عروسي المشوهة

الجزء الناقص من الفصل الاخير

الجزء الناقص من الفصل الاخير
لقاء سالي بوالدتها
جلس مازن بجانب سالي وهو يربت على يدها بصمت ...تحدث قائلا بقلق :
" شكلك تعبانه اوي يا سالي ... ايه رأيك تنامي ...؟!"
اجابته سالي بدموع :
" انا تعبانه فعلا ... مش عارفة اعمل ايه ... رزان فالسجن ... ودادة علياء هتتحبس ...."
"متقلقيش ... رزان هتخرج عشان هي بريئة ودادة علياء اكيد وسام مش هيبلغ عنها ... هي متستحقش ده ..."
أردف قائلا بسخرية :
" لا وسام ولا اي حد فيكم زعلان عشان موت الراجل ده ... يعني محدش يفكر يبلغ عنها ..."
" تفتكر الموضوع سهل كده ...؟!"
سألته ليجييها :
" باذن الله هيكون سهل ..."
مسحت دموعها باناملها بينما سمع الأثنان صوت جرس الباب يرن ... جاءت اليهم الخادمة بعد لحظات لتخبرهم بوجود ضيوف في غرفة الاستقبال ... اتجه مازن وسالي هناك ليجدا محمد وبجانبه ماجده والتي انتفضت ما ان رأت سالي ...
تقدمت سالي وهي تقول :
" اهلا دكتور محمد ..."
تطلع مازن اليها بغيظ ما ان رأي محمد ومدى وسامته بينما تقدمت ماجدة ناحيتها بلهفة دون ان تستطيع السيطرة على نفسها :
" سالي بنتي ..."
تراجعت سالي الى الخلف قابضة على ذراع مازن الذي تطلع الى المرأة امامه بعدم فهم ...
نهض محمد من مكانه قائلا :
" سالي ممكن نتكلم شوية ..."
هزت سالي رأسها نفيا فهتف بها مازن :
" سالي ... اهدي يا حبيبتي ...."
" سالي انا أمك ...متخافيش مني ..."
قالتها ماجدة بتوسل ورجاء لتهز سالي رأسها نفيا والدموع تهطل من عينيها بغزارة ...
" سالي خليها تحكي من فضلك ..."
قالها محمد برجاء لينهره مازن :
" وانت ايه علاقتك فالموضوع ده ... دي مشاكل عائلية ..."
" انا ابقى ابن الست دي يعني اخو سالي ..."
صمت مازن ولم يعقب ثم قبض على يد سالي واجلسها على الكنبة وجلس بجانبها ثم طلب من محمد وماجدة ان يجلسوا ...
تنهد محمد ثم تحدث بجدية :
"انا كنت عارف انكم اخواتي من ساعة مبعتوا الملف الطبي ... عرفتكم فورا... طلبت من الدكتور اني اتولى عمليتك يا سالي عشان تكون فرصة ليا اقرب منكم ...."
أردف قائلا :
"والدتي عاوزة تحكيلك كل حاجة ... عاوزة تفهمك ... اسمعيها من فضلك ..."
هنا انتفضت سالي قائلة ببكاء :
" افهم ايه ... افهم انها سابتنا واحنا أطفال صغيرين عشان نلاقي نفسنا فجأة من غير ام ... افهم انها حرمتنا من حنان الام واتخلت عننا ... "
"انا متخلتش عنكم بإرادتي ... انا انجبرت على ده ..."
قالتها ماجدة بدموع ثم استرسلت في حديثها قائلة :
" انا هحكيلك كل حاجة ... انا قابلت ابوكي وكنت ساعتها مطلقة وعندي طفل صغير هو محمد ... حبينا بعض واتجوزتي غصبا عن ابوه ... عشنا حياتنا بعيد عنه ... لغاية ما ابوكي مات ... ساعتها جه وهددني انوا لازم اسيبكم ليه وابعد عنكم ... انا رفضت اني أتخلى عنكم ... قام هو خطف محمد ابني وهددني انوا هيقتله لو مسبتش البلد كلها ... اضطريت أنفذ كلامه ... بعتكم ليه وخدت محمد وهربت من البلد ... مكانش قدامي حل تاني ..."
" سبتينا ليه بالسهولة دي ... ضحيتي بينا ... تخليتي عنا ... انتي عارفة احنا عشنا ازاي ... احنا عشنا فجحيم ... عارفة عشنا ازاي بعد ما عملت الحادثة واتشوهت ... وانتي هتعرفي منين ... مانتي كنتي عايشة مع ابنك فامان الله ..."
" انا اتعذبت اوي فبعدكم ..."
قالتها ماجدة بالم الا ان سالي نهضت من مكانها قائلة :
" كلامك وتبريراتك ملهاش معنى يا ماجدة هانم ... عن إذنك انا تعبانه وعاوزة ارتاح شوية ... "
قالت سالي كلماتها تلك وخرجت من الغرفة متجهه الى غرفة نومها بينما اعتذر مازن منهم نيابة عنها ...
************************************