زوجي المغرور (منقوله )

الحلقات الاخيره

اللهم اغفرلي ولوالدي ولجميع المؤمنين الاحياء منهم والميتين الى يوم الدين ياأرحم الراحمين ...
اليوم الحلقات الاخيرة
زوجي مغرور 108
وعدتني وخلفت الوعد.. أو أنا نحسابك خلفت الوعد..
مسحت دمعتي بطرف كمي وكملت ونا نحسش بروحي: تذكر لما كنا ف البيضاء ..أول يوم ف رمضان ..تذكر لما بكيت.. أنا بكيتش عشان قالت موديلي قديم.. أنا بكيت عشان قالت عليك كنت تغازل ف الممرضات.. وﻷنك تو ترد لسوابقك بعد شهور.. يومها دافعت عليك لكن زرعت  في داخلي الشك.. ليش ماقلت لي ع مساعدتك لصاحبك ؟
شنو كنت توقع رد فعلي ونا نحصل خمر ومسجل فيه إعترافاتك.. وربي كنت ناويه نحرقك وبعدها نقطعك..
ماإقدرت نواجهك.. أحسن حل كان نهرب.. وبقلبي حسره.
إرتجف جسمي ونا نتوسل : خاف ربك فيه.. أغلى مانملك خاتمك وساعتك.. شنطك كل ليله نسهر ونرتبها.. أنا نتعذب وانت متهني.. صورك أطرافها هريتها من كثر لمسها ونسألها صاحبك ليش خان.. قعدت نحب ريحة الدخان م حبي لك.. نفز لو طروا إسمك.. دهورت حالي.. وسلبت عقلي.. وحرقت قلبي.. حرقته دون لاتدري ولا تحس.. وشنو ذنبي إني نحبك.. ماكان قصدي نجرحك.. نجرح روحي ولا نجرحك..
كررتها ونا نعترف لروحي قبل نعترف له.. ومسحت دمعتي : أنا نحبك.. بس إنت تعرفش تحب..
تحرك ببطء خذى إيدي اليمين المحروقه باطنها.. وحطها فوق صدره م جهة اليسار..فوق مكان جرحته بالموس هذك اليوم.. كان قلبه يدق بعنف.. ماتكلم ولا رفع راسه ليه.. جذبته لحضني ونا نشده.. ف ثواني هو شدني ويبكي.. ألمني لين ظنيت كسر ضلوعي.. لكن ماشكيت له..
تكلم بحزن وآهه : هضا يوسف.. يوسف يافاديه.. إنزله بقبره كيف ؟ سيارتي شكلها قطعاته.. الدم ف كل مكان..
قلت بثقه رغم إسم يوسف إستدعى صورة ليلى : هو يبيكش تبكي..كان بتدير معروف أوقف بعزاه.. ونزله بقبره.. واذكره بالخير..
رفع راسه وقال بألم : مانقدر..
وقفت وسحبته م إيده : لو هو حي كيف كان يكون تصرفه ..
خش للحمام..كانش يحس بروحه.. أنا غيرت لبسي ومسحت مكياجي.. طلع وغير لبسه ..ولبس عمامه ولف وجهه قعد مخفي وجهه تكلم لما لاحظني نلبس عبايتي : وين ؟
تكلمت ونا نحاول نمسك دموعي : أنا نعرف إمرته.. ليلى لازم نوقف معاها..
ركبنا ف السياره ..سألته : كيف صار الحادث ؟
همس بهزوه مريره : كان المفروض نكون أنا.. أنا المقصود واحد بيني وبينه مشكله سبب ف الحادث.. يعرف سيارتي ..وسيارتي كانت مع يوسف..
قطعته بحسم : قدر الله وماشاء فعل.. الله يرحمه.. إنت تعرف الراجل الثاني ليش حاقد عليك ؟
خذا نفس وجاوب : إسمه عصام..قبل سنه صارت بيني وبينه مشكله.. ومن دون قصد سببت له بشلل ف صوابعه ..
غمضت عيوني ونا نحاول نتذكر من هو عصام.. تذكرت الراجل اللي يشبه للقنفود.. واللي دق الباب ف غياب ياسر.. اللي هو لايهم..
وصلنا المستشفى اللي وصفه من أسعف يوسف ..كان مليان بالشباب ورجاله.. رافقني ياسر لين وصلنا لليلى وتوجه وحده للثلاجه.. نعم ..ثلاجة الموتى.. بنبقى معه للنهايه ..حتى لو كان مغرور ومتكبر وقح.. عنديش صبر نتركه ..
_____
ياسر..
خشيت نجر ف روحي سألت ع المتوفيين ..كان بالحادث اربع أشخاص كل إثنين ف سياره..شخص توفى وواحد حالته حرجه..واثنين تحت العلاج..
طلبت نشوف الإمرضى قبل مرات يكون يوسف واحد منهم ..كان ماهر ولد خالت يوسف حالته حرجه وف العنايه المركزه..والاخر عصام..وسوست لي نفسي بقتله لكن أجلت إنتقامي لين يوعى ونتأكد من وفاة يوسف..
خشيت لدار بارده ونا قريب نرجع..فيها الجثث قبل يحطوها ف الثلاجه.. كان الدليل الوحيد ع وفاة يوسف حتى اﻵن هو تليفونه وبطاقته الشخصيه..
سمعت روحي نسأل الدكتور اللي جا معايه للكشف ع الجثه : يشبهلي..
قال بطريقه عمليه : بص حضرتك.. الحادث كان مباشر ع الباب بتاعه.. فيه عدة كدمات بوجهه.. طمست ملامحه.. لكن إنت حاول تتعرف عليه بأي علامه..
حسيت بيد تعصر قلبي.. طمست ملامحك يايوسف..
شكل الراجل اللي تحت الغطا أقصر م يوسف.. ولا هك وهمت لي عيني لتثبت إنه مش يوسف..
فتحت الغطاء بان الوجه فيه كل تدريجات اﻷحمر والبنفسجي واﻷزرق.. من كدمات وكسور.. مطموس الملامح.. مش أول مره نشوف فيها جثه هامده.. لكن الوضع مختلف.. هذي جثة يوسف.. رفيق العمر.. طلعت بسرعه برى الدار ..نتنفس ونبكي..
تذكرت حاجه الحاجب اليسار للجثه.. خشيت رفعت الغطاء م جديد.. كان يغطي جهة اليسار كدمه.. مافش أي أثر ﻷربع غرز.. طلعت م الدار وسجدت سجود شكر لله..
_______
يوسف..
كانت سيارة ياسر الجديده فيها مشكله.. كان يشكي لي صبح اليوم : بناخذ السياره للورشه ..اليوم كنت مشغول ومستحق لها.. وصلت مرتي للجامعه وبكرة نبيها..
قلت بسرعه : إنت خود سيارتي ونا ناخذ سيارتك للورش
قاطعني : لا مايصير..
حسمت اﻷمر : هاك المفاتيح..
خذيت سيارته ورنت خالتي ..كانت تبكي..مافهمت شيء مشيت بسرعه خشيت لحوش خالتي البيبان مفتوحه ف الصالون خالتي واقفه جنب الباب وهي تبكي.. جوا الصالون ماهر واقف قدام والده ويمسك بمقدمة سوريته كان راجل خالتي بتخلص منه ولما شافني قال كأنه يستنجد :يوسف..
بلا شعور تحركت دفيت ماهر م باته بعيد..قوتي البدنيه أكبر م قوته..ماهر شكله مش واعي يتعاطى.. مسكته..
زوجي مغرور 109
لا شعور تحركت دفيت ماهر من باته بعيد..قوتي البدنيه أكبر م قوته..ماهر شكله مش واعي يتعاطى.. مسكته وسحبته للحمام وحطيته تحت الدوش وفتحت الميه فوق راسه..كل مايحاول يطلع نرده.. لين بدى يوعى.. طلعت وطلبت من خالتي دبش له عشان يغير تكلمت وهي تبكي: شفت شنو دار يايوسف ..ضرب خواته ورد ع باته.. يبي فلوس.. كان مستعد يقتلنا عشان الفلوس..
قلت لها بصبر : إدعي له بالهدايه..
قالت بضعف وهي تمسح دموعها بطرف محرمتها : الله يهديه ويصلح حاله.. كان قريب يضرب باته.. الله لايوفق من دله ع هالطريق ..
مش محتاج من يدله.. هو كان مروج.. وبغباء قعد يتعاطى.. خليتها تبكي وقمعزت مع راجل خالتي أول مره يتكلم معايه بلطف : تعبناك معانا..
ماإقدرت نرد ..أنا مش متعود الكلام معاه حتى لما كان يطلب مني فلوس كانت خالتي هي الوسيط بيناتنا.. تكلم بعدها بفتره : ياريت ولدي كان بنص عقلك.. ماكانش هضا حاله..
ماكان ف كلامه غضب لكن تحسر وندم.. ضاف بجهد : مانستاهل توقف معانا.. الله يبارك فيك..
رديت بصدق : إنت صاحب معروف فيه..
مارد..حرك راسه برفض وتنفس بضيق..
وقت العصر كلمتني ليلى تستأذن بتمشي لخطبة عزيز وكنت مقمعز ف المربوعه وكنت حابس ماهر معايه وهو توا راقد.. كنت نفكر..خالتي مسألتني حتى ع حالي !! أو وين مرتي.. هل اﻹشاعه حقيقه ولا كذب ع كوني مفلس ..إستدعتني بس نوقف ولدها الهايج والخارج ع السيطره ..
أذن المغرب وقفت نصلي.. وخليت مفاتيح السياره فوق الطاوله.. كملت لقيت ماهر ومفاتيح سيارة ياسر مختفيات ..وتزداني وتليفوني ف السياره..
_________
عماد..
كانت أكبر م كل توقعاتي ..أمس لما تكلمت مع سالم.. سألته ع سبب خلافه مع بشرى فاجأني وهو يتكلم بغموض : اسألها ..
سألته بغضب : وليش ماتقول إنت..
جاوب : إختك تعايرني ببنت عمي ..تقول ع إبتسام ماعندها كرامه.. ﻷنها ردت لك بعد طلقتها.. بنت عمي كيف أختي وأغلى.. طلقتها ورميتها عشان قصه تافهه.. وخليتها مسخره للي يسوى واللي مايسوى.. خل أختك تقول لك حقيقة المشكله بين أمك وإبتسام..وتجرب تفكر بغيرها..
سألته : كيف يعني ؟
قال بهدوء : أنا نحترمك ياعماد.. وكان إنت ماترضى ع هلك فأنا مانرضى ع هلي.. وإبتسام م هلي.. يرضيك أختك تقول عليها ماعندها كرامه ..كان إنت يرضيك أنا مايرضيني..
الجمني فقلت : ماحد إغلط ع هلك.. وإبتسام زوجتي وأم ولدي.. ومانرضى حد يغلط عليها أبدا.. وتفاهمي مع بشرى ..
وقف وهو يقول : بس حبيت بشرى تحس بإحساس إبتسام.. وبكرة نجي ناخذها..
قلت بهدوء : يصير خير..
لكن ماحصل خير أبدا.. كنت نردد بغضب " شغلك عندي يابشرى " مسكت بشرى ف دارها وخبرتني باللي صدمني تماما.. كانت إبتسام مظلومه.. كنت أنا الظالم..
أمس بعد عرفت الحقيقه ..ماإقدرت ندير شيء.. كانت اليوم مقمعزه تذاكر ف الدار.. لما خشيت وقفت وهي تسأل : خاطرك ف قهوه ؟
جاوبت : ياريت..
وقفت تدير القهوه قمعزت تستنى فيها.. كنت بين حلين نتجاهل الموضوع ونتركه بدون نبش.. أو نطلب السماح ونرضي ضميري وندفن الموضوع للأبد..
انتهت من دير القهوه..
وصبت لي فنجال قهوه كنت بنتكلم لكن أجلتها بعدها صبت لي واحد أخر وبعدها واحد اخر..
سألتها : لو حد إغلط عليك تسامحي إبتسام ؟
جاوبت بدون ماتحط عينها ف عيني : ع حسب ..
قلت بهدوء : تعرفي ولد عمك ليش خلى أختي ف حوش هلي ..
رفعت راسها وجاوبت بثقه : نعرفش ولايهمني..
خشيت للموضوع مباشره : إنتي غاليه إبتسام ولك محبه ف قلبي مالها حد.. لكن قبل سنه فار دمي ﻷن ....
قطعتني : أنا ماإغلطت ع حد..
كملت بهدوء :نعرف.. أمس قالت لي بشرى كل اللي صار سكتت ..سألتها : قولي شيء ؟
رفعت راسها وحضرت دموعها مثل كل مره : شنو تبيني نقول.. سامحتك مثلا.. سنه كامله وبقلبي جمره.. حلفت مانرد لك ..لكن ﻷنك شايفني رخيصه هددتني بولدي.. ورديت عشان ولدي بس.. فوفر إعتذارك..
مسكت بكتوفها : متقوليش هك إبتسام.. إنتي غاليه.. سنه ونا نحاول نردك..لكن مانفع.. كنت قريب نقتل ولد عمك سعيد عشان خطبك.. رديتك مع إني ظنيتك إغلطتي ع أمي.. برايك ليش ؟
ماردت وقفت وسيبتني..
كنت نحاول نقنع روحي إن إبتسام طيبه وتو تسلمح قريب ..وكان ماسامحت ..حياتي تبقى ....مشكلتي مانعرف نعبر ع مشاعري ماقلتلها كم نحبها وتوحشتها ف غيابها.. فتحت النت وقعدت انزل ف كلام غزل عشان نرسله لها..
_______
إبتسام..
غبيه غبيه غبيه.. قوي قلبك.. ف المره الجايه مفروض نقول.. بدري.. بعد سنه تعذر.. بس من جد من جد ..واااو يهبل هو وإعتذاره ..كنت قريب نحضنه ونعاتبه..
أنا سامحت م زمان ..قلبي ضعيف ..لو لح أكثر كنت أنا عتذرت له بدل ماهو يعتذر لي.. لكن ضروري نقوي قلبي عشان يعرف زعلي شين.. كنت نمسح دموع حمقاء م الفرح أو م الغضب نعرفش.. مجهولة المصدر..
تمنيت تصالحنا كان كمل هالتمثيل بالضيق مرات نحاول نمسك بسمتي ونحط بدالها تكشيره ..ونحاول نخفي حبي ونظهر بداله كره ونفور ..ونحاول تحويل شوقي لجفاء..كأني ننكر سعادتي بقربه وهي موجوده..
كنت نحاول نشحن روحي بالكراهيه ضده لما...
زوجي مغرور 110
كنت نحاول نشحن روحي بالكراهيه ضده لما وصل لتليفوني مسج وتابعه مسج كل شوي مسج منه هو كله كلام إعتذار ويغازل..
عش إقدرت نوقف ..ونكمل باقي المسجات لأنه دموعي منعتني.. وعماد خش وسأل : ليش تبكي ؟
جاوبته ونا نعزق التليفون : ﻷنك ماتقصد الكلام اللي دزيته ..
قمعز جنبي ومسك إيدي وهو يبوس فيها وتكلم بهدوء : إبتسام.. أنا مانعرف نعبر بشكل عام ..بس أقسم ..إنتي أحلى ماحصل ف حياتي..
قلت بجديه : تقسم !!
ضحك وقال : معدومة الثقه بينا لين تحلفيني.. برتقاله..
قلت ونا نضرب إيده بعيد عليه : وخر.. نحكبش.. ولا نسامحك ..ﻷنك كذاب مش ح تحلف..
إبتسم.. ساخطه ومستبده يعرف هضا ويتسلى به : وحتى أنا مانحبك.. لكن سامحيني..
بعناد رديت ونحاول نمسك بسمتي : كنت بنسامحك.. لكن ﻻ..
كمل الليل ف سامحيني.. ونبيش نسامحك ..
لكن كان يعرف إني سامحته.. أنا قلبي طيب مايحمل حقد ع حد..
_______
ياسر..
كنت بنطلع م المستشفى.. لاحظت وجوه نعرفها هضا هيثم وسليمان وهضا ولد عمي ..وهضا طارق وسمير .. وباتي .. ومجموعة شباب ..
ماظنيت نمر ف حياتي كيف هالموقف.. كان باتي شبه منهار جنبه طارق..
ارتفعت اﻷصوات ولتم الكل ع واحد كان.. يوسف..
شفت باتي يبتسم وهو يشوف يوسف ..ماإقدرت نوقف مكاني وقفت وراه.. مع إني متلثم بالعمامه عرفني.. إلتفت بهدوء ونادى بضعف : ياسر..
شعرت وقتها كم هلكته بتصرفاتي ..احتضنته.. شفت طارق يقرب وحضني وهو يتكلم بصوت مخنوق : حمدلله ع السلامه.. طيحت قلبي ..قريب حضنت صاحبك تقيل الدم..
توجهت ليوسف اللي كان الكل يتحمدله ع السلامه مجموعات كبيره من جميع اﻷعمار.. يوسف كان محبوب ملوا المستشفى محبيه ..رغم كونه انطوائي ..
مسكت به ونا نعاتبه بغضب : وين كنت ومن كان ف السياره..
جاوب بضيق وشوي م الحزن : ماهر خذاها.. وشكله ركب معاه واحد م شلة الفساد.. وهالغبي عصام شبه ع السياره
قلت بصوت هادي : ماهر حالته حرجه وصاحبه توفى..
اكتسى وجهه باﻷلم ..لكن ماهتميت ..فسلامته عندي بالدنيا.. حضنته بقوه ونا نسر له بضعف : تعرف لو صارلك شيء كانت مسئوليتي..
إبتعد عليه وهو مذهول : وليش ياسر ؟ ياهوو إن شاء الله غير مابكيت.. راجل طول بعرض وتبكي..
ماإقدرت إلا همست بغضب ع ملاحظته : أسكت.. مابكيت.. وليش نبكي..
ضحك وحضني من جديد..
_______
ليلى..
وعيت م إغمائي ونا بالمستشفى.. وتذكرت اللي صار .. يوسف توفى.. نور حياتي انطفى.. غمضت عيوني نحاول مانذكر شيء ..سمعت صوته.. قعدت نهلوس..
فتحت عيوني شفته.. يوسف.. أنا نجنيت لين قعدت نشوف ف طيفه ف المستشفى.. أكيد نحلم..
كان عزيز واقف جنبه.. كيف يلتم حلم وكابوس..      همس طيف معشوق قلبي : ليلى.. كيفك حبيبتي
بكيت نعاتبه : مش بخير.. ليش تخليني ؟ ليش تموت ؟ كيف نعيش بدونك..
شفت عيون عزيز قريب تبقط م مكانها ..وجهت كلامي له : اهاا نحبه نموت عليه .. عندك مانع ..
مسك بإيدي يوسف وهو يتكلم بصوته المبحوح : أنا حي ألمسيني ..الخبر خطأ بطاقتي كانن ف السياره وقت الحادث.. اعتقدوا إنها تخص واحد م المصابين..
خشت أمي وعبدالله وتسأل ع حالي ..جتني نوبة بكاء.. ماإقدرت نوقف رغم حاولت نمسك روحي..
طلعت أمي وعبدالله وعزيز بعد سمعتها تهمس ليوسف بترفع : مندري شنو درت ف بنتي.. لكن خوذها معاك..
سألته ببكاء : عليش تدير فيه هك..
جاوب وهو يبوس جبهتي بحنان : مش بيدي.. بس خيره إبتسم ووضح : أمك خلتك تردي لي.. وهك نحلت مشكلتنا..
ضحك بتشفي : وخربنا خطبة عزيز..
ضحكت مرغمه بعدها تذكرت الموقف الاخير عند العرب : فضيحه.. درت عياط.. سيرتي ع كل لسان..
قال بهزوه : صدقتي.. اليوم ونا ماشي سمعت مراتين يقولن هضا راجل ليلى.. قعدتي معروفه.. بس شنو درتي بالزبط خليتي عمتي تردك ليه..
ابتسمت..بعدها كشرت..
خذا الموضوع سخريه وهو الموضوع جدي.. سأل : كنك قلبتي وجهك ؟
صارحته : تعرف وين المشكله.. أنا نحبك أكثر ماتحبني..
مسك بوجهي بقوه وفتح عيونه لاقصى حد وتكلم بغضب : من قال !! أنا نحبك أكثر ونا اللي نموت ع ترابك
قعد جدي فجأه ونا فرحانه فجأه : المهم تحبني..
كان مازال غاضب : اها نحبك.. بس معاد نسمع هالكلام.. أنا ماعندي حد ف الدنيا يهمني ونحبه أكثر م روحي إلا إنتي..
لكن مازلت مقتنعه أنا نحبه أكثر..
__________
طارق..
روحت للفندق ..تاعب ..مستنزف..
كانت مقمعزه قدام اللاب ..ماسألت وين كنت وليش تأخرت..
غيرت دبشي وتمددت ع السرير سمعت صوتها يكرر نفس النبره :  طارق.. طارق.. طارق.. طارق.. طارق.. طارق.. طارق.. طارق.. طارق ..طارق.. طارق.. طارق.. طارق..طارق..
همست بألم بدت تظهر أعراض الصداع النصفي : خير أماني..
قالت بصوت لعوب : طلقني ..
سألتها وبعد هالكلمه قعد طنين ف راسي : عليش ؟
جاوبت وهي تفكر : إنت تزوجتني عشان أملاك فيصل صح..
همست : لا.. تزوجتك عشان ربي كتب لنا نتزوج ..ممكن تخليني نرقد توا..
هزت راسها رافضه : أسمع طارق إنت شفت بروحك أنا إنسانه معقده ينفعش نكون زوجه..
انهيت الحوار بحسم : لا أماني مافي طلاق.. كان إنتي معقده فاأنا
يزوجي مغرور 111
انهيت الحوار بحسم : لا أماني مافي طلاق.. كان إنتي معقده فاأنا أكبر معقد..
تكلمت بغضب : نعرف شنو تبي..أملاك فيصل.. صح فيصل وصاني ماتطيح ف إيدك ..لكن أنا مستعده نتنازل لك عليها ..لكن طلقني..
نفذ صبري فتكلمت بغضب : عليش طالبه الطلاق !! عشان  معاملتي لك قبل نتزوج أو ﻷني هددتك بالدين ..حطي روحك مكاني.. خوك مريض نفسيا بشع كبير فالسن تزر طفله م جامع وحول أملاكه باسمها.. وهي حتى قبل يموت تعرض ف أملاكه للبيع ..وكانت قريب توافق ع زواج بالسر..
قالت بغضب : بنتنازل لك ع كل شيء..
مسكت إيدها ورميتها ع السرير : أنا مستعد نعطيك ضعف ماعطاك فيصل.. لكن ارقدي واسكتي.. وماتفكري بالطلاق..
ورقدت..
نضت مش مصدق ..ع صوتها وهي تنادي بهمس : طارق.. طارق..
فتحت عيوني ..وحده لابسه قونه قصيره وبلوزه ناعمه وكعب دبوس.. إبتسمت وهي تشبه أماني نوعا ما.. سألتها بعد صليت وإفطرت : كأني حلمت أمس طلبتي الطلاق..
إبتسمت بعذوبه واعترفت : يس..
سألتها وزادت حيرتي : غيرتي رايك ؟
قالت بضحكه : لا..
إحترت أكثر فسألتها : يعني مازال مصممه ع الطلاق !!
إبتسمت ووضحت بشقاوه : كنت نخبر فيك.. يعني كنت بنعرف صادق ولا كاذب..
سألتها بسخريه : وجهاز كشف الكذب الخاص عندك بين كذبي ولا صدقي ؟
قالت بتفكير : أغلب الظن صادق.. يعني لو إنت كذاب ونذل كان لما عرضت عليك أملاك فيصل وافقت..
حركات البنت مش هينه إختبارات صار.. سألتها : ولو إخترت تنازلي لي ع أملاك فيصل ؟
قالت وهي تكلم بقوه : ف الحلم نتنازل لك ع قرش واحد
كنت ح نسيبك ونرفع عليك قضية خلع.. أنا صح تزوجتك وعارفه تكرهني ..لكن إنت غيرت الوضع.. فحبيت نتأكد قبل نعطيك شيء ماعطيته لغيرك..
سكتت.. وهمست بإبتسامه هاديه وخجل : نقصد قلبي..
طفله ياأماني.. قلت بصدق : قدامنا العمر كله عشان نثبت لك حبي.. بس تربحي أجلي إختباراتك المره الجايه حتى ينتهي الصداع..
فعلا مانعرف اللي يشدني لهالكائن الضئيل ..
________
فاديه..
كان خبر وفاة صديقه خطأ.. روحنا والنفسيه تمام.. قمعزنا ف الشقه.. هو ف وسط الكنبه وانا ف طرفها.. أنا متقربت منه ولاهو..
كنت نتمنى نتحرك نغير لبسي ونتزين.. لكن ماإقدرت.. همس بصوت هادي : أنا نصلي.. وماشربت من بعد ما صورتيني.. كان اشتهيت نشرب نفتح مقطع الفيديو ونشوفه تنتهي رغبتي بالشرب.. ولا لمست غيرك.. ليه سنه وشهرين مالمست غيرك..
سألته بفضول : حتى زينه..
التفت وجاوب بصراحه : حتى زينه..
بغيره : قبل يومين جيت ف طرف سوريك روج..
جاوب بتروي وهو يحاول يتذكر : اين يوم.. او صح زينه اتصلت بيه وقابلتها..و..بس..
قطعته ونا نحاول نطمر غيرتي : خلاص مش مهم..
سأل بإسلوب غريب ..فيه حنان وارتباك : انتي تعبانه.. الصبح كان عندك إمتحان.. ونايضه بدري..وأكيد جيعانه نطلع نجيب عشا..
مسكت إيده ..وبرقه : تطلعش مش جيعانه ولا تعبانه..
قمعز مرتبك والسبب مجهول.. طلع باكو الدخان وحط وحده ف فمه واشعلها ..بعدها فطن طفاها..همست : عادي دخن..
رفض وعلق بمزح : حبيتي ريحة الدخان بسببي .. نخاف تدخني بعدين بسببي..
ابتسمت.. لكن مش ياسر كان ماضايقني.. كمل بوقاحه : ويمكن تكوني حامل ..والدخان مش صحي لصحة البيبي
كملنا الليل هدرزه لين فجأه دق باب الشقه ..
كان الوقت قريب الفجر.. خشيت المطبخ.. لحقني ياسر خبرني بجديه وعجله : هضا باتي ..وصل خبر وفاتي لطرابلس ..أمي تعبت لازم نسافر..
طلعت بنسلم ع بات ياسر.. راجل كبير ف السن رسمي للغايه لكن بنظراته حنان ..كان شكله تاعب.. قبلت إيده وراسه وفاجأني وهو يعلق : ياسر راجل ..لكن قلبه قلب طفل..
سكت وأمر ياسر بسرعه : جهزي شنطك بنسافر لطرابلس بر..
لما خشيت لداري صدمني منظر كتاباتي وتذكرت امتحاناتي..
وخش ياسر ورايه ونصدم حتى هو بعد تذكر : امتحاناتك
جاوبته بسرعه : هي خاربه خاربه خليني نعميها.. امتحان اليوم كان زفت أصلا..
قال بتردد : لا فدوى.. سنه كامله تريح عليك..
قلت بثقه : أنا لصقت فيك ..نتخلى ع القرايه.. خلينا نسافر ونفلها وربك يحلها..
ابتسم وهو يقول : تعجبيني..
مشينا من بنغازي لطرابلس بسيارة ياسر.. برفقة بات ياسر..
وصلنا طرابلس الصبح اليوم التاني.. خشينا للفيلا بشكل غير المره اللي فاتت..
كان أصحاب ياسر وخوته ف إستقباله.. وكانت أمه حتى هي ف استقبالي ترحب عكس المره اللي فاتت..
خش ياسر بعدها بفتره طويله بيشوفني.. كنت نحس ف روحي غريبه لين شفته..
قالت أمه وهي تبينا نركبوا ونتريحوا من معاناة السفر : ياسر خوذ زوجتك وتريحوا.. فاديه حبيبتي..
قاطعها ياسر بثقه : اسمها فدوى..
مسكينه أمه شكت ف روحها وسألتني : نذكر كان اسمها فاديه..
هو لو يقولوله لون السماء وردي والشمس أزرق يقول فعلا.. فما بالك وهو يستعطفني بعينه : إسمي فدوى..
ابتسم بثقه ..غيرش إسمي فقط.. غيرني كليا..
كنت بنركب لكن ودرت ياسر.. رديت سمعت هدرزته مع أمه : زينه طلبتني نطلقها.. بكرة بنكلقها بالمحكمه..
همست أمه : اللي يريحك حبيبي..
سألها ببهجه طفوليه : شن رايك بفدوى.. حلوه صح..
جاوبت وهي...زوجي مغرور 112
جاوبت وهي تضحك : انت راجلها مش أنا.. أهم شيء تريح لها..
جاوب بضحكه : متريح.. خاطري نستقر ويكون عندي حوش وزوجه.. وعيال وهي أمهم..
همست أمه بحنان : الله يوفقك ويسعدك معاها.. أول مره شفتها تمنيتها لك.. وسبحان الله.. بس خاطري نعرف ليش قصت شعرها ؟
ضحك وقطعها : ماتجيبي طاري الشعر لفدوى.. مارضت الا فﻻخير.. بعدين شكلها أحلى هكي..
كملت طريقي مبتسمه  لقيت دار ياسر مغير ألوانها ل..
ماتمنيت هذك المره..
•○●•○●•○●•○●•○●•○●•
بعد 15 سنه..
طارق..
كنت معزوم اليوم عند ياسر بمناسبة ولادة ولده السادس
ياسر عنده خمس عيال وبنت أكبر عياله طارق ويوسف وناصر والبنت رويده..وسمى حسام ع خوه وحمد ع باته ..
________
ياسر..
طارق ولدي يوزع ف القهوه ع الرجاله ..شميت ريحة دخان عالقه بدبشه.. لو هو صح يدخن نطفي الدخان ف لسانه أو شفايفه عشان يعرف يعيدها ويدخن.. ولدي اليوم بعمر شهرين.. كنت متشوق يطلعوا الضيوف عشانها ..شفتها لابسه قفطان كت وردي ..يحدد جسمها بعد الولاده.. وشعرها وصل نص ظهرها.. وشفايفها بلون الخوخ.. وف عيونها كحل فاتن..
تزوجت ريما بنت خويا بعد الجامعه بهيثم بعد طول انتظار..وعندها بنت سمتها زينه.. تزورني هي وخوتها كل ماجت لهم فرصه..
زينه حتى هي تزوجت..ومازالت تزور أمي بين وقت وأخر..
صاحبي محمود تزوج بنت عم عماد اسمها سلوى.. وانتقل معاها ﻷمريكا.. ﻷكمال الدراسات العليا لها ف مجال تخصصها "كيمياء " وهو يشتغل.. كنت من توسط بزواجه أنا وفدوى.. وعنده تؤام ولد وبنت..
يوسف ..عنده ولدين وبنت ولده الكبير كيف باته طيب النيه أبيض القلب ..يخطط بيقعد طبيب جراح "كيفي"
الكل حضروا..
ولد طارق ثمان سنوات يلعب هو وبنت يوسف 4سنوات الطفله ..لكن ولد طارق مشاغب وبنت يوسف دلوعه ويسير فيها كيف مايبي..
وطارق ويوسف متنافرين من بعضهم ..مع إن هما اﻹثنين أصحابي..
_________
ليلى ..
خش عبدالعزيز للحوش ..وابتسم باشراق واحترام..نعم يبتسم لي..بعد كان مايبحت فيه حتى بطرف عينه : كيفك ليلى ؟
جاوبت بثقه : بخير.. كيفك انت والعيال وامهم ..
قال ببساطه : بخير..
خش للموضوع مباشره : ياريت تكلمي يوسف ..يعطيني سلفه ونردها بعد أربع شهور..
سألته باهتمام : إن شاءالله خير ؟
جاوب بابتسامه : لا خير بس زوجتي الثانيه طالبه حوش بروحها ..
😨 " حلو ياعبدالعزيز "جاوبت بابتسامه مصطنعه : خلاص تو نكلمه
طلع بعدها بشوي ..
جا يوسف بعد العصر وهو يسأل : خاطري ف عصير مانجا.. كنه عبدالعزيز اليوم !!
عيالي كانوا نسخة الشكل كيفي ..أما بنتي الوحيده يارا كان نسخة شكل باتها..
جاوبت بابتسامه : كنه شيء.. بس لو تعطيه سلفه عشان زوجته الجديده..
ضحك يوسف بعطف وقال : نعطيه لو من عيوني.. هضا خو ليلى وسبب زواجنا أولا واخيرا..
ابتسمت : ربي يخليك ليه ..
رد : ويخليك ليه ..
_______
إبتسام..
عندي عيلين خالد وأحمد ثاني أطفالي 14 سنه وساره وجودي..
بعد سنوات قعدت نتحكم بدموعي ومشاعري..
قمعز عماد جنبي وابتسم وقال بخبث : سلوى بنت عمي قاعده هنا هاﻷيام ..
كان يعرف بغيرتي من بنت عمه ..كنت ف فتره ماضيه ساهمت ف تزويجها لمحمود صاحب ياسر..قلت ببساطه : الله يعينها ع الغربه..
ملاحظين العقل والثقل والحكمه ع إبتسام ..ف هاللحظه للعلم الساعه 11 الليل.. إتصلت ام عماد طالبه من عماد يجيها ..وقف متعب بين ماقالت ابتسام تواسيه : أكيد شيء ضروري ..
قال بتعب : ماعتقدش ..لكن الله يعين..
عماد بجديه : ماترقدي لين نروح..
قلت بكذب مكشوف : ارقد غادي.. انا تخافش عليه  عيالي معايه نقفلوا البيبان ونرقدوا..
ضحك وقال : خلاص أم العيال استغنيتي ..
قلت بجديه : لا ..استغنيتش.. بس نخاف عليك التعب..
عماد : الله ييسر..
_______
عزيزه..
روحنا م حوش خالتو "فدوى "
خش بابا كان خاطري نتبع ال تي في بالصاله..
لكن لﻷسف بابا قمعز وأمر .. طارق: الوقت تأخر عزيزه وقت نومك.. شوفي خوك اللي أصغر منك رقد..
خشيت ونا قريب نبكي مسكتني ماما م إيدي وهي تسألني : ليش حبيبة ماما زعلانه ؟
قلت : فاتني المسلسل اليوم وتوا اﻹعاده لكن بابا منعني يقول وقت نوم..
طلعت ماما لبابا ونا خلفها.. مسك بإيدها وباسها بخدها اليمين وبعدها خدها اليسار.. وقمعزت جنبه ومازالت إيدها ف إيده ..منظرهم حلو رغم رقة ماما وخشونة بابا كنت نتمنى نكونوا اسره كبيره كيف خالتو فدوى لكن ربي سخر لما أنا عمري 14 سنه واسمي عزيزه سميت ع إجديده وخويا أصغر مني ياسر عمره 8 سنوات..
كنت مدلله من بابا وماما ربي يخليهم لي ..
وقفت ماما وهي تهمس : تبعي المسلسل وبعدها مباشره ترقدي..
وقمعزت جنب بابا وهو يتبعها بعينه ويتكلم ويضحك.. ومش منتبه لي.. كيف بينتبه ﻷي شيء وأماني .. جمع أمنيه تقمعز جنبه ..
________
فاديه..
وقف قدامي بتحدي رفع واحد م حواجبه وحط إيده ف جيب سرواله الجينز ..سألته بهدوء : كيف يعني ؟
بحت فيه نظرة باته المغروره وتكلم بثقه طارق : حرام عليكم ارحموا م ف اﻷرض يرحمكم من في السماء.. هضا ظلم.. دكتاتوريه ..نهاجر يعني أو ننتحر..
زوجي مغرور 113
بحت فيه نظرة باته المغروره وتكلم بثقه طارق : حرام عليكم ارحموا م ف اﻷرض يرحمكم من في السماء.. هضا ظلم.. دكتاتوريه ..نهاجر يعني أو ننتحر..
وقفت بعد غيرت لبسي لروب نوم واسع كنت نلبس فيه وقت كنت حامل..وربطت شعري بعيد ع وجهي.. وغسلت مكياجي : تهاجر أو تنتحر عشان تطلب م المطعم وجبات مضره ..طارق أسمع إنت وخوتك ..العشاء بانيه..بتاكلوا باهي تبوش تاكلوا كولوا هواء..وارقد بجوعك..
هتف خوه اللي أصغر منه بنقمه : تو نشكو منك إنتي وبابا لجمعية حقوق اﻹنسان.. ديما العشاء سمك أو بانيه..  نبو برقر..بروست.. بيتزا.. مشاوي..
تكلمت رويده وهي توقف جنب خوها وكانت تملك نفس البسمه المتعجرفه الموروثه م باتها : يقولوا كل اﻷسماك انقرضت م البحر والطيور مهدده باﻹنقراض ..تعرفوا  ليش ؟
سألها خوها طارق وهو يعرف اﻹجابه : ليش ؟
جاوبت قبل تنفجر ضاحكه مع المتمردين المنقلبين ع النظام : فيه مفترسين اثنين أسمهم فدوى وياسر قضوا عليهم..
كنت بنضحك معاهم ..لكن مسكت روحي وف هاللحظه خش ناصر ولدي الصغير منذر : بابا جا..
أخيرا حضرت المسانده.. وقفت ونشوف تعبير وجه كل واحد منهم ناديت سندي : ياسر.. ياسر تعال..
لكن تأخر.. طلعت رويده وجت تضحك مطمنه لخوتها : بابا واقف جنب المرايه يضبط ف روحه.. طلبني نجيب له عطر من فوق..
ياسر فهم دعوتي غلط والسبب كلمة السر "تعال ياسر " خش بعدها بشويه وهو يبتسم وبمجرد شافني مسح إبتسامته.. نفجر ف العيال سأل بغضب : شنو تديروا هنا؟
وقف طارق بوجهه وهو يتكلم بجديه : نبي نطلب م المطعم ..لكن..
قطعه ياسر ..وهو يطلع محفظة الفلوس وعزق مبلغ مش بسيط : اطلبوا وتعشوا.. ومانبي نشوف واحد فيكم هنا.. رويده ردي بالك م خوتك الصغار..
طلعوا ونا نصرخ بغضب : ماتطلبوا بطاطا مقليه.. ولاعصير غازات..
التفت لي ياسر الكاشخ وسأل : ليش غيرتي قفطانك وغسلتي شعرك ومسحتي الكحل.. زعلانه مني فدوى..
ضحكت مجبره.. وسألته بدلال يلبسني ف وجود ياسر : يعني ماينفع شكلي ونا هكي ..
قال بعد صمت : ينفع ونص..
ضحكت ..هو قرب وابتسم بشقاوه : سمعتك قلتي "تعال ياسر " ومع إني تعبان.. بس كل شيء يهون ومانخيب أملك فيه..
قلت ببسمه : عيالك تعبوني ..قعدت نهلوس..
قمعز بجنبي بغرور ..مايليق بغيره..زوجي مغرور.. لكنه صاحب أجمل غرور.. شم الشيء الوحيد الباقي م أناقتي ريحة الفراوله همس : قد أيش نحبك فراولتي ..
_________
سالم..
كنا ف زياره لخو مرتي عماد.. راجل إبتسام..شكله حتى أماني موجوده زوجها موجود.. و ف ا د ي ه أكيد موجوده فزوجها حاضر..
طلعت م الصالون ..
كان مجموعة أطفال يلعبوا ..لكن لفت انتباهي طفل صغير بعمر خمس سنوات صاحب شعر أسود أجعد وعيون سوده ..يشبهلها ..
سألته : شنو إسمك ياشاطر !
جاوب بطفوله : ناصر..
أنا متهني مع زوجتي وعيالي.. ونحب زوجتي ..فطول العشره تحببك ف من معاك.. لكن عشقي لفاديه .. عشق من نوع ..الله يهنيها مع زوجها..

**** النهايه ****