أمانتي

33

بارت لعيون السهرانين
البارت 33
#أمانتي
بقلمي ملاك الصمت

هيفين .. بعد الي صار بين ايهم ومقدام صار الكلام انو نطلع وحدنه بدون مقدام واني جنت الوحيده الي معارضه ويحاولون يقنعوني ..
سبب معارضتي هو مو کادرة اترك مقدام لوحده هنا ولا اني اكدر ابقى وحدي لو عافوني اهله وهو ديطلع من الصبح ويرجعلي بالليل ..
جنت بالمطبخ جوة ببيت عمو احمي الاكل دنستعد نصب غده وشهد دتساعدني وميس كاعده ترضع ابنهه وسمعت الباب انفتحت ..
طليت من باب المطبخ .. شفت مقدام ديدخل استغربت مو عوايده يجي هالوكت هو حتلو يجي يتغده يتأخر ..
الاغرب بالمشهد الشفته دخلت بنيه وياه .. منقبه ولابسه عبايه كلو اسود بأسود شگد يمقت گلبي هالمنظر ..
حاجاهه .. فوتي ادخلي منا ..
اشرلهه تصعد درج بيتنه ..
طلعتله للطارمه سألته ..
شنو هاي مقدام ؟
منو هالبنيه ..
دخلي جوة هسه جايج ..
حاجيته واني اقصد البنيه بكلامي ..

جيبهه لهنا شنو ليش تريد تصعدهه لبيتنه ..
فوتي جوة هسه جاي دا فهمج ..
ووجه كلامه للبنيه .. وانتي يله اصعدي كملي طريقج ..
اني گلبي لعب بس ردت افتهم منه اول ماردت افقد اعصابي ..
فتت للمطبخ ودخل ورايه ..
هاي منو البنيه وشكو صعدتهه لبيتنه ..
حجيتهه بانفعال واحس نبرة صوتي ترجف وگلبي وكف دگاته ومنتظر جوابه ..

هاي البنيه ايزيديه سبيه وصارت حصتي .. اخذتهه الي ..
رمشت شكم مرة بلعت ريكي اذاني صفرت اريد استوعب يعني شنو ..
شنو سبيه شنو حصتك ...
حليلتي .. عقدت عليهه .. اجتي من الموصل ويه السبايا واخذتهه ..
مافهمت .. شنو عيد ..
شهد وميس صافنات علينه ماتنفسن بولا حرف بس شفت البهته بنظراتهن ومتفاجآت اكثر مني ..
ضحكت ..
لا انت اكيد تتشاقه ..
جرني من ايدي يمكن عرفني راح اتهستر ..
امشي نصعد ببيتنه نتفاهم ..

نترت ايده ونكثتهه من ايدي بقوة ..
صحت .. تزوجت عليه مقدام ..؟؟
ع صوتي اجتي خالتي وايهم ..

خاااله تعاي شوفي ابنج .. تزوج عليه خاله ..
گامت عيوني تذب دموع بدون وعي ..
ضرربت خاله صدرهه ..
ولك صدوك تزوجت .. والمن تزوجت ..
جاوبهه .. صرخت .. جاوبهه المن تزوجت ..
اششش صوتج لا حلگج افركه لاتصيحين ..
صعدي فوك افهمج ..
خاله .. جاوبني ولك منو هاي التزوجتهه ..
عاندته .. ماصعد ..
يوم بعدين اسولفلج ..
جرني خلصت ايدي منه ..
تزوج سبيه خاله .. شابعين بيهه الدواعش الانجاس وشامريهه وجايبهه ضرة عليه ..
من ضيمي حجيت هالكلام ..
انجبي .. حسج مااسمعه ..
جرني بقوة ومشاني وراه ليفوك صعدنه الدرج سحل ..
شمرني بالهول ..
شفتهه گاعده كبالي بعدهه بنقابهه ..
غريزة انثى وغيرة زوجه ع زوجهه ركضت جريتهه من نقابهه اجه بيدي طلع وجهه ردت اشوف منو هاي الي نزلت ضرة عليه ..
بيضه عيونهه خضر شعرهه مثل لون شعري بس كيرلي جمالهه جمال الكرديات ..
بس شنو وجهه ازرك صاير خريطه من الضرب ..
نقابهه بيدي ظليت صافنه عليهه ..
هو عباله اهجم عليهه لو اضربهه رأسا جرني بعيد عنهه وبقه لازم زندي ..
هيفين .. هيفين .. حبيبتي ..
صافنه وفاصله عن العالم بس اتباوعلهه وهي مدنكه مستحيه ودموعهه تجري ..
هيفين .. حبيبتي .. بنت عمي .. أمانتي ..
صديتله مادري هالكلمه أمانتي .. ضربت وتر حساس بداخلي  ..