جبروت الحنين

تنويه

يسعد مسائكم متابعي جبروت الحنين

شلونكم مشتاقة الكم كلش هواية .. طبعا هواي دتسألون شوكت ينزل الجزء الثاني ؟؟

ان شاءالله موعدنا يوم ٣٠ تموز ٢٠١٩ ..

حاليا محتاجة وقت ارتاح بي واستعيد نشاطي اتمنى تعذروني ع تاخير ❤..

الي متحب نجية لتقرا المشهد الاول 😂

_____

مشهد رقم ١ ...

يوم ١ بالشهر طلعت من بيتهم والفرحة ما سايعتها ..
اليوم تستلم السلفة لان هالشهر الها ..

تمشي بالفرع وتهز براسها وتغمض عيونها وتبتسم ..
رفعت ايدها المليانة سوارات ، رفعتها لمستوى نظرها ..

حاجتهم وابتسمت ؛ - اي ولكم اليوم استلم سلفة وازيدكم وظلت تخرخش بيهم ..

وصلت لبيت ام هشام محضرة نفسها حتى تاخذ فليساتها .

الباب جان مفتوح ع النص كبل لاتدخل ظلت تطل شافت وسام خاتل ورة الشجرة ويدخن .

ظلت تهز ركبتها وطك اصبعها وتغمز .. فتحت الباب بخفة وبدون صوت ، مشت وصارت وراه وصاحت عليه متصنعة صوت رجولي ..

ووولك وسييم  ..

وسام كمز  من مكانه ع الصبة شمر الجكارة وداس عليها ..

التفت وهو يحجي بتوتر وخوف والله ماجاي ادخن والله ما....

من شافها ظل يضرب على فخذه ويتنهد بضيق
وظل يردد : استغفر الله ياربي استغفر الله يارب
خالة شبيج انتي شبيج خوفتيني ترة مايصير هيج ..

طكتها ضحكة وقربت راسها وكالت بتهكم : ها ولك وسمي خو ما بللت سروالك .

حجايتها هذه خلته يشك بنفسه ويتفحص ملابسه ..

ظلت تضحك وفاتت من يمه وتحجي امك هنا لو لا ..
اجيتها حتى اخذ السلفة الشهر الي  ..

هيه تمشي ووسام وراها  يباوع الها ورافع ايده للسما ويدعي عليها بسبب الهبطة الي سببتها اله ..

ظلت تباوع للكاع شافت خياله وهو يسوي الها حركات بيده يغمها ويدعي عليها ..

اندارت عليه بسرعة البرق ، اخترع ووكع على الارض ..

طكتها ضحكة وغمته كالت حييل بيك شوف انه الي شارة وهذا اليندك بيه ..

كملت طريقها للبيت ، دكت باب المطبخ طلعت الها ام هشام .. دخلت وياها وطلعت مزعوجة ومعصبة وتدردم بيدهه ورقة الاسماء الي مادفعوا  ..

تمشي وتحجي بعصبية ؛ اي اي انه ادفع الهم كبل الكل وبيوم سهمي مايدفعون ويتميهلون انه الهم انه اعلمهم اروح اسحلهم سحل والله شون مايدفعولي باول الشهر .