مهمة حب ( الجزء الثاني من رحم للإيجار) للكاتبه ريحانه الجنه

٣٨

همس ما اتحملتش وبكت بخوف عليه . هي فعلا لو جرالها حاجة رعد هينكسر.

همس بدموع : عارف انا عندي رضي بقضاء ربنا ايا ماكان.وعمري ما هطلب من ربنا اني ماموتش. لا. ده قضاء ويوم محسوب عند ربنا من قبل مااتولد. بس انا لو بتمني من ربنا شئ فأنا بتمني وبدعي انك ما تنكسرش. لاني عارفة ان كسرتك في فقداني. وانا برغم وقتها اني مش هكون معاك بس قلبي واجعني عليك من دلوقتي.

رعد بعصبية : انا عايز افهم انتي ليه بتقولي الكلام ده دلوقتي لييه! انتي تعرفي حاجة عن حالتك ومخبية عليا.

همس : لا والله. انا بس بقولك اللي جوايا. اااانا يمكن حاسة بس اني فيا حاجة بس اديك اهو صممت تيجبني هنا وتعرف كل حاجة.

رعد حضنها بحيرة وخوف هو كمان قلبه مش مرتاح حاسس انها فيها حاجة مش مجرد تعب عابر: لازم تفهمي حاجة مهمة يوم ما يجي الموت وعمرك يخلص هيكون يومي انا كمان . وده مش بمزاجي ولا بمزاجه. انا وقدرك لازم حد فينا ينتصر يا يسيبك ليا يا يخدني معاكي. لكن اعيش من غيرك مستحيل. قلبي مش هيتحمل بعدك . بس كل اللي بطلبه منك. انك تكوني قوية علشاني انا علشان حبيبك رعد.

الباب خبط وهمس بعدت عن رعد . رعد اتنهد وباسها من جبينها واذن للدخول. دخل الدكتور وده يبقي مدير المستشفي .

دكتور نصار متوتر: مساء الخير يا رعد  باشا.

رعد بحزم : مساء النور. خير في اي نتائج!

نصار متردد : احممم. الحقيقة لسة في بعض التحاليل والاشعة ظهرت والباقي طبعااا هياخد وقت.

رعد شاف شكله وتردده وعنيه اللي بتتهرب منه وخايفة تقوله اللي هو جاي يقوله وخايف: مسك ايد همس وباسها برقة وابتسم. حياتي انا دقيقة وراجع ارتاحي شوية وانا مش هتأخر. فرصة اني هنا هتمم علي شوية حاجات في شغل المستشفي.

همس فهماه من نظرة .. من كلمة... هي كمان شافت شكل الدكتور وفهمت ان رعد عايز يتكلم معاه بعيد عنها.

همس ابتسمت بتفهم: اتفضل حبيبي انا متظراك هنا.

خرج رعد مع نصار وراحوا مكتب رعد ومعاهم 3 دكاترة تانين . واتكلموا مع رعد.

رعد كان بيسمعهم وهو بيحبس دموعه ... بيحبس غضبه ... بيحس آلمه. لا مستحيل  اللي بيتكلموا عنها دي مش همسته! مش ممكن تكون هي!

كلهم بيبصوا لبعض بقلق من سكوته وشكله اللي بيغلي. واخيرا اتكلم.

رعد بهدوء: وانتم اتأكدتم من الكلام ده!

نصار: احممم. حضرتك دكتور فاروق ده من اكبر دكاترة الاورام . وهو لما كشف علي مدام همس عرف ان فيه ورم في الثدي . وبعد الاشعة اللي اتعملت كل الشكوك هتبقي يقين. لكن بحكم خبرته اثناء الاشعة . انه خبيث مش حميد. وفي اقرب وقت لازم تعمل عملية .