عدت نشر البارت هذا لان بي شويه نقص بعدين من راجعته ورة النشر ياله انتبهت عليه ..
البارت 4
#امانتي
بقلمي ملاك الصمت
هيفين .. اسمع صوت عياط وصياح .. بعقلي اعرف احد يقربلي ميت بس مدا استوعب ولا دااتذكر منو ..
تذكرت اني منتظرة ابويه يجي من سوريا مواعدني بسفرة يونسني بس اخلص امتحانات ..
اشتاقيتله اريد اشوفه بلكي رجع بلكي بيبي خابرته واتطمنت عليه ..
ديلر عافني وحدي وماعرف وين راح ..
نزلت من السيارة وحدي سديت الباب وصرت اتلمس بالحيطان بايديه ..
لگيت باب صغير ..
دخلت وبعدني اتلمس واتعثر الممر ضيق وبي غراض وصلت لنهايته لحايط مسدود انضربت ع وجهي بنهايته ..
رجعت لنفس طريقي بس اتلمس الطرف الثاني للممر اتذكر اكو باب ع المنور ..
تلمست باب بس لزمت يدة الباب انفتحت وزاد عليه صوت الصياح والبجي ..
كفختني ريحه بوخه وحرارة ..
ظليت امشي واتلمس وانلطم بعالم نسوان ماعرف ماشوف شي ..
اسمعهن يكولن بنت المرحوم ..باع شصاير بحالهه ..
ماعرف عليه لو ع احد ثاني ..
هيوفه ..
الصوت النطق اسمي اعرفه .. صحت ..
ميس ؟؟
انمدتلي ايد سحبتني ..
ميس هذه انتي ..
اي حبيبتي اني ميس شجابج ولج مو جنتي بالمستشفى ..
ديلر جابني .. اجيت اشوف بابا .. ابويه رجع ميس مو كوليلي وينه وديني اله حبابه ..
اخذتني من ايدي واني امشي وانردم بناس هواي ودخلتني من غرفه لغرفه وكل ماجاله النفس يضيك والبوخه تصير اقوى ..
ميس تمشي وتجر بيه وتدردم .. وخرن .. وخرن عيني .. شويه سوولنه طريق ..
فجأة وگفت .. اخذت ايدي وخلتهه ع شي خشب .. صندوگ ..
واسمع اصوات بجي يمي زادت ..
ميس وين وديتيني .. هذا شنو ؟
هيوفه هنا .. هنا عمو .. ابوج حبيبتي .. الله يرحمه ..
انجبي شنو ابويه هنا .. هذا صندوك ..
ايدي تمر عليه تتلمسه ..
اي هذا تابوت عمو ..
وكامت تبجي ..
عقلي بدة يربط .. ابويه والله يرحمه وتابوت وسمعت ديلر يگول لخاله ياسمين جبتهه تودع ابوهه ..
بديت استوعب واتذكر ابويه يومين منقطعه اخبارة ومنعرف عنه شي واخر شي اجانه ديلر وعمو عبد الهادي كالوا بابا مات مقتول ..
عطت عيطه رجت البيت رج ..
ابوووووويه .. لالالا جذابين مو ابويه .. ابويه ميموت .. ابويه ميعوفني ..
دكيت ع وجهي ..
حضنتني ميس واني اضربهه ع صدرهه ..
جذابه انتي وخرري ابويه مامات ..
گلبت الدنيا بصوتي .. ع اثرة اجوي الزلم صارت هوسه اسمع صوت ديلر يگوللهم منو جابهه لهنا منو نزلهه ..
نمت ع التابوت دگيته .. اگعود يابه .. اگعود حاجيني شلون .. شلون هيج تروح وتعوفني اهون عليك يااااابه گوملي الله يخليك ..
ادين تسحب بيه واني مجلبه بالتابوت ماريد اعوفه .. اصووات هواي صايح وبجي .. ياناس اريد ابويه .. ربي رجعلي ابويه ..
فقدت ماكدرت ابقى بوعيي بعد ..
حسيت روحي انحضنت شميت الريحه .. ريحه عمو عبد الهادي من ريحه ابويه ..امنت وحسيت روحي استسلمت ثگل جسمي ع عمي لان اني ذبيت حيلي عليه ماكدرت اوگف ع رجليه محسيتهن يكدرن يحملني ..
جنت بين الوعي واللاوعي فززني صوت عمي صاح بأذني .. مقداااام بويه ..
فتحت عيوني .. شفت ديلر اجاني اخذني من عمي شالني ..
غمضت عيوني بعد محسيت بشي ..
