*انثئ في معتقل الحب*
بقلم(zainab)عطر الورد
........ ............ ............ ............. ............
. . هنيالك علية شكد افكر بيك
وهنيالك علية شكثر حبيتك
وهنيالك يغالي ويالسكنت الروح
وهنيالك لأن صار الكلب بيتك
حبيتك محبة تساوي كل الكون
وبوسط الجسد والروح خليتك
اخاف اني احسدك من جمال البيك
وعن عيون كلبي هواي ضميتك
ياتاج على راسي وياملك ع الناس
واغلى من الرمش والجفن حسيتك
بادلني العشك والشوك والوجدان
يالأسمك قصيدة واسمي قافيتك
نسيت حروف اسمك بية مدري شصار
وكتبت حروف اسمي وبيهة سميتك.
........ ........ ....... .......... .... .......
البارت٢٦
مساء العافية😍😍
(تصويت::تفاعل)
........ديمة ......
ضل سيف يقرالي شعر واني احس روحي اسعد وحدة بعالم جان لازم ايدي ...باوع لعيوني..
سيف:ديمة وعد لموت ما راح اتركج اريدج توعديتي ما تتركني لو شيصير..
ديمة:ديمه واني ذايبة بنظراته... وهمساته..
انته النفس مالتي اشلون اكدر اتركك ...
هو لزم خصلة من شعري ضل يشم بيها ..
سيف:اذا كصيتي شعرج حتى لو شويه اموتج..
ديمة:تدلل حبيبي...
سيف:فدوة لكلمه حبيبي اشلون طالعة منج..
خجلت نزلت راسي ...دائما يخجلني ..
بعدين سالته..
ديمة:سيف انته يمته بديت تحبني..
سيف:هو اعتدل بكعدته..وضحك
اول ما شفتج وانتي من اخذنه اخوج وضليتي تبجين بلبداية عطفت عليج.. وساعدتج من باب العطف واعتبرتج شي يخصني..
ديمة:بس انته طلبت مني شغلات موزينه..
سيف:لا ردت اختبرج ولد عمي واخو رشا كال من اساعدهم راح تنطيك كلشي وكلت اني اشوف كلامهم اذا صح ابطل وما اساعدج...
ديمة:وانته شنو شفتني..
سيف:شفتج بنية بريئية وتحجي بعفوية..كلشي البكلبها تحجي ما تحب تصنع ولا اجذب ..
تدرين من جنت اشوف واحد مجرد ما ينظرج بودي اكتله حتى انتي اكتلج بس كلبي ما ينطيني..
جنت بين فترة وفترة اجي لمدرسة بس اشوفج واتابعج خاف واحد يتعرضلج ومن صرتي بكليه
خفت لا تحبين واحد وتتعلقين بيه لو يضحك عليج
صرت بس افكر بيج خليت متابعين عليج واخبارج
اول بأول توصل الي..
بده يتقرب مني ..
ديمة:سيف ابتعد شنو ما تشبع..
سيف:هو اليشوف العسل ..يشبع منه ...
زين انتي يمته انعجبتي بشكلي الوسيم..
ديمة:ضربته ع صدرة لا اصير مغرور...
انته ليش رفضتني بلبداية من كليتلك اني احبك..
سيف:قبل لا تجين وتكليلي اني جنت وي رشا
وجنت مواعدها بزواج ما ردت انطيج كلمه واني ما متاكد ...منها ...
ما اعرف ليش من ذكر اسم رشا حسيت مغص ببطني
سيف:ديمة صح اني خطبت رشا بس ما حبيتها..
جنت لان متعود عليها واعرفها اني الحب عرفته وياج ..الباقي كلها جانت نزوات ...مجرد رغبة انتي العلمتني اشلون احب ...
اندكت الباب اني اعتدلت بكعدتي وهو شوي بعد..
دخلت ماما بيدها صينه عشة..
سمية:شنوو تخلصوها سوالف اليوم ما تاكلون..
سيف:خالة غير اريد اتعرف عليها وهو يغمزلي
اني نزلت راسي خرب راح يفضحني..
سمية:اي هم حقك..
امي طلعت واحنا بقينه هو كام يوكلني ويكلي اريدج اسمنين ..اني جان وزني ٥٥ ..يعني زين مو كلش ضعيفة بس هو يكلي جنج عصفورة..اريد اصير عندج اخدود..
وصلتني رسالة.. من نفس الرقم..
مكتوب انتظري المفاجأة بأقرب وقت..
اني قريتها وجهي كام ينطي الوان هو باوعلي..
سيف:شبيج حبي ..شنو هاي الرسالة..
ديمة:بارتباك هاي رغد ..اتكول البنات زعلانات
علية لان ما عزمتهم..
ما عرفت ليش ما كلتله ...هو كال
سيف :لا ضوجين بعرس نعزمهم..
شوي ودخل منتظر اجه كعد يمنه ..وصوفي وماما همات هو ابتعد عني وضل يسولف وي منتظر ..
اني احس روحي خجلانه وخصوصا كدام منتظر
شلت الصينية..هو صحيح يسولف وي منتظر بس عينه عليه حتى خلاني ارتبك بمشية..رحت فرغت الاكل سويت جاي ..جانت اكو جام مضلل كلساعه اباوع بيه ع شكلي ..غسلت ايدي رشيت عطر خدر الجاي صبيت جاي الهم ..رحت قدمته...
هو اخذ مني ...ضلو يشربون ويسولفون اني كاعدة يمه ...
هو أندار عليه كال احلى جاي شاربه بحياتي فدوة لسوته...
امي سمعته ضل تبتسم اني ما اكدر اسوي شي ..
بس اباوع لان جان منتظر موجود استحي يمه ..
شوي وكال اني استرخص...
كامو وصلوه لباب ..هو تقرب مني..
سيف:حبي محتاجه شي ..
ديمة:سلامتك ..ما محتاجه شي ...
سلم ع الكل وطلع ...
دخلت جوة واني تعبانه من الصبح كاعدة..
امي ضلت اسولف ع حفلة منتظر جان يباوع ع طوبة ...هو كال خوش ناس وهسة اني ارتاحيت
من صرتي بذمة رجال وسيف خوش زلمة وراح يدللج..شفت الصور ماخذتلي بموبايلها..
بعدين كلتهم اريد اصعد تعبانه ...
رحت غسلت وجهي لان بعده بيه مكياج..
وتسريحة فليتها رحت سبحت لان جسمي احسة مكسر ..طلعت من حمام لكيت سيف موديلي رسالة
بيها شعر وكال اشتاقيتلج ما يصير ارجع هسة ..
ضحكت..مشطت شعري ...ونشفته لان مبلل..
بعدين خابرت سيف واني كوة احجي لان عيوني ثكلن من النعاس هو شافني هيج كال روحي نامي ..
قفلت الجهاز خليته ع صفحة واني ردت انام صحيح
جنت نعسانه بس ضليت اذكر اليوم اشلون من عقدلي شيخ وتذكرت عمته شفتها ما عاجبها شي
احسها تكرهني..وقلقانه من الرسايل..ضليت افكر الا ان نعست ونمت..
كعدت ب١١ من التعب شفت موبايلي..٥ مكالمات من سيف ورسايل ..
خابرته..
ديمة:ها حبي صباح الخير..
سيف:صارت دنيا عصر وبعدج نايمة..
ديمة:والله غير تعبانه وهسة عطلة خليني انام.
سيف:واني كاعد من الصبح علمود اسمع صوتج...
ديمة:هسة راح يجي دوام واكعدلك ب٦ الصبح بعد شتريد..
سيف:ما اريد شي بس انتي ...
بقة يتغزل جانت عنده خدمة واني حتى ما غاسلة
وجهي ضلينه نسولف بساعة بعدين كليتله اريد اكل..جعت..هو همين جان عنده شغل وراح..
ضلينه اسبوع نفس الحالة جان يجي بين يوم ويوم ساعة العصر ويروح عشت احلى اسبوع ...
صادف يوم جمعة ولازم انزل السبت لاقسام..لان بدئ الدوام ...وهمين مثل كل سنة لازم ندفع وهوسة أقسام خابرت سيف كال اني اوصلج...باجر ..
ثاني يوم ...حظرت غراضي مال اسبوع لدوام
وبدلت لبست تنورة بينصل وبدي كلش ضيك اني احب هيج لبس ومن زمان البسه خليت مكياج بس ما كثرت ...اباوع ع نفسي بمراية كلش حلوة ضليت يم ماما وهي ضايجة مثل كل مرة انزل بيها كلتها من ازوج اشلون بيج..
سمية:ما اعرف بس ع الاقل انتي يمي مو بعيدة..
سمعت صوت هورن كمت اخذت الجنطة مال الملابس سلمت ع امي وطلعت هو نزل اخذ الجنطة اني راسا صعدت بسيارة اجه بقى يباوعلي..حتى ما سلم..
سيف :هاي انتي اشلابسة..
ديمة:يا شلابسة شنو تنورة ..
سيف: لو ما لابسة مو احسلج يلا انزلي غيرهن لو تلبسين شي فوكاهن..
ديمة:سيف شنو ابدلهن ما الحك واني هذا لبسي كل ملابسي هيج..
سيف:هذا قبل هسة انتي بذمتي واني ما اقبل تلبسين هيج يلا انزلي غيرهن ما اتحرك خطوة اذا ما غيرتيهن..
ديمة:شفته صار عصبي ...اني نزلت وضايجة فتحت الباب شفت ماما اتفاجات من رجعت..
سمية:ماما ليش رجعتي..
ديمة:استاذ سيف ما يقبل بلبسي..ويردني ابدلة..
سمية:اي حقة يمه هو بعد رجلج ويغار عليج لا اتعاندي...
صعدت واني طافرة روحي كلت ما اغيرهن لان راح يخرب شال وكلشي دورت بكنتور جانت عندي ابو ليرة طويلة لبستها احس روحي مبهذلة بسببة
واني اشوف نفسي واتأفف...
نزلت وماما توصي بيه عود ما اعصب لان تعرفني اكوم اجفص..
فتحت الباب ولكيته كاعد بسيارة ويدخن...شافني
ذب الجكارة اني صعدت بسيارة طبكت الباب حيل هو ابد ولا حجة واني بس اتافف هو بكل برود شغل اغنية شمسين بعدين خلصت شغل اغنية لحسين الجسمي وحشتني بحبك.. واني بس صحت وخصوصا هو ما حجه ابد اني درت وجهي وضليت اباوع من جام السيارة طول الطريق وهو ساكت ..
اريدة بس يحجي علمود اتعارك..
وصلنه لاقسام هو كال
سيف:حبيبتي ادري بيج ضايجة بس والله اني ما اتحمل هيج اشوفج لابسة ..
ديمة:درت وجهي عليه بس انته عصبت عليه
هو لازم ايدي باسها..
يعمري اني اسف من شفتج هيج لابسة وفكرت واحد يشوفج بهذا اللبس فقدت عقلي اني اغار عليج من الهوة الطاير ما اريد هذا الوجه الحلو يزعل عليه
بكلمتين منه خلاني أرضه ابتسمتله..
هو يكلي اشلون راح افاركج وما اشوفج...
وصاني ما امشي وي وحدة بس وي رغد لان يعرفها
اني حجيتله عليها ...
سلمت عليه نزلت واني اشوفه بعده واكف انتظرني ادخل الأقسام وهو راح..
اول ما دخلت الأقسام لكيت رغد مسويتلي مفاجاة
كيك وعصير واغاني صدك فرحت اني دخلت وبنات باركلي...واجت رغد تحظن بيه وباركتلي..
ضلن بنات يصفكن ويريدن يشوفن العريس طلعت صور الخطوبه وهي كلها اتكول شخصية مبين عليه اني غرت بسرعة اخذته منهن لان ضلن يتغزلن بيه
وناصبات عليه شفت سلار اتريد اتحاجيني بس اني ما قبلت ..
خلصت الحفلة وكلها راحت بقيت اني ورغد .
رحت رتبت ملابسي ورغد واكفة ع راسي سولفلي ما سولفلي كعدت سولفتها كلشي وحتى ع الرسايل شوفتها كالت لازم اتكولين لسيف ..كلتها اي هو اني اذا تبقى هيج اكله ..
بعدين سولفتلي ع احمد وهو كايل لاهله عليها وامه موافقة كالت بعطلة نصف السنة اصير الخطوبة..
خابرت سيف ..وكال وصلت بقة يوصلني مكياجج لبسج وما اريدج تحجين وي اي واحد...
ثاني يوم ..بدلت ولبست فستان طويل بس نازك..
لان سيف ما يقبل بعد البس قصير واني ما اريد مشاكل وياه ..
رحت لقسم لكيت مسويلي بوستر..
تهنئة وهمين بنات باركلي ولد بقسمي..
واني خايفة لان كلت خاف سيف يجي ويشوفني
واصير مشكلة كمت اجنب الولد ما اختلط وياهم..
مر اسبوعين ونزلت بطلت من الخط لان صار سيف
هو يوصلني ..
اجه شفته جنت حيل مشتاقتله هو همين مبين ..
من لهفته..صعدت سلمت عليه هو بسرعة باسني بخدي ..
سيف:ولج مشتاقلج بكد رحمة الله ..
ديمة:واني اكثر ...
سيف:منتظرين هاي الأسبوعين علمود اشوفج ..
لو ما دوامي اجي الج بكليه...
حرك السيارة ومشغل اغاني ..ولازم ايدي وهو يدندن
منطلق كلش وي الاغنية ..وكلساعة يبوس ايدي..
كلالي ..احسبي حسابج بعطلة نصف السنه الزواج
اني ما اتحمل هيج..
ديمة:بس مو متفقين ع العطلة..
سيف:اني ما اكدر انتظر للعطلة ...
ديمة:اوك حبيبي بكيفك
بعدين ..بنص الطريق نزل جابلي كص دجاج وهمبركر وفنكر...
سيف:تذكرين من جبتج من النجف..
ديمة:اي هذا الموقف ذكرني..بس اني بذاك اليوم جنت منهارة وخايفة ...
سيف:منين خايفة..
ديمة؛من ردت فعل اهلي وجنت خايفة من مشاعري وخصوصا انته ما قصرت وياي
هو ضحك...
سيف:من شفتج تبجين ما تحملت ..شكد جنت واعد نفسي ابتعد عنج بس كل موقف يمر وياج يخليني اقرب..
كملنه اني وياه اكل...
وهو يسولف عن اهله لان اني سالته ..
ديمة:سيف عمتك احسها ما تحبني..
سيف:عمتي هو هذا طبعها حتى امي جانت ما تحبها
بس هسة لا زينه انتي لاتتقربين يمها خلي علاقتج سطحية..
هزيت راسي ..
وصلنه لبيت هو نزل ع امي سلم عليها ...
امي جلبت بيه ع غدة بس كال عندي شغل ما اكدر
سلم عليه وراح ..
كليت لماما ع زواج بلبداية اعترضت بعدين كالت بكيفكم ...
مر يوم عادي اجه منتظر ..وامي فتحت وياه موضوع الزواج ..
سمية:يمه سيف كايل لاختك ع العطلة نصف السنة يزوجون ..
منتظر:هم بعد بكيفهم هاي حياتهم..
سمية:يمه وانته يمته نفرح بيك هاي اختك راح تزوج
واني ابقى بوحدي يمه انته جبير وهسة البعمرك
مزوجين وعندهم جهال..
منتظر:يمه رحمة لهلج سدي هاي السالفة اني من اريد اكلج ما مستعجل ..
خله وكام..
سمية:والله هذا الولد راح يموتني..
ديمة:يمة خلي براحته..
سمية:هو اني حسرة عليه افتح وياه موضوع الزواج ..غير هو الجبير وأريد افرح بيه ...
ديمة:الله كريم هسة هو من كيفه انطي وقت اول وتالي راح يزوج..
ضلينه اني وامي نسولف سالتها ع مهند ...
سمية؛ما شايفته من اروح الكاه بشغل ..
ديمة:خالتي اشلونهن..
زينات سالني عليج...باجر يجن هنا ..
ثاني يوم كعدت ..لكيت خلاتي موجودات سلمت عليهن بقن لظهر ويانه ...
بعدين راحن اني صعدت اسبح حظرت ملابسي اجه سيف اخذني وصلنه وهو كلعادة يوصي بيه
ايكلي ابتعدي عن بنات يسون مشاكل..
رحت دخلت لقسم وصلتني رسالة..
عبالي من سيف فتحتها ..
من نفس الرقم...ترة ما ناسيتج..والله ادمر حياتج
واخذ اعز شي عندج مثل ما اخذتي مني..
خفت منها كلت لو اجوان لو رشا وحدة منهن لازم اكول لسيف بس خاف يروحلهن أوف ياربي شسوي
وصلت لغرفة واني حتى ما منتبه...دخلت لغير غرفة
مال بنات ...لزمت الموبايل حظرت الرقم ..
بس ترجعلي بغير رقم ...
مرت الايام واني مخلصتها بس قراية لان لازم اطلع معدل زين ..علمود بعد الزواج ما اتعب هواي جانن
درجاتي كلها عالية ..سيف خطية من اكله عندي امتحان ماجان يخابرني حتى لو يخابرني شوي بس يسلم ويعرف اخباري ويغلقه ايكول ما اريد اشغلج
عن دراستج...
خابرت سيف..
ديمة:سيف اليوم انزل تجي تاخذني لو عندك شغل ارجع وي خط..
سيف:لا هسة هو اني بطريق الظهر يمج ...
ديمة:قفلته منه رجعت لقسم لان جنت بكلية..
اني محظرة ملابسي بس غيرت ملابس الكلية
لبست بنطرون وفوكاه قميص وأبو ليرة شي مستور
واني من نخطبت لسيف اشتريت كله طوال لان اعرفه يعصب ضليت منتظرته بعدين خابرني
كال منتظرج..
سلمت ع البنات وطلعت لكيته واكف يم السيارة
لابس قميص نيلي وبنطرون اسود فاتح شوي من دكم القميص لابس الزنجيل الهديته اله...شعره منزله منطيه اكثر جاذبيه...شفت البنات ايطلعن من القسم
لان كلها تنزل..لاهله وهنه يباوعن عليه الصراحة كلش غرت هو صحيح ما يباوع عليهن بس اني ما اتحمل وحدة تباوع عليه..
ااجيت عليه بدون حتى سلام..
ديمة:سيف ليش نازل من السيارة
سيف:اني اعرف الواحد يسلم اشو انتي اجيتي هاجمه عليه..
يعني ليش نازل غير انتظرج ..تعبت واني اسوق
كلت انزل ..
ديمة:سيف بعد خلي الخط يوصلني..
سيف:ليش يوصلج اني لعد وين..
ديمة:انته ما اشوف البنات اشلون يباوعن عليك
اكللنك بعيونهن..
سيف:اني ما تهمني اي وحدة غيرج ..
تدرين من اتغارين اصيرين احلى..
يلا حبي تعالي اصعدي محظرلج مفاجاة..😉
صعدت واني الح عليه اريد اعرف شنو المفاجاة
سيف:لا تستعجلين ع رزقج اصبري..
شوي وصلنه لمطعم كلش راقي نزلت وهو طلب اكل
كعدت اكلت هو ضل يسولفلي ع عرسنه كال جبت غرفة ..شوفني بتصوير كال اذا ما تعجبج اغيرها
جانت غرفة كلش حلوة ...
بعدين طلعنه...مو طريق اهلي راح لغير طريق..
ديمة:سيف وين موديني....
سيف:هسة تعرفين..
الصراحة اني شوي خفت بعدين وصلنه لشقه..
هو نزل واني نزلت...
فتح الباب ..اني ضليت واكفه..
سيف:تعالي ادخلي ليش واكفه..
ديمة:سيف هاي الشقة جانت بيها اجوان..
هو سكت ...دخل ...كعد جان بلبداية مثل الصالة وبيها تخم كعد عليه ..
اني سديت الباب اجيت اتخوصرت..
سيف هاي مو شقة الجنت اجيب بيها اجوان..
بقة ساكت باوعلي صفح..
اني احتركت لان اتخيلت اشلون يجبيها اهنا لو يتغزل بيها..
ديمة:هاي الشقة..اتبيعها ما اريدها..
سيف:اي سهلة أبيعها..
ديمة:سيف لاتضحك عليه والله لو اني لو شقة المن مخليها اتريد اجيب بيها بنات..
سيف:شبيج ديمة صحيح جان عندي علاقات بس هسة كلهن انتهت من يوم الحبيتج كطعت كل علاقتي..
ديمة:سيف لا تخوني.. والله اموت..
سيف:ولج لا تكفريني شنو اخونج...
لزمني من ايدي ..وكعدني ع رجله...
ولج اني مخبل اخونج والله ما تتحلالي مرة غيرج..
بعدين باسني...اني اجاوبت وياه..
خفت لا يتماده اكثر لان شفته كلش ذايب
ابتعدت عنه...
ديمة:سيف اريد اغير رقمي..
سيف:ليش تغيره عندج شي وتخافين منه لو ما كايلتلي عليه..
طبعا سيف شكد شكوكي من كد
ما معاشر بنات..
ديمة:اني اريد اغيرة...
سيف:رقم ما يتغير...
اني خليت ايدي ع وجهي ..وكمت ابجي هو من شافني هيج اجه وخر ايدي ومسح ادموعي..
وهو يباوعلي بنظرات قلق..
سيف:شبيج تبجين شكوو..شصاير وياج..
ديمة:جريت نفس سيف من يوم النخطبنه ولحد هسة تجيني راسائل تهديد..هاك شوف
هو قرة الرسايل وصل يخنزر عليه..
سيف:اني مو كليتلج لا اضمين عليه شي ..
ديمة:خفت احجيلك لو تروح..رشا لو اجوان
باوع عليه بعدين..لزم راسي..
سيف:هذا شبيه ما يشتغل مثلا اشلون اروحلهن..
لا ضلين بهذا تفكيرج..
رقمج راح اغيرة واني اعرف اصرف وي هاي الارقام
حاليا خلي يمج..اي رقم يراسلج احظري..
ديمة:اني خايفة عليك خاف اصير شي لو ياذوني اني..
سيف:لا تخافين ما طول اني يمج كوني مطمئنه هسة يلا تعالي نرجع اتاخرنا..
لزم ايدي وكمت واني اكوله بعد لا اجيبني اهنا وبيعها...هو بس يهز برأسه...
مرت الايام واني سيف نفس الوضع صحيح نتعارك بس نرجع بنفس الساعة ما اتحمل يبقى زعلان عليه ولا هو...
اجت امتحانات نصف السنه...واني حتى موبايل قفلته كلت لسيف وكال اقفلي اهم شي دراستج
بس شوي بليل اخابره لان اذا ما اسمع صوته احس ناقصني شي ..خلصت الامتحانات واني زينه بكل المواد واجت عطلة نصف السنة....
وتستمر الحكاية......
__^__^__^__^__^__^__^__^_^_^
هلاو متابعيني اسفة ع عدم نشر جان مكطوع النت وهسة جددنه🤗🤗
