تفهمي قالت ليا علاش نتا ماشي بحال دراري ومنعزل قلت لها عادي عزيز عليا الكالم وبنادم فيه غاتبرزيط ومعديش معا لي فيه قوة الأسئلة وهي تقرص وناضت قالت ليا سمح ليا إلى برزطتك وانا نقوليها هانية وهي تمشي!!

غتقولو كيفاش آسي برلين تضيع فرصة جات تالعندك بهاد السهولة؟؟

عمرك ترض من راسك فريسة وتخلي بنادم يختارك حيت فديك اللحظة غتولي ساهل وغاياكلوك... نتا لي تختار الفريسة باش نعرف منين تاكلها حيت فالعلاقات ديالنا يا تكون رابح ولا غتلعب دور الضحية وغتخسر كل مابنيتي... يتبع

ميعادنا غدا إن شاء الله العاشرة ليلا قديمة .. أحبكم <3

#برلين