مهمة حب ( الجزء الثاني من رحم للإيجار) للكاتبه ريحانه الجنه

٣٨

همس باست ايده بحب: فاهمة يا ملك قلبي. مممكن بقي حبيبي يرجعني البيت . عايزة اشبع من بيتي واوضتي. بكرة اقعد في المستشفي لحد ما ازهق. رجعني بيتي .

رعد هز راسه وقام وقومها ومشيوا ورجعها البيت.
......................................
في مراسي حمزة وفتون كانوا بيغنوا كل ليلة في حفلاتهم واوقات كانت بتجمعهم اغنية واحدة . كانوا بيغنوها مع بعض ولبعض. فتون كانت خلاص قلبها مش متحمل يبعد عن حمزة اكتر من كدة. كانت جواها حاجة بتقولها انسي وسامحي. هو يمكن غلط بس كفاية حبه واهتمامه وندمه . بس حمزة كان جنونه وغيرته بتزيد كل يوم لوجود غانم . غانم بيمتلك شركة انتاج. وكان فيه تعامل بينه وبين حمزة . بس حمزة اختلف معاه وانفصل عنه. غانم سمع عن فتون وعن صوتها وجمالها وكان موجود هناك بيحضر حفلات لمغنين كتيير. واتعرف علي فتون وكان دايما يتعمد يظهر اعجابه بيها وبصوتها وموهبتها وكمان بجمالها وانوثتها . وفي وجود حمزة. وعرض كمان علي فتون انه ينتجلها البوم وحمزة قبل مايرفض. هي سبقت ووعدته تفكر . حمزة غار وحزن وبدأ يكون متعصب طول الوقت وبالاخص في وجود غانم. وفتون كانت اوقات بتكون سعيدة بغيرة حمزة عليها . وبتتعمد تتكلم مع غانم قصاده وتثير جنونه . وفي ليلة كانت حفلة وحمزة هيغني . وصادف كمان وجود شهاب وتمارا وطبعاااا هما علي معرفة بحمزة وفتون مبدأيا في يوم خطوبتهم . وكمان بسبب جواز چنا ومروان.

حمزة كان مجهز اغاني معينة وقبل ما يطلع علي الاستيدچ. قابله ايمن صاحبه في الفرقة.

ايمن : جاهز يا فنان.

حمزة كانت عينه علي فتون اللي واقفة مع غانم. وبيتكلموا ويضحكوا... ومش مركز مع ايمن.

ايمن شاف هو نظره متركز فين: كانت واخداك سلمة.

حمزة لفله بعصبية : انت بتقول ايه!  هي مين؟!

ايمن بص لفتون: مراتك. انت كنت سلمة عايزة تطلع علي كتافك. واديها اهي راحت للي هينفعها اكتر وينتجلها البوم.

حمزة بغضب ضرب ايمن لكمة قوية بغيرة.

حمزة بتحذير: اياك تتكلم عن مراتي بالشكل ده تاني انت فاهم. هقطع لسانك.

ايمن: بتضرب صاحب عمرك علشان واحدة ماقدرتش كل اللي عملته علشانها . وباعتك في اول محطة. تقدر تقولي هي بلغتك بقرارها انها تشتغل مع غانم ولا لا وانها اتفقت معاه انه ينتجلها البوم. عندك علم انها مسافرة معاه بكرة القاهرة تمضي العقود. وكمان هيعملها كليب. انطق عارف ولا لا.

حمزة جواااه نااار وغيرة وحزن والم ووجع . مش ممكن تعمل كدة ! مش ممكن تهمشه من حياتها  بالشكل ده. لمجرد انها تعاقبه علي اللي حصل! معقول توجعه كدة! خصوصا انه عرفها كرهه لغانم وغيرته منه. قلبه انجرح واتوجع.

ايمن : ياللا الناس مستنياك والمزيكا هتبدأ.بعدين ابقي راجع نفسك وشوف هتعمل ايه. 

حمزة بحزن انا هبدأ بأغنية تانية ..