زوجي المغرور (منقوله )

الحلقات 23.24.25

زوجي مغرور 25
قال بضيق : ليش ماكملتي مبدري ؟
رديت بنفس الضيق : كنتش فاضيه ..وراي الف شغله
رفع حاجبه وقال : خلاص المره الجايه مباشره دبشي للمغسله ..كويس
هضا وقت الزن يا ابتسام : لا تشيل ولا هم يحزنون ..يعني فرقت ..ا ا ا ه ظهري انكسر اليوم من تنظيف الحوش ..
قال بتساؤول :خواتي وين ؟
رديت بسرعه ودفاع : ماقصرن بس الحوش كبير والشغل واجد ..وتنساش وحده وراها مدرسه وحده جامعه ..وانا فاضيه فكله جا فوق راسي ..
استراح ف تقمعيزته : كويس تساعدي امي ..
تصنعت الطيبه : مسكينه عمتي ..كيف كانت شايله الحوش قبل ..
رد بفخر : هذي المراه الصح ..الله يخليها لنا يارب ..
قلت ببسمه معوجه : امين
شكلها خطتي نقلبت ضدي ..
وصلت للسرير ورميت روحي ع الفراش قرب مني وناوي بهدرز ..فالتفتت بضيق جدي : معلش حبيبي انا تعبانه اليوم ..خل السهره لبكره
ابتعد بضيق وحسره ..مازل شفتش شيء ..هضا بداية المشوار ياحلو ..
《راجلك طيب ياسومه كان راجل ثاني طلع ودار جوه مع وحده اخره 》..
-----------------
فاديه..
قلت شرطي : نرد لبنغازي ..وتسيب الخمره ..وتصلي
تجمد مكانه بعدها قال ببرود : رده لبنغازي لاااااا ..والخمره والصلاه مش شغلك..
قلت بغضب : كيف مش شغلي ..استحاله نعيش معاك وانت هك..واحد فاسق ..
نقز ف اتجاهي ورفع ايده ع وشك يضربني لكن تراجع : عيديها وشوفي شنو يصير معاك
هديت روحي وتحليت بالحكمه وقلت بأسلوب لين ناصح : اسمع صلي تو تحس براحة البال ..ويهدى قلبك
《ان الصلاة تنهى عن الفحشاء والمنكر 》..يعني تكون دافع تسيب الخمره ..
قال بغضب وهزوه وكأنه يكلم ف حشره : لسانك ح يشيلك ف داهيه.. انت امتى تفهمي ..قلت اشرطي .. توقعت تطلبي تليفون ..شغاله تساعدك ..لكن تسلطي ع حياتي ..انتي ناسيه روحك ..مجرد جاريه .. حتى كان قتلتك مافيه من يفقدك ..اوه صح انا حثاله وانتي ..
حاولت نمتص غضبه : اسمع ..انت مش حثاله ..نحن بشر نخطأ..وخير الخطائين التوابين ..ممكن انت بذنبك هضا تقول ربي مش ح يسامحني ..لكن لا ..تنساش ان ربي غفور رحيم ..لو اتوب بس ..
اشتعلت عيونه نار بغضب مجنون تقدم وتكلم باسلوب قذر وهو يتلمس وجهي : صح نسيت من وين خذيتك.. من الجامع ..لكن ماقلتيلي كيف كانت ليلة امس ..اكيد ممتعه ..نعاودها ..خلك م الصلاه والخمر .. ركزي معاي ..
تصدقوا كبدي درهت منه هو يبي يغير الموضوع .. يعرف الموت عندي اهون من يلمسني قلت بهمس وعنف : تقرب نقتلك وننتحر
ضحك بمتعه وقرب ..هنا عقلي تذكر شيء رميته ف وجهه : انا مش زينه
يمكن لو حطيت ف فمه ملح ليم كانتش تقرف هك ..كأنه شم ريحه قذره : وانتي من وين تعرفي زينه !!
غيرت الحقيقه : وانت امس طول اوقت تهمس ..حبي زينه ..نحبك زينه.. حياتي زينه ..خلاص امشي لها شبع شهوتك فيها ..اكيد حتى هي مستاحشتك ..
نزل عينه للارض يستوعب كلامي : مستحيل
قلت بهزوه : مش هي حبك وتغار عليها ..
بحمق وقوه مسك معصمي وسحبني وراه : بس انا ماتبيش زينه ..انا نبي ..فدوى
ثارت نفسي حتى اسمي نطقه غلط حاولت نفك إيدي : خلااااص ..احرقني اقتلني ..لكن تلمسنيش ..واقسم تندم
وقف قدام داره : ليش ؟
بخوف ونفسي مش منظم ورديت عليه رد قاسي : لانك كافر ..حتى زواجنا باطل ..
سحبني بقوه اكبر قريب طرت ف الهواء وهو يتنفس بضيق وقهر ..فكرت هضا بيضربني ضرب مبرح بيقتلني
بيحرقني ..
لكن وقف قدام الحمام خذا المفتاح وخششني وقفل عليه الباب ..حبسني ..ضربت الباب وانا نقول : افتح ..
سمعته يقول بهدوء : هضا حبس انفرادي ..احسن من شيء اخره ولا نقطع لسانك ..
سمعت الباب يسكر ..ا ا اه طلع وخلاني ف الحمام محبوسه ..امس ف السطوح واليوم ف الحمام .. وانا جيعانه موت ..
قمعزت ع الارضيه بارده ..وانا انتنهد ..شفت حمامه ف عشها ..ا ا اه ياريتني حمامه نطير ونهاجر ..صوتها حزين ومؤثر ..ذكرتني بهمي وضيقي وحزني ..
----------------
أماني ..
: شرطي تخبرني كل شيء بحياتك ..وليش قلت ع روحك مريض ؟انت شكلك داس عليه شيء واجد ..
رد بخوف : وتقسمي ماتسيبيني ..
رديت عليه بقوه : واقسم اني مانسيبك
او شكلها القصه طويله : م البدايه قلت ع روحك مريض ..ممكن نعرف شنو مرضك ؟
نزل عينه للارض وبعمس لولا حاسة السمع عندي قويه ماسمعت شيء ..قال : اسمه " الشلل الرعاش" ورثته ع امي ..ممكن لاحظتي كيف ترعش ايدي اليمين وكراعي ..مازلت ف بدايته وصاحبه يستمر به المرض لين يقعد مشلول وغير قادر ع تحكم اطرافه ..وممكن يموت ..كان عندي حساسيه من بعض الادويه ..سببت لي حكه واحمرار ..لكن الدكتور غيرها وماجابت نتيجه ..
كان نفسي نضمه ونحضنه  بس مسكت روحي كان نبكي تو نزيد نهلكه ..
: الحمدلله ع كل حال ..اجرك حاصل ..انت قوي ..كان ربي كاتب لك عمر تعيشه ..
قطعني بحزن : امي ماتت بنفس المرض ..
يانويرتي 😢 : تيأسس ..خل عندك امل ..الطب تطور ..
غرقت نفكر ف المفاجأه ..توقعتش نوع المرض بصراحه ..توقعت مريض بس مش هك ..
تكلمت عشان نطلعه م الجو الكئيب ونتعرف عليه اكثر : ليش ماعرفتني ع هلك .. وشنو علاقتك بهم ..بصدق