زواج مرفوض

البارت الرابع

زواج مرفوض
لوتس

البارت الرابع
وفاتحة شعرها اسود لحد نص ظهرها وطبت للنساوين
-مساء الخير
-تعالي بنتي.. اعرفجن سهير مرت ياسين
العيون انفتحت والكل متفاجأ طبت بوستهم وكعدت
-يمة يمة خية منين جبتوها وين لكيتوها انتي منو اهلج وين جنتي خاتلة
-اي خية ماشالله كمر مصور
-صلو ع النبي جنتي من بغداد محامية وابوها صاحب الشيخ
-واني اكول هالجمال مال بغداد
-والله مبخت ياسين عندة بفرشته هيج طويرة طول وجمال ودلال
ومن ضمن الكاعدات جانت مرت اخو ياسين اللي ازغر منه فاطمة(يدلعوها فطيم) ومن سمعت الحجي وجت قهر
-على كيفجن حبيبات ترى بنات بغداد كلة لبخ لا يغرجن الكشر
-خية مبين حليوة شو العندة يلبخن ويطلعن وجه الجوب
-عوجت حلكها فطيم.. هنه بنات بغداد يلبخن ويتشلحن ويصيدن رجال
مرت الشيخ عصبت .. فطيم كومي ساعدي سلايفج و ضيفي الناس.. كامت فطيم والنساوين يتغامزن عليهة
-انتي ماعدج خوات؟
-لا
-حسافة والله جان خذيتلة منكم ل ابني
راحو النسوان وظلت مرت الشيخ وسهير
-بنتي شنو هذا اللبس شنو هالمكياج كلنة تهندمي بس موهيج
-ليش عمة مو حلو
-ههههههههه راح تطيرين عقلة ل ياسين يمة ما شالله يجنن شنو ترحين صالون
-ههههه لا والله بس اعرف اتمكيج
-الله يحفظج بنيتي بس حسيتج تكدرتي من كلام فطيم هية غيارة و لسانها طويل
-اي ماحبيته كلش هانتني
-تعاي والله لا امسحلج بيها الكاع
راحو للمطبخ ولكت فطيم تسوي عشا هية وسلايفها ومنار
-ولج فطيم
-بلي عمة
-بلبالة تشلع ضلوعج شخربطتي كدام النساوين
-ماكلت شي
-ولج الغيرة طكت من عروكج
-قصدج ع اللبخ مو؟
-لبخ اللي يلبخج ان شالله وانتي شكو عروس وبكيفها ومرة لخ ان فتحتي حلكج وكلتي يلبخن ويجرن زلم هذا راسج اكسرة فهمتي يمعزايه
-يعني كلة علمود الطرمة الوراج
-سهير عصبت بس مارادت تشفيها.. حبيبتي الجمال من الله مو ذنبي انو اني احلى منج
-ثارت فطيم وكامت تصيح احلى من منو ولج معزاية هسة اجيب وصلت مسح وامسحلج البوية اللي بخلقتج وتطلعين صدك مصلبخة
-عاطت مرت الشيخ .. صمي حلكج يمعزاية يجي زوجج ويعرف حسابة وياج الا يكصلج لسانج واندارت على سهير يمة صعدي بدلي زوجج على جية
وبهألاثناء طب ياسين وحسن(اخو ياسين اكبر من منار بسنتين وعزابي)
- حسن ليش اصواتكم عالية شكو
-ماكو شي يمة
-مجتمعة العصابة النسائية ههههههه شكو واندأر على سهير وصفن
-باوعتلة سهير وابتسمت ونزلت راسها
-لا لالالالالا هذا العنصر من العصابة ؟
-هههههه اي اني من العصابة
-يمة هاي منو
-يا الاغم مرت اخوك هاي
-صافن عليها مرت منو بالظبط؟
-ههههههههه يول مرت ياسين
باوع على امة وباوع على سهير واندار لكة ياسين صافن وبيدة كوب ويباوع عليهم
-يول طول عمرك مبخت ومحظوظ بالنسوان بس مو لهدرجة
-هههههههه نزول على سوالفك
-باوع على سهير انتي من يا كوكب ؟
-ههههههههه من زحل
-اخوج حسوني من الارض
-هههههههههه ضلت تضحك وحسوني صافن بوجهة خايب عمي شتاكلين عسل هيج حلوة عاد ياسين تخبل
-سد حلكك وبلا هالشقى السخيف واكضب حدودك
-اعصابك حبي دا اشاقى شبيك
-لا تشاقى وصير ادامي واندار على سهير بخزرة وجرها
من ايدها وطلع فوك
-مرت الشيخ ... ولك مصختها واخوك واكف وبعدهم عرايس
-ردت فطيم .. اي كاعد الحظ ل امهات اللبخ
-اندار عليها حسن ... جنتي تلبخين وكت عرسج وتحطين ديرم(حمرة) ورغم اللبخ وجان مع الاسف يبقى شكلج شكل حضيري ابو عزيز
كل اللي بالمطبخ خربو ضحك وفطيم ماتت بغيظها... اي ضحكو باجر تطلع على حقيقتها وتحرك البيت
جوة جان الضحك شغال بس فوك جان اكو غير كلام
جر ياسين ايدها وطببها بالغرفة
-ايدي شبيك كلش اذيتني
-شمسوية بنفسج؟؟ شنو هذا اللي لابسته شي مقزز
-شبيك شنو ملابس
-كام يصيح اعرف قنادر بس شعندج تفرفرين جوة هااااا
-اني بالبيت مو بالشارع وجنت بالمطبخ دنحجي وجانو اكو مباركات جايين وخالتي كالت اتهندمي
-ومكيفة بنفسج وحسن هيج يحاجيج
-هذا اخوك مو غريب وحسبت اخوية مابيه شي
-جرها من ايدها ... سمعي لج والخلقج اذا المحج تلبسين هيج وتفترين بالبيت الا راسج اطشرة فهمتي
-جرت ايدها وباوعت بوجهة ماشي اللي تريدة يصير تريد تمشي وجرها مرة لخ
-انتي تتمسخرين جنج؟
-لا
-جذابة
-شبيك والله مدا اتمسخر وبعدين صدك المفروض ما افتر بي
-جاهل كدامج تاخذيني على كد عقلي وتسايريني انتي شنو
-شبيييييك فهمني شنو اللي تريدة ؟؟ كتلك صار واني غلطانة شنو اسوي هسة
-هد ايدها حيل وطلع
سهير بدلت ونزلت تعشو وطلعت فوك غسلت وفتحت التاب تبحث عن تحليل لتصرفات ياسين وتبحث أخر شي طلع وياها التالي
ياسين بالهوية مواليد ١٨/٩ يعني برج العذراء نظامي وكتوم ويعرف يحلل البشر كدامة ... رومانسي بس ما يظهر ل احد وبنفس الوكت يطنش هواي اما بالنسبة لتجاهلة وعصبيتة سهير فهمت انو هوة بالضبط مثل الطفل اللي مكسور بداخلة شي وديحاول يطلع عصبيتة براس الاخرين يعني اكو شي عندة مو مضبوط بحياته لهذا قررت سهير انو تسمع كلامة وما تعصبة وتمدح بي كدام اهلة حتى ممكن تكدر تغيرة شوي ويعاملها افضل لان صار واقع لازم تتعامل وياه
صار الصبح ونزلت سهير وياهم للريوك وجان البيت من الصبح كلة نسوان وهمة
مرت الشيخ وبنتها منار و فطيم زوجه عبدالله ازغر من ياسين و عالية زوجة شهاب و رقية مرت حسين
-صباح الخير
-الكل ردو صباح الخير بس فطيم عوجت حلكها
-خالتي اساعدج بشي
-لا يمة كعدي انتي عروس
-بدت تحجي فطيم عاروس وترتاح براسنة الله يرحم من صباحية عرسي واني اخبز
-سدي حلكج فطيم لا والله اصيح عبدالله يسدلج يا
-عمة هذا ظلم صارلها ٥ ايام مرتاحة بروسنة شنو احنا زواج
-فات الشيخ صوتج عليان ولج فطيم والله لسانج اكصة واطلكج اذا عليتي صوتج وتدخلتي بشي مايخصج انتي مو ام البيت وبكيفج تقارنين... اسمعي انتي ويسمعن سلايفج كلام للكل موجه.. سهير محد اله علاقة بيها ومحد علية سلطة عليها غير مديحة(مرت الشيخ) الباقيين كلهة تحط لساناتهم بحلوكهم وتسكت
-قاطعة ياسين حتى اني وياهم بوية؟؟
-هههههههههه انتة خارج قوس
-صبحكم الله بالخير باس راس ابو
-شو مبدل ؟ خيرك
-عندي عزومة على الريوك وطالع
-بس انته عريس
-شسوي بعد .. اترخصكم
-الله وياك
البارت الخامس
اتغير لونة وتكولين اهلي ... منو هذا؟
-نصي صوتك هذا اخوية شبيك
اصعدي فوك بسرعة لا اسحلج
-سهير انسحبت وصعد وراها صاير ثور ويريد ينطح
-ولج قندرة اضحكين عليه ادبسز تكوليلي اهلج وطلع علاوي
-اي والله اهلي هذا اخوية
-واخوج تحطين بصف اسمة قلب ولج كدامج ثور
-ياسين ما اسمحلك اني مو جذابة
-جرها من شعرها راح اتصل بي هسة والخلقج اطلع بروحج اذا طلعتي جذابة
-شعري وخر ايدك
طلع الرقم وداس اتصال
وانفتح الخط واذا ولد
-الووووو حبيبتي شلونج
-رد ياسين الووووو
-ااااه العفو شونك خوية ياسين
-هلا هلا خوية علاوي شونك
-اسف عبالي سهير ردت شونكم اخباركم
-الله يسلمك بخير والله سهير زينه بس عدنه خطار وكاعدة يمهم كلت اتصل بيك اكلك حتى مايضل بالك
-حبيبي اشكرك عود سلملي عليها وخلي تتصل بيه بالليل وسلملي ع الاهل
-ماشي حبيبي يوصل
وسد الخط وباوعتله سهير ... هاااااا اتاكدت ؟
-وشتردين هسة ؟
-اسمع زين وحط كلامي براسك ... اني عشت ابغداد ٢٦ سنة لا ابوية ولا اخوية حاسبوني على شي ورغم عيشتنه مفتوحة لان جنت رافعة راسهم وربوني عدل واذا متصدك روح لجامعة بغداد وانته تعرف اني منو .. و ل اخر مرة اسمحلك تمد ايدك علية وتغلط
طلعت وعافتله الغرفة
مرت ٣ ايام وخلالها ياسين ما يشوف سهير بس ع الاكل ويجي بالليل يجر فراشة وينام بالكاع لحد ما اجة رابع يوم كاعدين يتعللون وجان كاعد ياسين وامة وصاحت على سهير وكعدت يمها وفتحت مرت الشيخ الموضوع
-ياسين ابني تحضر انته ومرتك باجر نروح للنجف
-خيرج يمة
-اني ناذرة من تتزوج اخذك انته ومرتك نزور ونوزع ثواب ل ابا عبدالله ونصلي بلكت الله يهدي سركم بحق مقام سيدنا الحسين عند رب العالمين
-ماشي
باوعت على سهير شنو يمة انتو ماتزورون؟؟؟
-اي مرات نروح نزور بس مو دائمآ
-اني اصلي من النجف و دوم ازور صح بيت عمج من البصرة بس جان يودوديني ويزور وياي
-اي عمة حلوة الواحد يتقرب من الاماكن المباركة ويزورها تحسين براحة وراها
-الله يوعدنة ونروح المهم باجر ب٨ نطلع
-ماشي
صعدت سهير ووراها بشوي صعد ياسين وظل يباوع ع التلفزيون وبين ما فات يسبح واندك باب الغرفة وطلعت سهير واذا حسن اخو ياسين
-سوسو ازيك
-ههههههههه لا يسمعك ياسين سوسو شنو لا عيب هالحجي
- خلاص عمي اسف
-وازيك انته يا سونسن
-هههههههه دبل حشاسة عبالي صدك زعلتي.. وين زوجج
-ياسين ديسبح
-خلي يكمل وينزل بالحديقة اريدة
وبهلاثناء طلع ياسين وشافهم وضل واكف
-خوما بيك شي تريد
-هههههههههه ولك خرب يومك ياسين شمسوي بيها تخاف عليك هيج حتى طلعة ماتريد تطلعك
-حسن انزل انتظرني جوة لا انزل بيك حدرة بدرة
-نازل عيني
سدت الباب وراحت تريد تمدد ونزل وسهير لعب الفار بكلبها وطفت الاضوية والتلفزيون وكعدت تسمع من الشباك شنو صاير وحطت البردة فوك الشباك حتئ مايشوفوها وكوة تسمع الصوت
-نزل ياسين يتلفت
-هااااااا
-علمود الوصيتني عليه دزيت مقداد واكرم
-وشطلع وياهم
-منطقتهم والجامعة والمحكمة وكل اللي يعرفوها اتفقو على انو هية ابيض
-شون ابيض
-مقداد يكول بالجامعة ماعدها علاقة بولد بس سلام عليكم وجانت محترمة بلبسها لا قصير ولا حصر تلبس وبالمحكمة نفس الشي صح عدها سيارة واهلهة مفتوحين بس ابيض كلشي ماعدها خرابيط وصديقاتها ناس اكابر ومحترمين مثلها وهواي مدحو بيها
-زين وشمضمني هذا الكلام صح
-شوف ياسين حتى اني وزنتها وتدري بيه علاقاتي بكد شعر راسك .. البنية مو وكيحة كتلك من البداية ومبينه انته لا تثق ١٠٠%بس اني متاكد من اخلاقهة وبقت يمك
صعد ياسين وسهير سوت نفسهة نايمة بس سمعت كل الكلام وافتهمت انو ياسين شكاك ونامو وصبح الصبح واجة ياسين يكعدها
-كومي ولج راح نتأخر
-كامت باوعته صباح الخير
-دار وجهة وردلها صباح الخير
اول مرة يرد عليها صباح دوم من تسلم مايجاوبها وهية تعجبت بس فهمت انو كلام حسن مال البارحة اثر بي
تريكو وبدلو ولبست سهير فستان اسود واخذت عباية من منار على الراس وبين مدا يطلعون الام على منار
-امي اني اليوم مارجع للعصر دير بال ع البيت وابوج لا تنسين ادارينه بغيابي
-صار
ركبو سيارة ياسين جانت عالية ومشو طول الطريق ياسين ساكت مافتح حلكة ابد بس الام تسولف
-الحمدلله بلكي اكضي النذر اليوم
-ان شالله
نزلو وجان المزار مو كلش مكتض والام تمشي وتبجي ودموعها تصب ولازمة ب ايدها سهير وياسين وراهم ضلت تبجي وتدعي وصلو الظهر وطلعت فلوس ووزعتهم ثواب وكعدت بصفحة بداخل المقام وكملت دعاء واندارت على سهير
-يمة اني كملت دعاء وطالما ياسين مو يمنه اريد احجيلج على شي بس احلفج الله مايطلع برة وتستري
-كولي عمة عسى ما شر
-يمة ابني ياسين اريدج ماتعوفينة
-خالتي شنو هالحجي ليش تحجين هيج
-بدت الام تبجي .. اني اعرف هوة يعاملج مو حلو وما ينام يمج واعرف انت شون عايشين
-هااااا عمة انتي ...شون ... مدا افهم
-بنتي ابني واني اعرف ما جان هيج بس الصار ويا كلب احوالة... ابني كلبة طيب وماعندة شر بس بت الحرام اللي لعبت بي
-منو هاي ؟
-من ١٠ سنوات ياسين اتزوج جان عندة ٢٥ سنة حب وحدة ويا بالكلية اسمها ميمونة وعند الا يزوجها... البنية ماعليهة كصرة من عايلة مستورة وخوش ناس خطبناها وتزوجو ... وجان مدللها وهية هم تحبة وصارت حامل بعد شهرين من زواجهم .. وبلشت مشاكل بينهم وعركات وكامت ما تريدة وتنفر منه وبين ماهية حامل بالسادس عرفنه حامل بولد وجنه طايرين من الفرح بس هية مو طايقة ياسين حاجيناهة هواي تكول مو متقبلته كلنه ممكن من الحمل لان اكو نوعية من تحبل تكره زوجهة بس هاي جانت غير
بجت المرية بحركة وحضنتها سهير عمة بسج عاد والله فطرتي كلبي
-يمة الصار مو شوية
-شنو صار
-بليلة سودة البنية هجت وتركتلنه رسالة تكول بيها انو هية تحب واحد من عشيرة ثانية وانهزمت ويا وابن ياسين راح تنزلة وتخلص منه ... ما وصفلج حالنة بعد هاليوم .... ياسين مات والله حيا بقدرتة وعمج ضربته جلطة تخزينة بين الوادم دورنة بكل مكان ماكو وجوي اهلهة ودزو على الولد اللي كالت مهزومة ويا وحلف قرأن انو لا شافها ولا يعرفها...