الحلقه الخامسة عشر ..الجزء الثانى /
سمير كان واقف يسمع كلام الدكتور عن ضعف الجنين وعيونه مابتتحركش من على بوسى وكلها توعد ليها بوسى خافت من نظرته ولأول مره تخاف منه
الدكتور :تمام يلا مدام انا حكتبلك محاليل وحقن حديد علشان نحافظ على تغذية الجنين
قامت بوسى من على سرير الكشف وهى متشاله زى كل مره لكن المره دى كانت حاسه بقسوه فى ايد سمير إللى شيلاها وقلب سمير إللى حاضنها
قعدها قدام الدكتور واستنى يسمع منه سبب الضعف علشان يبدأ طريقة معامله تانيه مع بوسى ان كان ليها يد فى كده
الدكتور:انا كنت متوقع ضعف الجنين بعد.نتيجة تحليل الهيموجلوبين لان النسبه قليله جدا وده ممكن يعرضك لنقل ده أثناء الولاده طبعا انا من البدايه مفهمكم ان السن له عامل كبير فى ده ده غير ضعف الام نفسها
سمير:يعنى هى مش بتاكل
الدكتور:ده مالهوش علاقه بالاكل ده له علاقه بانواع الاكل وواضح أن المدام كانت بتعانى من الانيميا من قبل الجواز
بوسى:ايوه فعلا وده كان بيسسبلى إغماء كتير
الدكتور:طيب يعنى طبيعى ان بعد مايكون فى جنين بياخد الغدا منك ان الانيميا تزيد علشان كده كتبتلك المحاليل وحقن الحديد ده غير الفيتامينات دى كمان
بوسى:حاضر يادكتور لكن انا كمان بحس انى عاوزه اتقيئ كتير اوى
الدكتور:ده طبيعى وحتنتهى مع نهاية الشهر الثالث واشوفك ان شاء الله بعد ثلاث اسابيع من دلوقتى
سمير:شكرا يادكتور
سمير أخد بوسى على الكرسى وخرجوا ركبها العربيه ورجعها البيت
سمير اطمن ان ده خارج عن إرادتها وأنه يأذيها اكتر مايأذى الجنين لكن هو بقى كل همه ابنه وبس
سمير بقى عنده حاله مرضيه اسمها ابنه وخصوصا بعد ماعرف مع تقدم الشهور على بوسى انه ولد وحيشيل اسمه
كان كل مابوسى تعدى شهر حمل ويكبر الجنين فى بطنها يزيد بعد سمير عنها واهتمامه بصحتها علشان ابنه وأصبح مهووس بيه مت قبل ماييجى عمله اوضه جهز فيها كل حاجه غير انه كان بيكبر صور السونار كل شهر ويحطها فى براويز ملا بيها أوضة نومهم ومكتبه فى الفيلا والشركه سمير يوميا كان بيشغل السى دى اللى عليها الاشعه بتاعة الجنين ويسمع ضربات قلبه ولا كأنه بيسمع مقطوعه موسيقيه لبيتهوفن او اغنيه لام كلثوم
بوسى كانت بتحس كل يوم بيعدى ببعده عنها وفقدانها أهم حاجه هو قدمهالها وهى اهتمامه وحنانه
عدت شهور الحمل عذاب على بوسى وانتظار من نار على سمير
لحد اليوم المنتظر وولادة ولى عهد سمير الكردى
بوسى وهى نايمه بالليل حست بألم شديد فى بطنها
بوسى:سمير سمير انا تعبانه اوى
سمير بلهفه :مالك تعبانه من ايه
بوسى بصراخ:حاسه انى بولد اااااااه الحقنى ياسمير
سمير قام شالها على العربيه وسط صراخها ودموعها والالم وفجأة لقت مياه بتنزل منها ودم
بوسى:ااااااااااه انا بموت
سمير شاف المياه والدم وقلبه كان كانه سيتوقف عن النبض كان كل خوفه على ابنه يجراله حاجه بعد طول انتظار
وصلوا المستشفى بأعجوبة بعد ماسمير كان حيعمل كام حادثه
سمير جرى ونادى على التمريض وبسرعه اتعاملوا معاها ونقلوها على العمليات
بعد حوالى نصف ساعه من القلق على سمير سمع صوت بكاء طفل ولمح ممرضه خارجه من العمليات
سمير وجسمه بينتفض:لو سمحتى هو ده اااااا
الممرضه :ايوه ياافندم مبروك جالك ولد زى القمر
سمير بفرحه ودموع :شكرا شكرا
الممرضه :هو فين لبس المولود
سمير:انا جيت علطول لكن ثوانى واجيبه هو كده ممكن يتعب ارجوكى اتصرفى لحد ماابعت اجيبه وطلع مبلغ كبير وعطاه الممرضه
الممرضه:ماتقلقش انا حتصرف لكن هاته بسرعه
راحت الممرضه جابت بامبرز ودخلت لبست المولود ولفته بملايه كبيره معقمه
سمير اتصل بالبيت
سمير:الو ايوه ياماجده
ماجده:نعم ياباشا تحت امرك
سمير:بسنت ولدت هاتى شنطة هدوم البيبى وتعالى المستشفى بسرعه خلى اسلام بتاع الأمن يوصلك بالعربيه الصغيره بسرعه
ماجده:حاضر ياباشا دقايق واكون عندك
سمير:بسرعه ياماجده الولد مش لابس
ماجده :حاضر ياباشا حاضر
قفل التليفون مع ماجده وكان ساعتها الممرضه خارجه بالمولود
سمير بصوت مهتز:ده ده ابنى
الممرضه :اتفضل ياباشا شوفه قبل مااوديه أوضة الأطفال
سمير:لا احسن يتبدل
الممرضه بدهشه:لا ياباشا اسم مامته مكتوب على ايده فى الشريط اهو
سمير:معلش هاتيه فى أوضة لوحده وانا ادفع أى حاجه مش مهم
الممرضه :ماينفعش ياافندم لازم يروح الدفايه بتاعة الأطفال
سمير:قولتلك لأ انا عاوز ابنى
الممرضه :طيب تعالى حضرتك انا ححطه قدامك وحتكون شايفه من الزجاج
سمير:ماشى
راح سمير وفضل واقف عينه على ابنه ونسى الطفله التانيه إللى حتى ماسألش عليها هى فاقت ولا لأ
خرجت بوسى من العمليات ولا كان معاها امها ولا جوزها لكن رحمة ربنا وقفتلها ممرضه بنت حلال فضلت جنبها لحد مافاقت وطمنتها على مولودها
وصلت ماجده المستشفى وسلمت لبس المولود وكانت جايبه معاها لبس لبسنت بالرغم ان سمير نسى كمان يقولها عليه
راحت ماجده على أوضة بوسى
ماجده:حمد الله على سلامتك ياحبيبتى مبروك
بوسى بتعب:الله يسلمك ياطنط
الممرضه :كويس ان حضرتك وصلتى اسيبهالك انا بقى بس خليكى معاها هى مش حتعرف تتحرك لوحدها
ماجده:ماتقلقيش انا معاها
الممرضه بصوت خافت:ياحاجه قولى لجوزها ييجى يشوفها من ساعة ماخرجت وهى بتنادى عليه وهو راح ورا المولود وماشفهاش لدلوقتى
ماجده:حاضر يابنتي كتر خيرك
خرجت الممرضه وقربت ماجده من بوسى
بوسى بدموع:سمير سابنى ومش عارفه هو فين
ماجده:عند المولود هو اطمن عليكى وراح للمولود
بوسى:انا قولتله انه بيحبه اكتر منى
ماجده:اهدى ياحبيبتى هو بيحبكم انتوا الاتنين لكن هو خايف عليه لحد يأذيه
بوسى:طيب وانا ده حتى ماما مالحقتش تيجى
ماجده:انتى ولدتى قبل المعاد ده انا إللى معاكم فى نفس البيت ماحستش غير بعد مامشيتوا
بوسى :اتصلى بماما خليها تيجى
ماجده:حاضر من عينيا
بوسى:ناديلى سمير
خرجت ماجده تدور على سمير واول ماشافته راحت عليه
ماجده :سمير باشا مدام بسنت عاوزه حضرتك
سمير:هى خرجت
ماجده:دى خرجت من بدرى وفاقت ومالقتش حد.معاها لولا صعبت على الممرضات وواحده مهم فضلت جنبها
سمير:معلش بقى انا اتلهيت فى ادهم
ماجده:هو حضرتك سميته ادهم
سمير:ان شاء الله ادهم سمير الكردى
ماجده:يتربى فى عزك ياباشا لكن معلش روح طيب خاطرها غلط عليها الزعل دى لسه والده
سمير:يوووه بقى لازم تبطل شغل الأطفال ده دى بقت ام
ماجده بقصد:صغيره ياباشا
سمير:الصغير بيكبر عموما انا رايحلها وانتى خلى عينك على ادهم أوعى حد يحركه من مكانه
&&&&&&ياترى سمير حيعمل ايه مع بوسى &&&&&&
