#كأس_العالم
الفصل الثامن
( خروج الارجنتين كان قمة السعادة رغم اني نكره فرنسا اما خروج البرتغال اعلى اعلى قمة السعادة لاعبين برشلونة والريال المهمين خارج المونديال هذي هي سعادتي )
اما هي من الاخير رغم انه مونديال لكن ماتقدرش تفصل بين برشلونة والريال في حساباتها ورديت على منشورها بتعليق ( تحدي الريال وبرشلونة مش قادرة تكوني حيادية وتحوليهن من المونديال) شوي وردت على تعليقي ( هذا العادي حتى لو خسرت البرازيل تو عندي عادي طالما ميسي وكريستيانو طلعو ) ضحكت على تعليقها وطلعت لامي نهدرز معاها شوي ونشوف بالك ناقصها حاجة من مصاريف عرس خوتي
امي .. وجهك والله القمر
انا وبست على راسها.. سامحيني يا امي والله ضغط المدرسة والامتحانات انتي عارفة
امي .. ربي يعاونك يا ولدي انت وخوتك
انا.. امي بالك مستحقة فلوس
امي.. لا الحمدلله يا احمد الفلوس اللي لميتوهن كفن وزيادة وبعدين خالك وعمتك مبوش يخلوني نقسم معاهم بالنص
انا.. عليش يا امي
امي.. خالك قال ماتجيش تقسمي بالنص ونحن زوز عرسان وانتي عريس واحد وغير هما معارفهم واجد
انا.. خالي هذا سبحان الله ماتقولش اللي رباته هي اللي ربت خوتك
امي.. خالك عمر ماجربش العازة يا ولدي في عمره من يومه عمي محافظ على رزقه وكبره اخرى بينما باتي فرط في رزقه ومادارش بيه عقب لخوتي الا الارض اللي طلعت في التخطيط وجاهم تعويض فيهم كبير كنهدا راه مازالو قاعدين في حوش خالك عمر القديم
انا .. الحاجة الكويسة واللي مستغربها كيف من باب طمعو في قطعة ارض محلاتنا وقطعوك بسببها وكيف عطوك حقك في التعويض
امي .. حقي في التعويض عطوه ليا ايام باتك حي وخالك عمر هو اللي خذاه غصبن عنهم ودسه عنده ولما جاء بيعطيه ليا باتك قاله يشغلهن عنده الواحد مايندريش على الوقت وفعلا تقول باتك حاسس لان بالمدخول اللي يجيني من تشغيل خالك عمر ليهن وايجار المحلين ومعاش باتك التقاعدي ومعاشي قدرت نربيكم ونعيشكم احسن عيشة ولله الحمد
انا.. ربي يخليك ويخليه لنا يارب عمره مافرق بينا وبين ضناه
امي .. تصدق ان عمر واخذ واجد من اطباع باتي وباته لكن الحِن واخذه من باته عمي الله يرحمه كان حنون بكل ويحب العيلة ولمة العيلة
انا.. حتى انتي واخذة حِن عمك الله يرحمه زي خالي عمر هيا خلاص يا امي نحس في روحي بنطفئ بكل تصبحي على جنة
امي .. وانت من اهلها يارب
انا.. اجمعين
وجاء يوم جديد وعديت للمدرسة الحكومية زي العادة ومنها لمدرستنا ولقيت زادا جاية قبلي لان ايمن سابقني وفتح وقبل مانخش حسيت بيها ما انتبهتش ليا فرجعت وبعتت ليها رسالة (مباش قلبك يحن ويرد عليا حتى بكلمة)
وخشيت للمدرسة وسلمت عليها وخشيت للمكتب جاني ردها وحمدت ربي اني داير الرسايل من غير نغمة احتياط لردها في اي وقت وفتحت بلهفة ( وليش انرد على رقم غريب يبعتلي في رسايل اغرب )
بعتت ليها ( مرات الغريب الواحد يلقى الراحة معاه اكثر من القريب وزي مايقولو *تكلم على ما بداخلك لغريب ياخذ همك معاه ويختفي انت تشعر بالراحة لانك تكلمت والغريب يذهب ولن تلتقي به مرة اخرى* )
ردت عليا بعد وقت بسيط كأنها فكرت في الرد ( عندك حق بس انت او انتي تقدر تتحمل اللي نفضفض بيه)
كتبت( انا بالي واااااااسع ومستعد نسمعك لاخر العمر)
ردت عليا( لا مش لدرجة آخر العمر يا غريب)
كتبت( وليش مش غريبة)
ردت( لانك لو مؤنث راه تعاملت بالصوت لكن لانك ذكر تعاملت معي بالرسائل لانك تتوقع عدم ردي عليك)
كتبت( وجهة نظر تحترم)
ردت( بس عرفت الرقم هذا منين )
كتبت( مش انا غريب فخلي معرفتي بالرقم مجهولة ليك افضل )
ردت(ممكن وجهة نظر )
كتبت ( به ماتبيش تقولي ليا سبب حزنك)
ردت ( فراق غالي علي ومازلت ما تقبلت فكرة الفراق)
كتبت( الفراق واللقاء من ربي ولو ربي قرر الفراق نحن مانملكوش الاعتراض لكن طالما انتي متعلقة بيه واجد تقدري تحاولي لاستراجاعه)
واستنيت ردها واستنيت فخطر عليا انشوفها وشوفتها من الشباك لقيتها تمسح في عيونها عرفت روحي عفست بلي بعته ليها وقررت نمشي نغير جو ليها
انا.. السلام عليكم
زادا وهي تحاول تبان عادية.. وعليكم السلام
انا.. شنو حصتك مازالت
زادا.. اه بتتاخر نص ساعة
انا.. كنك نحس فيك مش تمام
زادا.. لا عادي غير مليت شوي
انا .. به كسدتي على النت
زادا.. يدره الكبد معبي بين ناس ادافع على الارجنتين والبرتغال وناس متشمتة في خسارتهم
انا.. وانت شنو موقعك بينهم
زادا وتغيرت ملامح وجهها للاحسن .. انا اكيد من المتشمتين وتصدق مش انشجع في البرازيل لكن تو عندي حتى تخسر عادي
انا.. ليش
زادا.. ماهو لو البرازيل خسرت قدام واحد من الفريقين هذين حيصدعو روسنا بلاعب برشلونة ميسي او الريال كريستيانو فشوف انت النفخ ورغم اني برشلونية لكن مانخبش ميسي بكل ومانحبش انه يكون يلعب في فريق يخسر قدامه البرازيل لكن تو طالما طلعو الحمدلله حتى تخسر البرازيل قدام روسيا او كرواتيا او الارجواي من الفرقان اللي فازو
انا.. منظور صحيح شكلك مشجعة متعصبة
زادا برفعة حاجب.. لا بالعكس لدرجة اني لما نشجع في لفيربول (الدور الانجليزي) او برشلونة( الدوري الاسباني ) او بايرن ميونخ (الدوري الالماني ) او انتر ميلان( الدوري الايطالي ) او غلاطا سراي( الدوري التركي ) ويكون لاعب واحد منهم ضعيف نكون حيادية برايي ولما حد يناقشني نقوله صح لعبهم زفت ونوضح حتى اخطائهم
انا
في اللحظة هذي حسيت زهرة اللي تحكي معاي وعجبتني لقطة رفعت حاجبها اللي خلى منظره يهبل
انا.. ماشاءالله تشجعي في الدوريات كلها شكلك
زادا.. تقدر تقول كنت متابعة وبقوة لكل دوري كروي لدرجة واجد يستغربو اني نتابع في الدوري التركي لكن من مدة معاش نتابع واجد ويا دوب مبارايات الفرق اللي نشجع فيها والباقي بالاخبار والجداول بتاعتهم
انا.. اه بـ.....
زادا.. معليش وقت حصتي جاء
انا.. تفضلي
وفرحت اني غيرت جوها ونسيتها شنو كتبت ليها
وبعتت ليها(معليش اذا كلامي ضايقك آسف)
وطبعا لانها في الحصة عرفت انها مش حترد عليا وهي عطت حصتها وانا خشيت لحصتي ولما طلعت انتبهت لفوني اشعار رسالة وفتحتها بلهفة وكانت رد منها
ردت( لا مازعلتش بس للاسف اللي مفارقني مانقدرش نمشي ليه تحت التراب موجود)
كتبت(الله يرحمه لكن الحي ابقى من الميت )
ردت (عارفة لكن هو حب عمري والفراق صعب اني نتقبله لاني نحس فيه كانه مسافر فترة وبيجي )
انا رغم حسيت بغصة لكن كتبت( بس هو مش حيرضيه انك اديري في روحك هكي)
ردت( عارفة مش بايدي نغرق في روحي في الشغل والخدمة بش ننساه لكن ماقدرتش كل ذكرياتي معاه تعاود في روحها معاي كاني عايشتها تو )
كتبت( حاولي واصري انك تعيشي حياتك حتقدري تعيشي صدقيني)
ردت(بس انا مانبيش حياتي عشان هو مش فيها ولولا اني عارفة ان الانتحار حرام لكنت نهيت حياتي )
وجعتني كلمتها وياسها من الحياة للدرجة هذي
كتبت( بس هو مش حيرضيه وحيضايق لما يحس بيك انك حزينة يقولو ان الموتى يحسو بي احبايهم )
ردت ( انت مدرس هنا في المدرسة )
انصدمت من سؤالها وكيف تجاهلت الرد على كلامي خذيت وقت بيش نجمع رد
وكتبت( اي مدرسة تحكي عليها)
ردت( اصلا انت تحكي معاي كانك تعرفني وتعرف حزني ووجعي )
كتبت( لا شفتك مرة في مدرسة ......... ولحظت وجهك الحزين وسئلت عليك واللي سئلته قالي انك حزينة من فترة طويلة رغم انك كنتي عكس هذا بكل وبعدها حاولت نوصلك وصدقيني ماكانش بالساهل اني نوصل لرقمك هذا)
استنيت ردها لكن معاش ردت عليا ولما طولت عرفت انها خلاص معاش تبي ترد وفرحت بالتقدم اللي صار بيني وبينها
وقررت عشان معاش بنشتتها معاش بنرد عليها في الفيس وبنتابع بس من بعيد ونشوف تلاحظ غيابي او لا خصوصا انها على الفيس تعرف اني احمد سالم
وروحت للحوش لقيت ايمن قدامي لان حصصه كانت قبلي وروح بدري
ايمن .. طولت واجد
انا .. هذا هو
ايمن .. بنقولك حاجة
انا.. شنو فرحني اخيرا نطقت وحكيت مع فريال
ايمن .. كيف عرفت
انا .. عيب يا رفيق
ايمن .. اه كلمتها وطلعت تبادل فيا نفس الشعور
انا بفرحة .. به الحمدلله لان مافيش اصعب من الحب يكون مش متبادل
ايمن .. فعلا اكثر حاجة خفت منها في الاول انها تكون مرتبطة ولما عرفت انها مش مرتبطة فرحت واجد
انا.. بس فرحت انها تبادلك نفس المشاعر مافيش زيها فرحة
ايمن .. فعلا واصلا اللي شجعني اني نسئلها على شعورها اتجاهي نظرة عيونها ناحيتي
انا.. اوووه بدينا نفهمو في النظرات
ايمن .. اكيد لما تعجب بالشخص تبدا مركز معاه في كل شئ
انا باستغراب .. معجب
ايمن .. ها امنا تسحابه حب لا يا احمد مافيش حب يجي بالسرعة هذي وتصدق لو حتى هيا قالتلي انها تحبني كنت سيبتها
انا.. ليش
ايمن .. لان نحن مالينا شئ نعرفو بعض صح انا نعرف فريال من زمان بحكم انها كانت بنت جيرانا لكن كانت انطوائية وماتخالطش في حد بكل الا زهرة بنت عمها بس
انا.. بس برضو ليش مايكونش حب مش اعجاب زي ماتقول
ايمن .. الحب اكبر يا احمد يجي مع التعامل والعشرة مش من اول مرة
انا.. لا غالط يا ايمن غير انت تاخذ في الامور بعملية اكثر لكن لو تخلي الامور لقلبك حتصدق انك حبيتها من الاول لان بمجرد ماتلتفت ليها وتحس بنبض قلبك يزيد بمجرد ماتشوفها قدامك والله لما تبدا تحكي كان تلقاها ماتسكتش غير ضحكتها مرات عادية لكن انت تحسها انها مميزة وساحرة
ايمن .. احمد انت توصف في اللي نحس بيه مع فريال بالحرف
انا.. مش قلت ليك غير انت تاخذ في الامور بعملية واجدة اكثر من اللزوم احيانا الحب مرات يجي في ثواني واستمراره او فشله يعتمد على الشخص اللي حبيته
ايمن .. عندك حق لكن تعرف مايهمش المسمى حب او اعجاب المهم اني نبيها ونبي نكمل حياتي معاها
انا .. وهذا المطلوب اثباته امتى بتمشي تخطب
ايمن .. مازال
انا.. فيش تستنى طالما عرفت اللي تبيه انها مش مرتبطة ومعاها تبادل فيك نفس المشاعر
ايمن .. نستنى فيك
انا.. كيف
ايمن .. زادا
انا.. شنو
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة
ČTEŠ
كأس العالم
Fanfikceعندما يصبح الوفاء عملة نادرة نبحث عنها في كل مكان ماذا نفعل عندما نجده عند شخص ولكن للاسف هذا الشخص ليس لنا رواية باللهجة الليبية كتابة صديقتي حياة احمد ( مكتملة)
