زواج مرفوض

بارتين

بارتين لعيونكم
زواج مرفوض
لوتس
البارت الثاني
#سهير (العروسة)
محامية عمري ٢٧ سنة طويلة شوي وحنطاوية وشعري اسود امراة شرقية بكل معنئ الكلمة احب الادب وغاوية قراية اكل الكتب واحب شغلي كلش وجنت اشتغل عقد بمحكمة دار العدل .. حياتي تغيرت بيوم ما اجة الشيخ للمحكمة عندة معاملة وسهلتله امرة لان صديق بابا .. صفن هواي علية ونظراته واسئلته جانت غريبة الي بس ما جنت اتوقع يخطط لزواج .. حاولت وحاولت بس الظاهر جان مكتوب عليه هذا الشي اكون زوجة لشخص ما شايفته
#ياسين (العريس)
مهندس كيمياوي اشتغل بحقول الجنوب ٣٥ سنة طويل واسمر مو كلش .. غامض ومحد يفهمني بس امي ... وبيه هواي شغلات راح تعرفوها بالقصة

زفو العروس والعريس لغرفتهم فوك والدعوات مشتغلة الهم بالستر والذرية
طبو للغرفة والعريس باس راس عروستة وكعدت على الجرباية والجكليت من كل اتجاه يطش على روسهم .. كعدت يمها امها ونزلو كل العايلة وبقت الام وبنتها تودعها
-اووووف يا بنتي كلبي وياج.. اعرف شتحسين ومتكطعة من جواية ردتلج قسمة تفرح كلبج بس مابيدي شي
-سهير تبجي .. الله المعين هذا المكتوب
-ابوج وصاني اكلج شي وحلف يطلكني اذا ما كتلج يا...
-كولي
-هذا البيت مالج طلعة منه لو يذبحوج.. انتي ل ياسين للابد واذا فكرتي تحجين او تشتكين ابوج يموتج
-سهير كامت تبجي كولش قوي وحضنت امها ... يعني لو مشتريني من السوك مو هيج تسوون بيه
-كافي يمة الله يسعدج ويهنيج
طلعت الام وسهير مسحت دموعها ودعت الله انو يجبر بخاطرها وطبت منار شايلة العشا مالت العرسان وحطته بالكاع وجانت الغرفة كلش جبيرة بيها غرفة نوم حلوة وعلى صفحة كعدة عربيه وتلفزيون ومكتب وثلاجة وحمام ومخزن زغير حطت العشا بالكاع منار (اخت العريس عمرها 24سنة) واندارت على سهير
-حبيبتي هذا عشاكم وان شالله الف مبروك وامي تكول لا تشيلين الطرحة من على وجهج الا يجي ياسين يشيلها
سهير ما شالت راسها ودموعها تصب واجتها منار تشوف شبيها
-شبيج حبي سهير
-تبجي.. مابيه بس راح اشتاق ل اهلي
-تتعودين حبي هذا نصيبج وان شالله ترتاحين
وانفتح بالباب واذا ياسين اشر لمنار تطلع برة وقفل الباب ونزع عبايته والغترة والعكال وشمرهم على الجرباية وكعد بالكاع وشغل التلفزيون وكعد ياكل ولا كأنما ماكو عروسة بالغرفة وسهير بعدها بالبدلة ومغطيها بالطرحة ومرت نص ساعة وياسين ما حرك ساكن ولا اندار عليها اخر شي طب غسل وشال مخدة وغطا ونام بالكاع على وحدة من المنادل وانطى ظهرة لسهير
سهير بداخلها متعجبة.. معقولة؟؟ صار نص ساعة اني كاعدة وانتظر وهوة حتئ سلام ما سلم ؟!!! لا وتعشا ونام ولا عبالك اكو وحدة ويا بالغرفة .. ابد مو طبيعي هذا الرجال
كامت سهير بدلت وغسلت ونامت والافكار تودي وتجيب بيها وصبح الصبح كعدت ومالكت ياسين بالغرفة بس كاتبلها ورقة ع باب الغرفة
شوفي تسبحين وتبدلين وتتعطرين وتنزلين جوة مبتسمة وشيكولون تكولين صار .. و فنج تفكين حلكج بشي او تشتكين مني.. مباشرة راح اكول انتي مو بنية واخلي اهلج يذبحوج .. وبين ما تبرين نفسج انتي رايحة بخبر كان.. اسمعي كلام ونفذي...
شالت سهير الورقة وظلت تفكر ... واخر شي قررت تنفذ المكتوب وتشوف هذا فلمة شنو بدلت وتمكيجت ولبست ثوب الصبحية(كلابيه بيها شغل لونها وردي فاتح)وتنزل جوة واول مانزلت من الدرج استقبلوها هلاهل سلايفها ومرت الشيخ
-مبروووك بنتي ان شالله زواج العمر
- تسلميلي عمة
-تعاي يمة عمج الشيخ يريد يباركلج
طبت سهير لديوانية الصغيرة اللي بداخل البيت واذا الشيخ متربع وجان مهيوب وكاعد بصفة ياسين منزل راسة لابس دشداشة بيضة ولازم مسبحة.. تقربت سهير وباست راس الشيخ وايدة واشرلها كعدت كدامة وباوعلها وابتسم
-صباحج مبارك بنتي والف مبروك زواجج
-مشكورة عمي يبارك بعمرك
-شونه ياسين؟ ان شالله عجبج؟ اعرف كلشي سريع صار ومالحكتو تتشاوفون بس الظرف هيج
-احسن رجال بالدنيا ومالكى ظفرة عمي.. كافي ابنك وباوعت ل ياسين وهو شال راسة باوعلهة متعجب وضحك ونزل راسة
-الشيخ تغير لونة بس ضحك..ههههه الله يسلمج ويحفظج بنتي... ام ياسين جيبي الصبحية
-تفضل
انطى الشيخ طخم ذهب ل سهير .. صبحيتج بنتي
-اشكرك عمو بس هذا كلش هواي
-لاااااا مو هواي عليج انتي مرت الغالي ابني الجبير
-الله يسلمك عمي
وبهالاثناء اجت مرت اخو الشيخ فالح وام زوجة عبدالله (فطيم)واحد من ولد الشيخ(فخرية اسمها) وكلبت الدنيا هلاهل وجابت الريوك للعرسان .. وطبت للديوان هلاهل .. ووراها سارة بنت اخت فخرية شايلة الصينية ع راسها
-الف الف الف الف مبروك زواج الغالي ياسين
-الله يباركلج خية
-كرت عينك شيخنا..
-وعينج ام مزهر الله يسلمج
-هذا فطور العرسان اني ناذرة بيوم زواج ياسين اجيب الريوك للعرسان واروح للنجف اوزع ثواب
-زحمة عليج خية
-لا والله ابد.. اترخصكم اطلع انصبلهم الريوك بالغرفة
-مرخوصة خية
وطلعت فخرية وسهير وسارة شايلة الريوك ونصبتلهم يا فوك
كاهي وكيمر وبيض وجبن ولحم مشوي ومربة وكليجة وجاي
-شوف شون ايدية دبكت من الشيرة .. يمة بنتي عديلي الشيلة بس اغسل ايدية
عدلت سهير الشيلة وراحت مرت العم تغسل بالحمام وبقت سارة تباوع ع سهير
-انتي حلوة
-حبيبتي شكرآ
-شسمج
-سهير
-الله حلو اسمج ..
شالت شهير ١٠ الف ونطت ل سارة هاي الج
-ليش.؟
-اني حبيتج وحبيت انطيج شي
-سارةصفنت وانقهرت.. لا.. اني..
واجتي مرت العم .. شسوين هنا معزاية نزلي
واجة ياسين.. ليش هالزحمة يا مرت عمي
-حبيبي انتة الغالي لازم نكوملك بالواجب.. اترخص والف مبروووك
-الله يباركلج
-كعدو تريكو ان شالله عوافي
طلعت مرت العم وكعد ياسين ياكل وظلت سهير واكفة باوعتله مستغربة تصرفاته... وشال راسة وباوعلها.. شو واكفة تعاي صبي جاي لو تردين عزيمة
كعدت سهير صبت جاي وبكلبها حجي وقررت تحجي
-ماكو داعي تتركلي ورقة تعليمات تكدر تكعدني وتكلي اللي تريدة
-والله عاد هذا اني .. وزين سمعتي كلام ونفذتي صح ومالعب الشيطان براسج
-هههههههههههههههههههه
-شال راسة وعيونة تجدح شنو اللي يضحك ب الله؟
-انته عبالك اني خفت ونزلت و سويت اللي سويته خفت من تهديدك؟اني اكدر انزل بالورقة للشيخ واكلب الموضوع عليك واستلم عاد اللي راح يجي