*انثئ في معتقل الحب*
بقلم(zainab )عطر الورد
............. ............. ................. .........
لأن كلــــش احـبهم خاين يـكَولون
ولأن طــيـب يــــسموني انــــاني
راح الــغي عشكَهم لأن مامــجبور
اخلص عمري كله مكَابل احــزاني
مـــو آني اليذلهة الروح للأشــواكَـ ..
... غلـــطانين انــــتم والله مـــو آنــي
يمكن سم اجرعة يجوز اشرب نار ..
.
بس للذل طـعم ما ظايكَة لساني ...
ما اقبل خطــية الناس عني تكَول
بــــس الناس خلي تكَول وحداني
(منقول)
............. ............. ........... .....
البارت ٢٣
مساء الخير....😍
(تصويت::تفاعل)
.........ديمة ....
ضليت افكر منو اله مصلحة يخرب علاقتي بسيف ..
حتى لو رغد شنو مصلحتها..زين منو نرجس بس هي ما موجودة بقسم يا ربي راح اتخبل ليش بس اني يصير وياي هيج احس حرارة تطلع من وجهي
الافكار موتتني ما الي طاقة لأي شي كل بالي يم
سيف زين هو ليش صدكهم ما يعرفني اني شنوو
مو اني تربيه ايدة مثل ما يكول ليش ما سمع مني وخلاني ادافع عن نفسي معقولة هيج ما عنده ثقة بيه ومن اول شي أتخلى عني اني ما ماكله من الصبح ضغطي احسة نزل اذكرت من جابلي كباب
واشلون مهتم بيه نزلت دمعتي ..راسلت حنين لان
هي الوحيدة هسة تعرف كل شي كتبت الها..
حنين اني راح ابتعد عن سيف بعد لان هو ما وثق بيه وانتي تعرفيني شنو بعد ماكو داعي ابرر واني ادري هاي لعبه وراح اكشفها لان مستحيل ادز صوري لولد ..
شوي ورجعت حنين..رسلتلي
حنين حبيتي اعرفج هو الخسرج طز بيه ما يستاهلج بس انتي لازم تعرفين منو دايواصله وهيج مسوي حتى فربكة للصور...
خليت الموبايل ع الميز رحت اقرا لان سنه صعبه ما يفيدني غير شي بس دراستي..حسيت روحي ما مرتاحة رحت سبحت بلكي ارتاح...واكلت لان ما اريد ضغطي ينزل ..رحت رجعت لغرفة ما لكيت ولا وحدة لان كلها بعدها ع السفرة وسوالف وضحك اني رجعت شفت موبايلي مو نفس المكان الخليته بيه اكيد واحد شايلة من مكانه اتاكدت وحدة من البنات داسوي بيه هيج بس منو اتمددت فتحت الموبايل ما لكيت بيه شي خليته جوة المخدة لان بعد ما اكدر اخلي بعد هيج لازم اخذ حذري ...غفيت شوي واحس جهازي يهتز فتحت عيوني سحبته من جوة المخدة ..اشوف حنين تتصل الساعة ب١ بليل فزيت
خفت صاير شي فتحت عليها خط..
ديمة:الووو حنين
حنين:ليش هيج ديمة اسوين بيه تعرفين سامر يحب سيف واني حجيت وياج بيناتتنه الموضوع وكليتلج
ما يستاهلج ليش توصلين كل الحجيناه لسامر
اني تخبلت شنو هاي شيصير وياي
ديمة:حنين والله ما مواصله شي اصلا سامر حتى ما محاجيته ..
حنين:لعد منو ديمة اني همين بديت اشك ..
ديمة:معقولة اشكين بيه اني اختج سدت الخط بوجهي ...
احس روحي انهاريت ما ضل عقل براسي البنات نصهن ما نايمات لان يسهرن بليل يبقن ...ملن من يمي من كد ما ابجي بهاي الفترة رحت لحمام محد بيه موجود سديت الباب عليه واني اهنا انهاريت بجي حتى حنين ما اصدكني المن اشتكي ضليت ابجي واني اذكر كلام سيف من ايكلي بعد ما اريدج واكرهج كلشي اذكرت احس روحي ضايعة بعدين عيوني كامن يوجعني من البجي طلعت كلها تقريبا نايمه رحت فتحت الباب البنات نايمات نمت من التعب...كعدت الصبح اشوف عيوني منتفخات وهالات سود جواهن..ما الي خلك اخلي مكياج..
بدلت واني واهس ما عندي رحت لدوام جان عندنه امتحان امتحنت وطلعت لان ما اخذونه محاظرات صرت كلش انطوائية ع نفسي حتى بنات بقسم كمت ما اختلط بيهن بدوام همين كل اتكولي متغيرة اكوللهم ضروف..وحتى بقسم اكولاهن ضروف عائيلية صار الحمام هو الوحيد يطلعني من حزني صرت ما ابجي كدام احد اروح لحمامات وابجي..
مرة كاعدة مخنوكة ورحت لحمامات جنت مخليه راسي بين رجليه وابجي احس يمي واحد واكف ..
شلت راسي محد خفت بسرعة طلعت واني مرعوبه
لان حسيت شخص واكف ع راسي نمت واني اقرا ايات ..لان صارت عندي مثل الخنكة كوة اتنفس..
ثاني يوم داومت جان عندنه محاظرة ارشاد تربوي وهو يسولف ع العلاقات والشباب واشلون يضحكون ع البنات اني اذكرت سيف هو ما ضحك عليه بلعكس
حتى من اعترفتله هو ما استغلني أوف صايرة بكلشي اذكر سيف لو بس اعرف منو سوت بيه هيج حتى لو سيف ما يرجعلي بس اني اريد اخلص من هذا الهم لان هسة اني بنظرهم خاينة..دمعتي نزلت
بدون ما احس ع روحي شكد ما احاول ابين قوية تخذلني دمعتي بسرعة مسحتها شفت الاستاذ ..
يباوع عليه هو دكتور كلش جبير خلص المحاظرة
سمعته يكول ..
ديمة تعالي وراية لغرفة ..
الصراحة اني خفت مسوية شي ويريد يحاسبني..
هو طلع اني شوي اخذت جنطتي وطلعت ..
رحت وصلت لغرفة واني ارجف دكيت الباب ..
هو كال ادخل...
دخلت لكيته كاعد ع الكرسي وكدامة ميز..
الدكتور:تعالي بنتي ديمة اكعدي ..
اني كعدت مقابيلة ع الكرسي..
الدكتور:ديمة اني صالي فترة ملاحظج حالتج مو مثل قبل واشوافج منعزلة وجهج ذابل ابين عليج الحزن واليوم لاحظتج تبجين بمحاظرة احجيلي صايلج شي اكو واحد مضوجج احسبيني مثل ابوج
واحجيلي...
اني كاعدة وافرك بايدي هذا الاستاذ كلش احبه واحد
من يشوف اسلوبه كلش يرتاح هو عمرة يطلع بنهاية الاربعين..ما اعرف شحجيله هو اني نفسي ما اعرف شيصير وياي ..
ما كليتله شي بس ضروف عائيلية..هو أتفهم موقفي
وبدئ ينصحني الصراحة ارتاحيت شوي من حجه وياي لو اكدر جان حجيتله كلشي بس ما اكدر خليت
وطلعت ..
رجعت لقسم لكيت البنات مسويات غدة اكلت وياهن غسلت امواعين لان جان عليه الدور ..رحت نمت لعصر كعدت بديت اقرا وجان عندي امتحان ما خلصته الا ب١١ بليل ما عندي مجال اسبح دخلت سبحت واني ادندل بحمام طفت الكهرباء عادي اني عندي ما اخاف من الظلمة بعكس احبها ضليت مستمرة بسبح جوة الدوش احس شي يم اذني خفت لا حشرة لو شي ماكو بعدين احس واحد يهمس باذني وحرارة تضرب ع خدي جفلت بمكاني كلبي صار يدك سريع كنت اتخيل شغلات مو حقيقة اشتغلت الكهرباء واني حتى ما كملت سبح لبست ملابسي وطلعت مرعوبه لان حسيت بيه مو تخيل
لا حسيته حقيقه كعدت امشط بشعري واني افكر .
هاي شيصير وياي حتى احلامي صايرة موزينه مرة تحملت مرة لابسة عباية وجان وجها كلش يخوف ..
اجت عليه وخنكتني واني اريد انطق ماكو احلامي
صايرة عبارة عن كوابيس..خليت الهتفون باذني وجنت منزلة ايات قرانية سمعتهن شوي ارتاحيت
كعدت الصبح بدلت رحت لدوام لكيت لافته كاتبين بيها يم الاستعلامات..
الغناء والبكاء في الحمامات مكروه يسبب المس للبشر ..
اذكرت اني اشلون بايام الاخيرة جنت ابجي بحمامات رحت امتحنت واني بالي مو يم الامتحان.
خلص الدوام ورجعت..
ثاني يوم صادف يوم خميس حظرت نفسي ما خليت مكياج لان ردت اروح ازور الإمام علي خليت البنات يطلعن رحت طلعت وراهن شفت محد موجودة من الاعرفهن رحت طلعت أجرت سيارة وكليتله اريد للنجف ..وصلني السايق ..انطيته كروه ونزلت جنت جايبة وياي عباية بعلاكة مخليتها طلعتها ولبست..وصلت لحظرة الإمام واني ادموعي اصب احس روحي ضعيفة بديت ابجي وادعي ربي يكشف الحقيقة وصوري ما اريد ينشروهن وحتى هذا الوسواس يروح مني صليت ركعتين ضليت ادعي حسيت براحة نفسية شفت بعد وكت بس لازم ارجع كلشي يصير خاف اتاخر..طلعت من الإمام واني عيوني مورمة بس الهم كله خليته اهناك ادور ع سيارة توصلني لاقسام شفت مرية كلش جبيرة وبيدها عكازة نزلت من السيارة ..وحدها تمشي
رحت عليها لان شفتها مثل المتيهة...
ديمة:خالة اساعدج بشي ...
خالة بس نسيت الطريج منين تيهت
ديمة:خالة انتي منين من النجف..
لا خالة اني من السماوة..
اتعجبت مرة جبيرة وحدها جاية..سالتها
خالة ليش وحدج محد وياج..
والله يمة ولدي كلمن حاير بنفسة واني طاك كلبي ع الإمام واجيت ازورة ..
كسرت كلبي رحت وياها كلتها اني ازورج شفتها فرحت .. وصلتها للحظرة وهي ضلت ازور وتدعي
كلتها خالة ادعيلي وياج...طايحة بمشكلة
هي كالت ..ربي يريح كلبج ويفرج همج ويحفظج..
بقت شوي بعدين كالت وصليني خالة لكراج السيارات اني كلتها الا تتريكين هي كالت لا أريد ارجع من وكت ..بس اني جبرتها تاكل ما اكلت بس شورية بعدين ضلت تشكرني وتدعيلي صعدتها بسيارة لسماوة واني اخذتلي ..سيارة لقسم ورجعت..
لكيت البنات بعدهن ما رجعات..حظرت غراضي لان يوم انزل لبيت اجن البنات وهنه يسألني..اليوم ما شفناج ما مجاوبتهن اجه الخط ..
رحت صعدت وصلت لبيت واني تعبانه ..رحت سلمت ع ماما وهي تكلي صايرة ضعفانه ..مسويتلي جانت دجاج شوي كلتها بس اسبح وارتاح رحت صعدت لغرفتي خليت ملابسي طلعتلي تراك دخلت لحمام كملت ..نزلت جوة ومنتظر جاي رحت سلمت عليه
ضلينه كاعدين وماما تسألني ع الدوام اني اجاوبها مختصر وكلساعه اتكولي ديمة ما عاجبتني بعدين
كالت حنين يم بيت جدج شعجب ما كالتلج اني بسرعة طفرت كلتها اريد اروح لبيت جدو..
ضليت بتراك لبست عباية..اخذت صوفي وياي
ورحت بسرعة دخلت لكيت خالتي كاعدة سلمت عليها ..سالتها ع حنين كالت بغرفتها رحت اركض
دخلت شفتها تلعب بنتها سلمت عليها هي ردت عليه
بس وجها ثكيل ..سديت الباب واني رحت كعدت كدامها بس ليمار وضليت لازمة ايديها جانت اديها زغيرونه واني احب الجهال...رفعت راسي ...
ديمة:حنين والله ما وصله حجي لسامر بيش تريديني احلف بقران جبت القرآن وحلفتها..
حنين:ديمة اني مصدكتج ما مسوية شي بس جانت ساعة عصبيه..واني اسفه مفروض ما اصدك لان اعرفج..
رحت حظنتها...ضلينه نسولف ونضحك مثل قبل..
بعدين سالتها ع سيف ..كالت
سيف وي ابوه مريض وهسة كلش متخربط احتمال باجر يرجع ..ضل بالي يمه ع الرغم السواه بيه ..
بعدين حنين كالت راح اروح لان سامر ما يخليني ابات ودعتها ورجعت ...
تعبانه كلش لان من اجيت ما نمت كلتهم لا تكعدوني للعشة نمت من التعب ..
ثاني يوم كعدت الساعة ب٩ كلت خليني اشوف سيف راجع ..اتصلت عليه فرحت لان يدك بعدين انطاني مشغول رجعت ادك عليه طلع مخليني..
بقائمة الرفض ...انقهرت حيل ليش يسوي بيه هيج
حسيت روحي انكسرت ما اكدر انساه مستحيل
نزلت لان اذا ابقى بغرفة ما اعرف شسوي لكيت ماما تقري بصوفي شافتني..
سمية:ليش يمه هيج وجهج اصفر وجوة عيونج صاير سواد ..
ديمة:يوم كرهت الدوام..ما اكدر اكمل بقسم وبعيدة عنكم..
سمية:يايمة هذا مستقبلج وهي ما باقي بس سنتين
وتخلص اصير سوالف ...
ديمة:ماما احس مخنوكة ما اعرف شبيه ..
سمية:تعالي ماما يمي ..
رحت يمها نمت ع رجليها ..ضلت تمسح ع راسي وتقرأ ايات صوفي غار وكلساعة يدفعني واني من كل عقلي اتعارك وياه...
سمية:اليوم اكول لمنتظر اخلي يطلعلنه..
وصدك بليل طلعنه واتونسه ورحنا لمطعم غيرت جوء...
ثاني يوم حظرت غراضي ونزلت لقسم ...
بس وصلت خليت جنطتي بلوكر وطلعت لحديقة
لان ما اتحمل الغرفة صرت..كعدت جوء شجرة وبيدي عودة ارسم بيها ع الكاع لان ملل واني ما اختلط صايرة بلبنات ابتعدت صرت ما اثق اي وحدة
شفت رغد اجت عليه ..لزمت ايدي
رغد:ليش هيج ديمة وحدج تدرين انتي صايرة حديث البنات بقسم ..ديمة سيف صدكيني ما يستاهل كل هاي ادموعج..
باوعت عليها بحقد لان اني شاكة بيها هي التسوي
بيه هيج..
ديمة:رغد انتي معليج بيه انتي السبب اني بيه هسة انتي تتواصلين وي سيف
رغد:انتي منين اجيبن هذا الحجي اني سيف لا أعرفه ولا شي منين اتواصل وياه وشعندي اسوي هيج شي ..حتى مصلحة ما عندي معقولة اشكين
بيه ..
باوعت عليها ..
رغد اني احبج والله وما عندي غيرج احسج متغيرة ومبتعدة عني ..
بعدت اديها عني نزلت راسها ...حجت بصوت هامس
رغد:ديمة اني خنتج..
فتحت عيني اريد اعرف بشنو خانتني واني لازمة كلبي ..خاف الافكر بيه صحيح..
احجي رغد اشلون خنتيني..
رغد:والله مو بيدي..غصبا عليه ..
ديمة:جريت نفس احجي رغد شكوو وبيمن خنتيني
كامت وعافتني اني لحكتها جريتها من اديها ..
ديمة:رغد ما اخليج تروحين اذا ما تحجيلي ..
رغد:اكولج بشرط بس تنطيني وعد ما تفضحيني
بجامعة..
ديمة:اتنهدت اوعدج بس كولي ..
رغد:اني واحمد ع علاقة واحد يحب الخ ..
اني مو بيدي اتعلقت بيه ..
بقيت صافنه صحيح اني رفضت احمد وماجان عندي وياه علاقة بس ما اتوقعته يحب أقرب صديقة عليه
اشلون كدرت توصله ويمته حبته ..سمعتها اتكول
رغد:ديمة لا اصيرين انانية..واني وياه كلش متعلقين
بعض وانشاء الله راح يخطبني..
باوعت عليها حظنتها ..لان رغد حبابة تستاهل واحمد همين خوش ولد ..
تستاهلين حبيتي صدكيني ما ضايجة منج ..
اتمنالج الخير ربي يوفقكم يجمعكم سوة..
رغد:ويهدي سيف عليج..
ديمة:لا سيف بالنسبة إليه انتهى بس الاريدة اعرف منو ماخذ صوري اخاف ينشروهن والله اهلي يموتوني..
ضلت تهدى بيه ..
رغد؛ديمة اني وياج وما راح اتركج والله واسفه ع الصار اني ابتعدت عنج لان خفت اسويلي مشكلة
وخفت منج تحجين كدام البنات..
ديمة:شنو ما تعرفيني ترة اني حتى جنت ما معجبه
بأحمد ما حبيته حتى هو جان ايجوز يعطف عليه..
رغد:ديمة لا اضلين بهذا وضعج اريدج قوية لان كلها
تحجي هسة وايكولون شبيها..
سكتت..رجعنا..لغرفة وانسولف ..وشوي نفسيتي ارتاحت لان اصالحت اوياها ..
ضلت تحجيلي ع احمد واشلون حصلت رقمة..
رغد:بيوم النتائج شفته هو واخوه واجه سلم عليه
وسالني عليج وبعدين طلب الرقم علمود يعرف اخبارج كليتله مو رفضت كال اي قطعت بعد الامل منها وما وكفت وياي اخذ رقمي وكام بين فترة وفترة يتصل بدئ يحجيلي عن حياته واحد اتعلق
بثاني واعترفلي يحبني ..وهسة اتفقنه نزوج ع المرحلة الثالثة..
ديمة"الله يسهلكم يلا تعالي نسوي عشة..
كمت اني وياه اسوي عشة احجيلها ع سيف جنت محتاجة واحد يسمعني..اتعشينه وحدنه..
اكلت لان فرحانه برجعة رغد ..
شفت ماما ادك عليه..فتحت خط..
ديمة:هلاو ماما اشلونج شو بسرعة اشتاقيتلي..
سمية:لعد اشلون ما اشتاقلج غير انتي اميرتي..
بس هسة دكيت عليج لان عم سامر اتوفى..
ديمة:صددك ماما منين سمعتي الخبر ..
سمية:هسة خابرتني حنين وكالتلي..
ديمة:ماما اني باجر انزل علمود حنين عيب ..
سديتها منها واني بالي يم سيف اعرف بيه متعلق
بابوه هسة اشلونها حالته..
رغد:منو المات..
ديمة:ابو سيف ..
رغد:يا خطية..الله يرحمة..
ثاني يوم نزلت ..اتصل ع حنين ما ترد اكييد مشغولة
سبحت لبست بدي لركبة اسود وبنطرون وشال
صعدنه بسيارة منتظر وصلنه واني خايفة من جهة سيف ما شايفته اخر مرة بيت حنين ومن جهة خايفة من عمتهم خاف تذكر موقف الصار بيت سامر
وصلنه ولكينه زلم وجوادر وسيارات كلها مكلوبه
كوة صار مجال ودخلنه لكينه ملاية تقرا ونسوان كلها
تبجي هواي نسوان امي سلمت عليهن وصلت لعمتهم
سلمت اني سلمت عليها اشو من ورا خشمها سلمت شفت اخت سيف منهارة..وتبجي فقد الاب صعب اني صحيح ابوية عايش بس ما احس بيه رحت حظنتها واخذت من خاطرها ..شفت حنين توزع مي وملتهيه
رحت يمها واساعدها بعدين دخلنه لمطبخ إنجيب
جاي شفت رشا انصدمت..
ديمة:ليش رشا اهنا هم مو مزاعلين..
حنين:لا اجت هي وامها ..بس زلم ما اجوه بعدهم ما يحجون ..
شفتها هي وعمت سيف وهي اتكول لرشا..
بس تطلع الاربعين نرجعج انتي وسيف ..
اني احس الدخان يطلع من وجهي وهاي اشوفها ع تستحي لو بيدي اكظ عمته واموتها ...
بقت تباوعلي واسمعني حجي اني كوة لازمة روحي
خاف اجفص وياها واصير عركة وهمين وياهن
بنات عم سيف ..
حنين شاورتني:امشينة نصعد ذني دائما هيج مو بس وياج...
اني باوعتلهن من فوك ليجوة رفعت حاجبي ورحت...
ديمة:سيف هسة اشلونه..
حنين:خطية كلش مقهور لان هو هسة اجه من الخارج وكالو حالته زينه انصدم بوفاة ابوة الله يصبرة..
ديمة:انقهرت عليه اتمنيت لو اني يمه واخفف عنه حزنه بس لاسف هو بعدني عنه..
كلساعة اروح لماما اكولها خلينه نرجع ضجت من الوضع والحجي وعمتهم كلساعة ابسمرتني ما اعرف هاي المرة شبيها اليكول ماخذة رجلها ..ماما اتكول عيب بقينه ليل خابرنه منتظر يرجعنه..
طلعنة..لكيت منتظر واكف يم سيف يسلم عليه
شفته اني ووضعي كله ارتخربط جان لابس دشداشة
سودة ولحيته ومبين عليه التعب..كلش كلبي كام يدك سريع ..منتظر كال يلا تعالو هو التفت عليه..
وتستمر الحكاية...
__________^^________^^___________
