مهمة حب ( الجزء الثاني من رحم للإيجار) للكاتبه ريحانه الجنه

٣٤

(((سلسلة عشق الرجال الجزء الثاني من رحم للإيجار)))

((مهمة حب))
((الحلقة الرابعة والثلاثون))

🌹بقلم ريحانة الجنه🌹

في شركة الحديدي.

في مكتب رعد الحديدي.

رعد قاعد مع أكمل وبعد ما أكمل سمع كلام رعد انصدم.

أكمل بدهشة: هو انت جايبني هنا علشان تطلب چنا لمروان! ازاي!!
انت موافق انه يتجوز علي ريما؟!!

رعد بهدوء وثقة: أكيد لا طبعاا مش موافق. بس دي رغبة ريما وانا حتي لو معترض مش  هقدر اكسر قلبها. هي عايزة چنا تخلف من مروان. واظن بنتك موافقة. واتفقت مع ريما ومروان علي كدة.  كمان مروان حكالي عن قصة الحب اللي بينهم ولا انت ماتعرفش!

أكمل بيغلي من الموقف اللي بنته حطته فيه وقصاد رعد بالاخص وبعصبية: لا قالتلي. وقالتلي كمان ان اختك هي اللي طلبت منها تتجوز مروان وتديها ابنها. بس انا بقي مش موافق. انا بنتي مش رخيصة علشان تبقي لعبة في ايد اختك وجوزها. جوزها اللي كنت بعتبره صاحبي وبحبه وبحترمه. جاي النهاردة وعايز يخطف شباب بنتي وياخد حته منها ويديها لختك. اسف ماعنديش بنات للجواز.

رعد اتنهد بهدوء: انا مقدر كل اللي انت فيه وكل اللي بتمر بيه . ومتأكد من حالتك دلوقتي. لاني لو مكانك كنت قتلت بنتي بإيدي ودفتها احسن . بس انا عارف انك بتحب چنا ومش هتقدر تزعلها. وواضح كدة انها حبت مروان بجنون. ومش هتسيبه . لو عايز نصيحة اخ شايف اللي ممكن يحصل. وافق يا أكمل. وافق علشان هي في كل الاحوال هتتجوز مروان رضاك او غصب عنك. وقتها هتخسر من كل اتجاه موقفك كأب وكمان مش هتقدر ترجع وتحن ليها وتوافق. خاليها تيجي منك يا أكمل.

أكمل اتوجع اكتر وحس بإهانة من كلام رعد بس هو عنده حق وبحزن: لو كنت اعرف انها هتزلني كدة وتحط رقبتي تحت سكينة الظروف
كنت خنقتها بإيدي يوم ما اتولدت.

رعد بحزن قام وقعد قصاده : أكمل انا مش غريب عنك. انا رعد اخوك وسندك. اوعي تفتكر ان موقفي اخف منك لا ده اضعاف. انا جوز اختي جاي يعترفلي بحبه لغيرها وعايز يتجوز عليها . اختي الوحيدة  بتندبح قصادي وانا اللي بساعدها كمان. متخيل ده بيعمل فيا ايه!
أكمل اياك تفتكر ان انا في مركز قوة ولا ان ريما هتكون كسبانة . لا! چنا هي الاقوي. بنتك اخدت القلب والعقل. أخدت حب مروان بقلبه . وأخدت احتاجه لطفل بعقله. بنتك الاقوي مش الاضعف. وتأكد اني كنت ممكن امنع الجوازة دي في لمح البصر حتي لو هقتل مروان اقسم بالله ماكنت هرمش. ولا كان هيصعب عليا. اللي مانعني عنه هي ريما. ريما لو مروان راح منها او اتأذي هتموت . وانا مستحيل اتحمل يجراها حاجة. فاهمني يا أكمل .

أكمل اتنهد بحيرة: فاهمك يا رعد . بس قلبي مش مطاوعني صدقني. لو دي بنتك مش كنت تتمني انها تتجوز زي كل البنات شاب من سنها تعيش معاه شبابها وتخلفلك حفيد تفرح بيه. زي ما بناتك اتجوزت وخلفت. تقدر توافق انك تبيع حفيدك يا رعد بسهولة كدة من قبل حتي ما يجي للدنيا! ؟قولي تقدر؟